’ahu ta’oto e fa’a’ite ra i te mau rima e rave rahi ’ū o te ’iri

I te mau melo tāne ti’amā nā Emma Allebes

6–12 nō Tītema

Te mau Hīro’a Fa’aro’o ’e Te mau Fa’a’itera’a Mana 1 ’e te 2

« Tē ti’aturi nei mātou »

’A tuatāpapa ai ’outou i teie hepetoma ’e ’a fa’anaho ai nō te ha’api’i, ’a feruri e nāhea ’outou i te tauturu i te mau tamari’i i roto i tā ’outou piha ’ia ha’apūai i tō rātou ti’aturira’a i roto i te mau parau mau niu o te ’evanelia.

Pāpa’i i te mau mana’o e tae mai

ītona fa’a’itera’a

Tītau i te mana’o

E tāora i te hō’ē pōpō i te hō’ē tamari’i, ’e e ani i te tamari’i ’ia fa’a’ite mai i te hō’ē mea tāna e ti’aturi nei nō ni’a ia Iesu Mesia ’aore rā, i te Metua i te Ao ra. ’A nā reira noa e tae noa atu ʼua noaʼa i te mau tamariʼi atoʼa te taime nō te faʼaʼite mai.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī a’e

Te mau Hīro’a Fa’aro’o

Tē ti’aturi nei au i te ’evanelia a Iesu Mesia.

E nehenehe ’outou e fa’aohipa i Te mau Hīro’a Fa’aro’o nō te hi’o fa’ahou ’e te mau tamari’i i te tahi o te mau ti’aturira’a niu o te ’Ēkālesia a Iesu Mesia. Nō te aha e mea faufa’a ’ia ti’aturi te mau tamari’i o tā ’outou e ha’api’i ra i teie mau parau mau ’ōhie ?

Mau ’ohipara’a e nehenehe e rave

• Mā’iti i te tahi mau hīro’a fa’aro’o ’o tā ’outou e mana’o ra e faufa’a ta’a ’ē nō te mau tamari’i o tā ’outou e ha’api’i ra. Nō te hīro’a fa’aro’o tāta’itahi, ’a fa’a’ite i te hō’ē hōho’a (hi’o te ’api ’ohipara’a nō teie hepetoma) ’aore rā te hō’ē ’ā’amu (nō roto mai i te mau pāpa’ira’a mo’a aore rā, tō ’outou iho orara’a) ’o tē fa’ahōho’a nei ’aore rā, ’o tē ha’apāpū nei i te hō’ē parau mau i ha’api’ihia i roto i taua hīro’a ra. E parau i te mau tamari’i nō te aha e mea faufa’a nō ’outou taua parau mau ra, ’e e vaiiho ia rātou ’ia fa’a’ite mai nō te aha e mea faufa’a nō rātou.

• ’A ’imi mai i te mau hīmene ’aore rā, te mau hīmene a te mau tamari’i ’o te nehenehe e tauturu i te mau tamari’i ’ia māramarama i te hō’ē aore rā hau atu mau hīro’a fa’aro’o. Penei a’e e nehenehe te mau tamari’i e tauturu ia ’outou ’ia mā’iti. ’A hīmene ’āmui i te mau hīmene, ’e e tauturu i te mau tamari’i ’ia hi’o e nāhea te mau hīmene e tū’ati ai i te mau hīro’a fa’aro’o.

Te mau Hīro’a Fa’aro’o 1:9; Te mau Fa’a’itera’a Mana 1 ’e te 2

E arata’i te Fatu i tāna ’Ēkālesia nā roto i tāna peropheta.

’A fa’aruru ai te mau melo o te ’Ēkālesia i te mau huru tāmatara’a, e nehenehe tātou e ’ite mai i te hau ma te ’itera’a ē, ’ua ineine te Metua i te Ao ra i te hōro’a mai i te heheura’a nō te arata’i ia tātou. Tauturu i te mau tamari’i o tā ’outou e ha’api’i ra ’ia ha’apūai i tō rātou fa’aro’o ē, tē arata’i nei te Atua i te ’Ēkālesia nā roto i te hō’ē peropheta ora.

tamaiti e hi’o ra i te ’āmuira’a rahi

E arata’i te Metua i te Ao ra ia tātou nā roto i te mau peropheta.

Mau ’ohipara’a e nehenehe e rave

• Fa’a’ite i te hō’ē pāpa’a pāpa’ira’a mo’a ’e hō’ē hōho’a nō te peropheta ora (’aore rā te hō’ē ve’a o te ’āmuira’a i ma’iri iho nei o te Ensign ’aore rā te Liahona). Tauturu i te mau tamari’i ’ia fa’ata’a tehea te tao’a e tū’ati i te pereota « te mau mea ato’a i heheuhia mai e te Atua », ’e tehea tao’a e tū’ati i te pereota « mau mea ato’a ’o tāna e heheu mai nei i teienei » (Te mau Hīro’a Fa’aro’o 1:9).

