12 nō Tītema

Nāhea e ’itehia ai iā’u te mau pāhonora’a i tā’u mau uira’a ?

Te mau Hīro’a Fa’aro’o ’e Te mau Fa’a’itera’a mana 1 ’e te 2

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e e fa’anaho i te mau rāve’a nō te fa’a’ohipa i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau tumu parau e ’āparau) :

• Tā tātou pupu ’aore rā piha. E aha te mau ’ohipara’a tā tātou i fa’atupu a’enei ? ’Ua manuia ānei te reira ? E aha te mau mea i tere maita’i, ’e e aha te nehenehe e ha’amaita’i atu ?

• Tā tātou mau ’ohipa ’aore rā mau hōpoi’a. ’O vai tē hina’aro nei i tā tātou tāvinira’a ? Nāhea tātou e nehenehe ai e tauturu ia rātou ?

• Tō tātou orara’a. E aha te mau fā tā tātou e ’ohipa tāta’itahi nei ? E aha te mau ’ohipa i tupu ’o tā tātou e nehenehe e fa’a’ite ? E aha te mau ha’amaita’ira’a tā tātou i fāri’i ?

I te hope’a o te ha’api’ira’a, mai te mea e tano, e rave i te mau mea i muri nei :

• ’A fa’a’ite pāpū nō ni’a i te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

E ’ohipa mātarohia tē vai ra te mau uira’a. Tē uiui nei tātou nō ni’a i tō tātou ananahi ’e nō ni’a i te ao e hā’ati nei ia tātou. E uira’a ato’a tā tātou nō ni’a i te Atua ’e i tāna ’ōpuara’a nō tātou. ’Ia tai’o ’outou i te mau Fa’a’itera’a Mana 1 ’e te 2 i teie hepetoma, ’a hi’o i te mea tā te mau peropheta ’e te mau ’āpōsetolo i rave nō te ’ite mai i te mau pāhonora’a i tā rātou mau uira’a (te arata’i ha’api’ira’a nō teie hepetoma i roto Mai, pe’e mai—nō te ta’ata hō’ē ’e te ’utuāfare). E aha te ti’ara’a tei ravehia nō te ’imira’a i te mau pāhonora’a i te mau uira’a i roto i tā ’outou ha’api’ira’a mai i te ’evanelia ? E aha tā ’outou e nehenehe e rave nō te fa’aitoito i te mau melo o tā ’outou pupu ’aore rā, piha, ’ia ’imi i te mau pāhonora’a i tā rātou mau uira’a nō te ’evanelia nā roto i te ha’apa’o ? ’A fa’aineine ai ’outou nō te ha’api’i, e nehenehe ’outou e hi’o fa’ahou Te Parau Ha’api’ira’a ’e te mau Parau Fafau 6:14–15 ; 9:7–9 ’e « Te fāri’ira’a i te māramarama pae vārua » i roto Te parau niu o te tāmaura’a i te ha’api’ira’a tumu ([2018], 3–5).

E nehenehe tō tātou ’itera’a pāpū e ha’apūaihia ’a ’imi ai tātou i te mau pāhonora’a i tā tātou mau uira’a ma te ha’apa’o.

Ha’api’i-’āmui-ra’a mai

’A tuatāpapa ai te mau melo o tā ’outou pupu ’aore rā, piha te mau Fa’a’itera’a Mana 1 ’e te 2 i teie hepetoma, e nehenehe e ’itehia mai ia rātou te mau parau tumu nō ni’a i te fāri’ira’a i te mau pāhonora’a i te mau uira’a nō ni’a i te ’evanelia. ’A hōro’a ia rātou te tahi tau minuti nō te hi’o fa’ahou i te mau fa’a’itera’a ’e ’ia fa’a’ite mai e aha tā rātou i ’apo mai nō ni’a i te fāri’ira’a i te heheura’a. E nehenehe te mau ’ohipara’a i muri nei e tauturu i te feiā tā ’outou e ha’api’i nei ’ia hāro’aro’a maita’i a’e nāhea ’ia ’ite mai i te mau pāhonora’a i tā rātou mau uira’a nō te ’evanelia.

• Tē ha’api’i nei te mau pāpa’ira’a mo’a i muri nei i te mau parau tumu nō ni’a i te uira’a i te mau uira’a ’e te fāri’ira’a i te mau pāhonora’a : Mataio 7:7 ; Te Parau Ha’api’ira’a ’e te mau Parau Fafau 6:14–15 ; 9:7–9. E nehenehe tā ’outou pupu ’aore rā, piha e tai’o ’āmui i teie mau tuha’a ’īrava ’e ’ia tāpura mai i ni’a i te tāpura ’ere’ere i te mau parau tumu tei ’itehia mai e rātou. Nō te aha ’aita te Metua i te ao ra e pāhono hope roa mai ’aore rā, i taua iho taime ra, i tā tātou mau uira’a i te mau taime ato’a ? Nāhea tātou i te fa’a’ite tāmau noa i tō tātou fa’aro’o ’a tīa’i ai tātou i te mau pāhonora’a ? (Hi’o Te Parau Ha’api’ira’a ’e te mau Parau Fafau 19:23 ; 78:18). ’A feruri e fa’a’ite atu i te hō’ē ’itera’a i te taime ’a hiti mai ai te hō’ē uira’a nō ni’a i te ’evanelia ’e ’a fāri’i ai ’outou i te hō’ē pāhonora’a. E ani i te mau melo o te pupu ’aore rā, o te piha, ’ia fa’a’ite mai i te hō’ē ā ’itera’a mai te reira.

