Te fa’anahora’a rahi nō te fa’aorara’a.
’Ua ’ite au ē ’ia tātarahapa mau ana’e tātou e mā roa tā tātou mau hara---’aita roa e vai fa’ahou nei !
I te tahi avaʻe na mua i tō te peresideni Boyd K. Packer fa’aru’era’a mai, ’ua fa’aro’o te mau taea’e nō te autahu’ara’a rahi ’e te feiā fa’atere nō te pupu tauturu i te a’ora’a faufa’a roa nō ō mai iāna ra. ’Aita vau i fa’aea i te feruri i te mau mea tāna i parau. ’Ua fa’a’ite ’oia ē, ’ua ’imi ’oia i roto i tōna orara’a tā’āto’a i te tahi tāpa’o nō te mau hara o tāna i rave ’e i tātarahapa ’e ’aita roa e vai fa’ahou nei. ’Aita te reira i ’ite-fa’ahou-hia. ’Ua fa’aʻite pāpū mai ’oia ē, na roto i te tusia tāra’ehara a tō tātou Fa’aora here, o Iesu Mesia, ’e na roto i te tātarahapara’a mau, ’ua mā roa tāna mau hara, mai te mea ra ’aita roa te reira i tupu. I muri iho, ’ua fa’aue mai te peresideni Packer ia mātou, te feiā fa’atere, i taua mahana ra, ’ia fa’a’ite pāpū ē e parau mau teie nō tātou tāta’itahi o tei tātarahapa mau
’Ua ’ite au i te hō’ē ta’ata o tei topa i roto i te hara morare e rave rahi matahiti i ma’iri. Nō te tau maoro, ’ua ha’amā teie ta’ata ’e ’ua ha’ape’ape’a rahi roa nō te fa’a’ite atu i te reira i tāna vahine fa’aipoipo ’e i tōna feiā fa’atere nō te autahu ara’a. ’Ua hina’aro ’oia e tātarahapa i te tā’āto’ara’a o tāna mau hara terā rā, ’ua fa’a’ite mai ’oia ē, ’ua ineine ’oia i te fa’aru’e i tōna fa’aorara’a mure ’ore nō te mea e fāri’i tāna vahine fa’aipoipo ’e tāna mau tamari’i i te oto rahi, te ha’amā ’e te tahi atu mau fa’ahopeara’a ’ia fā’i ’oia i tāna mau hara.
’Ia hara ana’e tātou, e tamata pinepine Sātane i te fa’a’amu’amu ia tātou ē, te mana’ora’a ia vetahi ’ē ō te pārurura’a ïa ’ia ’ore rātou ’ia māuiui na roto i te ’itera’a i tā tātou mau hara, mai te fā’ira’a i mua i tō tātou ’episekōpo, o te nehenehe e ha’amaita’i i tō tātou orara’a na roto i te mau tāviri nō te autahuʻara’a ’ei ha’ava nō Iseraela. ’Āre’a rā, te parau mau, ’oia ho’i te mana’ora’a ia vetahi ’ē ’e te ’ohipa mai te Mesia te huru o te fā’ira’a ïa ’e te tātarahapa. O tera te fa’anahora’a rahi nō te fa’aorara’a a tō tātou Metua i te Ao ra.
I te pae hope’a, ’ua fā’i teie ta’ata here i tāna mau hara i tāna vahine fa’aipoipo ha’apa’o maita’i ’e i tōna feiā fa’atere o te ’Ēkālesia, ma te fa’a’ite i tōna ha’amā hōhonu. Noa atu ē o te ’ohipa fifi roa a’e o tāna i rave, ’ua tupu mai te māmā, te hau, te here, te māuruuru nō tō tātou Fa’aora, ma te ’itera’a ē ’ua ’amo te Fatu i tāna hōpoiʻa teimaha ’e o tei hōro’a mai i te ’oa’oa hau atu ’aita e nehenehe e parau, noa atu ā te mau hope’ara’a ’e tōna ananahi.
