mau vahine e haere ’āmui ra

24 nō ’Ātopa

Nāhea e roa’a ai iā’u « te mau mana o te ra’i » i roto i tō’u orara’a ?

Te Parau Ha’api’ira’a ’e te mau Parau Fafau 121–123

’ītona tāu’aparau ʼāmui

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Tê parau tumu a te pupu Autahu’ara’a a Aarona ’aore rā, Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e e fa’anaho i te mau rāve’a nō te ’ohipa i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau tumu parau e ’āparau) :

• Tā tātou pupu ’aore rā piha. ’O vai te ta’ata ’āpī i roto i tā tātou pāroita, ’e nāhea tātou i te tauturu ia rātou ’ia ’ite rātou ē, tē fāri’i-pōpou-hia nei rātou ? E aha tā tātou e rave ra nō te ha’afaufa’a i tō tātou taime i roto i te mau rurura’a pupu autahu’ara’a ’aore rā te mau rurura’a piha tamāhine ?

• Tā tātou mau ’ohipa ’aore rā mau hōpoi’a. E aha te tahi o tā tātou mau ’ohipa ’e te mau hōpoi’a ’ei feiā ’āpī tamāroa ’e ’ei feiā ’āpī tamāhine ? Nāhea tātou e nehenehe ai e rave maita’i a’e i te reira ?

• Tō tātou orara’a. E aha tā tātou e rave ra nō te riro rahi atu ā mai ia Iesu Mesia te huru, ’e ’ia fāri’i i tōna mana i roto i tō tātou orara’a ? E aha tā tātou e rave ra nō te tauturu i tō tātou ’utuāfare ’ia haere mai iāna ra ?

I te hope’a o te ha’api’ira’a, mai te mea e tano, e rave i te mau mea i muri nei :

• ’A fa’a’ite pāpū nō ni’a i te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

’ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

E ’ere hō’ē ā ’ohipa te mana ’e te ha’amanara’a o te autahu’ara’a. E nehenehe te hō’ē ta’ata e fāri’i i te ha’amanara’a o te autahu’ara’a nā roto i te tu’ura’a rima—e nehenehe te mau tāne e fa’atōro’ahia i te hō’ē tōro’a o te autahu’ara’a, ’e e nehenehe te mau tāne ’e te mau vahine e fa’ata’ahia nō te hō’ē pi’ira’a. ’Āre’a te mana o te autahu’ara’a—te mana o te Atua, ’aore rā, « te mau mana o te ra’i »—e nehenehe te reira e fa’a’ohipahia « nā roto [ana’e] i te mau parau tumu o te parauti’a » (Te Parau Ha’api’ira’a ’e te mau Parau Fafau 121:36), ’e e nehenehe te mau tāne ’e te mau vahine e fa’a’ohipa i teie mana. Mai te mea e hina’aro tātou i tā tātou tāvinira’a ia vetahi ’ē ’ia riro ’ei tāvinira’a pūai ’e e taui i te orara’a, tītauhia ia tātou ’ia riro ’ei mea ti’amā nō te ti’aoro i te mau mana o te ra’i.

’Ua ’ite ānei te mau melo o te pupu ’aore rā, o te piha, nāhea e noa’a ai ia rātou te mana o te autahu’ara’a ? Mai te aha tō rātou orara’a ’e tā rātou tāvinira’a e ta’a ’ē ai ’āhiri ’ua roa’a ia rātou taua hāro’aro’ara’a ra ? ’A feruri i teie mau uira’a ’a tuatāpapa ai ’outou i Te Parau Ha’api’ira’a ’e te mau Parau Fafau 121. E mea maita’i ato’a ’ia tuatāpapa e piti parau poro’i a te peresideni Russell M. Nelson. Hō’ē tei a’ohia i te feiā tei mau i te autahu’ara’a—« Te ho’o o te mana o te autahu’ara’a » (Liahona, Mē 2016, 66–69). Te tahi tei a’ohia i te mau tuahine—« Te mau tao’a rahi pae vārua » (Liahona, Novema 2019, 76–79).

tamāroa e pure ra

E tae mai te mana o te autahu’ara’a nā roto i te orara’a parauti’a.

Ha’api’i-’āmui-ra’a mai

Nō te ha’amata i te hō’ē ’āparaura’a nō ni’a i te mana o te autahu’ara’a, e nehenehe ’outou e ani i te mau melo o te pupu ’aore rā, o te piha, ’ia fa’a’ite mai i te hō’ē mea tā rātou i ha’api’i mai nō ni’a i teie mana nā roto mai i tā rātou tai’ora’a i Te Parau Ha’api’ira’a ’e te mau Parau Fafau 121 i teie hepetoma. Mai te mea e tauturu, e nehenehe ’outou e ani ia rātou ’ia tāpa’o i te mau ’īrava 34–46 nō te ’ite mai i te mau vāhi ato’a ’ua fa’a’ohipahia te ta’o ra mana ’e ’ia fa’a’ite mai i te mea tā rātou i ’apo mai. E nehenehe ’outou e fa’a’ohipa i te mau ’ohipara’a i muri nei nō te tauturu i te mau melo o te pupu ’aore rā, o te piha, ’ia hāro’aro’a maita’i a’e nāhea rātou e nehenehe ai e fāri’i i te mana o te autahu’ara’a o te Atua i roto i tō rātou orara’a.

