Ineine e ti‘amâ no te tavini

Na te peresideni Thomas S. Monson

E itehia te semeio i te mau vahi atoa mai te mea e, e maramaramahia te parau no te autahu‘araa, mai te mea e, e faaturahia e e faaohipa-ti‘a-hia to’na mana, e mai te mea e, e faaitehia te faaroo.

E au mau taea‘e here e, e mea au mau ia farerei faahou ia outou. I te mau taime atoa e haere au i te amuiraa rahi a te autahu‘araa, e feruri au i te mau haapiiraa a te tahi o te mau ti‘a faatere hanahana a‘e na te Atua, tei paraparau i roto i te mau pureraa autahu‘araa rahi a te Ekalesia. E rave rahi o ratou o tei taoto, tera râ, mai roto mai i te maramarama o to ratou feruriraa, i te hohonuraa o to ratou aau, e i te mărû o to ratou mafatu, ua horo‘a mai ratou i te arata‘iraa faauruhia ia tatou nei. Te horo‘a’tu nei au ia outou i teie pô i te tahi o ta ratou mau haapiiraa no ni‘a i te autahu‘araa.

Mai roto mai i te Peropheta Iosepha Semita:« Ua riro te Autahu‘araa Mo‘a ei rave‘a e paraparau ai e e ohipa ai te Atua e te taata i ni‘a i te fenua nei; e te mau ve‘a no te ra‘i mai tei haere mai i te fenua nei no te paraparau i te taata e mau taata ïa o tei mau e o tei faatura i te autahu‘araa a ora’i ratou i roto i te tino nei; e te mau mea atoa ta te Atua i faatupu no te faaoraraa o te taata nei, mai te taeraa mai o te taata i ni‘a i te fenua nei e tae noa’tu i te faaoraraa o te ao nei, ua ravehia e e ravehia ïa na roto i te autahu‘araa mure ore ».¹

Mai roto mai i te mau parau a te peresideni Wilford Woodruff, te haapii mai nei tatou e: « Ua riro te Autahu‘araa Mo‘a ei rave‘a e paraparu ai e e ohipa ai te Atua e te taata i ni‘a i te fenua nei; e te mau ve‘a no te ra‘i mai tei haere mai i te fenua nei no te paraparau i te taata e mau taata ïa o tei mau e o tei faatura i te autahu‘araa a ora‘i ratou i roto i te tino nei; e te mau mea atoa ta te Atua i faatupu no te faaoraraa o te taata nei, mai te taeraa mai o te taata i ni‘a i te fenua nei e tae noa’tu i te faaoraraa o te ao nei, ua ravehia e e ravehia ïa na roto i te autahu‘araa mure ore ».²

I muri a‘era ua haapapû mai te peresideni Joseph F. Smith e: « Te autahu‘araa… o te mana ïa o te Atua tei horo‘ahia i te taata na roto hoi i te reira e ti‘a ai i te taata ia rave i te ohipa i ni‘a i te fenua nei no te faaoraraa o te utuafare taata nei, na roto i te i‘oa o te Metua e o te Tamaiti e o te Varua Maitai, e ia haa ma te mana; eiaha râ ma te faahua mau noa i te mana, eiaha atoa ma te tipee i te reira i te mau u‘i tei pohe e tei reva ê, e mana râ tei horo‘ahia mai i teie mahana ta tatou e ora nei na te mau melahi tauturu e na te mau varua no ni‘a mai, mai mua ti‘a mai i te aro o te Atua Manahope ra ».³

E te hopea roa, no roto mai i te peresideni John Taylor: « Eaha te autahu‘araa ?… E pahono poto noa’tu vau e, o te faatereraa ïa a te Atua, i ni‘a i te fenua nei e i te ra‘i ra, i te mea e, na roto ho‘i i taua mana ra, taua ti‘amaraa ra, e aore râ, taua ture ra e faaterehia ai te mau mea atoa i ni‘a i te fenua nei e i ni‘a i te ra‘i ra, e na roto ho‘i i taua mana ra i paturuhia ai te mau mea atoa. Na’na e faatere i te mau mea atoa—na’na e arata‘i i te mau mea atoa—na’na e paturu i te mau mea atoa—o te reira te tumu o te mau mea atoa i taatihia i ni‘a i te Atua e te parau mau ».⁴

E haamaitairaa rahi to tatou i te taeraa mai i ô nei i teie mau mahana hopea nei, i te taime tei ni‘a i te fenua nei te autahu‘araa o te Atua. E fana‘oraa rahi to tatou i te mauraa i te reira autahu‘araa. E ere te autahu‘araa i te hoê horo‘a noa, e faaueraa râ ia tavini, e fana‘oraa no te faateitei, e e taime no te haamaitai i te oraraa o vetahi ê.

