Nō tō tātou tupura’a pae vārua ’e te ha’api’ira’a pae vārua
E ’īriti’hia mai ia tātou te mau mea māere o te Atua ’ia au noa i tōna hina’aro ’e ma te mana o te Vārua Maita’i.
’A vai tamari’i noa ai au, ’ua fāri’i tō’u mau metua i te hō’ē tao’a hōro’a ’o te ha’amāere iā’u ’e tō’u nei teina Davida. Teie tāo’a hōro’a ’o te tahi ïa mau pāpa’a parau ’auro na’ina’i tā te peropheta Iosepha Semita i fāri’i. ’Ia ha’amana’o vau, e 10 ’e hau atu ’api mētara tō teie hōho’a pāpa’a parau ’o te pāpa’ihia i ni’a iho. Terā rā, e ’ere roa atu te reira tā māua i tāu’a.
’Ua pa’ari māua ma te fa’aro’o i te mau ’ā’amu o te Fa’aho’i-fa’ahou-ra’a mai. ’Ua ’ite māua, ’e ’ua hīmene ho’i, i te Paraimere nō ni’a i te mau ’api ’auro ’o tei hunahia i roto i te hō’ē pae mou’a ’e ’o tei hōro’ahia e Moroni ia Iosepha Semita.1 Tē rahi noa ra te ānoenoe i roto i tō māua nei ferurira’a tamari’i, hō’ē noa rā ’ohipa tā māua e hina’aro mau ’ia ’ite : e aha tei pāpa’ihia i ni’a i te mau tuha’a na’ina’i o te mau ’api ’auro tei tāpirihia e nā piti tuha’a mētara na’ina’i ?
’Ua vai noa te mau ’api i ni’a i te hō’ē ’aira’amā’a ’e ’ua rahi roa tō māua ānoenoe e’ita e nehenehe fa’ahou. Noa atu ā ’ua ’ite pāpū māua e ’ere teie mau ’api tā Moroni i hōro’a atu, ’ua hina’aro rā māua e ’ite i te tuha’a o tei tāpirihia. E rave rahi taime, ’ua tāmata māua tō’u taea’e ’ia fa’a’ohipa i te mau tipi pata, te mau punu tāipu tahito, ’e te tahi atu mau tauiha’a nō te tāmata i te ’ite e aha tō roto—’aita rā i nava’i nō te ha’afati i te mau tuha’a mētara na’ina’i. ’Ua māramarama rā māua nō te ’orera’a e vaiiho i te tahi ’ohipa e ’itehia mai tā māua ’ohipa ma’ama’a o tō māua ānoenoe tamari’i. ’Ua ’ino’ino māua ’e ’ua ’aupari ato’a i te ’itera’a ē, ’aita tā māua tāmatara’a nō te « pana i te mau pāpa’a parau » i manuia.
Tae i teie mahana, ’aita vau i ’ite e aha—mai te mea tē vai ra—tei hunahia i roto i teie mau tuha’a i tāpirihia. Te mea ha’amā rā i roto i teie ’ā’amu tā māua, tae roa mai i teie mahana, ’aita roa atu vau i ’ite i tei pāpa’ihia i ni’a i te tuha’a o te mau ’āpī mētara e ti’a ’ia tai’o. Tā’u noa e nehenehe e feruri, tō roto i teie mau ’āpī te mau ’ā’amu o te Fa’aho’i-fa’ahou-ra’a ’e te mau ’itera’a pāpū o Iosepha Semita, o nā ’ite to’otoru ’e o nā ’ite to’ova’u, ’o tei ’ite i te pāpa’a parau tā Moroni i hōro’a.
Mai te haāmanira’ahia teie ao, ’ua hōro’a tō tātou Metua i te Ao ra i te fa’aterera’a, te arata’ira’a, te ha’amāramaramara’a i tāna mau tamari’i nā roto i te mau peropheta. ’Ua ha’aputuhia tāna mau parau e teie mau peropheta ’e ’ua fa’ahereherehia ’ei pāpa’ira’a mo’a nō tō tātou tupura’a ’e te ha’api’ira’a. ’Ua fa’ata’a mai ’o Nephi mai teie te huru :
« Nō te mea ’ua au tō’u vārua i te parau mo’a i pāpa’ihia ra, ’e tē feruri nei tō’u ’ā’au i te reira, ’e te pāpa’i nei ho’i i te reira ’ei ha’api’ira’a ’e ’ei faufa’a nā tō’u mau tamari’i ».