• E nehenehe ānei te mau melo o tā ’outou pupu ’aore rā, piha, e feruri i te mau ta’ata i roto i te mau pāpa’ira’a mo’a tei ui i te mau uira’a tei arata’i atu i te heheura’a ? (Mai te mea e hina’arohia, e fa’ahaere atu ia rātou i roto i te mau pāpa’ira’a mo’a i raro a’e « Mau rāve’a tauturu pāturu ».) E nehenehe te mau melo o te pupu ’aore rā, o te piha, e tai’o nō ni’a i teie mau ta’ata i roto i te mau pāpa’ira’a mo’a, ’e ’a ’imi mai i te mau uira’a tā rātou i ui, nāhea rātou i te ’imira’a i te mau pāhonora’a, ’e te mau pāhonora’a tā rātou i fāri’i. E aha tā tātou i ʼapo mai i roto i teie mau hi‘ora’a ? Nāhea tātou ’ia ha’a i te mea tā tātou i ha’api’i mai, ’a ’imi ai tātou i te mau pāhonora’a i tā tātou mau uira’a ? ’Ei tuha’a nō teie ’ohipara’a, e nehenehe ato’a ’outou e fa’a’ite « Nāhea e nehenehe ai iā’u ’ia ora maita’i a’e i te mau ture o te ’evanelia ? » i roto Mata ’e mata ’e o Elder ’e te tuahine Bednar » ([ha’apūrorora’a nā te feiā ’āpī ’ati ti’a i te ao nei], 12 nō Mē 2015, FacetoFace.ChurchofJesusChrist.org).

• Tē hōro’a nei te parau poro’i a Elder W. Mark Bassett « Nō tō tātou tupura’a pae vārua ’e te ha’api’ira’a mai » (Liahona, Novema 2016, 52–54) i te mau mana’o tauturu nō ni’a nāhea te ’imira’a i te mau pāhonora’a i te mau uira’a i te pae vārua. E nehenehe tā ’outou pupu ’aore ra, piha e tai’o ’āmui i nā paratarāfa e maha o tāna parau poro’i tei ha’amata « Nō te hāro’aro’a i te mau parau ’aro a te Atua ». I muri iho e ani i te mau melo o te pupu ’aore rā, o te piha, ’ia tai’o 1 Nephi 2:16, 19–20 ; 10:17–19 ; 11:1 ’e e ’imi e aha tā Nephi i rave nō te ’imi i te mau pāhonora’a i tāna mau uira’a. E ani i te mau melo o te pupu ’aore rā, o te piha, ’ia feruri e aha tā rātou e rave nō te pe’e i te hi’ora’a o Nephi ’ia hiti ana’e mai tā rātou mau uira’a nō ni’a i te ’evanelia.

• E nehenehe te ’ā’amu i roto i te Mareko 9:14–27 e tauturu i te mau melo o te pupu ’aore rā, o te piha, ’ia ’aro ana’e rātou i roto i tā rātou mau uira’a ’aore rā, ’ia tapitapi ana’e te mana’o. E ani nā mua roa i te hō’ē melo nō tā ’outou pupu ’aore rā, piha ’ia haere mai ma te ineine e fa’a’ite i te ’ā’amu. I muri iho, e vāhi i tā ’outou pupu ’aore rā, piha, i roto e toru pupu, ’e e fa’aue i te pupu tāta’itahi ’ia tuatāpapa i te hō’ē o nā fa’ahitira’a parau e toru tā Elder Jeffrey R. Holland i parau nō ni’a i te ’ā’amu i roto i tāna parau poro’i E te Fatu, tē ti’aturi nei au » (Liahona, Mē 2013, 93–95). Nāhea tātou i te fa’a’ohipa i te parau a Elder Holland ’ia hiti ana’e mai tā tātou ’aore rā, tā te tahi atu ta’ata o tā tātou i mātau mau uira’a ’aore rā, mau mana’o tapitapi, nō ni’a i te ’evanelia ?

’A rave ma te fa’aro’o

E fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te ’ohipa i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tū’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e fa’a’ite mai i tō rātou mau mana’o.

Mau rāve’a tauturu pāturu

• Enosa 1:1–8 ; Alama 5:43–47 ; 40:3–5 ; Etera 2:18–23 ; Te Parau Ha’api’ira’a ’e te mau Parau Fafau 138:1–4, 11 ; Iosepha Semita—’Ā’amu 1:10–18 (Te mau hi’ora’a o te mau ta’ata e ’imi ra i te mau pāhonora’a i tā rātou mau uira’a)

• James B. Martino, « Fāriu atu iāna ra, i reira te pāhonora’a e tae mai ai », Liahona, Novema 2015, 58–60

• Te mau tumu parau nō te ’evanelia, « Te pāhonora’a i te mau uira’a o te ’evanelia », topics.ChurchofJesusChrist.org

Ha’api’ira’a mai tā te Fa’aora

’Ua fa’aitoito te Fa’aora i te feiā tāna i ha’api’i ’ia fa’a’ohipa i te mau pāpa’ira’a mo’a nō te ’ite mai i te mau pāhonora’a i tā rātou iho mau uira’a. Nāhea te feiā tā ’outou e ha’api’i nei i te ha’amaita’ihia ’a ha’api’i mai ai rātou nāhea ’ia ’ite mai i te mau pāhonora’a i tā rātou mau uira’a ?