E hopoi‘a e e ohipa to roto i teie mau maitai tei horo‘ahia mai. Te here nei au e te poihere nei au i teie ta‘o ohipa e i te mau mea atoa i apitihia mai i te reira.

I roto i te hoê ti‘araa e aore ra, i te tahi atu, i roto i te hoê faanahoraa e aore ra, i te tahi atu, ua haere au i roto i te mau pureraa autahu‘araa i roto i na matahiti e 72 i ma‘iri ra—mai to’u faatoroa-raa-hia e diakono i te 12 o te matahiti. E tamau noa te tau i te tere i mua. E rahi noa’toa ta tatou ohipa a tere noa ai te tau. Eita te ohipa e paruparu eita atoa e iti. E tae mai te mau pe‘ape‘a rarahi e a reva’tu, area te aroraa no te varua o te taata ra, aita ïa te reira e morohi. Mai te ture paari ra te parau na te Fatu i te tae mai ia outou na, ia’u nei, e i te feia tei mau i te autahu‘araa i te mau vahi atoa: « No reira, i teie nei a tuu atu i te mau taata atoa ia haapii mai i ta’na iho ohipa, e ia rave hoi i te ohipa i roto i te toro‘a tei faataahia no’na ra, ma te itoito atoa ».⁵

Ua tae mai te piiraa ohipa ia Adamu, ia Noa, ia Aberahama, ia Mose, ia Samuela, ia Davida. Ua tae mai te reira i te Peropheta Iosepha Semita e i to’na ra mau mono atoa. Ua tae mai te piiraa ohipa i te tamaiti ra ia Nephi a faaue mai ai te Fatu ia’na, na roto i to’na metua ia Lehi, ia ho‘i i Ierusalema e to’na na taea‘e no te haere e tii i te mau api veo ia Labana ra. Ua amuamu na taea‘e o Nephi, ma te parau e, e ohipa teimaha teie e anihia ra ia raua. Eaha te pahonoraa a Nephi ? Na ô atura oia, « E haere atu vau, e rave hoi i te mau mea ta te Fatu i faaue maira, ua ite hoi au e, e ore te Fatu e tuu mai i te hoê faaue i te mau tamarii a te taata, maori râ e faaineine oia i te hoê ravea no ratou, e tia‘i ia ratou i te rave i te mea ta’na i faaue mai ia ratou ra ».⁶

Mai te mea e, e tae atoa mai taua piiraa ra ia outou e ia’u, eaha ïa ta tatou pahonoraa ? E amuamu anei tatou, mai ia Lamana raua o Lemuela, ma te parau e, « e mea rave taiatâ ta’u i ani ia raua » ?⁷ E aore ra, e parau anei tatou tata‘itahi e o Nephi e, « E haere au. E rave au » ? E ineine anei tatou no te tavini e no te haapa‘o ?

I te tahi taime e riro paha te paari o te Atua ei ohipa maamaa e aore ra, ei mea teimaha, tera râ, hoê o te mau haapiiraa rahi e te faufaa roa a‘e o te ti‘a ia tatou ia apo mai i te tahuti nei maori râ, ia paraparau ana‘e mai te Atua e ia faaroo te taata, e vai parau ti‘a noa te reira taata.

Ia feruri ana‘e au i te ta‘o ra ohipa e te huru no te raveraa tatou i ta tatou ohipa i te haafaufaa i to tatou oraraa e i te oraraa o vetahi ê, e haamana‘o vau i te mau parau i papa‘ihia na te hoê roipehe tu‘iroo:

Ua taoto e ua moemoea vau
E oaoa te orararaa nei
Ua ara mai au e ua ite a‘era vau
E ohipa te oraraa nei
Ua haa vau, e inaha
E oaoa te ohipa.8

Ua papa‘i o Robert Louis Stevenson i te tahi atu papa‘iraa. Ua parau oia e, « Ua ite au e, eaha te oaoa, i te mea e, ua rave au i te ohipa maitai ».⁹

Ia rave ana‘e tatou i ta tatou ohipa e ia faaohipa ana‘e i to tatou autahu‘araa, e itehia ia tatou te oaoa mau. E ite tatou i te mauruuru no to tatou faaotiraa i ta tatou ohipa.

