13–19 nō Tītema

Te ’Utuāfare : E Poro’i i tō te Ao nei

« ’Ua riro te ’utuāfare ’ei tumu nō te ’ōpuara’a a tei Hāmani »

’Ua parau te peresideni Dallin H. Oaks : « Tē ti’aturi nei au ē, ’o te huru hi’ora’a ’e te fa’a’ohipara’a i te poro’i nō ni’a i te ’utuāfare [te hō’ē] tāmatara’a nō teie u’i. Tē pure nei au ’ia ti’a ’āueue ’ore te feiā mo’a i roto i teie tāmatara’a » (« Te fa’anahora’a ’e te parau poro’i », Ensign ’aore rā Liahona, Nov. 2017, 31). ’A feruri i teie mau parau ’a tuatāpapa ai ’outou i te parau poro’i nō te ’utuāfare i teie hepetoma.

Pāpa’i i te mau mana’o e tae mai

Hou tō tātou fānaura’a, ’ua riro tātou ’ei tuha’a nō te hō’ē ’utuāfare—te ’utuāfare o tō tātou nā Metua i te ra’i. I te taera’a mai te taime nō te fa’aru’e i tō Rāua aro, ’ua tāmarūhia paha tō tātou ’ā’au i te ’itera’a ē, i ni’a i te fenua nei, e riro te mau ’utuāfare ato’a ’ei tuha’a nō te fa’anahora’a a te Atua. ’Ua ’ōpuahia te hōho’a i ni’a i te fenua nei ’ei tāvevora’a i te hōho’a maita’i roa i te ra’i.

’Aita e ha’apāpūra’a ē, e roa’ahia i te mau ’utuāfare i ni’a i te fenua nei i terā fāito i mana’ohia, ’aore rā e tere maita’i te reira. ’Ua ha’api’i rā te peresideni Henry B. Eyring : « E hōro’a [te mau ’utuāfare] i te mau tamari’i a te Atua i te rāve’a maita’i roa a’e ’ia fāri’ihia rātou i teie ao ma te here i ni’a i te fenua nei tei piri atu i te here tā tātou i ’ite i te ra’i ra—te here metua » (Haʼaputuputuraʼa i te ʼutuāfare o te Atua », Ensign ’aore rā Liahona, Mē 2017, 20). Nō tōna ’itera’a ē, ’aita te mau ’utuāfare i rae’a i te fāito maita’i roa ’e e topa rātou i raro a’e i te mau ’arora’a a te ’enemi, ’ua tono mai te Atua i tāna Tamaiti here nō te fa’aora ia tātou ’e nō te fa’aora i te māuiui o tō tātou mau ’utuāfare. ’E ’ua tono ato’a ’oia i te mau peropheta i te mau mahana hope’a nei ma te hō’ē parau poro’i nō te pāruru ’e nō te ha’apūai i te mau ’utuāfare. Mai te mea e pe’e tātou i te mau peropheta ’e e tu’u tātou i te fa’aro’o i te Fa’aora ra, noa atu ā ’aita te mau ’utuāfare tāhuti nei mai te hōho’a hanahana roa, e tīa’ira’a tē vai ra nō te mau ’utuāfare—i ni’a i te fenua nei ’e i te ra’i.

Mau mana’o nō te tuatāpapara’a pāpa’ira’a mo’a a te ta’ata hō’ē

« ’Ua riro te ’utuāfare ’ei tumu nō te ’ōpuara’a a tei Hāmani »

« Te ’Utuāfare : E Poro’i i tō te Ao nei », e mea pāpū roa nō ni’a te reira i te mau ’utuāfare. Nō ni’a ato’a rā i te fa’anahora’a nō te fa’aorara’a a te Atua. Hō’ē rāve’a nō te tuatāpapa i te poro’i, ’o te ’imira’a ïa i te mau mea tāna e ha’api’i nō ni’a i te orara’a hou i te tāhuti nei, te orara’a tāhuti ’e te orara’a i muri a’e i te tāhuti nei. E aha tā ’oe i ’apo mai ’ia tuatāpapa ’oe i te poro’i mai te reira ? Nāhea te reira i te tauturu ia ’oe ’ia māramarama nō te aha e mea faufa’a roa te fa’aipoipora’a ’e te ’utuāfare nō te fa’anahora’a a te Atua ?

