A opani ai tatou i teie amuiraa
Na te peresideni Thomas S. Monson
E mata na outou i te feruri hohonu i te mau parau mau i faaroohia e outou, e ia tauturu mai hoi te reira ia outou ia riro mai ei taata maitai a‘e i te huru o te taata na mua a‘e a haamata ai te amuiraa.
Ua î roa to’u aau i te mauruuru i te hopea o teie amuiraa hanahana. Ua farii tatou i te mau haamaitairaa rahi na roto i to tatou faarooraa i te a‘o e i te mau iteraa papû o te feia tei paraparau mai ia tatou. Te feruri nei au e, e tuati to outou mana‘o i to’u i te parauraa e, ua farii tatou i te Varua o te Fatu i te mea e, ua putapû to tatou aau e ua haapuaihia to tatou iteraa papû.
Ua fana‘o â tatou i te mau himene henehehe, e na te reira i haamaitai e i haafaufaa roa’tu i te mau tuhaa tata‘itahi o te amuiraa. Te faatae atu nei i to’u mauruuru i te feia atoa tei faaite mai ia tatou i to ratou mau tareni no te haamaitai i teie amuiraa.
Ta faatae atu nei au i te mauruuru i te mau taata tata‘itahi tei paraparau mai ia tatou e te feia atoa tei horo‘a mai i te mau pure i roto i te mau tuhaa pureraa tata‘itahi.
I roto i ta amuiraa tata‘itahi, e rave rahi te taata e rave nei i te ohipa ma te ite-ore-hia e te taata e aore ra, e ti‘araa ohipa haihai to ratou. Eita roa e ti‘a ia matou ia faatupu i teie mau tuhaa pureraa ahani e, aita ratou. Te faatae atoa nei au ia ratou i te mauruuru.
Ua ite au e, ua apiti mai outou ia’u no te faaite i te mauruuru rahi i te mau taea‘e e te mau tuahine tei vaiihohia i to ratou ti‘araa i roto i teie amuiraa. E mihi tatou ia ratou. E ohipa rahi ta ratou i rave i roto i te ohipa a te Fatu, e e itehia te reira i tera u’i e tera u’i i muri nei.
Ua paturu atoa tatou, na roto i te afa‘iraa i te rima i ni‘a, i te mau taea‘e e te mau tuahine tei piihia i ni‘a i te mau ti‘araa apî i roto i teie amuiraa. Te manava nei matou ia ratou e te hinaaro nei matou ia ite mai ratou e, te tia‘i nei matou no te tavini e o ratou i roto i te ohipa a te Fatu. Ua piihia ratou na roto i te faaururaa no ni‘a mai ra.
Ua haapurorohia teie amuiraa i roto i te hoê haapurororaa aitâ i ravehia a‘e nei, ua tae roa i rotopu i te mau taata atoa i tera fenua e i tera moana. Noa’tu e, tei te atea roa matou ia outou e rave rahi, mai te huru ra râ e, tei piha‘i iho matou ia outou e te ite nei matou i to outou haapa‘o, e te faatae atu nei matou i to matou here e te mauruuru ia outou na i te mau vahi atoa tei reira outou.
E haamaitairaa rahi to tatou, e au mau taea‘e e au mau tuahine, i te fariiraa i te evanelia a Iesu Mesia i faaho‘i-faahou-hia mai, i roto i to tatou oraraa e i roto i to tatou aau. Te horo‘a nei te reira i te mau pahonoraa i te mau uiraa rarahi a‘e o te oraraa nei. Te horo‘a mai nei hoi te reira i te auraa e i te opuaraa e i te tiairaa no to tatou oraraa.
Te ora nei tatou i roto i te mau taime arepurepu. Te haapapû atu nei au ia outou e, te ite mai nei to tatou Metua i te Ao ra i te mau titauraa ta tatou e farerei nei. Ua here Oia ia tatou tata‘itahi e te hinaaro nei Oia e haamaitai e e tauturu mai ia tatou. E mata na tatou i te tiaoro Ia’na na roto i te pure, mai Ta’na i a‘o mai i te na ôraa mai e, « A pure noa i te mau taime atoa ra, e e niinii atu vau i to’u Varua i nia iho ia oe, e e mea rahi roa ta oe haamaitairaa—oia ïa, e hau a‘e te reira i to te roaa, ahiri ua roaa ia oe te mau tao‘a atoa ».1
E au mau taea‘e e au mau tuahine here, e mata na i te faaî i to outou utuafare i te here e i te auraro e i te Varua o te Fatu. A here i to outou utuafare. Mai te mea e, te vai ra te tuati ore te mana‘o e aore ra, te mârô i rotopu ia outou, te faaitoito atu nei au ia outou ia faatitiaifaro i te reira i teie nei. Na ô maira te Faaora e :
« Eiaha ei mârô i rotopu ia outou…
« Oia mau hoi, ta’u e parau atu ia outou na, o tei roto ia’na te varua mârô ra, e ere oia i ta’u, no te diabolo râ, o te metua oia no te mârô, e ua faaitoito oia i te aau no te taata e mârô ai te tahi i te tahi ma te riri.
« [Tera râ] inaha, e ere teie i te ture na’u… teie râ ta’u ture, ia faaruehia te reira ».2
I roto i to’u ti‘araa tavini haehaa no outou, te faahiti nei au i te mau parau a te Arii Beniamina i roto i ta’na a‘oraa i to’na mau taata, i te na ôraa e :
« Aore hoi au i faaue atu ia outou e… ia mana‘o hoi outou e, e ere au i te taata o te tino nei.
« E taata mau â râ vau mai ia outou atoa te huru, e tia hoi ia roohia-noa-hia i te mau mea tia ore o te tino nei e o te aau atoa hoi ; i maitihia râ vau… e te rima o te Fatu ra… ua haapaohia e ua faaorahia hoi au e to’na mana faito ore, ia tavini ia outou ma te mana atoa, e te hinaaro atoa, e te puai atoa hoi ta te Fatu i horoa mai ia’u nei ra ».3
E au mau taea‘e e au mau tuahine here, te hinaaro nei au ma to’u aau atoa ia haapa‘o i te hinaaro o te Atua e ia tavini Ia’na e ia tavini ia outou.
I teie nei, a haere atu ai tatou i rapae i teie amuiraa, te tiaoro nei au i te mau haamaitairaa o te ra‘i i ni‘a ia outou tata‘itahi. Outou tei te atea ê roa i to’u outou nohoraa, ei hau to outou ho‘iraa. E mata na outou i te feruri hohonu i te mau parau mau i faaroohia e outou, e ia tauturu mai hoi te reira ia outou ia riro mai ei taata maitai a‘e i te huru o te taata na mua a‘e a haamata ai te amuiraa a piti mahana i ma’iri a‘e nei.
Mai teie atu taime e tae roa’tu i te taime e farerei faahou ai tatou i roto e ono ava‘e i muri nei, te ani nei au i te mau haamaitairaa a te Fatu ia tae mai i ni‘a iho ia outou, e i ni‘a iho ia tatou paatoa, e te na reira nei au i roto i To’na ra i‘oa mo‘a—o Iesu Mesia, to tatou Fatu e te Faaora—amene.