’Ua ’ite Iosepha i tōna metua tāne, tōna metua vahine ’e tōna taea’e i roto i te bāsileia tiretiera (te ’ōrama a Iosepha Semita nō te bāsileia tiretiera, Robert Barrett).

29 nō Novema–5 nō Tītema.

Te Parau Ha’api’ira’a ’e te mau Parau Fafau 137–138

« Te ’ōrama nō te fa’aorara’a i te feiā pohe »

’Ua ha’api’i te peresideni M. Russell Ballard : « tē ani nei au ia ’outou ’ia tai’o pauroa ’e ’ia tai’o māite i [Te Parau Ha’api’ira’a ’e te mau Parau Fafau 138]. ’A nā reira ai ’outou, ’ia ha’amaita’i mai te Fatu ia ’outou nō te māramarama hope atu ā ’e nō te māuruuru hope atu ā i te here o te Atua ’e i tāna fa’anahora’a nō te fa’aorara’a ’e nō te ’oa’oa o tāna mau tamari’i » (« Te ’ōrama nō ni’a i te fa’aorara’a i te feiā pohe », Ensign ’aore rā Liahona, Nov. 2018, 73).

Pāpa’i i te mau mana’o e tae mai

Te mau heheura’a tei pāpa’ihia i roto i Te Parau Ha’api’ira’a ’e te mau Parau Fafau 137 ’e te 138 ’ua fa’ata’a-’ē-hia, ’ua hau i te 80 matahiti ’e e 1 500 maile te ātea. Nā te peropheta Iosepha Semita i fāri’i i te tufa’a 137, i te matahiti 1836 i roto i te hiero nō Kirtland tei ’ore i oti roa, ’e nā Joseph F. Smith, te ono o te Peresideni o te ’Ēkālesia, i fāri’i i te tufa’a 138, i te matahiti 1918 i Roto Miti. I te pae rā nō te ha’api’ira’a tumu, e haere ’āpipiti ïa nā ’ōrama e piti. To’opiti tē pāhonora’a i te mau uira’a nō ni’a i te hope’a o te mau tamari’i a te Atua i te orara’a a muri a’e. ’E to’opiti te fa’arahira’a i te aura’a o te reira ’ia hi’ohia te mau ’ohipa i tupu i roto i te orara’a o nā peropheta i fāri’i i te reira.

’Ua tauturu te ’ōrama a Iosepha Semita iāna iho ’ia māramarama i te hope’a mure ’ore o tōna taea’e ia Alvin, tei pohe e ono matahiti hou te mana nō te bāpetizo i te fa’aho’i-fa’ahou-hia mai. ’E ’ua vai noa te māna’ona’ora’a nō te fa’aorara’a mure ’ore o Alvin i roto ia Iosepha mai taua taime ra. ’Ua heheu mai te ’ōrama a Joseph F. Smith i te mau parau mau hanahana nō ni’a i te ao vārua—pāpū roa e heheura’a tāmāhanahana rahi nō te hō’ē ta’ata tei heva i te pohera’a e rave rahi ta’ata nō tōna ’utuāfare. ’Ua fa’aru’e mai te metua tāne o Joseph F. Smith, ’o Hyrum Smith, e 5 noa matahiti tōna, ’e ’ua fa’aru’e mai tōna metua vahine, ’o Mary Fielding Smith, 13 noa matahiti tōna. I te taime nō te ’ōrama i te matahiti 1918, ’ua heva ’oia nō e 13 tamari’i tāna.

E rave rahi uira’a nō ni’a i te orara’a i muri a’e i te pohe tei pāhonohia i roto i teie nā heheura’a. Tē ha’amāramarama ri’i ra te tufa’a 137 nō ni’a i te reira, ’e nā te tufa’a 138 e ha’amatara rahi roa i te pāruru. Tē fa’a’ite to’opiti nei rāua i « te here rahi ’e te fa’ahiahia o te Metua ’e te Tamaiti » (Te Parau Ha’api’ira’a ’e te mau Parau Fafau 138:3).

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau 137

E fāna’o te mau vārua ato’a i te mā’itira’a i te hanahana tiretiera.

