Te feia rave ohipa i roto i te ô vine
Na Elder Jeffrey R. Holland
No te Pŭpŭ no te Tino Ahuru ma Piti Aposetolo
A faaroo na i te faaurûraa a te Varua Mo‘a e parau nei ia outou i teie nei, i teie ihoa taime, e e ti‘a ia outou ia farii ite horo‘araa no taraerahara a te Fatu ra ia Iesu Mesia.
No ni‘a i te mau piiraa e te mau haamauruururaa ta te Peresideniraa Matamua i faaite iho nei, te hinaaro nei au na ni‘a i te i‘oa o tatou paatoa e parau atu e, e haamana‘o e e here noa matou ia ratou tei tavini itoito, mai ta matou e here e e farii poupou nei i te feia tei piihia no te tavini i roto i te mau ti‘araa. Mauruuru rahi ia outou tata‘itahi.
Te hinaaro nei au e paraparau no ni‘a i te parabole a te Faaora no ni‘a i te hoê taata fare « o tei haere i rapae au i te poipoi roa e tarahu i te rave ohipa ». I muri a‘e i te faaohiparaa i te pŭpŭ matamua i te hora 6 i te poipoi, ua ho‘i atu oia i te hora 9, e i te hora 12, e i te hora 3 i te avatea no te tihepu faahou â te rave ohipa no te rû o te ohipa ootiraa. Te parau nei te papa‘iraa mo‘a e ua ho‘i mai no te taime hopea, « i te ahuru ma hoê o te hora ra» (fatata i te hora 5 i te ahiahi), e ua tihepu i te pŭpŭ hopea. Hoê noa iho hora i muri mai, ua putuputu mai te taatoaraa o te rave ohipa no te farii i ta ratou moni ohipa. Ma te maere rahi, ua farii te taatoaraa o te rave ohipa i te hoê â moni ohipa noa’tu te mau hora taaê no te ohiparaa. Ua riri ‘oi‘oi roa te feia tei tihepu-matamua-hia, na ô maira, « Hoê roa ra hora a teie feia i te ohiparaa, e ua faafaito oe ia ratou ia matou nei, tei faaoromai i te rohirohi e te veavea o te mahana ».1 I to outou tai‘oraa i teie parabole, peneia‘e ua mana‘o outou mai teie feia rave ohipa e, te vai ra te hoê ohipa hape i ravehia i ô nei. E paraparaurii ïa vau no ni‘a i taua mana‘o ra.
A tahi, e mea faufaa rahi roa ia ite e aita roa‘e hoê i rave-ino-hia. Ua faaau te feia rave ohipa matamua i te taatoaraa o te moni ohipa no taua mahana ra e ua farii ho‘i i te reira. E nehenehe noa ia’u ia mana‘o e, ua mauruuru ratou i te noaaraa te ohipa. I te tau o te Faaora, aita’tu e ohipa ta te hoê taata e to’na utuafare e nehenehe e rave maori râ ia ora i ni‘a i te moni tei noaa ia ratou i taua mahana ra. Mai te mea eita outou e rave i te ohipa aore râ e faaapu aore râ e tai‘a aore râ e hoo, eita paha ïa outou e tamaa. No te iti o te ohipa e te rahi hoi o te rave ohipa, ua fana‘o rahi ïa teie mau taata matamua tei ma‘itihia i roto i te pŭpŭ rave ohipa i taua po‘ipo‘i ra.
Oia mau, ahani ua ti‘a ia tatou ia aroha, e aroha ïa tatou i te mau taata tei ore i ma‘itihia no te mea e utuafare atoa hoi to ratou e ti‘a ia faaamu e ia faahu. E au ra aita ratou e manuia nei i te imiraa i te ohipa. E i te mau tere atoa o te taata tiaau i te roaraa o te mahana, ua ite noa ratou i te tihepu-raa-hia te tahi taata ê atu.
