fa’aipoipo-’āpī-hia i mua i te hiero

14 nō Novema

Nō te aha e mea faufa’a te fa’aipoipora’a mure ’ore ?

Te Parau Ha’api’ira’a ʼe te mau Parau Fafau 129-132

ītona tāu’aparau ʼāmui

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e e fa’anaho i te mau rāve’a nō te ’ohipa i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau tumu parau e ’āparau) :

• Tā tātou pupu ’aore rā piha. ’O vai te hina’aro i tā tātou tauturu ’e mau pure ? E aha tā tātou e nehenehe e rave nō te tauturu ia rātou ? ’O vai tā tātou e ani manihini ’ia haere mai i te hō’ē ’ohipara’a i muri nei ?

• Tā tātou mau ’ohipa ’aore rā mau hōpoi’a. E aha te mau tītaura’a tā tātou i fa’aoti ? E aha te mau tītaura’a e ti’a ia tātou ’ia rave ? Nāhea tātou i te ani manihini ia vētahi ’ē ’ia haere mai i te Mesia ra, ’e nāhea tātou i te ani manihini ia vētahi ’ē i teienei ?

• Tō tātou orara’a. E aha te mau ’itera’a ’aita i maoro a’enei tei ha’apūai i tō tātou ’itera’a pāpū ? E aha te mea e tupu nei i roto i tō tātou orara’a ’e e nāhea tātou e nehenehe ai e pāturu te tahi ’e te tahi ?

I te hope’a o te ha’api’ira’a, mai te mea e tano, e rave i te mau mea i muri nei :

• ’A fa’a’ite pāpū nō te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau ’ōpuara’a ’e te mau ani-manihini-ra’a i ravehia i roto i te rurura’a.

ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

Mai te mea ’ua roa’a tō te mau melo o tā ’outou pupu autahu’ara’a ’aore rā, tā ’outou piha a te feiā ’āpī tamāhine i te mau ’itera’a pāpū nō ni’a i te fa’aipoipora’a hiero i tō rātou ’āpīra’a, e rahi atu ā tō rātou hina’aro ’e tō rātou fa’aineine nō taua ha’amaita’ira’a rahi ra. I roto i te ’ōpuara’a nō te ’oa’oa a tō tātou Metua i te ao ra, e mea faufa’a te fafaura’a mure ’ore o te fa’aipoipora’a, nō te fa’ateiteira’a (hi’o Te Parau Ha’api’ira’a ’e te mau Parau Fafau 131: 1–4). Terā rā, e ’ere te fa’aipoipora’a hiero nō ni’a noa i te mea tā tātou e fāri’i i roto i te orara’a a muri a’e—e nehenehe ato’a te reira e hōro’a mai i te mau ha’amaita’ira’a rarahi i roto i teie orara’a. ’Ei hi’ora’a, e nehenehe te mau fafaura’a mo’a ’e te Atua e fa’auru i te huru o te hi’ora’a a te hō’ē tāne ’e te hō’ē vahine fa’aipoipo i tō rāua autā’atira’a te tahi ’e te tahi. ’E te hō’ē tāne ’e te hō’ē vahine tei tā’atihia i te tahi ’e te tahi nō te tau ’e nō te tau a muri atu, e roa’a ia rāua te ha’apāpūra’a ē, maoti Iesu Mesia, e vai noa tō rāua autā’atira’a e a muri noa atu mai te mea ē, e ha’apa’o maita’i rāua i tā rāua mau fafaura’a.

Nāhea e nehenehe ai ia ’outou ’ia tauturu i te mau melo o te pupu ’aore rā, o te piha ’ia fāri’i i te hō’ē hina’aro rahi ’ia tā’atihia i roto i te hiero ? Nō te fa’aineine ia ’outou iho nō te ha’api’i nō ni’a i te fa’aipoipora’a hiero, e nehenehene ’outou e tai’o i te parau pāpa’i « Nō ni’a i te hō’ē tā’atira’a hiero » i ni’a temples.ChurchofJesusChrist.org ’aore rā, e tai’o « Te fa’aipoipora’a » i roto Mau Māite i te Fa’aro’o ([2004], 97–101).

nā metua e tāpe’a ra i tā rāua nā tamari’i

E nehenehe te mau ’utuāfare e tā’atihia e a muri noa atu nā roto i te mau ’ōro’a o te hiero.

