Te faaoraraa no te tupuraa mau

Na te episekopo Richard C. Edgley

Tauturu matamua i roto i te Episekoporaa Faatere Rahi tei haamauruuruhia

Ua pii te Fatu ia tatou ia rave i te ohipa faaoraraa.

I te mau ava‘e i ma‘iri, ua tuatapapa-rahi-hia te parau no te « tupuraa mau » i roto i te Ekalesia na roto i te tautururaa ia ratou atoa e hinaaro ra, ia farii e ia haapa‘o i te mau fafauraa e te mau oro‘a faaoraraa e na reira, ia roaa mai te faahuru-ê-raa rahi i roto i te aau mai ta Alama i parau (hi‘o Alama 5:14). Te hoê o te mau rave‘a papû e te faufaa no te faati‘a i te tupuraa mau i roto i te Ekalesia, o te tapaparaa ïa e te faaoraraa ia ratou tei bapetizohia e tei faatau i te ekalesia, ma te faaatea ia ratou i te mau haamaitairaa e te mau oro‘a faaora. Noa’tu to tatou piiraa—e orometua hahaere anei, e orometua Haapiiraa Sabati anei, e episekopo, e metua tane, e metua vahine, e aore râ e Hui mana faatere—e noaa ia tatou pauroa ia turu papû i te ohipa faaoraraa. E ia hi‘o maitai ana‘e tatou, te tautururaa i te taatoaraa—to tatou utuafare anei, te mau melo ore, te mau melo paruparu, te taata hara—ia haere mai i te Mesia, o te piiraa ïa te reira ta tatou pauroa e amo nei.

I te hoê po‘ipo‘i Sabati a 30 matahiti i teie nei, tei roto vau i te hoê peresideniraa tĭtĭ, ua taniuniu mai te hoê o ta matou mau episekopo haapa‘o maitai. Ua faataa mai oia e, no te tupu-oioi-raa o ta’na paroisa, aita atura ïa ta’na e piiraa faahou no ta’na mau melo ti‘amâ. E ta’na aniraa ia matou, ia vahihia ta’na paroisa. A tia‘i ai matou i taua faati‘araa ra, ua faaoti matou te peresideniraa tĭtĭ ia haere i taua paroisa ra no te pii mai i taua mau taea‘e e tuahine maitai e te ti‘amâ ra ei mau misionare tĭtĭ.

Te toru o te taata ta’u i farerei, o te hoê tuahine apî ïa e haere ra i te haapiiraa tuatoru i tera vahi. Ua paraparau rii maua maa taime iti, e ua tuu atura vau i te piiraa ia tavini ei misionare. Ua mamû noa oia maa taime. I muri iho ua parau mai oia, « peresideni, aita anei oe i ite e, no ho‘i noa mai ra vau i te pureraa ? »

Vai mamû atoa’tura vau maa taime, pahono atura vau, « Aita roa’tu, aita vau i ite e, ua riro na oe ei melo paruparu ».

Parau mai nei oia, « Tau matahiti to’u vairaa ei melo paruparu » e parau faahou mai nei « aita anei oe e ite e, ia riro oe ei melo paruparu, e ere i te mea ohie ia ho‘i mai ? »

Ua pahono vau, « Aita, aita roa’tu. E haamata ta oe pureraa i te hora 9. E tomo oe i roto i te fare pureraa, e atira, tei ô nei oe ».

Parau mai nei oia, « Aita, e ere i te mea ohie. E taiâ oe no te tahi mau mea e rave rahi. E taiâ oe i te mea e taata anei te farii ia oe e aore râ e parahi otahi anei oe i te hiti roa e aita e haapa‘ohia mai. E teie atoa, e feruri oe e, e fariihia mai oe e o vai te mau hoa apî e haafatata mai ».

Ua tahe to’na roi mata e ua parau faahou mai oia, « Ua ite au e, ua pure to’u na metua vahine e metua tane e rave rahi matahiti ia ho‘i mai au i te Ekalesia ». Faaea rii’tura oia e parau mai nei, « Na ava‘e e toru i ma‘iri, ua pure noa vau no te farii i te itoito, te puai, e te rave‘a no te ho‘i mai i te pureraa ». Ani mai nei oia, « Peresideni, i to oe mana‘o, o teie piiraa anei te pahonoraa i ta’u mau pure ? »

Haamata a‘era to’u roimata i te tahe, pahono a‘era vau, « Te ti‘aturi nei au e, ua pahono te Fatu i ta oe mau pure ».

Ua farii oia i te piiraa e ua riro mai oia ei misionare maitai roa. E ua papû ia’u e, ua farii oia i te oaoa rahi e na reira atoa to’na na metua e te tahi atoa melo o te utuafare.