I te hopea râ o te mahana, ua ho‘i mai te taata fare i te paeraa o te taime ma te hoê faanahoraa faahiahia i te pae hopea! No to ratou faarooraa e, e aufau-ti‘a-hia ratou, ua farii teie mau rave ohipa hopea tei paruparu hoi te mana‘o, i te ohipa ma te ore e ite eaha ra te moni ohipa, ma te ite e, e mea maitai a‘e te tahi mea i te ore roa, o ta ratou ho‘i i ora mai e tae noa mai i teie taime. I muri iho a putuputu ai ratou no te aufauraa, ua maere rahi ratou i te fariiraa i te hoê â moni ohipa mai te tahi atu mau rave ohipa. Auê ïa to ratou maere rahi e to ratou mauruuru rahi e ! Aita paha ratou i ite a‘enei i taua huru aroha ra i to ratou raveraa i te ohipa.
I to’u hi‘oraa, e ti‘a i te amuamuraa o te feia rave ohipa matamua ia hi‘ohia mai te au i teie tatararaa o teie aamu. Mai ta te taata fare i parau ia ratou i roto i te parabole (e te faahuru ê rii nei au i ta’na parau) : « E to’u mau hoa, aita vau i rave i te ohipa tano ore ia outou. Ua farii outou i te moni ohipa no teie mahana, e moni maitai hoi. Ua oaoa outou ua noaa ia outou te ohipa, e te oaoa nei au no ta outou huru taviniraa. Ua aufau-ti‘a-hia outou. A rave i ta outou moni e a oaoa i te haamaitairaa. E no vetahi ê, e mea papû ïa, e ti‘amâraa to’u i te faahohipa i te mea ta’u e hinaaro e ta’u iho moni ». E teie uiraa hohonu i te mau taata atoa i taua taime ra aore râ i teie taime tei ti‘a i te faaroo i te reira : « No te aha e tia‘i ia outou ia pohehae no te mea ua ma‘iti au i te hamani maitai atu ? »
Te mau taea‘e e te mau tuahine e, te vai nei te mau taime i roto i to tatou mau oraraa e noaa i te tahi taata ê i te hoê haamaitairaa mana‘o-ore-hia aore râ e farii i te tahi haamauruururaa taa ê. Te tiaoro atu nei au ia tatou eiaha e riri—e eiaha roa e faahinaaro—ia tae ana‘e mai te mau haamaitairaa i te tahi atu taata? Eita tatou e haafaufaa-ore-hia ia haamaitai-rahi-ana‘e-hia te tahi atu taata. Aita tatou e tata‘u nei te tahi i te tahi no te hi‘o o vai ra te mea moni roa‘e aore râ te mea aravihi roa‘e aore râ te mea nehenehe roa‘e. Te tata‘uraa mau tei rotopû ia tatou o te tata‘uraa pato‘i ïa i te hara, e o te nounou te hoê o te mau hara matau-roa-hia.
Ua riro atoa te nounou mai te hoê hapa o te tamau noa i te tupu mai. Oia mau e mauiui rii tatou ia tupu mai te tahi ati i ni‘a ia tatou, e titau râ te nounou ia mauiui tatou no te mau maitai atoa e tae mai i te mau taata atoa ta tatou e matau nei! Eita ïa te reira e horo‘a mai i te tiaturiraa maitai no ananahi—te oaoa-ore-raa i te mau taime atoa e oaoa te tahi taata na pihaiho ia tatou ! E mea hau atu i te haamâ i te pae hopea, ia ite ana‘e tatou e, e mea ti‘a mau e e mea aroha mau te Atua i te horo‘araa i te taata atoa tei pee Ia’na i « ta’na mau mea atoa »,2 mai ta te papa‘iraa mo‘a e parau nei. No reira te haapiiraa matamua na roto mai i te ô vine a te Fatu ; eita te nounouraa, te oreraa e paraparau i te tahi atu taata no te faaite i to’na inoino aore râ te tutavaraa ia ore ana‘e vetahi ê e oaoa e e haamaitai i to outou ti‘araa, eita atoa te haafaufaa-ore-raa i te tahi atu taata e haamaitai i to outou iho hi‘oraa ia outou iho. A hamani maitai atu, e a mauruuru e, te hamani maitai nei te Atua ia outou.