« Inaha, tē popou nei ta’u vārua i te mau mea o te Fatu ; ’e tē feruri noa nei ā ta’u ’ā’au i te mau mea tā’u i hi’o ’e tā’u i fa’aro’o ra ».2
Nā ni’a i te reira, i roto i te mau pu’e tau ma’iri ’e i teie tau tu’ura’a nō te ’īra’a o te ’evanelia, ’ua ha’amaita’ihia te mau melo o te ’Ēkālesia a te Fatu nā roto i te tauturura’a tāmau mai roto mai i te hoara’a o te Vārua Maita’i ’o te tauturu i tō tātou tupura’a pae vārua ’e te ha’api’ira’a pae vārua.
Nō te mea ’ua ’ite au i te huru ha’apa’o o tō’u nei teina, ’ua mana’o vau ē, e mea pāpū ’ua tai’o ’oia i te mau parau ’o tei pāpa’ihia i ni’a i te mau hōho’a pāpa’a parau i roto i te fare o tō mātou mau metua. Terā rā, ’aita vau i ha’apa’o i te mau parau mau māramarama ’e te faufa’a, ’ua ha’apūai rā vau i ta’u tauto’ora’a i ni’a i te ma’imira’a i te mau ’ohipa ’aita ā i heheuhia mai.
Te mea oto, i te tahi taime, e nehenehe tō tātou tupura’a ’e te ha’api’ira’a ’ia fa’ataupupūhia ’aore rā e ha’amauhia e te hō’ē hina’aro tano ’ore ’ia « pana i te mau pāpa’a parau ». E nehenehe te reira mau ’ohipa e arata’i ia tātou ’ia ’imi i te tahi mau ’ohipa ’o tei ’ore e ta’ahia i te reira taime, ’e i te roara’a o terā taime, e tāu’a ’ore tātou i te nehenehe o te mau parau mau i fa’ata’ahia nō tātou ’e nō tō tātou huru orara’a—terā mau parau mau tā Nephi i parau tei pāpa’ihia ’ei ha’api’ira’a e ’ei faufa’a nō tātou.
’Ua ha’api’i ’o Iakoba, te taea’e o Nephi : « Inaha, o te mea māere e te ta’a ’ē ho’i te mau ’ohipa a te Fatu ra. Te mea ti’a ’ore ’ia ’imi ’e te hōhonu o te parau mo’e nāna ra ē, ’e ’aore roa e ti’a i te ta’ata ’ia ’imi pāpū i tāna ato’a ra mau rāve’a. »3
Tē ha’api’i nei te mau parau a Iakoba ē, ’aita tātou e manuia ’ia « pana i te mau pāpa’a parau » ’aore rā ’ia fa’ahepo i te mau parau mo’e a te Atua ’ia heheuhia mai ia tātou. E ’īriti’hia mai ia tātou te mau parau ’aro a te Atua mai te au noa i tōna hina’aro ’e nā roto i te mana o te Vārua Maita’i.4
Tē parau fa’ahou ra Iakoba :
« ’Aita ho’i e ta’ata tei ’ite i tāna mau haere’a, maori rā ’ia heheuhia mai ïa iāna ra ; ’e tenāna, e au mau taea’e,’eiaha ’outou e vahavaha i te mau parau heheu a te Atua ra.
« E inaha ho’i, nō roto i te mana o tāna ra parau i tae mai ai te ta’ata i ni’a i te fenua nei… Inaha, e aha e ’ore e ti’a ai ’ia fa’aue i te fenua, ’e te mau ’ohipa i hāmanihia e tōna ra rima i ni’a i te fenua ra, mai tei au i tōna ra mana’o ’e tōna ra hina’aro ho’i ?
« ’E tenāna, e au mau taea’e, ’eiaha ’outou e tītau ’ia fa’aa’o atu i te Fatu, ’ia fāri’i mai rā i tāna ra a’ora’a mai. »5
Nō te ’ite i te mau parau ’aro a te Atua ’aore rā te reira mau huru ’ohipa ’o te nehenehe noa e ’itehia nā roto i te heheura’a, e ti’a ia tātou ’ia pe’e i te huru o Nephi, ’o tei parau, « e ta’ata ’āpī roa vau, ’o Nephi, i reira ra, ’āre’a e tino rahi tō’u, ’e e hina’aro rahi ho’i i te ’ite i te mau parau ’aro a te Atua ra, i pi’i hua atu ai au i te Fatu ra ; ’e inaha, ’ua fā maira ’oia iā’u ra, ’e ’ua ha’amarū ho’i i ta’u ’ā’au ; ’e ’ua fa’aro’o ihora vau i te mau parau ato’a i parauhia e tō’u ra metua ».6 Nā te Fatu iho i fa’ata’a mai i muri iho ē, ’ua fa’atupu Nephi i te fa’aro’o, ’ua ’imi māite ho’i ma te ’ā’au ha’eha’a ’e ’ua ha’apa’o i tāna mau fa’aue.7
Tē vai nei i roto i tā Nephi ’imira’a ’ite (1) te hina’aro mau, (2) te ha’eha’a, (3) te pure, (4) te ti’aturira’a i te peropheta, ’e te fa’atupura’a i te (5) fa’aro’o, (6) te tu’utu’u ’ore, ’e (7) te ha’apa’o. E mea ta’a ’ē rahi roa teie huru ’imira’a i tā’u « panara’a pāpa’a parau » ’aore rā tā’u tāmatara’a i te fa’ahepo ’ia māramarama i te mau ’ohipa ’o te heheu-noa-hia mai mai te au i te tārena a te Fatu ’e nā roto ho’i i te mana o te Vārua Maita’i.