Ua haapiihia tatou i te mau ohipa papû maitai o te autahu‘araa ta tatou e mau nei, te autahu‘araa a Aarona anei e aore ra, te Autahu‘araa a Melehizedeka anei. Te faaitoito atu nei au ia outou ia feruri maite i teie mau ohipa e ia rave i te reira ma to outou puai atoa no te faaoti i te reira. No te raveraa i te reira, e mea ti‘a ia tatou tata‘itahi ia ti‘amâ. Ei rima ineine to tatou, ei rima mâ, e ei rima hinaaro ia nehenehe ia tatou ia rave i te ohipa no te horo‘a i te mau mea ta to tatou Metua i te Ao ra e hinaaro ia vetahi ê ia farii. Mai te mea e, aita tatou i ti‘amâ, e riro tatou i te ere i te mana o te autahu‘araa, e mai te mea e, e ere tatou i te reira, ua ere ïa tatou i te mea faufaa no te faateiteiraa. E mata na tatou ia riro ei feia ti‘amâ no te tavini.

Teie ta te peresideni Harold B. Lee, te hoê o te mau orometua rahi i roto i te Ekalesia, i parau: « Ia riro ana‘e te hoê taata ei taata tei mau i te autahu‘araa, e riro mai oia ei ti‘a no te Fatu. E titauhia ia’na ia feruri i to’na piiraa mai te huru e, te rave nei oia i te ohipa a te Fatu ».¹⁰

I te tau no te Tama‘i Rahi II o te Ao nei, i te omuaraa o te matahiti 1944, ua tupu te hoê ohipa i ni‘a i te autahu‘araa i te taime a haru ai te nuu ihitai o te mau Hau Amui no Marite i te motu no Kwajalein, i te mau motu no Marshall, i roto i te Moana Patifita, i ropu ia Auteraria e Vaihi. Na te hoê papa‘i ve‘a i papa‘i i te ohipa tei tupu—e ere oia i te melo no te Ekalesia—e rave ohipa râ no te hoê taiete ve‘a no Vaihi. I roto i te parau pia o te ve‘a no 1944 ta’na i papa‘i i muri a‘e i te ohipa tei tupu, te faaite ra oia e, tei roto oia e te tahi atu mau papa‘i ve‘a i te piti o te pŭpŭ tama‘i i muri i te mau ihitai i te motu no Kwajalein. A haere ai ratou i mua, ua ite atura ratou i te hoê ihitai te painu ra i roto i te miti te mata i raro, mai te huru ra e, ua pepe oia. E ere te miti i te mea hohonu i taua vahi ra e ua uteute roa i to’na toto. E i muri iho, ua ite ratou i te tahi atu ihitai te haere ra i piha‘i iho i to’na hoa tei pepe. Ua pepe atoa te piti o te ihitai, inaha ua tarere noa to’na rima aui aita e ohipa e nehenehe e rave. Ua amo a‘era oia i te upoo o te ihitai e painu ra i roto i te miti i ni‘a eiaha oia ia paremo. Ua tuo oia ma te reo riaria no te ani i te tauturu. Ua hi‘o faahou te mau papa‘i ve‘a i ni‘a i te tamaiti ta’na e amo ra e ua pahono atura, « Tamaiti, aita e ohipa e ti‘a ia tatou ia rave no teie tamaiti ».

Ua papa‘i faahou te papa‘i ve‘a « I imuri iho, ua ite au i te hoê mea aita â vau i ite a‘enei ». Teie tamaiti, tei pepe maitai atoa, ua faaitoito oia i te amoraa i te tino o to’na hoa6, mai te huru ra e, ua pohe, e tae roa’tu i te pae tahatai. Ua « tuu a‘era oia i te upoo o to’na hoa i ni‘a i to’na turi… E mea maere mau te ohipa i itehia’tu—teie na tamaiti ua fatata i te pohe—toopiti atoa… e mea viivii ore, na taure‘are‘a nehenehe, noa’tu i roto i teie taime ati to raua. Ua taupe a‘era hoê tamaiti i to’na upoo i ni‘a a‘e i te tahi e ua na ô a‘era, ‘Te faaue nei au ia oe, na roto i te i‘oa o Iesu Mesia e na roto i te mana o te autahu‘araa, ia ora noa oe e tae roa’tu i te taime e roaa mai te tauturu a te taote’ ». Ua opani te papa‘i ve‘a i ta’na parau pia: « Teie matou e toru, [na ihitai e piti e o vau], i roto i te fare ma‘i. Aita te taote i ite… [e mea nahea raua i ora noa ai], o vau râ, ua ite au ».¹¹