Tei mātauhia i rotopū i te mau keresetiano i te matahiti 1836 ra, ’oia ho’i, mai te mea e pohe te hō’ē ta’ata ma te ’ore i bāpetizohia—mai te taea’e o Iosepha Semita, o Alvin—e’ita terā ta’ata e haere i te ra’i. Terā rā, ’ua ’ite Iosepha ia Alvin i roto i te hō’ē ’ōrama nō te bāsileia tiretiera. ’A tai’o ai ’oe i te tufa’a 137, ’a feruri i tā ’oe i ’apo mai nō ni’a i te Metua i te Ao ra, tāna fa’anahora’a nō te fa’aorara’a ’e te bāsileia tiretiera.

Te Parau Ha’api’ira’a ’e te mau Parau Fafau 138:1–11, 25–30

E fa’aineine te tai’ora’a ’e te ferurira’a i te mau pāpa’ira’a mo’a iā’u ’ia fāri’i i te heheura’a.

I te tahi taime e tae mai te heheura’a noa atu ā ’aita tātou i ’imi i te reira. I te rahira’a taime rā, e tae mai te reira nō te mea e ’imi itoito tātou ’e e fa’aineine tātou nō te reira. ’A tai’o ai ’oe i Te Parau Ha’api’ira’a ’e te mau Parau Fafau 138:1–11, 25–30, ’a hi’o maita’i tā te peresideni Joseph F. Smith e rave ra i te taime « ’ua ’ara’ara ihora te mata o [tōna] ’itera’a » nō te māramarama maita’i a’e i te misiōni fa’aora o te Fa’aora. ’Ei reira e feruri ai nāhea ’oe i te pe’e i te hi’ora’a o te peresideni Smith. ’Ei hi’ora’a, e aha te mau tauira’a tā ’oe e nehenehe e rave nō ni’a i te tuatāpapara’a pāpa’ira’a mo’a ’ia rahi atu ā « te feruri hōhonu i te mau pāpa’ira’a mo’a » ’e ’ia rahi atu ā « te feruri ato’a i te tusia rahi nō te tāra’ehara [a te Fa’aora] » ? (mau ’īrava 1–2).

I roto i tāna a’ora’a « Te ’ōrama nō ni’a i te fa’aorara’a i te feiā pohe » (Ensign ’aore rā Liahona, Nov. 2018, 71–74), ’ua hōro’a mai te peresideni M. Russell Ballard i te tahi atu ā mana’o nō te fa’aineinera’ahia te peresideni Smith nō teie ’ōrama. ’A feruri nāhea ’oe i te fa’aineinehia nō te mau ’ohipa e tupu nō ’oe ’aore rā e tupu i muri iho nō ’oe ananahi.

Joseph F. Smith, nā Albert E. Salzbrenner

Te Parau Ha’api’ira’a ’e te mau Parau Fafau 138:25–60

Tē tupu ra te ’ohipa nō te fa’aorara’a i nā pae e piti o te pāruru.

’Ua ha’api’i te peresideni Russell M. Nelson : « E mea ’ōhie roa tā tātou parau poro’i ’e e parau poro’i ’ā’au tae tā tātou : tē ani manihini nei tātou i te mau tamari’i ato’a a te Atua i nā pae e piti o te pāruru ’ia haere mai i tō tātou Fa’aora, ’ia fāri’i i te mau ha’amaita’ira’a o te hiero mo’a, ’ia fāri’i i te ’oa’oa vai maoro, ’e ’ia fāri’i i te ora mure ’ore » (« Ara mai tātou », Ensign ’aore rā Liahona, Mē 2018, 118–19). ’A feruri i teie parau ’a tai’o ai i Te Parau Ha’api’ira’a ’e te mau Parau Fafau 138:25–60. E nehenehe ato’a e feruri i te mau uira’a i muri nei :

• E aha te ha’api’ira’a tā ’oe i ha’api’i mai i roto i teie mau ’īrava nō ni’a i te ’ohipa nō te fa’aorara’a e ravehia ra i roto i te ao vārua ? Nō te aha e mea faufa’a nō ’oe ’ia ’ite ē, tē tupu ra te reira ’ohipa ? Nāhea teie mau ’īrava i te ha’apūai i tō ’oe fa’aro’o i te tāra’ehara a te Fa’aora ?

