feiā ’āpī tamāroa e fāri’i ra i te hō’ē tauahi

26 nō Tītema

Nō te aha e mea faufa’a te mau ’utuāfare ?

« Te ’Utuāfare : E Poro’i i tō te Ao nei »

’ītona tāu’aparau ʼāmui

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e e fa’anaho i te mau rāve’a nō te ’ohipa i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau tumu parau e ’āparau) :

• Tā tātou pupu ’aore rā piha: ’O vai te ta’ata ’āpī i roto i tā tātou pāroita, ’e nāhea tātou i te tauturu ia rātou ’ia ’ite rātou ē, tē fāri’i-pōpou-hia nei rātou ? E aha tā tātou e rave ra nō te ha’afaufa’a i tō tātou taime i roto i te mau rurura’a pupu autahu’ara’a ’aore rā te mau rurura’a piha tamāhine ?

• Tā tātou mau ’ohipa ’aore rā mau hōpoi’a. E aha te tahi o tā tātou mau ’ohipa ’e te mau hōpoi’a ’ei feiā ’āpī tamāroa ’e ’ei feiā ’āpī tamāhine ? Nāhea tātou e nehenehe ai e rave maita’i a’e i te reira ?

• Tō tātou orara’a. E aha tā tātou e rave ra nō te riro rahi atu ā mai ia Iesu Mesia te huru, ’e nō te fāri’i i tōna mana i roto i tō tātou orara’a ? E aha tā tātou e rave nō te tauturu i tō tātou ’utuāfare ’ia haere mai iāna ra ?

I te hope’a o te ha’api’ira’a, mai te mea e tano, e rave i te mau mea i muri nei :

• ’A fa’a’ite pāpū nō ni’a i te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

’ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē feiā fa’atere pa’ari ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

Mea ta’a ’ē te mau ’utuāfare ato’a, ’e ’aita e ’utuāfare e mea maita’i hope roa. Terā rā, ’ua fāri’i tātou pā’āto’a i te mau Metua i te ao ra maita’i hope roa, tei hina’aro ’ia fāri’i tātou i te ha’amaita’ira’a ’ia ora ma te ’oa’oa ’ei mau ’utuāfare mure ’ore. Nō te tauturu ia tātou ’ia fa’atupu i te reira, ’ua fa’auru te Atua i te mau peropheta ’e te mau ’āpōsetolo ’ia parau mai i te mau parau mau mure ’ore i roto i Te ’Utuāfare : E Poro’i i tō te Ao nei » (ChurchofJesusChrist.org).

’A fa’aineine ai ’outou nō te ha’api’i i te faufa’a rahi o te mau ’utuāfare, ’a feruri nō te aha e mea faufa’a tō ’outou ’utuāfare nō ’outou. E aha te ti’ara’a tā Iesu Mesia i rave i roto i te tauturura’a i tō ’outou ’utuāfare ’ia ’ite mai i te ’oa’oa ? ’A fa’aineine ai ’outou nō te ha’api’i, e nehenehe ’outou e tuatāpapa i « Te ’Utuāfare : E Poro’i i tō te Ao nei » (ChurchofJesusChrist.org), «  ’Utuāfare  » i roto Nō te Puai o te Feiā ’Āpī ([2011], 14–15), ’e te parau poro’i a Elder D. Todd Christofferson « Nō te aha te fa’aipoipora’a, nō te aha te ’utuāfare » (Liahona, Mē 2015, 50–53). ’Ia mana’o ’outou, e aha te mau parau tumu nō roto mai i teie mau rāve’a tauturu, e mea faufa’a a’e nō te feiā tā ’outou e ha’api’i ?

’utuāfare e haere ra nā ni’a i te mou’a

’Ua riro te ’utuāfare ’ei pū mau nō te ’ōpuara’a a te Metua i te Ao ra nō tātou.

Ha’api’i-’āmui-ra’a mai

Nō te ha’amata i te hō’ē tāu’ara’a parau nō ni’a i te faufa’a o te mau ’utuāfare, e nehenehe ’outou e ui i te pupu ’aore rā, i te piha, e aha tā rātou i ha’api’i mai nō ni’a i te ’oa’oa i roto i te orara’a ’utuāfare ’a tai’o ai rātou i Te ’Utuāfare : E Poro‘i i tō te Ao nei » i te fare. E aha tā rātou i ’apo mai ’o te tauturu ia rātou ’ia ha’apūai i tō rātou ’utuāfare ? I muri iho, ’a mā’iti hō’ē ’aore rā hau atu o te mau ’ohipara’a i raro nei nō te tauturu i te mau melo o te pupu ’aore rā o te piha ’ia māramarama hau atu nō te aha e mea faufa’a rahi te mau ’utuāfare i roto i te ’ōpuara’a a te Metua i te Ao ra.

• Tē turu nei te mau pāpa’ira’a mo’a i roto « Mau rāve’a tauturu pāturu » i te mau parau mau fa’auru i roto i te poro’i o te ’utuāfare. Penei a’e e nehenehe ’outou e ani i te melo tāta’itahi o te pupu ’aore rā, o te piha ’ia tai’o mai hō’ē o teie mau pāpa’ira’a mo’a ’e i muri iho ’ia ’imi mai i te poro’i o te ’utuāfare nō te ’ite mai i te hō’ē tuha’a parau e tū’ati i ni’a i tāna ’īrava. E nehenehe te melo tāta’itahi o te pupu ’aore rā, o te piha ’ia fa’a’ite mai i te mea tei ’itehia mai iāna.

