Kadakayo Padak a Katulongan, da Linda Curley Christensen ken Michael T. Malm

Pebrero 14

Ania ti Priesthood?

Doktrina ken Katulagan 12–13; Joseph Smith—Pakasaritaan 1:66–75

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag a paglilinnawaganyo):

• Ti korum wenno klasetayo. Ania dagiti aktibidad nga adda kadatayo itay nabiit? Naballigian kadi dagitoy? Ania ti naaramid a nasayaat, ken kasano a mapasayaattayo pay dagitoy?

• Dagiti pagrebbengan wenno responsibilidadtayo. Asino ti agkasapulan iti serbisiotayo? Kasano a makatulongtayo kadakuada?

• Ti biagtayo. Ania dagiti panggep a tun-oyen a kayattayo nga aramiden a saggaysa? Ania dagiti padas a maibinglaytayo? Ania dagiti bendision a naawattayo?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Bayat ti panangbasam maipapan iti pannakaisubli ti Aaronic Priesthood iti Doktrina ken Katulagan 13, padasem nga ammuen dagiti kapanunotan dagiti sursuruam. Maawatanda kadi ti bileg ti priesthood iti biagda? Kasano a timmulong kenka nga umawat iti bileg ti Mangisalakan dagiti ordinansa iti priesthood kas iti panagbuniag ken sakramento? Panunotem dagiti padas a maibinglaymo. Tapno isaganam ti bagim a mangisuro maipapan iti priesthood, ibilangmo ti panagadal kadagiti nasantuan a kasuratan a naisingasing iti balabala iti daytoy a lawas iti Umaykayo, Sumurot Kaniak—Para Kadagiti Indibidual ken Pamilia ken “Priesthood” iti Pangiwanwan iti Nasantuan a Kasuratan (scriptures.ChurchofJesusChrist.org).

Tulongannatayo dagiti nasantuan a kasuratan a makaawat no kasano a bendisionan ti priesthood dagiti biagtayo.

Aggigiddan a Masursuruan

Tapno mangirugi iti panaglilinnawag maipapan iti priesthood, mabalinmo nga awisen dagiti miembro ti korum wenno klase tapno mangibinglay no ania ti ammoda maipapan iti pannakaisubli ti Aaronic Priesthood, agraman no ania ti nabasada iti daytoy a lawas iti Doktrina ken Katulagan 13 ken Joseph Smith—Pakasaritaan 1:66–75. Mabalinmo pay nga ipakita ti maysa a ladawan a mangiladawan iti pannakaisubli ti Aaronic Priesthood (kas iti Libro ti Arte ti Ebanghelio [2009], no. 93) ket awisem dagiti miembro ti korum wenno klase tapno mangibinglay no ania ti ammoda maipapan iti daytoy a pasamak. Apay nga agyamantayo iti pannakaisubli ti priesthood? Dagiti sumaganad nga aktibidad ti makatulong kadagiti sursuruam tapno nasaysayaat ti pannakaawatda no ania ti priesthood ken no kasano a mabendisionantayo babaen iti daytoy.

• Kasano a mailawlawag dagiti miembro ti korum wenno klase no ania ti priesthood iti maysa a tao a di pay pulos nakangngeg idi maipapan iti daytoy? Tapno matulongan ida, mabalinmo nga ilista iti pisarra ti sumagmamano a saludsod a mabalin a damagen dagiti tao maipapan iti priesthood, kas iti Ania ti priesthood? Kasano nga awaten ti maysa a tao ti priesthood? Kasano ti nasken a panagtignay ti maysa nga addaan iti priesthood? Ania ti aramiden dagiti addaan iti priesthood? Awisem dagiti sursuruam a mangsukisok kadagiti sungbat nga us-usaren dagiti nasantuan a kasuratan ken dadduma pay a resources a masarakan iti “Dagiti Pangsuporta a Resources” ket isurat dagiti sungbatda iti pisarra. Mabalinmo a dawaten nga ibinglayda dagiti bendision a simmangbay iti biagda gapu iti priesthood. Mabalinmo pay nga ipabuya ken ilawlawag ti video “How the Priesthood Works” (ChurchofJesusChrist.org; kitaen met iti Dale G. Renlund, “The Priesthood and the Savior’s Atoning Power,” Liahona, Nob. 2017, 64–67).