’Ua pāpū iāna ē, ’ua māuiui tāna vahine fa’aipoipo ’e te mau tamarii---’e ’ua na reira rātou ; ’e ’ua ravehia te hō’ē ’āpo’ora’a fa’atītī’aifarora’a ’e ’ua ha’amāuruuruhia i tōna pi’ira’a----’e, ’ua na reirahia. ’Ua pāpū iāna e ’oto, e māuiui ’e e ’iriā tāna vahine fa’aipoipo---e ’ua na reira ’oia. ’E ’ua ’ite pāpū ’oia ē, e fa’aru’e mai tāna vahine fa’aipoipo iāna ma te rave ato’a atu i te mau tamari’i---’aita rā te vahine i na reira.
I te tahi taime e haere roa te hara i te fa’ata’ara’a, ’e tei te huru o te mau ’ohipa tei tupu, ē e mea tītauhia. ’Āre’a rā ma te māere o teie ta’ata, ’ua ’āpā tāna vahine fa’aipoipo iāna ’e ’ua tūtava e tauturu iāna mai tāna e nehenehe. Hau atu ā, ’ua nehenehe iāna ’ia fa’a’ore i te hapa a tāna tāne fa’aipoipo. ’Ua fāri’i te vahine fa’aipoipo i te mana fa’aora o te Tāra’ehara a te Fa’aora nōna. Tau matahiti i muri mai, ’ua vai pūai ’e te ha’apa’o maita’i teie nā ta’ata fa’aipoipo ’e tā rāua nā tamari’i e toru. Te tāvini nei te tāne ’e te vahine i roto i te hiero ’e e fa’aipoipora’a nehenehe tō rāua nō te here. Te ’itera’a pāpū hōhonu o teie ta’ata ’e tōna here ’e te ’ā’au mēhara nō te Fa’aora ’e tāna Tāra’ehara e ’itehia te reira i roto i tōna orara’a.
’Ua fa’a’ite pāpū o Amuleka, « ’ua hina’aro vau ia haere mai ʼoutou, ʼe ’ia ʼore ʼoutou ’ia faʼaetaeta i tō ʼoutou ʼāʼau ; inaha hoʼi … ’ia tātarahapa ʼoutou … e faʼatupu-vave-hia te rāveʼa rahi o te ora nō ʼoutou ».1
’A tāvini ai au i piha’i iho i tō’u hoa fa’aipoipo ’ei peresideni nō te hō’ē misiōni, ’ua haere mātou i te taura’a manureva nō te ti’i i te hō’ē pupu misiōnare rahi hō’ē po’ipo’i. ’Ua haru tō māua mata i ni’a i te hō’ē misiōnare ta’a ’ē mau. E hōho’a ’oto tōna ’e te ha’ape’ape’a. ’Ua hi’opo’a māite māua iāna i te reira avatea. I te ahiahi, ’ua fā’i teie taure’are’a i te hō’ē hara tahito, ’e ’ua fa’aoti tōna feiā fa’atere e fa’aho’i iāna i te fare. Noa atu ā ’ua ’oto māua nō te mea e ’ere ’oia i te mea parau ti’a ’e ’aita i tātarahapa na mua a’e i tōna haerera’a mai i te misiōni, ’āre’a rā tō māua terera’a i te taura’a manureva, ’ua ha’apoupou mau māua iāna ma te here i tōna itoito nō te haerera’a mai i te misiōni, ’e ’ua fa’aitoito ’ia fa’aea piri noa māua iāna.
’Ua ha’amaita’ihia teie tamaiti ’āpī rahi e nā metua fa’ahiahia, te feiā fa’atere rahi o te autahu’ara’a, ’e te hō’ē pāroita turu nō te here. I muri mai hō’ē matahiti i te ’ohipa pūaira’a i tōna tātarahapara’a mau ’e i te fāri’ira’a i te Tāra’ehara a te Fa’aora, ’ua nehenehe iāna e ho’i mai i roto i tā mātou misiōni. E mea fifi nō’u ’ia fa’a’ite i te mana’o ’oa’oa tā māua i fāri’i ’a haere atu ai māua e ti’i iāna i te taura’a manureva. ’Ua ’ī ’oia i te vārua, te ’oa’oa, te ti’aturi i te Atua, ’e ma te hina’aro pūai ’ia rave i te hō’ē misiōni ma te parau ti’a. Ua riro ’oia ’ei hō’ē misiōnare hau atu i te fa’ahiahia, ’e i muri iho, ’ua haere atu māua ’e tō’u hoa fa’aipoipo i tōna ’ōro’a ta’atira’a i te hiero.