Hi’o ato’a Dallin H. Oaks, « Te Fa’anahora’a ’e te Poro’i », Ensign ’aore rā Liahona, Nov. 2017, 28–31.

« E mea pāpū a’e te ’oa’oa i roto i te orara’a ’utuāfare ’ia fa’atumuhia te reira i ni’a i te mau ha’api’ira’a a te Fatu ra o Iesu Mesia ».

’A feruri i te mau paratarafa ono ’e te hitu o te poro’i nō te ’utuāfare ’ei hōho’a e pe’e nō te « ’oa’oa i roto i te orara’a ’utuāfare ». ’A tai’o ai ’oe i teie nā paratarafa, ’a hi’o mai i te mau parau tumu nō te « manuia o te mau fa’aipoipora’a ’e o te mau ’utuāfare ». ’Ei reira ’a feruri i te hō’ē tā’amura’a i roto i te ’utuāfare o tā ’oe e hina’aro e ha’apūai mai. E aha te mana’o tei fa’auru ia ’oe ’ia rave ? Nāhea ’oe i te fa’aō mai i te Fa’aora i roto i tā ’oe mau tauto’ora’a ?

Hi’o ato’a Richard J. Maynes, « Ha’amau i te hō’ē nohora’a fa’atumuhia i ni’a i te Mesia », Ensign ’aore rā Liahona, Mē 2011, 37–39.

« E ha’avāhia [vau] i mua i te aro o te Atua » nō te huru tā’u i rave i tō’u ’utuāfare.

Tei roto i te poro’i nō te ’utuāfare te mau ha’amaita’ira’a fa’ahiahia mau tā te Metua i te Ao ra i fafau i te feiā e pe’e i tāna parau a’o. Tei roto ato’a te mau fa’aarara’a pūai nō rātou ’aita e pe’e ra. ’A feruri e hāmani i te hō’ē tāpura nō te mau ha’amaita’ira’a ’e te mau fa’aarara’a tā ’oe e ’ite mai.

Nāhea ’oe i te ’ohipa i te parau a’o a te Atua i roto i te poro’i ? ’Āhani e ti’a ’oe i mua i te Atua i teie mahana, e aha tā ’oe e taiā ’ore i te paraparaura’a iāna nō ni’a i tō ’oe mau tā’amura’a ’utuāfare ? E aha tē tītauhia ’ia ha’amaita’i ?

Hi’o ato’a Alama 5:15–22 ; Te Parau Ha’api’ira’a ’e te mau Parau Fafau 42:22–25 ; 93:39–44.

E aupuru te metua i tā rātou mau tamari’i nā roto i te here ’e te parauti’a.

E ti’a ānei iā’u ’ia fāri’i i te mau ha’amaita’ira’a i fafauhia mai te mea ’aita te vaira’a o tō’u ’utuāfare i tū’ati roa i te hōho’a ’utuāfare i mana’ohia ?

’Ua ha’api’i Elder D. Todd Christofferson : « Te paraura’a i te mau parau mau tumu nō ni’a i te fa’aipoipora’a ’e te ’utuāfare, e ’ere ïa i te tāu’a-’ore-ra’a ’aore rā te fa’aitira’a i te mau tusia ’e te mau manuiara’a o te feiā tē ’ere ra i teie maita’i hope. E mau hōro’a tō te mau ta’ata ato’a ; e mau tārēni tō te mau ta’ata ato’a ; e nehenehe tā te mau ta’ata ato’a e tauturu i te fa’atupura’a i te ’ōpuara’a a te Atua i roto i te mau u’i tāta’itahi. Te rahira’a o te mau mea maita’i, te rahira’a o te mau mea faufa’a—’e i te tahi mau taime te mau mea ato’a tei tītauhia i teienei—e nehenehe ïa e fa’atupuhia i roto i te hō’ē orara’a e ’ere i te mea au roa… Tē fa’a’ite pāpū nei mātou ē, ’ua ’ite ātea, ’e i te pae hope’a, e fa’a’ore te Tāra’ehara a Iesu Mesia i te mea tei ’erehia ’e tei mo’ehia i te feiā tei fāriu atu iāna. ’Aore e ta’ata i fa’ata’a-ātea-hia ’ia fāri’i iti a’e i te mea ato’a tā te Metua i fa’aineine nō tāna mau tamari’i » («  Nō te aha te faʼaipoiporaʼa, nō te aha te ʼutuāfare  », Ensign ’aore rā Liahona, Mē 2015, 52).