• Tūpohe i te mau mōrī, ’e e tu’u i te hō’ē hōho’a nō Iesu Mesia i ni’a i te tāpura ’ere’ere. E tū’ama i te hō’ē mōrī pata i ni’a i te hōho’a nō te fa’ahōho’a e nāhea te peropheta, mai te mōrī pata, i te tauturu ia tātou ’ia ’ite māramarama maita’i i te Fa’aora.

• ’A ’imi mai i te mau arata’ira’a ’ōhie nō te rave i te tahi ’ohipa, mai te mā’a ’aore rā, hō’ē tao’a ha’uti. ’A pe’e i te mau arata’ira’a ’e te mau tamari’i, ’e ’a fa’ata’a ē, nā roto i te peropheta, tē hōro’a mai nei te Metua i te Ao ra ia tātou te mau arata’ira’a nō te tauturu ia tātou ’ia ho’i fa’ahou e ora i pīha’i iho iāna. E aha te tahi mau mea tā te peropheta i ha’api’i mai ia tātou, ’ia ti’a ia tātou ’ia ho’i fa’ahou i te Atua ?

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari

Te mau Hīro’a Fa’aro’o

Tē ha’api’i nei Te mau Hīro’a Fa’aro’o i te mau parau mau ’ōhie o te ’evanelia.

I te tahi taime e au ra te ’evanelia e mea rahi ’e te tāfifi, nō te mau tamari’i iho ā rā. E nehenehe Te mau Hīro’a Fa’aro’o e tauturu i te mau tamari’i ’ia ta’a, ma te hō’ē rāve’a ’ōhie, vetahi mau parau mau niu ’o tā tātou e ti’aturi nei ’ei feiā mo’a i te mau mahana hope’a nei.

Mau ’ohipara’a e nehenehe e rave

• E ani i te tamari’i tāta’itahi ’ia mā’iti i te hō’ē ta’o ’aore rā, te hō’ē pereota niu nō roto mai i te hō’ē o te mau Hīro’a Fa’aro’o ’e ’ia fa’a’ite i te reira i te piha ha’api’ira’a. I muri iho e vaiiho i te tahi atu mau tamari’i ’ia feruri (’aore rā ’ia ’ite mai) tehea hīro’a fa’aro’o nō reira mai teie ta’o ’aore rā teie pereota. E ani i te mau tamari’i ’ia fa’a’ite mai nō te aha te ta’o ’aore rā te pereota tā rātou i mā’iti mai e mea faufa’a.

• Tau mahana ri’i noa nā mua a’e, ’a ani i te tahi o te mau tamari’i ’ia fa’aineine mai nō te fa’a’ite i roto i te piha ha’api’ira’a te hō’ē poro’i poto nō ni’a i tā rātou Hīro’a Fa’aro’o i au roa a’e. E nehenehe tā rātou poro’i e riro ’ei hō’ē hōho’a, hō’ē hīmene, hō’ē ’ā’amu ’aore rā, hō’ē ’itera’a, ’aore rā, te tahi atu mau pāpa’ira’a mo’a. E ani i teie mau tamari’i ’ia fa’ata’a mai, nō te aha rātou i au ai i te Hīro’a Fa’aro’o tā rātou i mā’iti.

• Pāpa’i i ni’a i te tāpura ’ere’ere te tahi mau uira’a tā te mau ta’ata e nehenehe e vai ra nō ni’a i tō tātou mau ti’aturira’a ’e ’o tā tātou e nehenehe e pāhono nā roto i te hō’ē o te mau Hīro’a Fa’aro’o. E ani i te mau tamari’i ’ia mā’iti mai i te hō’ē ’uira’a ’e ’ia ’imi mai i te hō’ē hīro’a fa’aro’o o te pāhono i te reira. ’A vaiiho ia rātou ’ia ha’a nō te pāhono i te uira’a ma te fa’a’ohipa i te hīro’a fa’aro’o.

Te mau Fa’a’itera’a Mana 1 ’e te 2

E tauturu te mau peropheta ia tātou ’ia ’ite i te hina’aro o te Metua i te Ao ra.

Te mau Fa’a’itera’a Mana 1 ’e te 2 e mau hi’ora’a maita’i roa e nāhea te mau peropheta ’ia fāri’i ’e ’ia ohipa i ni’a i te heheura’a nō ’ō mai i te Atua ra. Nāhea ’outou i te tauturu i te mau tamari’i ’ia fa’arahi i tō rātou fa’aro’o ē, tē fa’atere nei te Atua i tāna ’Ēkālesia nā roto i te heheura’a ?