Ha’api’i-’āmui-ra’a mai

Nō te hōro’a i te mau melo o te pupu ’aore rā, o te piha, i te hō’ē rāve’a nō te fa’a’ite mai i te mau mea tā rātou i tuatāpapa i roto i te mau pāpa’ira’a mo’a i teie hepetoma, e nehenehe ’outou e pāpa’i i ni’a i te tāpura ’ere’ere hō’ē uira’a mai teie Nō te aha e mea faufa’a te fa’aipoipora’a mure ’ore i roto i te hiero o te Atua ? E nehenehe i te mau melo o te pupu ’aore rā, o te piha, e ’imi i te fa’ahorora’a nō te hō’ē ’īrava tā rātou i tai’o i roto Te Parau Ha’api’ira’a ’e te mau Parau Fafau 129–32. e nehenehe e pāhono i te uira’a ’e e pāpa’i i te fa’ahorora’a i pīha’i iho i te uira’a. (Mai te mea e tauturu te reira, e nehenehe ’outou e fa’a’ite ia rātou Te Parau Ha’api’ira’a ’e te mau Parau Fafau 131:1–4 ; 132:13–19.) E tai’o ’āmui i te tahi o te mau fa’ahorora’a, ’e e ’āparau i te mea tā te reira e ha’api’i ra. E nehenehe ’outou e fa’a’ohipa i te mau huru ’ohipara’a ato’a i muri nei nō te tauturu i te feiā ’āpī ’ia hāro’aro’a maita’i a’e i te faufa’a o te fa’aipoipora’a hiero.

• Nō te mea ho’i ē, e mea ta’a ’ē mau te fa’aipoipora’a mure ’ore i roto i te ’evanelia i fa’aho’i-fa’ahou-hia mai, e nehenehe te feiā tā ’outou e ha’api’i ra e fāri’i i te mau rāve’a nō te fa’ata’a i te reira i te mau ta’ata ’aita i mātau i te reira. Nō te tauturu i te mau melo o te pupu ’aore rā, o te piha ’ia rave i te reira, e nehenehe ’outou e ani ia rātou ’ia feruri ē, tē vai ra tō rātou hō’ē hoa ’o tē uiui nei te mana’o ē, nō te aha te Feiā Mo’a i te mau Mahana Hope’a nei e ti’aturi ai ē, e mea faufa’a te fa’aipoipora’a i roto i te hiero. E ani ia rātou ’ia tai’o i te mau pāpa’ira’a mo’a i roto « Mau rāve’a tauturu pāturu », « Te ’Utuāfare : E Poro’i i tō te Ao nei » (ChurchofJesusChrist.org), ’aore rā, te mau ’api 97–98 i roto Mau Māite i te Fa’aro’o. E nehenehe rātou e ’imi i te mau ta’o, te mau pereota, ’e te mau mana’o tā rātou e nehenehe e tu’u i roto i te hō’ē rata i tō rātou hoa nō te fa’ata’a i te faufa’a o te fa’aipoipora’a hiero. E nehenehe ato’a rātou e māta’ita’i « Nō te aha e mea mo’a te fa’aipoipora’a nō te Metua i te ao ra ?i roto « Mata ’e mata ’e o Elder ’e te tuahine Renlund » ([ha’apūrorora’a nā te feiā ’āpī ’ati ti’a te ao nei], 5 nō ’Ātete 2017, FacetoFace.ChurchofJesusChrist.org E vaiiho ia rātou i te tahi taime nō te pāpa’i i te hō’ē rata ’e i muri iho, e ani ia rātou ’ia fa’a’ite mai i te mea tā rātou i pāpa’i.