Te vai nei te tahi mau haapiiraa ta’u i apo mai e aore râ ta’u i haamana‘o mai mai teie uiuiraa e te tahi atu â :

Ua haapii au e, te vai nei te mau taata e here nei i teie mau melo paruparu e tei ni‘a ratou i to ratou turi avae no te taparu i te Fatu ia faaora tei herehia.
Ua haapii au e, e ere i te mea ohie roa e te taiâ ore no te melo paruparu ia tomo faahou mai i roto i te Ekalesia. E tauturu te titauhia nei. E faaitoitoraa te titauhia nei. E faahoaraa te titauhia nei.
Ua haapii atoa vau e, te vai nei te mau melo e tamata ra e e hinaaro ra ia ite i te e‘a no te ho‘i mai.
Ua haapii au e, e rave rahi melo paruparu e farii atu i te mau piiraa ia anihia atu.
Ua haapii au e, e mea ti‘a ia ravehia e ia hi‘ohia te hoê melo paruparu mai te hoê tamaiti e aore râ tamahine a te Atua here.

I te mau matahiti i ma‘iri, ua mana‘ona‘o noa vau i te tereraa o teie uiuiraa ahani e, ua hi‘o mau vau ia’na ei melo paruparu. Na outou iho e feruri.

Ua riro ihoa te faaitoitoraa i te melo paruparu ei tuhaa faufaa no te ohipa a te Fatu. Noa’tu e, e hopoi‘a te faaoraraa no te mau melo atoa, na te feia e mau nei i te Autahu‘araa a Aarona e te Autahu‘araa a Melehizedeka te hopoi‘a ia arata‘i i roto i teie ohipa. Ia hi‘o maitai outou, o teie te tumu no te taviniraa a te autahu‘araa—te arata‘iraa i te mau taata atoa ia rave i te mau fafauraa no te faaoraraa ; te faataeraa i te hau, te oaoa, te auraa ia’na iho.

I roto i te Buka a Moromona, te haamana‘o ra paha outou i te taime a ite ai Alama e, ua taiva roa te nunaa Zorama i te Ekalesia, ua faanaho oia i te hoê pŭpŭ no te haere e faaora i teie nunaa. A fatata ai ratou i te tere, ua pure Alama i te Fatu na roto i teie mau parau :

« E te Fatu, ia haamanuia mai oe ia matou, ia arata‘i faahou mai matou ia ratou ia oe na i roto i te Mesia.

« Inaha, e te Fatu, e me faufaa rahi to ratou varua, e mau taea‘e no matou hoi ïa ratou e rave rahi, no reira e horo‘a mai na matou, e te Fatu, i te mana e te paari ia ti‘a ia matou i te arata‘i faahou mai ia ratou, o to matou mau taea‘e, ia oe na » (Alama 31:34–35; reta tei faahuru-ê-hia)

Maa ava‘e i ma‘iri, i muri mai i te hoê pureraa no te feia faafariuhia e te mau melo paruparu, ua tapiri mai te hoê tane tei ho‘i papû mai i te pureraa, hoê â paha matahiti to maua, e ua parau mai ra, « I te roaraa o to’u oraraa, e melo paruparu vau. Ua faaatea vau i te Ekalesia i to’u apîraa. Teie nei râ, ua ho‘i mai au, e te rave nei au i te ohipa i roto i te hiero e ta’u vahine ».

No te faaite ia’na e, e mea maitai te reira, teie ta’u i parau ia’na : « Aita’tu ai ïa, e faahopearaa maitai te reira ».

Pahono mai nei oia, « Aita roa’tu ïa. Ua ho‘i mai au i te Ekalesia tera râ ua mo‘e ta’u mau tamarii e mootua. E te ite ra vau i teie nei i te mo‘eraa’tu o ta’u mau hina—tei rapae ratou pauroa i te Ekalesia. E ere i te mea maitai roa ».

I roto i to’u utuafare, ua tomo hoê o to matou hui tupuna i roto i te Ekalesia i Europa i te mau mahana matamua o te Ekalesia. Ua faatau te hoê tamaiti i te pureraa. Ua tamata rii maua te tuahine Edgley ia tuatapapa i teie amaa huaai o teie tupuna tei faaru‘e i te Ekalesia.

E mea ohie no’u e to’u hoa ia parau e, na roto i na u‘i e ono e nehenehe e faati‘a e, ua mo‘e na 3000 melo utuafare. E teie nei a hi‘o na e piti faahou u‘i i muri mai. E nehenehe roa e parau e, ua piri i te 20.000 e 30.000 tamarii a to tatou Metua i te Ao ra tei mo‘e atu.

