Te mau utuafare i raro a‘e i te fafauraa
Na te peresideni Henry B. Eyring
Tauturu Matamua i roto i te Peresideniraa Matamua
Aore e mea faufaa a‘e i tae mai i roto i to outou utuafare, e aore e mea faufaa a‘e e tae mai ananahi o te riro i te tu‘ati i te mau haamaitairaa no te taatiraa.
Te oaoa nei au i te amuiraa mai ia outou i roto i teie apooraa i reira te feia atoa e mau nei i te autahu‘araa a te Atua i ni‘a i te fenua nei e haere mai ai. Ua haamaitaihia tatou i te peresideniraa a te peresideni Thomas S. Monson. Ei peresideni no te Ekalesia, o oia ana‘e te taata ora e haapa‘o nei i te mau taviri e taati nei i te mau utuafare atoa e i te mau oro‘a atoa o te autahu‘araa no te tapae i te ora mure ore, te horo‘a hau roa i te mau horo‘a atoa a te Atua.
I teie pô, te vai ra te hoê metua tane i ô nei e faaroo mai nei, tei riro na ei melo paruparu, e te tia‘i nei oia i te haapapûraa no taua horo‘a ra ma to’na aau atoa. Ua here oia raua ta’na vahine i ta raua na piti tamarii na‘ina‘i, te hoê tamaroa e te hoê tamahine. Mai te tahi atoa mau metua, e nehenehe ta’na e feruri i te oaoa i te ra‘i ra a tai‘o ai oia i teie mau parau : « E te auraa e vai nei i rotopu ia tatou nei i o nei e vai ïa te reira iho auraa i reira, tera râ e apitihia’tu te reira i te hanahana mure ore, aore ïa tatou e mauruuru nei i te reira huru hanahana i teie nei ».1
Tera metua tane i rotopu ia tatou e faaroo mai nei i teie pô, ua ite oia i te e‘a i tera tapaeraa hanahana. E ere i te mea ohie. Ua ite a‘ena oia i te reira. Ua titau te reia i te faaroo ia Iesu Mesia, te tatarahapa hohonu, e te faahuru-ê-raa i te aau, na roto atoa i te tauturu a te hoê episekopo maitai tei faatae i to’na aau i te faaoreraa hara a te Fatu here.
E mau tauiraa faahiahia tei pee tamau mai a haere ai oia i te hiero mo‘a no te farii i to’na oro‘a hiero ta te Fatu iho i faataa ia ratou o Ta’na i haamana i roto i te hiero matamua no teie tau tuuraa evanelia. Tei te hiero ra no Ketelani i Ohio. Ua parau te Fatu no te reira :
« No reira, o teie te tumu vau i horo‘a’tu ai i te faaueraa ia haere atu outou i Ohio ; e i reira vau e horo‘a’tu ai ia outou ta’u nei ture ; e i reira hoi outou e noaa‘i i te mana no ni‘a mai ra ;
« E mai reira’tu… no te mea e ohipa rahi ta’u i haaputu i te vairaa ra, no te mea e faaorahia Iseraela, e e arata‘i atu vau ia ratou i te mau vahi atoa ta’u i hinaaro ra, e e ore hoe mana e tape‘a mai i to’u nei rima ».2
No to’u nei hoa tei ho‘i mai e no te mau taea‘e atoa o te autahu‘araa, e ohipa hanahana tei mua ia tatou no te faaoraraa i te tuhaa o Iseraela tei raro a‘e i ta tatou tiaauraa, to tatou ho‘i utuafare. Ua ite to’u hoa e ta’na vahine e, e titau te reira i te taatiraa na roto i te mana o te Autahu‘araa a Melehizedeka i roto i te hiero mo‘a o te Atua.
Ua ani mai oia ia’u ia rave i te taatiraa. Ua hinaaro oia raua ta’na vahine ia rave-oioi-hia te reira. Tera râ, no te rahi o te ohipa na mua i te amuiraa rahi, ua vaiiho atura vau na raua e to raua episekopo e faanaho i te tai‘o mahana maitai roa a‘e e ta’u nei papa‘i parau.