• E nehenehe te ’itera’a i te hō’ē hi’ora’a nō te hō’ē fa’aipoipora’a maita’i, e fa’auru i te feiā tā ’outou e ha’api’i ra ’ia ’imi i te reira ha’amaita’ira’a nō rātou iho. Hō’ē rāve’a nō te rave i te reira, o te hi’o-fa’ahou-ra’a ïa i te mau tuha’a o te parau poro’i a Elder L. Whitney Clayton « Fa’aipoipora’a : ’A hi’o ’e ’a ha’api’i mai » (Liahona, Mē 2013, 83–85). E aha tā te mau melo o te pupu ’aore rā, o te piha e ha’api’i mai nā roto mai i teie parau poro’i nō ni’a e nāhea i te patu i te hō’ē fa’aipoipora’a mure ’ore ’oa’oa ? E nehenehe ato’a te mau melo nō te pupu ’aore rā, nō te piha e hi’o fa’ahou i te mau mana’o i roto « Fa’atupura’a i te hō’ē fa’aipoipora’a ’oa’oa » i roto i te Mau Māite i te Fa’aro’o (mau ’api 99–101). E nehenehe ato’a rātou e māta’ita’i « Nāhea tō Elder ’e te tuahine Bednar fārereira’a » ? nō roto mai te « Mata ’e mata ’e o Elder ’e te tuahine Bednarha’apūrorora’a nā te feiā ’āpī ’ati ti’a te ao nei], 12 nō Mē 2015, FacetoFace.ChurchofJesusChrist.org

• E ani i te mau melo o te pupu ’aore rā, o te piha ’ia feruri i te tahi mau mea e tāpe’a nei ia rātou ’eiaha ’ia tā’atihia i roto i te hiero. E aha tā tātou e rave i teienei nō te mana i ni’a i teie mau mea ? I muri iho e nehenehe rātou e hi’o fa’ahou « Fa’aipoipora’a mure ’ore » i roto i te pene 3 o te ’Ia Poro Haere i tā’u nei ’Evanelia ([2019], 89) nō te ’imi i te mau parau tumu ’e te mau peu e arata’i atu i te fa’aipoipora’a ’e i te ’utuāfare ’oa’oa. E nehenehe rātou e tāpura i te tahi mau mea tā rātou e rave i teienei nō te fa’aineine nō te hō’ē fa’aipoipora’a mure ’ore. E aha te ti’ara’a o te Fa’aora i roto i te tauturura’a ia tātou ’ia fa’aineine ’e ’ia rave i te hō’ē fa’aipoipora’a mure ore ?

’A rave ma te fa’aro’o

’A fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te ’ohipa i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tū’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e fa’a’ite mai i tō rātou mau mana’o.

Mau rāve’a tauturu pāturu

• Te Parau Ha’api’ira’a ’e te mau Parau Fafau 49:16–17 ; 131:1–4 ; 132:13–19 (E mea faufa’a te fa’aipoipora’a mure ’ore i roto i te ’ōpuara’a a te Atua)

• Mau tumu parau nō te ’evanelia, « Te fa’aipoipora’a », topics.ChurchofJesusChrist.org

• Video « ’E aha te huru o te hō’ē fa’aipoipora’a hiero ? », temples.ChurchofJesusChrist.org

• ’Ua parau o Elder D. Todd Christofferson : « Te paraura’a i te mau parau mau niu nō niʻa i te fa’aipoipora’a ’e te ’utuāfare, e ’ere ïa i te tau’a-’ore-ra’a aore rā te fa’aitira’a i te mau tusia ’e te mau manuiara’a o te feiā e ’ere te reira i tā rātou ti’aturira’a… E rave rahi mau mea maita’i, e rave rahi mau mea faufa’a—’e i te tahi mau taime, te mau mea ato’a tei tītauhia i teienei—e nehenehe te reira e fa’atupuhia i roto i te hō’ē orara’a e ’ere i te mea fa’ahiahia roa. Ma te ti’aturi, tē fa’a’ite pāpū nei mātou ē, ’ua ’ite ātea, ’e i te hope’a, e fa’aho’i te tāra’ehara a Iesu Mesia i te mau mea tei ’erehia ’e tei mo’ehia i te feiā e fāriu atu i ni’a iāna » (« Nō te aha te fa’aipoipora’a, nō te aha te ’utuāfare », Liahona, Mē 2015, 52).

Ha’api’ira’a mai tā te Fa’aora

’A ani i te mau uira’a e fa’auru i te feiā tā ’outou e ha’api’i ra ’ia feruri hōhonu nō ni’a i te fa’aipoipora’a mure ’ore ’e ’ia ’ite i te hō’ē hina’aro ’ia tītau i te reira ’ōpuara’a. ’A fa’aro’o māite i tā rātou mau pāhonora’a ’e ’a pāhono ma te marū ’ia au i te fa’aurura’a a te Vārua.