I teie ’anotau, ’ua tae roa tātou i te tīa’ira’a i teie ’ite ’ia nehenehe ’e ’ia ti’a roa ho’i i te noa’a mai i terā iho taime ; ’e e ’ore ana’e te mau ha’amāramaramara’a e ’ite-’ōhie-hia mai ’aore e noa’a-’ōhie-hia mai, pinepine te reira i te fāri’i-’ore-hia ’e te ti’aturi-’ore-hia. Nō te rahi o te mau parau, e hahi te tahi pae i te ti’aturi rahi a’e i te mau parau e noa’a mai noa atu ’aita i ’itehia nō hea mai te reira, ’aita atura ïa e tūru’ira’a i ni’a i te fa’anahora’a a te Fatu nō te fāri’ira’a i te heheura’a nō ’oe iho. ’Ua nehenehe ia Iakoba ’ia pāpa’i nō tō tātou ’anotau ’a parau ai ’oia : « Inaha rā, e mau ta’ata ’ā’au ’eta’eta ho’i [rātou], ’ua vahavaha rātou i te mau parau pāpū… ’e ’ua tītau atura i te mau mea ’aore i ti’a ia rātou ’ia ’ite. E teie nei, nō tō rātou matapō ra, ’o tei tae i ni’a ia rātou nō te tītaura’a i te mau mea ’aore i ti’a ia rātou ’ia rave ra, ’ia ma’iri ai rātou e ti’a ai ; ’ua rave-’ē-hia ho’i e te Atua tōna ra mea e ’itea-pāpū-hia ia rātou, ’e ’ua hōro’ahia mai ia rātou te mau mea e rave rahi tei ’ore i hāro’aro’ahia e rātou, ’o rātou i hina’aro i te reira. »8
E mea ta’a ’ē te parau a’o a te peresideni Dieter F. Uchtdorf. ’Ua parau ’oia nō te mau misiōnare, ’āre’a rā e tano tāna mau parau i te mau ta’ata ato’a ’o tē tītau nei i te parau mau pae vārua. Tē parau nei ’oia : « ’Ia… roa’a ana’e i te mau misiōnare te fa’aro’o ia Iesu Mesia, e nava’i tō rātou ti’aturi i te Fatu nō te ha’apa’o i tāna mau fa’auera’a—noa atu ā, ’aita rātou i ’ite i te mau tumu ato’a nō te reira. E ’itehia tō rātou fa’aro’o i roto i tā rātou tūtavara’a ’e te ’ohipa. »9
I te ’āmuira’a rahi nō ’ēperēra i ma’iri iho nei, ’ua ha’amāramarama ’o Elder Dallin H. Oaks : « Tē fa’aitoito nei te ’Ēkālesia [’ia hōhora pāpū i te mau pāpa’a parau e vai ra ia tātou], terā rā, i muri a’e i te mau mea ato’a e nehenehe tā tātou e pia, i te tahi taime, tē vai nei te tahi mau melo tō tātou e mau uira’a tā rātou ’o te ’ore e roa’a i te fa’atītī’aifaro nā roto i te tuatāpapara’a… Tē vai ra te tahi mau mea e roa’a noa ’ia [ha’api’i mai] nā roto i te fa’aro’o ».10
’Ua ha’api’i te mau peropheta i muta’a ra i te hō’ē ā parau tumu, ’o tē fa’a’ite nei ē, ’aita te huru ta’ata i taui i roto i te tau ’e e vai noa te hōho’a a te Fatu nō te ha’api’ira’a. ’A hi’o na i teie maseli o te Faufa’a Tahito : « E ti’aturi ia Iehova ma tō ’ā’au ato’a ra ; ’eiaha rā e ti’aturi i tō ’oe ihora ha’apa’o ».11
’Ei ’auvaha nā te Fatu, ’ua ha’amāramarama ’o Isaia : « Mai te ra’i nei ho’i e teitei rahi tōna i tō te fenua ; ’oia ato’a tō’u ra haere’a, e teitei ïa i tō ’outou haere’a, ’e tō’u ra mau mana’o i tō ’outou ra mau mana’o ».12
’Ua hōro’a ato’a ’o Nephi i te tahi ’ite ’a parau ai : « E te Fatu, ’ua ti’aturi au ia ’oe, ’e e ti’aturi au ia ’oe ē a muri noa atu ».13
E tītau te fa’aro’o ’e te ti’aturi i te Fatu ’ia fāri’i tātou ē, tō ni’a a’e tōna pa’ari i tō tātou. E ti’a ato’a ia tātou ’ia fāri’i ē, tē hōro’a nei tāna fa’anahora’a i te fāito rahi roa a’e nō te tupura’a pae vārua ’e te ha’api’ira’a pae vārua.
