mau ta’ata i roto i te ao vārua

’Ua ’ite ’o Iosepha i tōna metua tāne, tōna metua vahine ’e tōna tu’āne i roto i te bāsileia tiretiera (Te ’ōrama ’o Iosepha Semita nō te bāsileia tiretiera, Robert Barrett).

29 nō Novema–5 nō Tītema

Te Parau Ha’api’ira’a ʼe te mau Parau Fafau 137–138

« Te ’ōrama nō te fa’aorara’a i te feiā pohe »

’A ’imi mai i te mau parau tumu i roto i teie mau heheura’a e au ra e mea faufa’a nō te mau tamari’i tā ’outou e ha’api’i ra. Nāhea ʼoutou e nehenehe ai e tauturu ia rātou ʼia māramarama i te reira mau parau tumu ?

Pāpa’i i te mau mana’o e tae mai

ītona fa’a’itera’a

Tītau i te mana’o

’A fa’a’ite i te hō’ē hōho’a nō Iesu Mesia i roto i te ao vārua, mai terā e ’itehia i roto i te arata’i nō teie hepetoma i roto Mai, pe’e mai—nō te ta’ata hō’ē ’e te ’utuāfare. E ani i te mau tamari’i ’ia fa’a’ite mai i te mea tā rātou i ’ite nō ni’a i te ao vārua.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī a’e

Te Parau Ha’api’ira’a ’e te mau Parau Fafau 137:1–5

’Ua hōro’a mai te Atua iā’u i te hō’ē rāve’a nō te ora e a muri noa atu ’e tō’u ’utuāfare.

I roto i te hō’ē ’ōrama, ’ua ’ite o Iosepha Semita i te mau melo o tōna ’utuāfare i tāhō’ēhia i roto i te bāsileia tiretiera. Nāhea ’outou i te fa’a’ohipa i teie ’ōrama nō te ha’api’i i te mau tamari’i ē e nehenehe te mau ’utuāfare e tāhō’ēhia e a muri noa atu ?

Mau ’ohipara’a e nehenehe e rave

• Fa’a’ite i te hō’ē hōho’a o te hō’ē ta’ata i roto i tō ’outou ’utuāfare, ’e e parau i tō ’outou hina’aro rahi ’ia vai ’e ’o ’ōna i roto i te bāsileia tiretiera. E fa’ata’a ē, ’ua pohe ’o Alvin te tu’āne ’o Iosepha Semita i tōna taure’are’ara’a ’e ’ua mihi noa Iosepha iāna. E tai’o i Te Parau Ha’api’ira’a ’e te mau Parau Fafau 137:1, 5, ’e e ani i te mau tamari’i ’o vai tā Iosepha Semita i ’ite i roto i tāna ’ōrama nō te bāsileia tiretiera (hi’o ato’a Te mau ’ā’amu o te Parau Ha’api’ira’a ʼe te mau Parau Fafau, 152–53). E ani i te mau tamari’i ’ia fa’atoro i tō rātou rima nō te fa’a’ite i tō rātou here rahi i tō rātou ’utuāfare, ’e e ani ia rātou ’ia fa’a’ite mai nō te aha rātou e hina’aro ai e pārahi i pīha’i iho i tō rātou ’utuāfare i roto i te bāsileia tiretiera.

• Fa’a’ohipa i Te Parau Ha’api’ira’a ʼe te mau Parau Fafau 137:1–5 ’e te ’api ’ohipara’a nō teie hepetoma nō te tauturu i te mau tamari’i ’ia ’ite mai i te mau parau ri’i nō ni’a i te ’ōrama ’o Iosepha Semita nō te bāsileia tiretiera. E ani ia rātou ’ia pāpa’i i te hō’ē hōho’a nō rātou iho ’e tō rātou ’utuāfare i ni’a i te ’api ’ohipara’a ’a ha’uti ’aore rā, ’a hīmene ai ’outou i te hō’ē hīmene nō ni’a i te ’utuāfare, mai te « Ensemble à tout jamais » (Chants pour les enfants, 98).