Te piti o te haapiiraa ta’u e hinaaro i te rave mai roto mai i teie parabole o te hape oto ïa ta te tahi e nehenehe e rave mai te mea eita ratou e hinaaro i te farii i ta ratou moni ohipa i te hopea o te mahana no te mea ua haape‘ape‘a to ratou mau mana‘o no te mau fifi tei tupu na mua’tu i taua mahana ra. Aita i parauhia i roto i teie papa‘iraa mo‘a e, ua ta‘ue atu te tahi taata i ta’na moni i mua i te aro o te taata fare e ua haere atu ma te riri, peneia‘e ua na reira te tahi.
To‘u mau taea‘e e tuahine, te mea tei tupu i roto i te aamu i te hora 9 ra aore râ i te ahuru ma piti aore râ i te hora 3 ra, ua ere ïa i te mea faufa rahi ia faaau-ana‘e-hia i te moni rahi faahiahia tei aufauhia i te taatoaraa o te feia rave ohipa i te hopea o te mahana. Te hoho‘a no te faatupuraa i te faaroo o te tamau-noa-raa ïa, te haa-noa-raa ïa, e te haapapuraa e, e oti te ohipa, e ia vaiiho i te mau pe‘ape‘a no te mau hora matamua—e mea mau anei aore râ e mea mana‘o-noa-hia anei—ia ore atu ia faaauhia i te maitai rahi o te utua hopea. Eiaha e tamau noa i te mana‘o i te mau pe‘ape‘a aore râ te mau inoinoraa tahito—ia outou iho aore râ, i to outou taata tupu aore râ, e ti‘a ia’u ia parau atoa’tu, i teie Ekalesia mau e te ora. E faaitehia mai ïa te hanahana o to outou oraraa, te oraraa o to outou taata tupu, e o te evanelia a Iesu Mesia i te mahana hopea noa’tu e, aita taua hanahana ra i itehia mai e te mau taata atoa na mua’tu. No reira eiaha e haape‘ape‘a rahi roa i ni‘a i te tahi mea tei tupu i te hora 9 i te po‘ipo‘i a tamata ai te maitai o te Atua i te haamauruuru ia oe i te hora 6 i te ahiahi—noa’tu eaha te mau faaauraa ohipa tei haamauhia i te roaraa o te mahana.
Te haamau‘a nei tatou i te puai faufaa rahi i te aau e te varua na roto i te tape‘a-eta‘eta-raa i te haamana‘oraa no te hoê nota pehe au ore ta tatou i ha‘uti i roto i te hoê ha‘utiraa piana i to tatou vai-tamarii-raa, aore râ te tahi mea ta te hoê hoa faaipoipo i parau aore râ i rave a 20 matahiti i ma‘iri e ua mana‘o eta‘eta tatou ia tamau noa oia i te haamana‘o e i te tatarahapa no na 20 e haere nei, aore râ te hoê ohipa tei tupu i roto i te aamu o te Ekalesia o tei haapapû noa mai e, e tutava noa â te mau taata i te titau i te mau fâ mure ore ta te Atua i faaineine no ratou. Noa’tu e aita oe i haamata hoê o taua mau mana‘o inoino e nehenehe râ ta oe e faahope i te reira. E vai mai ïa te hoê utu‘a maitai faahiahia no taua ohipa ra ia hi‘o mai te Fatu o te ô vine i roto i to oe mata e ua faatitiaifarohia te mau mea atoa i te hopea o to tatou tere i te fenua nei.
O te toru e te hopea ïa no to’u mana‘o. E ere teie parabole—mai te mau parabole atoa—no ni‘a i te feia rave ohipa aore râ te moni ohipa mai te tahi atu mau parabole no ni‘a i te mamoe e te mau puaa niho. E aamu râ teie no ni‘a i te maitai o te Atua, To’na faaoroma‘i e Ta’na faaoreraa hara, e te Taraehara a te Fatu ra ia Iesu Mesia. E aamu ïa no ni‘a i te aau horo‘a e te aroha. E aamu no ni‘a i te maitai aroha. Na te reira e haapapû i te mana‘o ta’u i faaroo e rave rahi matahiti i teie nei e e mea papû roa, o te mea ta te Atua e oaoa rahi nei no te riroraa ei Atua, oia ho‘i te oaoa ia riro ei taata aroha, i te feia ihoa râ te ore i mana‘o i te reira e o te mana‘o pinepine nei e, aita e ti‘a ia ratou ia farii i te reira maitai.