Mau ’ohipara’a e nehenehe e rave

• E ani i te mau tamari’i ’ia ’ite mai i te hō’ē hīro’a fa’aro’o ’o tē ha’api’i nei nō ni’a i te mau peropheta ’aore rā, i te heheura’a. E ani ia rātou ’ia fa’a’ite mai, nō te aha rātou i māuruuru ai ē tē vai nei tā tātou hō’ē peropheta ora. Fa’a’ite i te tahi mau hi’ora’a, e mea nāhea te Atua i te arata’ira’a i te ’Ēkālesia nā roto i te heheura’a, e tae noa atu i te mau hi’ora’a i fa’a’itehia i roto i Te mau Fa’a’itera’a Mana 1 ’e te 2, ’e e vaiiho i te mau tamari’i ’ia fa’a’ite mai i te mau hi’ora’a tā rātou i ’ite (mai te mau tāuiuira’a i tupu iho nei i roto i te mau fa’anahora’a ’aore rā, i te mau fa’aturera’a a te ’Ēkālesia).

• Hōro’a i te mau tamari’i i te mau fa’ahorora’a pāpa’ira’a mo’a i muri nei : 2 Nephi 26:33 ; Iakoba 2:27. E ani ia rātou ’ia fa’ata’a mai tehea pāpa’ira’a mo’a e tano i te Fa’a’itera’a Mana 1 (’o tei fa’a’ore i te fa’aipoipora’a i te mau vahine rau) ’e ’o te tū’ati i te Fa’a’itera’a Mana 2 (’o te hōro’a i te mau ha’amaita’ira’a o te autahu’ara’a ’e o te hiero i te mau ta’ata nō te mau nuna’a ato’a). E fa’a’ite i tō ’outou ’itera’a pāpū ē e heheu mai te Fatu i tōna hina’aro i te mau peropheta tahito ’e nō teie tau.

• Pāpa’i te Fa’a’itera’a Mana 1 i muri nei i ni’a i te tāpura ’ere’ere : « nā ’outou iho e ha’avā ». E aha te aura’a nā ’outou iho e ha’avā ’ia fāri’i ana’e te peropheta i te heheura’a ? Nō te tauturu ia rātou ’ia pāhono i teie uira’a, e fa’a’ite atu i teie fa’ahitira’a a te peresideni Russell M. Nelson : « E nehenehe ’outou e ’ite nā roto ia ’outou iho tei hea te parau mau ’e tei hea e ’ere, ma te ha’api’ira’a mai ’ia ’ite i te muhumuhu a te Vārua » (« The Love and Laws of God » [Brigham Young University devotional, 17 nō Tētepa 2019], 4, speeches.byu.edu).

• Pāpa’i hōho’a ’aore rā, e pia i te hō’ē hōho’a nō te fenua i ni’a i te tāpura ’ere’ere. E ani i te hō’ē o te mau tamari’i ’ia tai’o i nā paratarafa hope’a e piti a te Peresidenira’a Mātāmua, rata nō te 8 nō Tiunu 1978, tei fa’ahitihia i roto i te Fa’a’itera’a Mana 2 (ha’amata nā te « ’Ua fa’aro’o ’oia i tā tātou mau pure… »). E ani i te mau tamari’i ’ia tai’o e hia taime te mau ta’o « ha’amaita’ira’a » ’e « te mau ha’amaita’ira’a » e ’itehia ai. E aha te mau ha’amaita’ira’a e tae mai nā roto mai i te ’evanelia ? E ani i te mau tamari’i ’ia tāpura i te reira i ni’a i te tāpura ’ere’ere fa’a’ohu i te hōho’a pāpa’i ’aore rā, te hōho’a fenua. ’A fa’a’ite i tō ’outou ’itera’a pāpū ē, ’ua here te Atua i te tā’āto’ara’a o tāna mau tamari’i nā te ao ato’a nei ’e ’ua hina’aro ’oia e ha’amaita’i ia rātou nā roto i tāna ’evanelia.

ītona ’apora’a mai

Fa’aitoito i te ’apora’a mai i te fare

Tauturu i te mau tamari’i ’ia mā’iti i te hō’ē hīro’a fa’aro’o tā rātou e hina’aro e tāmau ’ā’au ’e e tauturu ia rātou ’ia fa’anaho nō te rave i te reira.

Ha’amaita’iraʼa i tā tātou ha’api’ira’a

E mea au nā te mau tamari’i ’ia fa’a’ite i te mea tā rātou i ha’api’i mai. Noa atu ē, e mea ’āpī rātou, e nehenehe te mau tamari’i e ha’apūai i te fa’aro’o o te mau melo o tō rātou ’utuāfare. E fa’aitoito ia rātou ’ia faʼaʼite atu i tō rātou ʼutuāfare i te mea tā rātou i ʼapo mai i roto i te Paraimere. (Hi’o Ha’api’ira’a mai tā te Fa’aora, 30.)

’api ’ohipara’a : te mau Hīro’a Fa’aro’o