’Aita roa a’enei i anihia ia tātou ’ia « ’ite mau i te mau mea e vai nei » i roto i teie orara’a tāhuti. ’Āre’a rā, ’ua anihia ia tātou ’ia « tīa’i i te mau mea ’itea-’ore-hia ra, ’o tei ti’a ».14
Noa atu te rahi o te fa’aro’o o Nephi, ’ua fā’i ’oia i te ’ōti’a o tōna māramarama ’a pāhono ai ’oia i te melahi tei ani iāna : « ’Ua ’ite ānei ’oe i te aroha o te Atua ? » Pāhono atura Nephi : « ’Ua ’ite au ē, ’ua aroha ’oia i tāna mau tamari’i ; ’āre’a rā, ’aita vau i ’ite i te aura’a o te mau mea ato’a ».15
Ho’ē ā huru i tō Alama paraura’a i tāna tamaiti ’o Helamana : « ’E teienei, ’aore taua mau parau ’aro nei i fa’a’ite-pāpū-hia mai iā’u nei ; ’e nō reira ’ātīrā i reira. »16
Tē fa’a’ite nei au i tō’u nei ’itera’a pāpū ē, ’ua here tō tātou Metua i te Ao ra i tāna mau tamari’i, ’āre’a rā, mai ia Nephi ’e ’o Alama, ’aita vau i ’ite i te aura’a o te mau mea ato’a. ’Aita ato’a e tītauhia iā’u ’ia ’ite i te mau mea ato’a ; ’ātīrā ato’a no’u i reira ’e e ti’aturi au ma te fa’aoroma’i i te Fatu, « i ’ite ai au ē, e parau mau teie mau mea nei ; nō ’oe ato’a teie mau mea nei i ’ite ai ’oe ē, e parau mau iho ā…
« ’Ua tu’uhia mai te mau parau i pāpa’ihia i mua ia ’oe na, ’oia ïa, ’e ’ua fa’a’ite māite te mau mea ato’a ē, tē vai ra te Atua ; ’oia iho ā ïa, te fenua, ’e te mau mea i te ao nei, ’e tōna tānīnītōra’a ; ’e nā te mau feti’a i tā rātou tānīnītōra’a, nā tō rātou ’ē’a i ha’apa’ohia ra i fa’a’ite mai ē, tē vai ra Tei Hāmani i te mau mea ato’a ra ».17
’A fāri’i ai tātou e mau hāmanira’a tātou nō te hō’ē Metua i te Ra’i pa’ari ’e te mo’a, « inaha », e aha ïa e ’ore ai e fa’ati’a iāna ’ia arata’i i tō tātou tupura’a pae vārua ’e te ha’api’ira’a pae vārua « mai te au i tōna ra mana’o ’e tōna ra hina’aro ho’i » ’eiaha rā tō tātou iho ?18
Tē ora nei ’oia. ’O Iesu Mesia te Fānau Tahi ’e te Tāra’ehara o te mau ta’ata ato’a. Nō tō te Fatu tāra’ehara hope, tē mau nei ’oia i te pa’ari ’e te ’ite nō te arata’i ia tātou i teie mau mahana hope’a nei. ’O Iosepha Semita tāna peropheta, mā’itihia nō te fa’aho’i fa’ahou i tōna bāsileia i ni’a i te fenua nei i tōna ’īra’a. ’O Thomas S. Monson tāna peropheta ora ’e te ’auvaha parau i teie mahana. ’O tā’u ïa e fa’a’ite pāpū atu nei nā roto i te i’oa o Iesu Mesia, ’āmene.