• E aha tā teie mau ’īrava e ha’api’i nei nō ni’a i te feiā e ’āmui mai nei i roto i te ’ohipa nō te fa’aorara’a i te ao vārua ? Nō te aha e mea faufa’a ’ia māramarama ē, tē tupu ra te ’ohipa nō te fa’aorara’a i nā pae e piti o te pāruru ?

Hi’o ato’a Dallin H. Oaks, « Ti’aturi i te Fatu », Ensign ’aore rā Liahona, Nov. 2019, 26–29.

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Te Parau Ha’api’ira’a ’e te mau Parau Fafau 137:1–5.’A ani i tō ’outou ’utuāfare e aha tō rātou mana’o nō ni’a i te huru o te bāsileia tiretiera, ’ia au i teie mau ’īrava. E aha tā ’oe e ’ite ra i roto i teie mau ’īrava ’o tē tauturu ia ’oe ’ia tīa’i māite ’ia ora i reira ? E aha tā tātou e rave nei nō te fa’aineine ’ia ora i roto i te bāsileia tiretiera ’e te Metua i te Ao ra ’e Iesu Mesia ?

Te Parau Ha’api’ira’a ’e te mau Parau Fafau 137:5–10.Nō te ’apo mai e aha te aura’a nō Iosepha Semita ’ia ’ite e rave rahi melo o tōna ’utuāfare ’āmui i roto i te bāsileia tiretiera, e nehenehe e māta’ita’i i te video « Ministry of Joseph Smith: Temples » (ChurchofJesusChrist.org). Penei a’e e nehenehe ato’a e paraparau nō ni’a i te hō’ē ta’ata tā ’oe i ’ite tei pohe ’aita rā i bāpetizohia. E aha tā Te Parau Ha’api’ira’a ’e te mau Parau Fafau 137:5–10 e ha’api’i nei ia tātou nō ni’a i terā ta’ata ?

Te Parau Ha’api’ira’a ’e te mau Parau Fafau 138:12–24.E aha tā Te Parau Ha’api’ira’a ’e te mau Parau Fafau 138:12–24 e ha’api’i nei nō ni’a i te mau ta’ata tā te Fa’aora i fārerei i te ao vārua ? E aha te mau ha’amaita’ira’a tā rātou i fāri’i ? E aha tā tātou e ’apo mai nā roto mai i tō rātou hi’ora’a ?

Te Parau Ha’api’ira’a ’e te mau Parau Fafau 138:38–55.Tē fa’a’ite nei teie mau ’īrava nō ni’a i te feiā tā te peresideni Joseph F. Smith i ’ite i roto i te ao vārua ’e te tahi ma’a parau poto nō ni’a ia rātou. Penei a’e e nehenehe te ’utuāfare e hāmani i te hō’ē tāpura i’oa nō tō ’outou mau tupuna i’ō i te ao vārua, ma te tahi ri’i parau poto nō ni’a i tō rātou orara’a.

Nō te mau mana’o hau atu nō te ha’api’ira’a i te mau tamari’i, hi’o te arata’i nō teie hepetoma i roto Mai, pe’e mai—nō te Paraimere

Hīmene tei mana’ohia : « Quand je lis l’Écriture sainte », Chants pour les enfants, 66.

Ha’amaita’i i tā tātou ’apora’a mai

Feruri i ni’a i te mau pāpa’ira’a mo’a. ’Ua pi’i te peresideni David O. McKay i te ferurira’a hōhonu « hō’ē o te mau ’ūputa huna roa a’e ’e te mea mo’a roa a’e e rave tātou nō te haere atu i mua i te aro o te Fatu » (Te mau Ha’api’ira’a a te mau Peresideni o te ’Ēkālesia : David O. McKay [2003], 37).

Tei tonohia, nā Harold I. Hopkinson. ’Ua tono Iesu Mesia i te mau vārua parauti’a ’ia poro i te ’evanelia i roto i te ao vārua.