I te tahi pae, ’ua ’ite au i te hō’ē atu misiōnare o tei ti’a ’ia fa’aho’ihia i te fare nō tāna mau hara tei ’ore i fā’i na mua a’e i tāna misiōni, ’e o tei rave i tāna iho fa’anahora’a ma te rave pūai i te ’ohipa i roto i tāna tau misiōni, ’e ’ua fā’i i tōna peresideni misiōni tau mahana noa hou ’oia ’a fa’aoti ai i tāna tau misiōni. ’Ua ’ere ’oia i te ’oto e au i te Atua ’e ’ua tamata i te fa’a’ore i te fa’anahora’a tā tō tātou Fa’aora here i pūpū mai nō tātou tāta’itahi.
’A tāvini ai māua i roto i tā māua misiōni, ’ua ’āpe’e atu vau i tō’u hoa fa’aipoipo nō te uiui i te hō’ē ta’ata nō te bāpetizora’a. ’A rave ai tō’u hoa fa’aipoipo i te uiuira’a, ’ua tia’i au i rāpae ’e te mau tuahine misiōnare o tei ha’api’i i teie ta’ata. I te otira’a te uiuira’a, ’ua parau tō’u hoa fa’aipoipo i te mau misiōnare ē, e nehenehe teie ta’ata e bāpetizohia. ’Ua ta’i maoro teie ta’ata, ’ua fa’ata’a mai ’oia ē, ’ua pāpū roa iāna ē tē mau hara rahi o tāna i rave i roto i tōna orara’a e fa’a’ore ïa te reira i tōna bāpetizora’a. E mea varavara tō’u rirora’a ’ei ’ite nō te ’oa’oa ’e te poupou o te hō’ē ta’ata o tei fa’aru’e i te ao pōiri, ’e ’ia tomo atu i roto i te māramarama mau o ta’u i ’ite i te reira mahana.
’Ua fa’a’ite pāpū mai o Elder D. Todd Christofferson ē :
« Ma te fa’aro’o i [tō tātou] Fa’aora hāmani maita’i e Tōna mana, e riro ïa te hepohepo ’ei tia’ira’a. E taui te ’ā’au ’e te mau hina’aro o te ta’ata, ’e e riro te hara tei auhia i mua ra ’ei mea au-’ore-hia …
« … Noa atu te teimaha o te mau tītaura’a nō te tātarahapara’a, e momihia te reira i roto i te ’oa’oa nō te fa’a’orera’a hara ».2
Tē fa’aha’amanaʻo mai nei teie mau ’itera’a iā’u ia Enosa i roto i te Buka a Moromona o « tei pi’i hua atu i [te Fatu] ma te pure ’ū’ana », ’a fa’aro’o atu ai i te hō’ē reo i te paraura’a mai ’ē, « Enosa, ’ua fa’a’orehia tā ’oe mau hara …
« ’Ua ’ite hoʻi au o Enosa ē, ’aita e ti‘a i te Atua ’ia parau i te parau ha’avare, ’ua horoi-’ē-hia ta’u mau hara.
« ’Ua parau atura vau : E te Fatu, nāheahia te reira ?
Parau maira ’oia iā’u : Nō tō fa’aro’o i te Mesia … ’A haere na, ’ua ora ’oe i tō fa’aro’o ».3
’A fa’aineine ai au i teie a’ora’a, ’ua hina’aro vau e fāri’i i te hō’ē ha’amāramaramara’a nāhea ta’u mau mo’otua i te hāroaroa i te tātarahapa ’e e aha te mana’o e roa’a mai ia rātou nō ni’a i te Fa’aora, nō reira ’ua ani au i tā māua mau tamari’i ’ia ani ia rātou i te mau uira’a i muri nei. ’Ua putapū roa tō’u ’ā’au i te mau pāhonora’a a tā māua mau mo’otua.
E aha te tātarahapa ? « ’Ia ta’iri ana’e ’oe i te hō’ē ta’ata, e parau ’oe ’ua hape au ’e e tauturu atu ».