• E mea maita’i ’ia fa’a’auhia te vaira’a o te « mana » ’e « te ha’aputapūra’a » i roto i te ao nei, ’e te mea tā te Fatu i ha’api’i i roto i te tuha’a 121 nō ni’a i te huru te mana o te autahu’ara’a e mauhia ai. E nehenehe ’outou e hāmani hō’ē tāpura e piti tuha’a i ni’a i te tāpura ’ere’ere ma teie nā upo’o parau te mana o te tahuti nei ’e te mau mana o te ra’i E nehenehe te mau melo o te pupu ’aore rā, o te piha, e fa’a’ī i te tāpura i te mau ta’o ’e i te mau pereota nō roto mai i Te Parau Ha’api’ira’a ’e te mau Parau Fafau 121:34–46. Nāhea te hāro’aro’ara’a i teie mau ’īrava e nehenehe ai te reira e fa’atupu i te huru o tā tātou ’imira’a ’ia ha’aputapū maita’i ia vetahi ’ē, e tae noa atu i tō tātou mau hoa, te mau melo o te ’utuāfare, ’e te feiā tā tātou e tāvini nei ’e e aupuru nei ? ’Ia au i teie mau ’īrava, nāhea te Vārua Maita’i i te tauturu ia tātou ’ia ha’aputapū ’ia vetahi ’ē ma te parauti’a ?

• Nō te tauturu i te feiā e mau nei i te autahu’ara’a a Aarona ’ia ha’api’i mai nāhea ’ia hōpoi mai i te mana i roto i tā rātou tāvinira’a autahu’ara’a, e nehenehe ’outou e fa’a’ite e rave rahi tao’a, ’e e ani i te mau melo o te pupu ’ia ’imi e aha te ho’o o te tao’a tāta’itahi. Nō te aha e mea ho’o rahi a’e te tahi mau tauiha’a i te tahi atu ? E aha te mau ’ohipa e e mea ho’o rahi a’e i roto i tō tātou orara’a, ’e e aha te ho’o tā tātou « e ’aufau » nō te reira ? E i muri iho e nehenehe te mau melo o te pupu e ’imi i te parau poro’i a te peresideni Russell M. Nelson « Te ho’o o te mana o te autahu’ara’a », ma te ’imi i te ho’o tāna i parau ē, e ’aufau tātou nō te fāri’i i te mana o te autahu’ara’a. E aha te tupu i tō tātou orara’a ’e tō vetahi ’ē ’ia tāvini ana’e tātou ma te mana hau atu o te Fa’aora ?

• Nō te tauturu i te feiā ’āpī tamāhine ’ia hāro’aro’a nāhea e roa’a ai ia rātou te mana o te autahu’ara’a, e nehenehe ’outou e ani ia rātou ’ia feruri nō ni’a i te mau taime ’a ’ite ai rātou i te mana o te Atua i roto i tō rātou orara’a. ’A fa’ata’a ē, te mana o te autahu’ara’a o te mana ïa o te Atua. E nehenehe rātou e ’imi i te parau poro’i a te peresideni Russell M. Nelson « Te mau tao’a rahi pae vārua » nō te mau parau mau nō ni’a i te mau vahine ’e te mana o te autahu’ara’a. E aha tā te peresideni Nelson i ani i te mau vahine o te ’Ēkālesia ’ia rave nō te « huti hua mai i te mana o te Fa’aora » ? ’api 77 ; hi’o ta’a ’ē i nā paratarāfa e maha o te ha’amata ’e « te mau vahine ’e te mau tāne ato’a »). ’Afea ra tō tātou huti-hua-ra’a mai i teie mana nō te ha’amaita’i i tō tātou orara’a ’e te orara’a o vetahi ’ē ? E aha tā Te Parau Ha’api’ira’a ’e te mau Parau Fafau 121:39–43 e ha’api’i nei ia tātou nō ni’a i te fa’a’ohipara’a i te mana o te Fatu i roto i tō tātou orara’a ?

’A rave ma te fa’aro’o

E fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te ’ohipa i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tū’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e hōro’a mai i tō rātou mau mana’o.

Mau rāve’a tauturu pāturu

• Russell M. Nelson, « Te hutiraʼa mai i te mana o Iesu Mesia i roto i tō tātou oraraʼa », Liahona, Mē 2017, 39-42.

• David A. Bednar, « Te mau mana o te ra’i », Liahona, Mē 2012, 48–51

Ha’api’ira’a mai tā te Fa’aora

’A ’imi ai ’outou i te pe’e i te hi’ora’a o Iesu Mesia ’e ’a ora ai ma te ti’amā nō te fāri’i i tōna mana, e nehenehe ’outou e ha’api’i ma te mana ’e te ha’amanara’a.