E hiti mahuta rahi to’u e te oaoa i to te metua tane parauraa mai i te pureraa e, e riro te taatiraa i te ravehia i te 3 no eperera. Tera mau te tai‘o mahana i te matahiti 1836 to Eliaha, te peropheta i tahitihia, tonoraahia i te hiero no Ketelani no te horo‘a i te mana taati i te peropheta Iosepha Semita e ia Olive Kaudere. Te vai nei teie na taviri i roto i te Ekalesia i teie mahana e e vai noa te reira e tae noa’tu i te hopea.3
Hoê â mana hanahana tei horo‘ahia ia Petero e te Fatu ra a fafau ai Oia e : « E e horo‘a’tu hoi au i te mau taviri o te basileia o te ao ra ia oe, e ta oe e haamau i raro nei, e haamau-atoa-hia ïa i te ao ; e ta oe e tuu i raro nei, e tuu-atoa-hia ïa i te ao ».4
Ua haamaitai te ho‘iraa mai o Eliaha i te feia atoa e mau nei i te autahu‘araa. Ua haapapû Elder Harold B. Lee i te reira i roto i te hoê amuiraa rahi, ua faahiti oia i te parau a te peresideni Joseph Fielding Smith. A faaroo maitai mai : « Te mau nei au i te autahu‘araa ; o outou te mau taea‘e i ô nei, te mau nei outou i te autahu‘araa ; ua farii tatou i te Autahu‘araa a Melehizedeka—tei mauhia e Eliaha e te tahi atoa mau peropheta mai ia Petero, Iakobo e Ioane. Tera râ, noa’tu e e mana to tatou no te bapetizo, e mana to tatou no te tuu i te rima no te horo‘araa o te Varua Maitai e no te faatoro‘araa i te tahi taata e no te raveraa i taua mau mea ra, aita ana‘e te mana taati, aita ïa ta tatou e rave‘a, no te mea, aita e haamanaraa no te mau mea ta tatou i rave na ».
Te parau faahou nei te peresideni Smith :
« Te mau oro‘a teitei a‘e, te mau haamaitairaa rahi a‘e, te mau mea faufaa a‘e no te faateiteiraa i roto i te basileia o te Atua… e roaa noa te reira i te tahi mau vahi taa ê, aore e taata e mana no te rave i te reira maori râ ua farii oia i te mana mai te taata e mau nei i te mau taviri…
« … Aore e taata i ni‘a i te fenua nei e mau nei i te parau faati‘a ia haere e ia rave i te mau oro‘a atoa o te evanelia maori râ ua haamanahia oia e te peresideni o te Ekalesia, o te mau nei i te mau taviri. Ua horo‘a mai oia ia tatou i te mana, ua tuu mai oia i te mana taati i roto i ta tatou autahu‘araa no te mea te mau nei oia i tera mau taviri ».5
Ua tae atoa mai taua haapapûraa ra na roto i te peresideni Boyd K. Packer i to’na papa‘iraa no ni‘a i te mana taati. to’u ite i te parau mau o te reira, ua riro ïa ei tamahanahanaraa no’u iho e no te utuafare ta’u e taati atu i te 3 no eperera. « Ua ti‘a ia Petero ia mau i te mau taviri. Ua ti‘a ia Petero ia mau i te mana taati no te haamau e aore râ no te taati i raro nei e aore râ no te tuu i raro nei e e na reira-atoa-hia i te ra‘i ra. Taua mau taviri ra, na te peresideni o te Ekalesia ïa—te peropheta, te hi‘o, e te heheu parau. Tei roto i te Ekalesia teie mana mo‘a no te taatiraa. Aita e mea e hi‘ohia ra ma te tura mo‘a e ratou te ite i te auraa no teie mana. Aita e mea e paruru-roa-hia a‘e. Maa tane noa e mau nei i teie mana taati i ni‘a i te fenua nei na roto i te mau tau—i roto i te mau hiero tata‘itahi, te vai nei te tahi mau taea‘e tei horo‘ahia te mana taati. Aita e taata e farii i te reira maori râ mai roto mai i te peropheta, te hi‘o, te heheu parau e te peresideni o Te Ekalesia a Iesu Mesia i te Feia Mo‘a i te mau Mahana Hopea Nei ».6
I te taeraa mai o Eliaha, aita i horo‘a-noa-hia mai te puai i te autahu‘araa, ua faafariu-atoa-hia te mau aau : « Te varua, te mana, e te piiraa o Eliaha, teie ïa, tei ia outou na te mana no te mau i te taviri no te heheuraa, no te mau oro‘a, no te mau orama, te mau mana e te mau oro‘a hiero no te îraa o te autahu‘araa a Melehizedeka e te basileia o te Atua i ni‘a i te fenua nei; e ia farii, ia noaa e ia rave i te mau oro‘a ato‘a no te basileia o te Atua, e tae noa’tu i te faafariuraa i te aau o te mau metua i te tamarii e to te mau tamarii i te mau metua, e tae noa’tu ia ratou i te ra‘i ra ».7
Ua tae a‘ena mai teie mana‘o no te faafariuraa o te aau i to’u nei hoa e i to’na utuafare. Ua tae atoa mai paha ia outou naa i roto i teie apooraa. Ua puta mai paha i to outou mana‘o, mai tei tupu i ni‘a ia’u nei, i te hoho‘a o to outou metua tane e metua vahine. Aita ana‘e râ, o te hoê tuahine e te hoê taea‘e. Aita ana‘e râ, o te hoê tamahine e te hoê tamaiti.
