Te taea’e Iosepha, nā David Lindsley

28 nō Novema

Nāhea tō Iosepha Semita tauturura’a ’ia fa’atupu i te ’ōpuara’a a te Metua mure ’ore ?

Te Parau Ha’api’ira’a ʼe te mau Parau Fafau 135–136

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e e fa’anaho i te mau rāve’a nō te ’ohipa i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau tumu parau e ’āparau) :

• Tā tātou pupu ’aore rā piha. E aha tā tātou e nehenehe e rave nō te fa’atupu i te hō’ēra’a i roto i te mau melo o te pupu ’aore rā, o te piha ? E aha te mau fā tā tātou e hina’aro e rave ’āmui ?

• Tā tātou mau ’ohipa ’aore rā mau hōpoi’a. E aha tā tātou e rave ra nō te fa’a’ite i te ’evanelia ? E aha te mau ’itera’a tā tātou i fāri’i nō te ravera’a i te ’ohipa hiero ’e te ’ā’amu ’utuāfare ?

• Tō tātou orara’a. Nāhea tātou i te ’itera’a i te rima o te Fatu i roto i tō tātou orara’a ? E aha te mea tei fa’auru ia tātou i roto i tā tātou tuatāpapara’a i te pāpa’ira’a mo’a i teie hepetoma ?

I te hope’a o te ha’api’ira’a, mai te mea e tano, ’a rave i te mau mea i muri nei :

• ’A fa’a’ite pāpū nō te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau ’ōpuara’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

« ’Ua rahi a’e tā Iosepha Semita, te Peropheta ’e te Hi’o a te Fatu, i rave, maori rā ia Iesu ana’e, nō te fa’aorara’a i te ta’ata nei i roto i teie nei ao, i tei ravehia ’e te hō’ē ta’ata ’ē atu ’o tei ora na i ni’a iho i te reira » (Te Parau Ha’api’ira’a ’e te mau Parau Fafau 135:3 Teie te hō’ē fa’ahitira’a parau mata’u ’ore nō ni’a i te ti’ara’a a Iosepha Semita. ’Ua feruri a’ena ānei ’outou i te aura’a o teie parau i roto i tō ’outou orara’a ? Nāhea tō ’outou orara’a e ta’a ’ē ai ’āhiri ’aita te ’evanelia a Iesu Mesia i fa’aho’i-fa’ahou-hia mai ? E aha tā ’outou e nehenehe e rave nō te tauturu i te mau melo o tā ’outou pupu ’aore rā, te piha, ’ia ha’apūai i tō rātou ’itera’a pāpū nō te misiōni a Iosepha Semita ?

A fa’aineine ai ’outou nō te ha’api’i, ta’a’ē noa atu te tuatāpapara’a i Te Parau Ha’api’ira’a ’e te mau Parau Fafau 135, a feruri i te hi’opo’a-fa’ahou-ra’a i te parau poro’i a te peresideni M. Russell Ballard, « E’ita anei tātou e haere nā ni’a iho i te hō’ē tumu rahi ? » (Liahona, Mē 2020, 8 – 11) e te parau poro’i a Elder Neil L. Andersen « Iosepha Semita » (Liahona, Novema 2014, 28 – 31).

’Ua ha’amaita’ihia tō tātou orara’a nā roto i te mau parau mau tei fa’aho’i-fa’ahou-hia mai nā roto i te peropheta Iosepha Semita.

Ha’api’i-’āmui-ra’a mai

Nō te ha’amata i te hō’ē ’āparaura’a nō ni’a i te huru o tō Iosepha Semita tauturura’a i te fa’atupu i te ’ōpuara’a a te Metua i te ao ra, e nehenehe ’outou e hamata nā roto i te hi’o-fa’ahou-ra’a e aha tā te mau melo o te pupu ’aore rā, o te piha i ’apo mai nō ni’a i te peropheta nā roto i te tai’ora’a Te Parau Ha’api’ira’a ’e te mau Parau Fafau 135 i teie hepetoma. ’Ei hi’ora’a, e nehenehe rātou e tāpura mai i te mau parau mau tā rātou i ’ite nō ni’a i te Fa’aora ’e tāna ’evanelia maoti Iosepha Semita. Nō te aha e mea faufa’a teie mau parau mau tāta’itahi i roto i te ’ōpuara’a a te Metua i te ao ra ? E nehenehe te mau ’ohipara’a i muri nei e tauturu i tā ’outou pupu ’aore rā, piha, ’ia hāro’aro’a maita’i a’e i te ti’ara’a a Iosepha Semita i roto i te ’ōpuara’a nō te fa’aorara’a.