Te Parau Ha’api’ira’a ’e te mau Parau Fafau 138:6, 11

E nehenehe te Vārua Maita’i e tauturu iā’u ’ia hāro’aro’a i te mau pāpa’ira’a mo’a.

Te tahi taime e nehenehe te mau pāpa’ira’a mo’a e riro ’ei mea fifi ’ia hāro’aro’a nō te mau tamari’i iho ā rā. Tē ha’api’i nei Te Parau Ha’api’ira’a ’e te mau Parau Fafau 138:11 ē, e nehenehe te Vārua Maita’i e ’īriti i « te mata o [tō tātou] māramarama ».

tamaiti e tai’o ra i te mau pāpa’ira’a mo’a

E nehenehe te Vārua Maita’i e tauturu ia tātou ’ia hāro’aro’a i te mea tā tātou e tai’o ra i roto i te mau pāpa’ira’a mo’a.

Mau ’ohipara’a e nehenehe e rave

• E fa’a’ite i te hō’ē hōho’a nō te peresideni Joseph F. Smith (hi’o Buka hōho’a o te ’evanelia, no 105). E fa’ata’a ē, ’o ’oia te ono o te peresideni o te ’Ēkālesia, ’e i te hō’ē mahana ’ua tai’o ’oia i te mau pāpa’ira’a mo’a ’e ’ua feruri i te reira (te ferurira’a nō ni’a i tō rātou aura’a). ’A tai’o ai ’outou i Te Parau Ha’api’ira’a ’e te mau Parau Fafau 138:6, 11, e ani i te mau tamari’i ’ia fa’ahua ’o rātou te peresideni Smith ’e ’ia ha’uti i te ravera’a e tano i te mau ta’o.

• E fa’ati’a i te mau tamari’i i te hō’ē taime ’ua feruri hōhonu ’outou i te hō’ē mea i roto i te mau pāpa’ira’a mo’a ’e ’ua tauturu mai te Vārua Maita’i ia ’outou ’ia ta’a maita’i i te reira. E hīmene ’āmui i te hō’ē hīmene nō ni’a i te tuatāpapara’a i te pāpa’ira’a mo’a, mai te « Quand je lis l’Écritures saintes » (Chants pour les enfants, 66). E aha tā teie hīmene e parau nei e ti’a ia tātou e rave nō te ta’a maita’i i te mau pāpa’ira’a mo’a ?

Te Parau Ha’api’ira’a ’e te mau Parau Fafau 138:18–35

E fana’o te tā’āto’ara’a o te mau tamari’i a te Metua i te Ao ra ’ia fa’aro’o i te ’evanelia.

I muri a’e i te fa’asātaurora’ahia ’o Iesu Mesia, ’ua haere ’oia e fārerei i tōna feiā mo’a ha’apa’o maita’i i roto i te ao vārua. ’Ua fa’aue ’oia ia rātou ’ia ha’api’i i te ’evanelia i te feiā ’aita i fāri’i i reira.

Mau ’ohipara’a e nehenehe e rave

• Fa’a’ite i te hō’ē hōho’a o te hō’ē mēnema (hi’o Buka hōho’a o te ’evanelia, nos. 58, 59 ’aore rā, te mau hōho’a o te Bibilia, no. 14), ’aore rā, e pāpa’i i te hō’ē hōho’a nō te hō’ē mēnema i ni’a i te tāpura ’ere’ere. Fa’a’ite i te hō’ē hōho’a nō te Fa’aora i roto i te ao vārua, ’a vai ai tōna tino i roto i te mēnema (mai teie i roto i te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare). ’A nā reira ai ’outou, e ui i te mau uira’a ’o te tauturu i te mau tamari’i ’ia ’ite mai i te mau parau ri’i faufa’a i roto i Te Parau Ha’api’ira’a ’e te mau Parau Fafau 138:18–19, 23–24, 27–30, mai te, ’o vai tā Iesu i fārerei, e aha tā rātou i fāri’i ’e e aha tāna i ani ia rātou ’ia rave.

