’īripiti pu’upu’u ma te hōho’a rima ’ū rau

I te mau melo ti’amā ato’a, nā Emma Allebes

6–12 nō Tītema

Te mau Hīro’a Fa’aro’o ’e te mau Fa’a’itera’a Mana 1 ’e te 2

« Tē ti’aturi nei mātou »

’A tuatāpapa ai ’outou i te mau Hīro’a fa’aro’o ’e te mau Fa’a’itera’a Mana 1 ’e te 2, ’a feruri i tā te reira i fa’atupu i ni’a i te ’Ēkālesia. E aha tā ’outou i tāpe’a mai nō ni’a i te mau parau mau tā te reira e ha’api’i nei ?

Pāpa’i i te mau mana’o e tae mai

I roto i nā 200 matahiti, mai te taime mai ā o te ’Ōrama Mātāmua a Iosepha Semita, ’ua tāmau noa te Atua i te hōro’a i « te heheura’a nā ni’a i te heheura’a, te ’ite ho’i nā ni’a i te ’ite » i te feiā fa’atere o tāna ’Ēkālesia (Te Parau Ha’api’ira’a ’e te mau Parau Fafau 42:61). I te tahi mau taime, e arata’i teie heheura’a i te feiā fa’atere o te ’Ēkālesia ’ia taui i te tahi mau ture ’e mau ravera’a nō te ’Ēkālesia, « mai te au ho’i i tō te Fatu ra hina’aro, mai te fa’aau i tōna ra mau aroha i te huru o te mau tamari’i a te ta’ata nei » Te Parau Ha’api’ira’a ’e te mau Parau Fafau 46:15). ’Ua riro te mau Fa’a’itera’a Mana 1 ’e te 2 i terā huru heheura’a—te hō’ē tei fa’a’ore i te ravera’a i te fa’aipoipora’a i te vahine rau, ’e te tahi tei ha’amatara i te mau ha’amaita’ira’a o te autahu’ara’a, tae noa atu te mau ha’ama’ita’ira’a o te hiero, i te mau nūna’a ta’ata ato’a. Teie mau huru tauira’a, ’o te mea ïa i roto i te parau nō te « ’ēkālesia parauti’a ana’e ’e te mea ora » (Te Parau Ha’api’ira’a ’e te mau Parau Fafau 1:30), ’e te peropheta mau ’e te ora.

Tē vai ato’a nei rā te mau mea ’aita e taui—te niu, te mau parau mau mure ’ore. ’E i te tahi taime, te tumu nō te heheura’a, nō te fa’arahi-atu-ā-ra’a ïa i te māramarama i ni’a i teie mau parau mau, ma te tauturu ia tātou ’ia ’ite pāpū a’e i te mau mea. Mai te mau Hīro’a Fa’aro’o—nā fa’ahitira’a e 13 a Iosepha Semita nō ni’a i te mau ti’aturira’a o te feiā mo’a—e au rā tē ha’amāramarama nei te reira ia tātou. E arata’i ’e e ha’amaita’i nā huru heheura’a i te ’Ēkālesia, hō’ē ’Ēkālesia tei niu-pāpū-hia i ni’a i te parau mau mure ’ore ’o tē nehenehe e tupu fa’ahou ā i te rahi ’e ’o tē nehenehe e taui ’a fa’arahi ai te Fatu i tō tātou māramarama, nō te tauturu ia tātou ’ia fa’aruru i te mau tāmatara’a o teie nei tau. E nehenehe e parau ē : « Tē ti’aturi nei mātou i te mau mea ato’a i heheuhia mai ’e te Atua, te mau mea ato’a o tāna e heheu mai nei i teienei, ’e tē ti’aturi nei ho’i mātou ē, e heheu mai ā ’oia e rave rahi atu ā mau mea maita’i ’e te faufa’a rahi nō tōna ra bāsileia » (Te mau Hīro’a Fa’aro’o 1:9)

’ītona tuatāpapara’a a te ta’ata hō’ē

Mau mana’o nō te tuatāpapara’a pāpa’ira’a mo’a a te ta’ata hō’ē

Te mau Hīro’a fa’aro’o

Tei roto i te mau Hīro’a Fa’aro’o te mau parau mau niu nō te ’evanelia i fa’aho’i-fa’ahou-hia mai.