Aita vau i ite o vai i roto i teie nahoa rahi i teie mahana tei ti‘a i te faaroo i te parau poro‘i no te faaoreraa hapa i roto i teie parabole, are‘a râ, noa’tu to outou taere i to outou mana‘oraa, noa’tu te mau rave‘a tei erehia e outou, noa’tu te rahiraa o te mau hape ta outou i rave, aore râ aita ta outou e taleni, aore râ te atea i rotopû ia outou e te utuafare e te Atua, te faaite papû atu nei au e, aita outou i tere atea ê roa’tu i te aroha o te Atua. Eita e nehenehe ia outou ia paremo hohonu roa i te faito e ore te maramarama mure ore o te Taraehara a te Mesia e tae‘a.
E ere anei outou no to matou faaroo, e aore râ i pihai iho na outou ia matou i te hoê taime e aita râ i faaea mai, aita e mea ta outou i rave o te ore e nehenehe i te tatarahia. Aita e fifi ta outou e ore e nehenehe e haavî. Aita e moemoea i roto i te tereraa o te tau e a muri atu eita e nehenehe e faatupuhia. Noa’tu e te mana‘o nei outou e, o outou te taata rave ohipa hopea no te ahuru ma hoêraa o te hora tei mo‘e, te ti‘a nei râ te Fatu o te ô vine i te aniraa, « E faafatata noa’tu i te terono o te aroha mau ra »,3 e ia parahi i te avae o te Mo‘a no Iseraela. A haere mai e amu « eiaha e ario e eiaha e hoo ».4 i te iri amuraa maa a te Fatu.
Te tiaoro taa ê atu nei au i te mau tane faaipoipo e te mau metua tane, e te mau taea‘e no te autahu‘araa aore râ te mau taea‘e e au ei peresibutero ia « Ara mai! A tia i nia i te repo mai… ei taata mau outou ».5 E ere i te taime atoa, e mea pinepine râ te mau tane i te ma‘iti eiaha e pahono i te piiraa ia « tomo mai i roto i te nuu ».6 E au ra e mea pinepine i te mau vahine e te mau tamarii i te hinaaro mai. E te mau taea‘e, ua tae te taime no te rave i te ohipa. A rave i te reira no to outou iho maitai. A rave i te reira no te maitai o te mau taata o te here nei ia outou e o te pure nei ia pahono mai outou. A rave i te reira no te maitai o te Fatu ra ia Iesu Mesia, tei aufau i te hoê hoo rahi no te ananahi Ta’na e hinaaro no outou.
E to’u mau taea‘e e tuahine here e, o outou tei haamaitaihia e te evanelia a rave rahi mau matahiti i teie nei no te mea ua fana‘o outou i te ite-oioi-raa i te reira, o outou tei haere mărû noa mai i te evanelia, e o outou—te melo e tei ore â i melohia—o te faataere noa ra, o outou tata‘itahi, tatou paatoa, te faaite papû atu nei au no ni‘a te i te mana faaapî o te aroha o te Atua e te temeio no To’na maitai. Te haape‘ape‘a nei Oia no te faaroo e noaa ia outou, e ere râ no te hora o te mahana e noaa’i ia outou taua faaroo ra.
No reira, mai te mea ua rave outou i te mau fafauraa, a haapa‘o i te reira. Mai te mea aita outou i rave i te reira, a rave ïa. Mai te mea ua rave outou i te reira e ua ofati i te reira, a tatarahapa e a tataî i te reira. Eita e taere roa ia parau ana‘e mai te Fatu o te ô vine e, te vai nei te taime. A faaroo na i te faaurûraa a te Varua Mo‘a e parau nei ia outou i tewie nei, i teie ihoa taime, e e ti‘a ia outou ia farii ite horo‘araa no taraerahara a te Fatu ra ia Iesu Mesia e ia oaoa i te auhoaraa no Ta’na ohipa. Eiaha e faataime. Te pô nei. I te i‘oa o Iesu Mesia, amene.