• Fa’a’ite i te hō’ē hōho’a o te mau misiōnare (hi’o Buka hōho’a o te ’evanelia, nos. 109, 110), ’e e ani i te mau tamari’i ’ia fa’a’ite mai e aha tā te mau misiōnare e rave nei. E nehenehe ato’a ’outou e ani ia rātou ’ia ha’uti mai i te tahi mau rāvera’a a te mau misiōnare. Tai’o i Te Parau Ha’api’ira’a ’e te mau Parau Fafau 138:31–34 i te mau tamari’i. ’A fa’ata’a ē, mai te mau misiōnare e vai nei i te fenua nei, tē vai ato’a ra te mau misiōnare i roto i te ao vārua, ’o tē ha’api’i ra i te mau ta’ata i reira.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 137:1–5

’Ua hōro’a mai te Atua iā’u i te hō’ē rāve’a ’ia tāhō’ēhia ’e tō’u ’utuāfare e a muri noa atu.

’Ua fāri’i Iosepha Semita i te hō’ē ’ōrama nō te bāsileia tiretiera, ’e ’ua ’ite ’oia i tōna nā metua ’e tōna tu’āne ’o Alvin i reira. Tē ha’api’i nei teie ’ōrama ia tātou ē, mai te mea e vai parauti’a noa tātou, e nehenehe tō tātou mau aura’a ’utuāfare e tāmau noa i roto i te orara’a a muri a’e.

Mau ’ohipara’a e nehenehe e rave

• E ani i te mau tamari’i ’ia tai’o i Te Parau Ha’api’ira’a ’e te mau Parau Fafau 137:1–5 ’e e pāpa’i i te hō’ē hōho’a nō te mea tā rātou i tai’o (hi’o ato’a i te ’api ’ohipara’a nō teie hepetoma). E aha tā Iosepha Semita i fāri’i i tōna ’itera’a i te mau melo o tōna ’utuāfare i roto i te bāsileia tiretiera ?

• Fa’a’ite i te video « Families Can Be Together Forever » (ChurchofJesusChrist.org), ’aore rā e hīmene i te hō’ē hīmene nō ni’a i te ’utuāfare, mai te « Ensemble a tout jamais » (Chants pour les enfants, 98). E aha tā te video ’aore rā tā te hīmene e ha’api’i nei ia tātou nō ni’a e aha tā tātou e ti’a e rave nō te fa’ariro i tō tātou ’utuāfare ’ei mea mure ’ore ?

Te Parau Ha’api’ira’a ’e te mau Parau Fafau 138:1–11

’Ia feruri hōhonu ana’e au i te mau pāpa’ira’a mo’a, e tauturu mai te Vārua Maita’i iā’u ’ia māramarama i te reira.

E aha tā te mau tamari’i e nehenehe e ha’api’i mai nā roto mai i te hi’ora’a ’o te peresideni Joseph F. Smith ’o te ha’amaita’i i tā rātou tuatāpapara’a i te mau pāpa’ira’a mo’a ?

Mau ’ohipara’a e nehenehe e rave

• E ani i te mau tamari’i ’ia tai’o i Te Parau Ha’api’ira’a ’e te mau Parau Fafau 138:1–11, ’e e tauturu ia rātou ’ia pāpa’i i te hō’ē ha’apotora’a parau nō te ’itera’a ’o te peresideni Joseph F. Smith. E aha tāna i rave ’o tei arata’i i tāna ’ōrama fa’ahiahia ? E aha te aura’a o te parau feruri hōhōnu ’aore rā feruri i ni’a te mau pāpa’ira’a mo’a ?