• Nō te tauturu i te mau melo o te pupu ’aore rā, o te piha, ’ia fa’aineine i te tauturu ia vetahi ’ē ’ia hāro’aro’a i te faufa’a rahi o te peropheta Iosepha, e nehenehe rātou e tai’o « Te fa’aho’i-fa’ahou-ra’a-hia mai te ’evanelia a Iesu Mesia nā roto ia Iosepha Semita » i roto i te pene 3 o te ’Ia Poro Haere i tā’u nei ’Evanelia ([2019], 36–38). Ma te rave ’āpitipiti ’aore rā, i roto i te mau pupu na’ina’i, e nehenehe rātou e ’imi i te mau tumu faufa’a nō te fa’a’ite i te tahi pae. I muri iho e nehenehe rātou e rave pinepiene nō te fa’a’ite i te ’itera’a o Iosepha Semita i te tahi ’e te tahi nā roto i tā rātou iho mau parau. E ani ia rātou ’ia feruri i te mea tā rātou e nehenehe e rave nō te fa’a’ite i te parau poro’i o te fa’aho’i-fa’ahou-ra’a mai. E nehenehe paha rātou e feruri i te hō’ē ta’ata ta’a maita’i tā rātou e nehenehe e fa’a’ite i teie parau poro’i. E hina’aro ato’a paha rātou e fa’a’ite i te mau ’itera’a i te taime ’a tauturu ai rātou i te hō’ē ta’ata ’ia ha’api’i mai nō ni’a ia Iosepha Semita.

• E ani i te mau melo o te pupu ’aore rā, o te piha, ’ia feruri ē, ’ua parau te hō’ē o tō rātou mau hoa i te fare purera’a ē, « ’aita vau i pāpū ē, e ’itera’a pāpū ānei tō’u nō ni’a ia Iosepha Semita. Nāhea ’oe i ’ite ai ē, e peropheta ’oia ? » Nāhea tātou i te pāhono ? E aha tā tātou i ha’api’i mai nā roto mai i te ’itera’a o Iosepha Semita iho i roto Iosepha Semita—’Ā’amu 1:8–19 nō ni’a e nāhea tātou e nehenehe ai e noa’a ’aore rā, e ha’apūai i tō tātou ’itera’a pāpū ? E ani i te mau melo o te pupu ’aore rā, o te piha ’ia tāpura mai i te mau rāve’a nō te ha’apūai i tō rātou ’itera’a pāpū nō te peropheta Iosepha Semita, ’e ’ia mā’iti tāta’itahi mai rātou hō’ē rāve’a tā rātou e rave i teie hepetoma.

• Nō te tauturu i te mau melo o te pupu ’aore rā, o te piha, ’ia hāro’aro’a maita’i a’e i te ’ohipa tā te Atua i fa’aoti nā roto ia Iosepha Semita, e nehenehe ’outou e ani ia rātou ’ia tai’o i te mau ’api 48–53 o Te mau Ha’api’ira’a a te mau Peresideni o te ’Ēkālesia : Gordon B. Hinckley (2016) ’aore rā, e māta’ita’i i te hō’ē ’aore rā hau atu, mau video i roto « Mau rāve’a tauturu pāturu ». E nehenehe rātou e rave mai hō’ē ’aore rā, hau atu, o te mau parau tumu ’e te mau ravera’a tei vauvauhia i roto i teie mau rāve’a tauturu, tei riro ho’i ’ei mea faufa’a rahi nō rātou. E nehenehe rātou e fa’ata’a mai, nō te aha rātou i māuruuru ai ē, ’ua fa’aho’i-fa’ahou-ra’a mai te Fatu i teie mau mea nā roto ia Iosepha Semita. E ’oa’oa ato’a paha rātou e pāpa’i i te hō’ē parau fa’a’itera’a i tō rātou māuruuru nō te huru o te ’ohipa a Iosepha Semita i te tauturura’a ia rātou ’ia ha’afātata au i te Fa’aora. E nehenehe ato’a rātou e feruri e aha tā rātou e ti’a e rave nō te fāna’o hope hau atu i te mau ha’amaita’ira’a tā te Fatu i hōro’a mai nā roto ia Iosepha Semita.

’A rave ma te fa’aro’o

’A fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te ’ohipa i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tū’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e fa’a’ite mai i tō rātou mau mana’o.

Mau rāve’a tauturu pāturu

• Te Parau Ha’api’ira’a ’e te mau Parau Fafau 35:17–18 (Nā roto i te peropheta Iosepha Semita, ’ua fa’aho’i mai te Fatu i te ’īra’a o te ’evanelia)

• Russell M. Nelson, « Te Buka a Moromona : E aha te huru o tō ’outou orara’a ’āhani ’aita te reira ? » Liahona, Novema 2017, 60–63

• « Te mau ha’api’ira’a a Iosepha Semita : Te nātura o te Atua », « Tāvinira’a a Iosepha Semita : Te Buka a Moromona », « Tāvinira’a a Iosepha Semita : Te fa’anahonahora’a o te ’Ēkālesia », «Tāvinira’a a Iosepha Semita : Te fa’aho’ira’ahia mai te mana autahu’ara’a », « Tāvinira’a a Iosepha Semita : Te mau hiero », mau video, ChurchofJesusChrist.org

Ha’api’ira’a mai tā te Fa’aora

’Ua fa’atumu te Fa’aora i ni’a i te tauturura’a a tāna mau pipi ’ia ora i te ’evanelia ma tō rātou ’ā’au ato’a. Nāhea e nehenehe ai ia ’outou ’ia tauturu i te feiā tā ’outou e ha’api’i ra ’ia hi’o ē, nāhea tō rātou ’itera’a pāpū nō Iosepha Semita i te ha’aputapū i tō rātou orara’a i te mau mahana ato’a.