Tei ô paha ratou i te ao varua e aore râ tei te hoê fenua atea ia outou. Ua tae mai râ i to outou aau te oaoa no te taamuraa papû ia ratou ra no te mea ua natihia e aore râ ua nehenehe ia outou ia nati ia ratou ra na roto i te mau oro‘a o te autahu‘araa ta te Atua e faatura atu.
No te feia e mau nei i te Autahu‘araa a Melehizedeka e o te riro atoa nei ei metua tane i roto i te mau utuafare tei taatihia, ua haapiihia ratou te mea ta ratou e ti‘a ia rave. Aore e mea faufaa a‘e i tae mai i roto i to outou utuafare, e aore e mea faufaa a‘e e tae mai ananahi o te riro i te tu‘ati i te mau haamaitairaa no te taatiraa. Aita e mea faufaa a‘e i te faaturaraa i te mau fafauraa no te faaipoiporaa e no te utuafare ta outou i rave e aore râ o ta outou e rave atu i roto i te mau hiero a te Atua.
E mea papû te rave‘a no te rave i te reira. E mea ti‘a i te Varua Mo‘a no te Fafauraa, na roto i to outou haapa‘oraa e ta outou haatusiaraa, ia taati i ta tatou mau fafauraa hiero ia vai te reira i te ao a muri mai. Ua faataa mai te peresideni Harold B. Lee i te auraa no te riroraa ei taata taatihia na roto i te Varua Mo‘a no te Fafauraa, ua faahiti oia i te parau a Melvin J. Ballard : « E roaa paha ia tatou i te haavare i te taata aita râ e roaa i te haavare i te Varua Maitai, e eita ta tatou mau haamaitairaa e vai mure ore maori râ ua taati-atoa-hia te reira e te Varua Mo‘a no te fafauraa. Na te Varua Maitai e tai‘o i roto te mau mana‘o e te aau o te taata nei e Na’na e horo‘a i ta’na faati‘araa taati i te mau haamaitairaa i parauhia i ni‘a i to ratou upoo. I reira noa te haamauraa, te haamanaraa, e te mana hope o te reira ».8
I to maua te tuahine Eyring taatiraahia i roto i te hiero no Logan Utah, aita vau i maramarama hope i te auraa o te reira fafauraa. Te tamata noa nei â vau i te maramarama i te mau auraa atoa o te reira, atira noa’tu, ua faaoti maua to’u hoa faaipoipo a 50 matahiti i teie nei, mai te haamataraa ihoa o to maua faaipoiporaa ia faaitoito i te titau-manihini-raa i te Varua Maitai i roto i to maua oraraa e to maua utuafare.
Ei metua tane apî tei taatihia i roto i te hiero e tei faafariu i to’na aau i ta’na vahine e i to’na utuafare apî, ua farerei au i te peresideni Joseph Fielding Smith no te taime matamua. I roto i te piha apooraa a te Peresideniraa Matamua, i reira vau i te titauraahia ia haere mai, ua tae mai te hoê iteraa papû roa ia’u nei i to te peresideni Harold B. Lee uiraa ia’u, ma te faatoro mai i te peresideni Smith, tei parahi noa i pihai iho ia’na « Ua ti‘aturi anei oe e, ua nehenehe ihoa i teie taata e riro ei peropheta na te Atua ? »
No tomo noa mai te peresideni Smith i roto i te piha e aita ta’na hoê a‘e parau. Ua mauruuru roa vau no to’u pahonoraa i te mea i tae mai i te hohonu o to’u aau : « Ua ite au e, e peropheta oia » e ua ite papû atoa vau e, mai ta’u atoa ho‘i e ite ra i te mahana i te anaanaraa, te mau ra oia i te mana taati o te autahu‘araa.