E itehia te temeio i te mau vahi atoa mai te mea e, e maramaramahia te parau no te autahu‘araa, mai te mea e, e faaturahia e e faaohipa-ti‘a-hia to’na mana, e mai te mea e, e faaitehia te faaroo. Ia mono ana‘e te faaroo i te mana‘o feaa, ia faaore ana‘e te taviniraa pipiri ore i te tautooraa pipiri, e faatupu te mana o te Atua i Ta’na mau opuaraa.

E nehenehe te piiraa ohipa e tae mărû noa mai, mai te mea e, e pahono tatou, tatou tei mau i te autahu‘araa, i te mau ohipa ta tatou i farii. Ua parau te peresideni George Albert Smith, teie ti‘a faatere haehaa e te maitai atoa râ, « E ohipa na outou a tahi roa, ia ite e, eaha ta te Fatu e hinaaro nei e i muri iho, na roto i te mana e i te puai o To’na Autahu‘araa mo‘a, ia faarahi [mai te reira]i to outou piiraa i mua i te aro o to outou mau taata, ia oaoa hoi te taata i te pee ia outou ».¹²

Teie huru piiraa ohipa—E ere i te piiraa rarahi roa, tera râ, ua tauturu te reira i te faaoraraa i te varua—ua tae mai te reira ia’u nei i te matahiti 1950 a piihia ai au ei episekopo. E mea rahi ta’u mau hopoi‘a ei episekopo e te rau te huru, e ua tamata vau ia rave i te taatoaraa o te mau mea i titauhia ia’u, ia au i te vahi maitai roa e maraa ia’u. Tei roto te mau Hau Amui no Marite i te mau tama‘i e rave rahi i taua taime ra. E no te mea e, e rave rahi o to tatou mau melo e tavini ra i roto i te nuu faehau, ua tae maira te hoê aniraa na roto mai i te pu faatere o te Ekalesia i te mau episekopo atoa ia hapono i te mau faehau atoa i te ve‘a ra Church News e te Improvement Era, te ve‘a ïa a te Ekalesia i taua taime ra. Taa‘e atu i te reira, ua anihia i te episekopo tata‘itahi ia papa‘i oia iho i te hoê rata i te mau ava‘e atoa na te mau faehau atoa o ta’na paroita. E 23 taata no ta matou paroita tei roto i te nuu faehau. Ua imi te mau pŭpŭ autahu‘araa i te mau rave‘a ia roaa te moni no te hoo i te mau ve‘a. Ua farii au i te titauraa, oia hoi, te ohipa, ia papa‘i au iho e 23 rata i te ava‘e tata‘itahi. I muri a‘e i teie rahiraa matahiti, te vai noa nei â ta’u e rave rahi o taua mau rata ra e te mau pahonoraa i tae mai. Ia tai‘oi‘o faahou ana‘e au i teie mau rata, e mea ohie roa te pape mata i te tahe. E mea oaoa roa ia ite faahou i te hinaaro o te hoê faehau ia haapa‘o i te evanelia, te faaotiraa a te hoê ihitai ia haapa‘o tamau noa i te evanelia e to’na utuafare.

I te hoê ahiahi ua horo‘a’tu vau i te hoê tuahine ra no te paroita i te puohu o na rata e 23 no taua ava‘e ra. Na’na e haapa‘o i te haponoraa i te mau rata, e i te hi‘opo‘araa i te tauiraa o te mau adress. Ua hi‘o oia i ni‘a i te hoê rata e ua ataata maira, e na ô mai nei e, « Bishop, aita oe e fiu ? Teie faahou â hoê rata na te Taea‘e Bryson. Teie te 17raa o te rata ta oe i hapono na’na e aita roa hoê pahonoraa ».