• E ani i te mau tamari’i e aha tā rātou e rave mai te mea e mau uira’a tā rātou nō ni’a i te ’evanelia. Fa’ati’a i te tahi mau hi’ora’a nō roto mai i te mau pāpa’ira’a mo’a ’aore rā, nō tō ’outou iho orara’a ’a feruri ai ’outou i te mau pāpa’ira’a mo’a ’o te ’āfa’i mai i te māramarama ’o te Vārua (hi’o, ’ei hi’ora’a, 1 Nephi 11:1–6 ; Te Parau Ha’api’ira’a ’e te mau Parau Fafau 76:19–24 ; Iosepha Semita—’Ā’amu 1:11–12).

Te Parau Ha’api’ira’a ’e te mau Parau Fafau 138:12–35

E fana’o te tā’āto’ara’a o te mau tamari’i a te Metua i te Ao ra i te rāve’a nō te fa’aro’o i te ’evanelia.

’Ua ha’api’i mai te peresideni Joseph F. Smith ē, tē tamau noa nei te ’ohipa porora’a ’evanelia i roto i te ao vārua. E ha’apāpū teie ’ohipa ē, e fana’o te mau ta’ata ato’a i te rāve’a nō te fāri’i i te ’evanelia.

Mau ’ohipara’a e nehenehe e rave

• I ni’a i te tāpura ’ere’ere, ’a tāpura i te tahi mau ’īrava nō roto mai i te tuha’a 138. I muri iho e tāpura i roto i te āpapara’a ta’a ’ē, te mau fa’ahitira’a parau tei ha’apoto i te mau pupu tāta’itahi o te mau ’īrava. E ani i te mau tamari’i ’ia fa’atū’ati i te mau fa’ahitira’a parau ’e te mau ’īrava e tano. E nehenehe e tu’u te mau ’īrava 12–16 (e ha’aputuputu te mau vārua parauti’a nō te tīa’i ’ia fā mai Iesu), 18–19 (e fā mai te Fa’aora i te mau vārua parauti’a), 29–30 (e pi’i Iesu i te mau ve’a nō te poro i te ’evanelia), 31–35 (e poro te mau vārua parauti’a i te ’evanelia), ’e e nā reira noa. I muri a’e i tō te mau tamari’i fa’atū’atira’a, e ani ia rātou ’ia fa’a’ite mai e aha tā rātou i ha’api’i mai nō roto mai i te mau ’īrava.

• E ani i te tahi o te mau tamari’i ’ia tai’o i Te Parau Ha’api’ira’a ’e te mau Parau Fafau 138:33 nō te ’ite mai e aha te mau parau tumu o te ’evanelia tei ha’api’ihia i te mau vārua o te feiā i pohe. E ani i te tahi mau tamari’i ’ia tai’o mai i te mau parau tumu i ha’api’ihia i roto i Te mau Hīro’a Fa’aro’o 1:4. E aha te mea e tuea i roto i teie mau ’īrava, ’e e aha tei ta’a ’ē ? E aha tā teie e ha’api’i nei ia tātou nō ni’a i te Metua i te Ao ra ’e i tāna fa’anahora’a ?

ītona ’apora’a mai

Fa’aitoito i te ’apora’a mai i te fare

E ani i te mau tamari’i ’ia fa’anaho i te hō’ē taime i teie hepetoma, ’a feruri ai rātou i te mau pāpa’ira’a mo’a tā rātou e tai’o.

Ha’amaita’iraʼa i tā tātou ha’api’ira’a

Fa’aitoito i te fa’aturara’a. Tauturu i te mau tamari’i ’ia hāro’aro’a ē, te hō’ē tuha’a faufa’a roa o te fa’aturara’a, ’o te ferurira’a ïa i te Metua i te Ao ra ’e ia Iesu Mesia. E nehenehe ’outou e fa’aha’amana’o i te mau tamari’i ’ia fa’atura nā roto i te hīmene-marū-ra’a ’aore rā, te hāmura’a i te hō’ē hīmene, ’aore rā, te fa’a’itera’a i te hō’ē hōho’a nō Iesu.

’api ’ohipara’a : ’Ua hōro’a mai te Atua ia tātou i te hō’ē rāve’a ’ia tāhō’ēhia ’e tō tātou ’utuāfare e a muri noa atu