Hō’ē rāve’a nō te tuatāpapa i te mau Hīro’a Fa’aro’o ’o te tāpurara’a ïa i te mau parau mau e ’itehia i roto i te hīro’a tāta’itahi ’e ’a ’imi atu ai i te mau pāpa’ira’a mo’a e tū’ati i te reira. Nāhea teie mau ’īrava i te fa’arahi i tō ’oe māramaramara’a i te mau parau mau i roto i te mau Hīro’a Fa’aro’o ?

Hi’o ato’a L. Tom Perry, « Te mau ha’api’ira’a tumu ’e te mau parau tumu i roto i te mau Hīro’a Fa’aro’o », Ensign ’aore rā Liahona, Nov. 2013, 46–48 ; « Pene 38 : Te rata a Wentworth », i roto Te mau Ha’api’ira’a a te mau Peresideni o te ’Ēkālesia : Iosepha Semita, 495–508.

Hīro’a Fa’aro’o 1:9 ; Mau Fa’a’itera’a Mana 1 ’e te 2

Tē arata’ihia nei te ’Ēkālesia a Iesu Mesia nā roto i te heheura’a.

« Tē ti’aturi nei ho’i mātou ē, e heheu mai ā [te Atua] e rave rahi atu ā mau mea maita’i ’e te faufa’a rahi nō te bāsileia o te Atua » (Hīro’a Fa’aro’o 1:9), noa atu ā e taui te reira i te mau ture ’e te mau ravera’a a te ’Ēkālesia. Ma teie parau tumu i roto i te ferurira’a, ’a hi’o fa’ahou i te mau Fa’a’itera’a Mana 1 ’e te 2, ’e ’a hi’o i te mau ta’o ’e te mau pereota ’o tē ha’apūai nei i tō ’oe fa’aro’o i roto i te heheura’a tāmau. E aha te tahi atu ā mau hi’ora’a nō te heheura’a tāmau a te peropheta a te Fatu tā ’oe e ’ite ra ? E aha tā teie mau heheura’a e fa’atupu nei i roto i tō ’oe orara’a ? Nāhea te reira i te fa’anu’ura’a i te ’ohipa o te bāsileia a te Metua i te Ao ra i mua ?

Hi’o ato’a Amosa 3:7 ; 2 Nephi 28:30.

Fa’a’itera’a Mana 1

’Ia haere ā te ’ohipa a te Atua i mua e ti’a ai.

I roto i « Te mau tuha’a nō roto mai i te mau a’ora’a e toru a te peresideni Wilford Woodruff nō ni’a i te parau fa’a’ite mana The Manifesto » (i te hope’a o te Fa’a’itera’a mana 1), e aha te mau tumu tā te peropheta i hōro’a nō te fa’a’orera’a te Fatu i te ravera’a i te fa’aipoipora’a i te vahine rau ? E aha tā te reira e ha’api’i nei ia ’oe nō ni’a i te ’ohipa a te Atua ?

hōho’a pēni nō Wilford Woodruff

Wilford Woodruff, nā H. E. Peterson

Fa’a’itera’a mana 2

E nehenehe e ti’aturi i te Fatu, noa atu ā ’aita tātou i māramarama hope roa i te mau mea.