No taua ohipa i tupu, ua tae mai ta’na mau parau ia maua ta’u vahine ma te puai rahi mau, i te hoê tuhaa no te amuiraa rahi i te 6 no eperera 1972, ua horo‘a mai te peresideni Joseph Fielding Smith i teie parau a‘o : « O te hinaaro a te Fatu ia haapuaihia e ia faahereherehia te utuafare. Te taparu nei matou i te mau metua ia rave i ta ratou hopoi‘a ti‘a i te upoo o te fare. Te ani nei matou i te mau metua vahine ia paturu e ia faaitoito i ta ratou tane e ia riro atoa ei maramarama no ta ratou mau tamarii ».9
E tuu atu vau e maha mea ta outou e nehenehe e rave ei metua tane o te autahu‘araa no te faateitei e no te arata‘i i to outou utuafare i te nohoraa o te Metua i te Ao ra e o te Faaora.
A tahi, a imi e a tape‘a i te iteraa papû e, tei ia tatou nei te mau taviri o te autahu‘araa e te mauhia nei te reira e te peresideni o te Ekalesia. A pure no te reira i te mau mahana atoa. E tae mai te pahonoraa na roto i te tupu-rahi-raa i te hinaaro ia arata‘i i to outou utuafare, te tupu-rahi-raa i to outou tiaturiraa, e na roto atoa i te oaoa-rahi-raa i roto i te taviniraa. E farii rahi outou i te popou e te anaanatae, o te hoê ïa haamaitairaa rahi no ta outou vahine e to outou utuafare.
Te piti o te titauraa, oia ho‘i ïa, ia here i ta outou vahine. E ani te reira i te faaroo e te haehaa no te tuu i to’na mau hinaaro i ni‘a a‘e i to outou iho nei na roto i te mau fifi o te oraraa. Tei ia outou ra te hopoi‘a ia faafana‘o e ia aupuru i te utuafare i pihai iho ia’na ma te tavini atoa outou ia vetahi ê. E riro te reira, i te tahi mau taime, i te haapau roa i to outou itoito e to outou puai. No te matahiti rahi e te ma‘i, e rahi mai paha te mau hinaaro o ta outou vahine. Ia ma‘iti râ outou, noa’tu te ohipa, ia tuu i to’na oaoa i ni‘a i to outou iho, te fafau nei au ia outou e, e rahi atu â to outou here no’na.
Te toru, a faaitoito i te utuafare atoa ia here te tahi i te tahi. Ua haapii te peresideni Ezra Taft Benson e :
« Ia hi‘o tatou i te ora mure ore, e riro te faaoraraa ei ohipa utuafare…
« I ni‘a i te mau mea atoa, e mea titauhia ia ite e ia farii roa te mau tamarii i to ratou aau e, te herehia nei ratou, te hinaarohia nei ratou, e te auhia nei ratou. Ua hinaaro ratou ia haapapû-pinepine-hia ratou te reira. Ia hi‘o maitai au, e ti‘a i te mau metua ia amo i teie hopoi‘a, e o te metua vahine te nehenehe e rave maitai roa a‘e i te reira ».10
Te tahi atoa râ puna rahi no te mana‘o here, o te here ïa ta te tamarii e faaite i te tahi tamarii i roto i te utuafare. E tae mai te haapa‘o-maitai-raa i te taea‘e e te tuahine, te tahi i te tahi, na roto ana‘e i te tutavaraa tamau a te mau metua e te tauturu a te Atua. Ua ite outou e parau mau te reira no te mea ua ite a‘ena outou i te reira i roto i to outou iho utuafare. Te vai atoa ra te haapapûraa ia tai‘o outou i te mau mârôraa utuafare ta te peropheta parau-ti‘a Lehi raua ta’na vahine Saria i faaruru i roto i te Buka a Moromona.
Ua riro ta raua mau manuiaraa ei arata‘iraa no tatou. Ua haapii maitai raua ma te tuutuu ore i te evanelia a Iesu Mesia e ua tae roa i te tamărû i te aau, o te mau tamarii e o te tahi atoa huaai na roto i te mau u‘i, i te Atua e i te tahi e te tahi. Ei hi‘oraa, ua papa‘i Nephi e te tahi atoa pu‘eraa, e ua pii mai ratou i te mau melo o te utuafare tei riro na ei enemi no ratou. Tae atura i te hoê taime, ua tamărû te Varua i te aau o na tauasini e ua taui te feii ei aroha.