Ua faatumuhia te hopoi‘a ia faaora i ni‘a i te mau haapiiraa tumu roa o te Ekalesia.

« A haamana‘o na e e faufaa rahi to te mau varua taata i to te Atua hi‘oraa mai ;

« No te mea, inaha, ua faaoromai te Fatu o to orua Faaora i te pohe o to’na tino ; no reira ua faaoromai hoi oia i te mamae rahi o te mau taata atoa, ia ti‘a i te mau taata’toa ia tatarahapa e ia haere mai ia’na ra…

« E mai te mea e hope to orua pue mahana i te pororaa i te parau tatarahapa i teie nei mau taata, e ia arata‘i mai orua, i te hoe noa a‘e varua taata ia’u nei, aue hoi to orua oaoa rahi i pihai iho ia’na i roto i te basileia o to’u Metua ! » (PH&PF 18:10–11, 15; reta tei faahuru-ê-hia).

Ua haamaitaihia vau no te mea ua roaa rii ia’u i te faaora maa melo paruparu i roto i to’u oraraa. I teie nei, ia tauturu vau i te hoê ia ho‘i mai i te Ekalesia, aita vau e hi‘o ra ia’na ei hoê varua ; Te hi‘o râ ra vau ia’na ei ono, ei hitu, e hau atu â u‘i—te tahi tauasini varua. E i muri iho e haamana‘o vau i te papa‘iraa mo‘a: « e ia arata‘i mai orua, i te hoe noa a‘e varua taata ia’u nei, aue hoi to orua oaoa rahi » (PH&PF 18:15).

Ua parau te Fatu i Ta’na mau aposetolo, « Te rahi mau nei te auhune, te iti nei râ te feia e rave » (Mataio 9:37). Eiaha te feia rave ia iti mai. Te vai nei ta tatou e tauasini rahiraa tane ti‘a e te ti‘amâ e o te mau atoa nei i te autahu‘araa e te vai atoa nei e milioni rahiraa melo itoito o te Ekalesia i na poro e ha o te ao nei. Te vai nei ta tatou mau apooraa paroisa e ohipa nei, te mau pŭpŭ autahu‘araa, te mau Sotaiete Tauturu, e te tahi faanahoraa no te amo i te hopoi‘a ia faaora. Ua pii te Fatu ia tatou ia rave i te ohipa faaoraraa.

I te omuaraa o ta’u a‘oraa ua parau vau no te pure ta Alama i pûpû a haamata ai ratou i ta ratou ohipa faaoraraa i te nunaa Zorama. I te Tama‘i Rahi II o te ao nei, ua haruhia e 500 faehau marite e te tahi feia turu o tera fenua i roto i te fare auri. No te mamae e te mana‘ona‘o atoa no to ratou maitai, ua faati‘ahia i te hoê pŭpŭ aro e 100 ti‘ahapa faehau marite no te haere e faaora i te feia tei haruhia. Ua faatahoêhia teie mau faehau, e na te tapena rahi i horo‘a ia ratou i te tahi arata‘iraa mai teie te huru: « I teie pô, e farerei outou i to outou feia faatere pae faaroo, e pure outou, e e tăpŭ outou i mua i te Atua e, ia vai te hoê noa a‘e aho ora i roto ia outou, eita outou e vai iho i te hoê noa a‘e o ratou e mamae maoro faahou atu ». (Hi‘o Hampton Sides, Ghost Soldiers: The Forgotten Epic Story of World War II’s Most Dramatic Mission [2001], 28–29.) E faaoraraa teie tei manuia, e faaoraraa i te mauiui o te tino e o te tahuti nei. E faaiti anei tatou i to tatou itoito i te tutavaraa ia faaora ia ratou o te nehenehe e mamae i te mau hopearaa pae varua e te mure ore ? E faaiti anei tatou i te pee papû i te Fatu ?

Ei puohuraa, mai roto roa mai to tatou mana‘o papû ei melo no te Ekalesia mau a te Mesia i te mea e, ua mamae te Fatu no te mau taata atoa—te melo ore, te melo paruparu, te taata hara atoa ho‘i, e te mau melo atoa o to tatou iho utuafare.Te ti‘aturi nei au e, e nehenehe ta tatou e arata‘i tauasini mau taata i te oaoa, te hau e te mărû o te evanelia, e tae noa’tu i te hanere tauasini, e te milioni ho‘i o to ratou mau u‘i amuri a‘e. Te ti‘aturi nei au e, e manuia tatou no te mea teie te Ekalesia a te Fatu, e no to tatou autahu‘araa e to tatou riroraa ei melo, ua piihia tatou ia manuia. Teie to’u iteraa papû ia outou i te i‘oa o Iesu Mesia, amene.