E aha tō ’oe huru ’ia tātarahapa ana’e ’oe ? « E nehenehe ’oe e ’ite Iāna i roto ia ’oe, ’e ’ia fāri’i i Tāna tāmāhanahanara’a, ’e e fāri’i au i te ’oa’oa, ’e e haere ē atu te ino ».
E aha te mana’o e roa’a mai ia ’oe nō ni’a ia Iesu ’e te Metua i te Ao ra ’ia tātarahapa ana’e ’oe ? « Tē mana’o e roa’a mai iā’u, ’ua ’ite Iesu i te faufa’a o tōna tusia tāra’ehara ’e ’ua ’oa’oa ’Oia e nehenehe fa’ahou tātou e ora i piha’i iho iāna.
Nō te aha ’ua hina’aro Iesu ’e te Metua i te Ao ra iā’u ’ia tātarahapa ? I roto i te mau parau a tā’u mo’otua tamāhine e 17 matahiti : « Nō te mea ’ua here rāua iā’u. ’Ia ti’a ’ia nu’u i mua ’e ’ia riro mai ia Rāua ra te huru, tītauhia ia tātou ’ia tātarahapa. ’Ua hina’aro tāmau ato’a tātou i te Vārua ia tātou ra, nō reira e ti’a ia tātou ’ia tātarahapa i te mau mahana ato’a nō te fāri’i i Tāna auhoara’a fa’ahiahia. ’Ua māuruuru roa vau ia Rāua ».
’A fa’aro’o ai Brynlee fātata e maha matahiti i teie mau uira’a, ’ua parau ’oia, « ’aita vau i ’ite, e papa. E ha’api’i mai ’oe iā’u ».
I roto i te ’āmuira’a rahi i ma’iri a’e nei, ’ua fa’ahiti o Elder Jeffrey R. Holland : « Noa atu tō ’outou taere i tō ’outou mana’ora’a, noa atu te mau rāve‘a tei ’erehia e ’outou, noa atu te rahira’a o te mau hape tā ’outou i rave… ’aore rā noa atu tō ’outou rātere ātea i te fare, te ’utuāfare ’e te Atua, tē fa’a’ite pāpū atu nei au ē, ’aita ’outou i tere ātea ’ē roa atu i te aroha o te Atua. E’ita e nehenehe ia ’outou ’ia paremo hōhonu roa i te fāito e ’ore te māramarama mure ’ore o te Tāra’ehara a te Mesia e tae’a ».4
’Āuē ia tō’u hina’aro nō te tāta’itahi o tā’u mau tamari’i, mau mo’otua, ’e nō ’outou tāta’itahi---tō’u mau taea’e ’e mau tuahine, ’ia ’ite I te ’oa’oa ’e te ha’afātatara’a atu i te Metua i te Ao ra ’e i tō tātou Fa’aora ’a tātarahapa ai tātou i tā tātou mau hara ’e mau paruparu i te mau mahana ato’a. E hina’aro te tamari’i ti’a’au tāta’itahi a te Metua i te Ao ra i te tātarahapa. E aha te mau hara e ti’a ia tātou ’ia tātarahapa ? E aha tē tāpe’a nei ia tātou ? E aha te vāhi e ti’a ia tātou ’ia ha’amaita’i ?
’Ua ’ite au, mai tā te peresideni Packer i fa’a’ohipa ’e i fa’a’ite pāpū ē, ’ia tātarahapa mau ana’e tātou e mā roa tā tātou mau hara---’aita roa e vai fa’ahou nei ! ’Ua ’ite ihoa vau te here, te ’oa’oa, te māmā, ’e te ti’aturi i te Fatu ’a tātarahapa mau ai au.
Nō’u nei, te temeio rahi roa a’e o teie nei ao, e ’ere i te ta’a-’ē-ra’a te miti Uteute, te fa’anu’ura’a o te mou’a, ’aore rā te ’orera’a te ma’i o te tino. Te temeio rahi roa a’e e tupu ’ia ha’afātata atu ana’e tātou ma te ha’eha’a i tō tātou Metua i te Ao ra, ma te pure tu’utu’u ’ore atu ’ia fa’a’orehia mai ’e i muri iho ’ia tāmāhia teie mau hara na roto i te tusia tāra’ehara a tō tātou Fa’aora. Na roto i te i’oa mo’a o Iesu Mesia ra, amene.