Tē ha’api’i nei te mau pāpa’ira’a mo’a ’ia ti’aturi i te Fatu (hi’o Maseli 3:5), ’e ’o tā te mau melo ïa o te ’Ēkālesia, te hua’ai nō te nūna’a Afirika, i rave i te taime ’a tāpe’ahia ai te ’ōro’a nō te autahu’ara’a ’e te mau ’ōro’a o te hiero nō rātou. Noa atu ā ’aita rātou i māramarama nō te aha terā ture—’e noa atu ā tō rātou māuiui i te mau tātarara’a i ha’api’ihia i terā tau, ’o tā te ’Ēkālesia ïa e pāto’i nei i teie mahana—e rave rahi melo hua’ai nō te nūna’a Afirika tei ti’aturi i te Fatu ’e tei vai ha’apa’o maita’i noa i roto i tō rātou orara’a. ’A tai’o ai ’oe i te Fa’a’itera’a mana 2, ’a feruri nāhea ’oe i te ha’api’ira’a mai i te ti’aturi i te Fatu, noa atu ā ’aita ’oe i māramarama hope roa i te mau mea.

E riro tē ’apora’a mai nō ni’a i te fa’aro’o o te mau melo ’ere’ere o te ’Ēkālesia i te fa’auru ia ’oe.

’ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Te mau Hīro’a Fa’aro’o.’A feruri nāhea te ’utuāfare e nehenehe ai e fa’aineine i te tahi mau « ha’api’ira’a poto » mai roto mai i te mau Hīro’a Fa’aro’o. ’Ei hi’ora’a, i roto i te hepetoma, e mā’iti te melo tāta’itahi o te ’utuāfare i te hō’ē hīro’a fa’aro’o ’a ’imi atu ai i te hō’ē ’īrava tū’ati, te hō’ē hōho’a, te hō’ē hīmene ’aore rā te hō’ē hīmene a te mau tamari’i, ’aore rā e fa’a’ite mai i te hō’ē ’ohipa i tupu nōna.

’Aore rā, e nehenehe te mau melo o te ’utuāfare e fa’a’ohu i te anira’a i te tahi ’e te tahi nō ni’a i te ’Ēkālesia ’e te mau mea tā tātou e ti’aturi nei, ’ei reira e pāhono atu ai i teie mau uira’a ’e te hō’ē hīro’a fa’aro’o.

Fa’a’itera’a Mana 1 ’e te 2.Tē tauturu nei te mau Fa’a’itera’a Mana 1 ’e te 2 ’ia māramarama i te ti’ara’a o te heheura’a nō teie ’anotau i roto i te ’Ēkālesia. ’A tai’o ’āmui ai te ’utuāfare i te reira, e nehenehe e tāu’aparau e mea nāhea te peropheta i te arata’i ia tātou « nā roto i te fa’aurura’a nō ’ō mai i te Atua mana hope » (Fa’a’itera’a Mana 1). Mea nāhea teie nā fa’a’itera’a i te ha’apūai i tō tātou fa’aro’o i te hō’ē Atua ora ’o tē arata’i nei i tāna ’Ēkālesia ? Nāhea tātou e ’ite ai i tōna rima i roto i te ’ohipa a te ’Ēkālesia i teie mahana ? E nehenehe ’outou e fa’aoti e hi’o ’āmui i te tahi o te mau rāve’a tauturu i roto i te « Mau mana’o nō te tuatāpapara’a pāpa’ira’a mo’a a te ta’ata hō’ē » i ni’a mai.

Nō te mau mana’o hau atu nō te ha’api’ira’a i te mau tamari’i, hi’o te arata’i nō teie hepetoma i roto Mai, pe’e mai—nō te Paraimere

Hīmene tei mana’ohia : « Pour trouver la paix », Chants pour les enfants 68–69.

Ha’amaita’ira’a i tā tātou ha’api’ira’a

’A pe’e i te mau anira’a ’ia rave. « ’Ia pe’e ana’e ’outou i te mau anira’a ’ia ’ohipa, tē fa’a’ite ra ïa ’outou i [te mau melo o te ’utuāfare] ē tē ha’apa’o nei ’outou ia rātou ’e e nāhea te ’evanelia i te ha’amaita’i i tō rātou orara’a. E nehenehe ato’a e hōro’a ia rātou i te taime nō te fa’a’ite mai i te ’ohipa i tupu nō rātou »(Ha’api’ira’a mai tā te Fa’aora, 35).

Te mau Hīro’a Fa’aro’o