• E arata’i te orara’a i te mau ha’api’ira’a a Iesu Mesia i te ’oa’oa mau ’e te vai tāmau i roto i tō tātou ’utuāfare. Nō te tauturu i te mau melo o te pupu ’e o te piha ’ia hāro’aro’a i te reira, e ani i te ta’ata tāta’itahi ’ia mā’iti i te hō’ē huru Mesia (hi’o « Nāhea vau ’ia fa’ahotu i te mau huru Mesia ? » pene 6 i roto ’Ia Poro Haere i tā’u nei ’Evanelia [2019], 121–29) ’e i muri iho e ’ite mai i te hō’ē pāpa’ira’a mo’a ’aore rā, te hō’ē fa’ahitira’a parau a te mau peropheta o te ha’api’i nei nō ni’a i te reira huru. ’A fa’a’ite mai ai te mau melo o te pupu ’e o te piha i te mea tei ’itehia ia rātou, e nehenehe rātou e pāhono i te hō’ē ’aore i te tahi o te mau uira’a : E aha tā te ora-hope-ra’a i teie huru Mesia e fa’atupu mai i ni’a i tō’u ’utuāfare ? E aha tā’u i ha’api’i mai nā roto mai i te hi’ora’a o te Fa’aora nō ni’a e nāhea i te fa’a’ohipa i teie huru i roto i tō’u ’utuāfare ?

• ’Ua ha’api’i mai te peresideni Russell M. Nelson : « Tē fa’arahi nei te ’enemi i tāna mau ’arora’a i ni’a i te fa’aro’o ’e i ni’a ia tātou ’e i tō tātou mau ’utuāfare i te hō’ē fāito rahi » («Te mau parau ’ōmuara’a », Liahona, Novema 2018, 7). Nō te tauturu i te mau melo o te pupu ’aore rā, o te piha ’ia pāruru ia rātou i teie mau ’arora’a, e nehenehe ’outou e ani ia rātou ’ia tāpura mai i ni’a i te tāpura ’ere’ere e rave rahi ravera’a ’e te mau peu tā Sātane e fa’a’ati ani nei nō te ha’aparuparu i te mau ’utuāfare. Nō te aha teie mau ’ohipa e riro ai ’ei mea ’ino nō te mau ’utuāfare ? I muri iho, e nehenehe te mau melo o te pupu ’aore rā, o te piha e ’imi i te hitu o te paratarāfa o te poro’i o te ’utuāfare nō te mau ravera’a ’e te mau peu e nehenehe e pato’i i te mau ’arora’a a Sātane. Nāhea tātou i te ani i te tauturu i te Fa’aora nō te fa’ahotu i teie mau ravera’a ’e mau peu ? ’Ei tuha’a nō teie ’āparaura’a, e fa’a’ite au i te video « Porora’a » (ChurchofJesusChrist.org). E aha tā tātou i ha’api’i mai e nāhea i te pārurura’a i tō tātou ’utuāfare i te fa’aurura’a a Sātane ?

’A rave ma te fa’aro’o

E fa’aitoito i te mau melo o te pupu autahu’ara’a ’aore rā o te piha tamāhine ’ia feruri ’e ’ia pāpa’i e aha te mea tā rātou e rave nō te ’ohipa i ni’a i te mau fa’a’itera’a tā rātou i fāri’i i teie mahana. Nāhea te ha’api’ira’a nō teie mahana e tū’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e hōro’a mai i tō rātou mau mana’o.

Mau rāve’a tauturu pāturu

• Roma 8:16–17Hebera 12:9 (E mau tamari’i tātou nā te Metua i te Ao ra)

• Genese 2:18, 24 ;Te Parau Ha’api’ira’a ’e te mau Parau Fafau 131:1–4 (Nā te Atua i fa’aue i te fa’aipoipora’a)

• Mosia 4:14–15 ;Te Parau Ha’api’ira’a ’e te mau Parau Fafau 68:25–29 ; 93:40–50(Nā te mau metua e ha’api’i i tā rātou mau tamari’i i te ’evanelia)

• L. Tom Perry, « Nō te aha e mea faufa’a te fa’aipoipora’a ’e te ’utuāfare—I te mau vāhi ato’a i te ao nei », Liahona, Mē 2015, 39–42

• Mau video « E nehenehe te ’utuāfare e vai ’āmui e a muri noa atu », « ’E fa’anahora’a hanahana te fare » ChurchofJesusChrist.org

Ha’api’ira’a mai tā te Fa’aora

’Ua ani te Fa’aora i tāna mau pipi ’ia fa’a’ite pāpū, ’e ’a nā reira ai rātou, ’ua ha’aputapū te Vārua i tō rātou ’ā’au. ’A ha’api’i ai ’outou, ’a ani i te mau melo o te pupu ’e o te piha ’ia fa’a’ite mai i tō rātou ’itera’a pāpū nō ni’a i te faufa’a o te ’utuāfare i roto i te ’ōpuara’a a te Atua.