Te hoê rave‘a no outou no te faatupu faahou i te mau manuiaraa a te metua Lehi ra, o te faatereraa ïa i te mau pure e te mau taime utuafare, mai te pureraa pô utuafare. A horo‘a i te mau tamarii ia pure, ia nehenehe ia ratou ia pure no te tahi e te tahi i roto i te haamenemeneraa, no oia e titau nei i te tahi mau haamaitairaa. A haro‘aro‘a oioi i te au-ore-raa e a haapopou i te taviniraa pipiri ore, te tahi i te tahi ihoa râ. Ia pure ratou no te tahi e te tahi e ia tavini ratou i te tahi e te tahi, e mărû mai te mau aau e e fariu mai te aau i te tahi e te tahi e i te mau metua.
Te maha o te rave‘a no te arata‘i i to outou utuafare ia au i te arata‘iraa a te Fatu, e tae mai ïa te reira i te taime no te faatitiaifaroraa. E nehenehe ta tatou e amo i ta tatou titauraa ia faatitiaifaro ia au i te arata‘iraa a te Fatu e na reira ia arata‘i ia ratou i te ora mure ore.
E haamana‘o ihoa outou i teie mau parau, e teie râ, aita â paha outou i ite i to te reira puai no te taata e mau nei i te Autahu‘araa a Melehizedeka no te faaineine i to’na utuafare ia ora ia au i te auraa e ite atu ratou i te basileia o te ra‘i ra. Te haamana‘o nei outou i teie mau parau. E mea matau-roa-hia ho‘i.
« E ore roa e nehenehe e e ore roa hoi e ti‘a ia haamauhia te hoe mana e a ore râ te hoe vahi iti a‘e no te tura na roto i te autahu‘araa, maori râ na roto i te faaoromai-noa-raa, na roto i te mărû e te haehaa, e na roto hoi i te here mau ra ;
« Na roto i te aroha, e te ite ateate ra, o te faarahi roa i te varua ma te faahua ore, e ma te haavare ore i roto i to’na aau—
« Ma te faahaparaa’tu i te tahi mau taime na roto i te parau papû roa, ia faaûrûhia ra e te Varua Maitai ; e i reira e faaite mai ai i te rahiraa no te here ia’na o ta oe i faahapa na, oi mana‘o mai ai oia e ei enemi oe no’na ra ;
« Ia ite mai oia e e mea puai a‘e ta oe tiaturiraa i te mau tapearaa no te pohe ».11
E i muri mai te fafauraa faufaa rahi no tatou te mau metua tane i Ziona : « E e riro te Varua Maitai ei apiti no outou i te mau taime atoa, e to outou sepeta ei sepeta taui ore no te parau-ti‘a e te parau mau ; e e riro to outou mana ei mana mure ore, e e tahe mai te reira ia outou ma te faahepo ore e a muri e a muri noa’tu ».12
E faatureraa teitei te reira no tatou, tera râ, ia haavî tatou ma te faaroo i to tatou huru e ia haapae tatou i to tatou te‘ote‘o, e horo‘a mai te Varua Maitai i To’na faati‘araa, e i reira, e papû roa mai ta tatou mau faufaa mo‘a e ta tatou mau fafauraa mo‘a.
E manuia outou na roto i to outou faaroo i te mea e, ua faaho‘i mai te Fatu i te mau taviri o te autahu‘araa e tei ia tatou nei â te reira—ma te taamuraa o te here i ta outou vahine, e ma te tauturu a te Fatu no te faafariu i te aau o te mau tamarii i te tahi e te tahi e i te mau metua, e ma te here no te arata‘i ia outou no te faatitiaifaro e no te a‘o i te huru e tae mai te Varua.
Ua ite au e, o Iesu te Mesia e to tatou Faaora. Te faaite papû nei au no te peresideni Thomas S. Monson, te mau nei e te faaohipa nei oia i te mau taviri atoa o te autahuraraa i ni‘a i te fenua nei. Ua here au ia’na e te paturu nei au ia’na. Ua here au ia outou e te pure nei au no outou. I te i‘oa mo‘a o Iesu Mesia, amene.