Pahono atura vau e, « Ahh, peneia‘e teie paha te ava‘e e papa‘i mai ai oia ». E o tera mau ihoa. No te taime matamua, ua pahono mai oia i ta’u rata. Ua riro ta’na pahonoraa ei haamana‘oraa nehenehe roa, ei tao‘a faufaa rahi. Te tavini ra oia i roto i te hoê motu atea roa, e te taata ore, e te mihi i te fenua, e te mo‘emo‘e. Ua papa‘i oia e, « E te episekopo here, e ere au i te mea ite maitai i te papa‘i ». (Ua nehenehe ihoa ïa ta’u e parau i te reira no tera mau ava‘e i ma‘iri a‘ena). Te na ô faahou ra ta’na rata e, « Mauruuru no te Church News e no te mau ve‘a, mauruuru hoa râ ia oe no ta oe mau rata. Ua huri au i te hoê api api. Ua faatoro‘ahia vau ei tahu‘a i roto i te Autahu‘araa a Aarona. E oaoa rahi to to’u aau. E taata oaoa vau ».

Aita te oaoa o te Taea‘e Bryson i hau atu i to to’na episekopo. Ua haapii mai au e nahea ia faaohipa i roto i to’u iho oraraa i te parau ra e, « E mea maitai a‘e ia rave oe i [ta oe] ohipa, vaiiho te toe‘a na te Fatu e haapa‘o ».¹³

Tau matahiti i muri mai, i roto i te hoê pureraa na te Tĭtĭ no Roto Miti Cottonwood, o James E. Faust to’na peresideni, ua faati‘a vau i te reira aamu, no te faaitoito i te taata ia haapa‘o maitai a‘e i to tatou mau faehau. I muri a‘e i te pureraa, ua haere maira te hoê taure‘are‘a nehenehe i mua. Ua tapea maira oia i to’u rima e ua ui maira e, « Bishop Monson, te haamana‘o ra oe ia’u ? »

I reira iho, ua ite a‘era vau e, o vai oia. Na ô atura vau e, « Te taea‘e Bryson ! Eaha to oe huru ? Eaha ta oe ohipa i roto i te Ekalesia ? »

Ma te mahanahana e te haapeu rii, pahono maira oia e, « Maitai roa vau. Te tavini nei au i roto i te peresideniraa no te pŭpŭ peresibutero. Mauruuru â no to oe haamana‘o-noa-raa ia’u e no ta oe mau rata ta oe i hapono mai e o ta’u e poihere maitai nei ».

E te mau taea‘e, te hinaaro nei te ao i ta tatou tauturu. Te rave ra anei tatou i te mau mea atoa i titauhia ia tatou ia rave ? Te haamana‘o ra anei tatou i te mau parau a te peresideni John Taylor: « Mai te mea e, aita outou e faarahi i to outou piiraa, e amo outou i te hopoi‘a i mua i te Atua no te mau taata o ta outou e faaora ahiri outou i rave i ta outou ohipa ».¹⁴ Te vai ra te avae e faaetaeta, te rima e tapea, te mana‘o e faaitoito, te aau e faauru, e te varua e faaora. Te tia‘i mai nei te mau haamaitairaa mure ore ia outou. Tei ia outou te haamaitairaa eiaha ia mataitai noa, e amui atu râ i roto i te ohipa taviniraa a te autahu‘araa. E mata na tatou i te faaroo i te parau faaara faauru e itehia i roto i te Episetole a Iakobo:« Ei feia rave hoi outou i te parau nei, eiaha ei feia faaroo noa, i te haavare-noa-raa ia outou iho ».¹⁵

E mata na tatou i te haapii e i te feruri maite i ni‘a i ta tatou ohipa. E mata na tatou i te faaineine e i te faati‘amâ ia tatou no te tavini. I roto i te raveraa i ta tatou ohipa, e mata na tatou i te pee i te taahiraa avae o te Fatu. Mai te mea e, e pee tatou i te hi‘oraa o Iesu, e ite ïa tatou e, e ere Oia i te aiu noa i Betelehema ra, e ere i te tamaiti noa na te tamuta fare, e ere noa i te orometua rahi roa a‘e aore â i ora a‘enei. E ite râ tatou Ia’na ei Tamaiti na te Atua, to tatou Faaora e to tatou Taraehara. Ia tae a‘era mai ia’na ra te piiraa no te ohipa, ua pahono atura Oia, « E te Metua, ia haapaohia to oe hinaaro, e no oe te hanahana e a muri noa’tu ».¹⁶ E ti‘a anei ia tatou tata‘itahi ia na reira atoa, ta’u ïa pure na roto i To’na i‘oa mo‘a, te i‘oa o Iesu Mesia, te Fatu, amene.