• No mangisuroka kadagiti addaan iti Aaronic Priesthood, mabalinda a mairanud manipud iti panangrebyu iti mensahe ni Brother Douglas D. Holmes “What Every Aaronic Priesthood Holder Needs to Understand” (Liahona, Mayo 2018, 50–53). Mabalinmo a dutokan ti tunggal miembro ti korum tapno irebyu ti umuna a sumagmamano a parapo ti mensahe wenno maysa kadagiti dadduma pay nga uppat a benneg. Awisem ti tunggal tao a mangsapul iti maysa a banag a mariknana a nasken a maawatan ti tunggal addaan iti Aaronic Priesthood. Mangtedka kenkuana iti gundaway a mangibinglay no ania ti nasursurona ken mangilawlawag no apay a pinilina dayta a pannursuro.

• No mangisuroka kadagiti agtutubo a babbai, mabalinmo nga ibinglay ti mensahe ni Presidente Russell M. Nelson “Spiritual Treasures,” a maiturong kadakuada (Liahona, Nob. 2019, 76–79). Mabalinmo nga idawat kadagiti miembro ti klase a mangsukisok iti mensahena nga agsapsapul iti maysa a banag a mabalinda nga aramiden nga ad-adda a naan-anay nga “umasideg iti bileg ti Mangisalakan” iti biagda (panid 77). Ania ti insuro ni Presidente Nelson maipapan iti no kasano a magun-odtayo ti bileg ti priesthood? Kasano a mabendisionannatayo ti bileg ti priesthood? Allukoyem dagiti agtutubo a babbai a mangpanunot no kasano nga agtignaydanto iti daytoy nga awis manipud ken ni Presidente Nelson: “Ipakaasik kadakayo nga adalenyo a sikakararag ti amin dagiti kinapudno a masarakanyo maipapan iti bileg ti priesthood” (panid 79).

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Doktrina ken Katulagan 84:17–22; 107:1–5 (Ti Priesthood ti bileg ken turay ti Dios)

• Hebreo 5:4; Pagannurotan ti Pammati 1:5 (Inawagan ti Dios dagiti addaan iti priesthood ken inordenan ti maysa nga addaan iti turay)

• Doktrina ken Katulagan 121:34–46 (Maipagna laeng ti bileg ken turay ti priesthood kadagiti pagbatayan ti kinalinteg)

• Mateo 3:1–6; 28:16–19; Juan 15:16; Doktrina ken Katulagan 12:3–4 (Ikasaba dagiti maikari a lallaki ken babbai ti ebanghelio)

• Dagiti Aramid 3:1–8; Santiago 5:14–15 (Mangted dagiti addaan iti priesthood kadagiti bendision a mangagas kadagiti masaksakit ken agsagsagaba)

• 3 Nephi 11:21–22; 18:1–5; Doktrina ken Katulagan 107:20 (Dagiti addaan iti priesthood ti mangannong kadagiti ordinansa)

• Doktrina ken Katulagan 65:2; 107:18–21 (Tumulong dagiti addaan iti priesthood a mangituray iti Simbaan)

• “Aaronic Priesthood,” “Melchizedek Priesthood,” “Priesthood,” iti Napudno iti Pammati (2004), 3–4, 101–2, 124–28

Panangisuro iti Wagas ti Mangisalakan

Insuro ti Mangisalakan dagiti disipulona nga umasideg kadagiti nasantuan a kasuratan para kadagiti sungbat dagiti saludsod ken tapno umawat iti naespirituan a pigsa. Kasano a maallukoymo dagiti sursuruam nga umasideg kadagiti nasantuan a kasuratan a mangsapul iti sungbat kadagiti saludsod ken karitda? (Kitaen iti Panangisuro iti Wagas ti Mangisalakan [2016], 30.)