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

« E tuha’a faufa’a rahi te rirora’a ’ei tāne ’e ’ei vahine nō te ihota’ata ’e nō te tumu o te ta’ata tāta’itahi i te ao nā mua a’e, i te tāhuti nei, ’e i te ao a muri atu ».Mai te mea e tauturu te ’āparaura’a i te tumu parau nō te ’āpeni ’e te fa’ahina’arora’a ta’ata nō tōna iho ’āpeni, i tō ’outou ’utuāfare, e mea maita’i ïa te mau mātēria i muri nei : Dallin H. Oaks, « Te parau mau ’e te fa’anahora’a », Ensign ’aore rā Liahona, Nov. 2018, 25–28.

« Te fa’anahora’a hanahana nō te ’oa’oa ».Nō te tauturu i te ’utuāfare ’ia ’ite i te faufa’a rahi o te mau ’utuāfare i roto i te fa’anahora’a a te Metua i te Ao ra, e nehenehe ’outou e pāpa’i e toru tuha’a i ni’a i te hō’ē pāpie te orara’a hou te tāhuti nei, te orara’a tāhuti nei, ’e te orara’a i muri ae i te pohe. ’A mā’imi ’āmui i roto i te poro’i ’e ’a pāpa’i i ni’a i te pāpie te mea tā ’outou i ’apo mai nō ni’a i teie nau tuha’a nō te fa’anahora’a a te Atua. Nō te aha e mea faufa’a rahi te mau ’utuāfare nō te Atua ?

« E [ti’a] i te mau ’utuāfare ’ia tāhō’ēhia ē a muri noa atu ».

« Te ’oa’oa i roto i te orara’a ’utuāfare »Nō te tāu’aparau nō ni’a i te rāve’a ’ia noa’a te « ’oa’oa i roto i [tō ’outou] orara’a ’utuāfare », e nehenehe ’outou e hīmene ’āmui i te hō’ē hīmene nō ni’a i te ’utuāfare, mai te hīmene « E riro te ’utuāfare nei mai te Ao ra » (Te mau hīmene, no.°181). E aha te ha’api’ira’a tā tātou i ’apo mai i roto i te hīmene ’e te poro’i nō te ’utuāfare e riro i te fa’atae mai i te ’oa’oa rahi atu ā i tō tātou ’utuāfare ? Nāhea i te ha’apāpū ē, ’ua « fa’atumuhia [tō tātou ’utuāfare] i ni’a i te mau ha’api’ira’a a te Fatu ra ’o Iesu Mesia » ? E nehenehe e mā’iti hō’ē ha’api’ira’a tā ’outou e fa’a’ohipa i roto i teie hepetoma.

« Ha’apūai i te ’utuāfare ’ei niu mau nō te sōtaiete. »Nāhea Sātane i te tāmata i te ha’aparuparu i te mau ’utuāfare i roto i te ao nei ? E aha tā tātou e nehenehe e rave i tō tātou pae nō te ha’apūai i te mau ’utuāfare ? Nō te tahi mau mana’o, hi’o i te a’ora’a a te tuahine Bonnie L. Oscarson « E mau tino pāruru i te Poro’i nō te ’utuāfare » (Ensign ’aore rā Liahona, Mē 2015, 14–17).

Nō te mau mana’o hau atu nō te ha’api’ira’a i te mau tamari’i, hi’o i te arata’i nō teie hepetoma i roto Mai, pe’e mai—nō te Paraimere

Hīmene tei mana’ohia : « E riro te ’utuāfare nei mai te ao ra », Te mau hīmene, no°181.

Ha’amaita’i i tā ’oe iho tuatāpapara’a pāpa’ira’a mo’a

’Ite mai i te here o te Atua. ’Ua ha’api’i te peresideni M. Russell Ballard ē : « Te ’evanelia, e ’evanelia ïa nō te here—te here nō te Atua ’e te here nō te tahi ’e te tahi » (« God’s Love for His Children », Ensign, Mē 1988,59). ’A tai’o ai ’outou i te poro’i nō te ’utuāfare, e nehenehe e pāpa’i ’aore rā e tāpa’opa’o i te mau fa’a’itera’a nō te here o te Atua tā ’outou e tāpe’a ta’a ’ē mai.