feiā ’āpī tamāhine e ’ā’ata ra

10 nō ’Ātopa

Nāhea e nehenehe ai iā’u ’ia fa’afāriu-hope-hia i te Fatu ?

Te Parau Ha’api’ira’a ’e te mau Parau Fafau 111–114

’ītona tāu’aparau ʼāmui

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, Te parau tumu a te Feiā ’Āpī Tamāhine. I muri iho, ta’a ’ē atu te ’āparaura’a nō ni’a i te ’ohipa ta’a ’ē a te pupu ’aore rā, a te piha, e hina’aro paha ’outou e ’āparau i te mau mana’o tei tae mai, ’e te mau tumu parau nō roto mai i te ’āmuira’a rahi. E nehenehe te mau uira’a i muri nei e tauturu.

• E aha te mau tumu parau ’aore rā, te mau parau poro’i tei ha’aputapū ia tātou ?

• E aha tei fa’aitoitohia ia tātou e rave nō te mau mea tā tātou i ha’api’i mai ’aore rā, i fāri’i ?

• E aha te mea e ti’a ia tātou ’ia rave ’ei pupu ’aore rā, ’ei piha, nō te fa’a’ohipa i te a’ora’a tā tātou i fa’aro’o i roto i te ’āmuira’a rahi ?

I te hope’a o te ha’api’ira’a, mai te mea e tano, e rave i te mau mea i muri nei :

• ’A fa’a’ite pāpū nō ni’a i te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

’ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

Nō te fa’arahi atu i tō tātou fa’afāriura’a i ni’a ia Iesu Mesia, e mea ti’a ia tātou ’ia ti’aturi iāna ’e ’ia ha’apa’o i tāna mau fa’auera’a—noa atu ē, e tupu mai te mau tītaura’a fifi nō te tāmata i tō tātou fa’afāriura’a. I te matahiti 1837, ’ua mo’e te ’itera’a pāpū o te tahi mau melo o te ’Ēkālesia, ’e tae noa atu i tō te tahi mau melo nō te Tino ’Ahuru Ma Piti ’āpōsetolo, ’e ’ua pāto’i rātou i te peropheta Iosepha Semita. ’O Thomas B. Marsh, te peresideni nō te Tino ’Ahuru Ma Piti i tāua taime ra. ’Ia tai’o ana’e ’outou ’e tō ’outou ’utuāfare i Te Parau Ha’api’ira’a ’e te mau Parau Fafau 112 i teie hepetoma, e ’ite ’outou i te a’ora’a tā te Fatu i hōro’a mai nō te tauturu ia Thomas B. Marsh ’ia ha’apūai i tōna fa’afāriura’a (hi’o ta’a ’ē te mau ’īrava 10–26). E aha tā teie a’o e ha’api’i nei ia ’outou nō ni’a i te fa’afāriu-rahi-ra’a atu i te Fa’aora ?

Nāhea e nehenehe ai ia ’outou ’ia tauturu i te mau melo o te pupu ’aore rā, o te piha, ’ia fāri’i i te parau fafau a te Fa’aora ē, « e fa’afāriuhia mai rātou, ’e e fa’aora mai au ia rātou » ? (Te Parau Ha’api’ira’a ʼe te mau Parau Fafau 112:13). E aha te mau ’ohipa i tupu ’o tā ’outou e nehenehe e fa’a’ite ? ’A feruri ai ’outou i teie mau uira’a, e nehenehe ’outou e hi’o fa’ahou i te parau poro’i a te peresideni Bonnie H. Cordon « E ti’aturi i te Fatu ’e ’eiaha e ti’aturi i tō ’oe iho ha’apa’o » (Liahona, Mē 2017, 6–9) ’e « Fa’afāriura’a » i roto i te Mau Māite i te Fa’aro’o ([2004], 40–43).

taure’are’a e tai’o ra i te pāpa’ira’a mo’a

E pūai rahi tō te mau pāpa’ira’a mo’a ’a ’imi ai tātou ’ia rahi atu tō tātou fa’afāriura’a.

Ha’api’i-’āmui-ra’a mai

’Ua ’ite ānei te mau melo o te pupu ’aore rā, o te piha e aha te aura’a o te parau ra, ’ia fa’afāriuhia ia Iesu Mesia ? ’Ua ’ite ānei rātou ē, nāhea ’ia fa’afāriu-rahi-hia ? ’A ani ia rātou ’ia feruri i teie mau uira’a ’a hi’o fa’ahou ai rātou i Te Parau Ha’api’ira’a ’e te mau Parau Fafau 112:10–26. Nāhea e nehenehe ai ia tātou ’ia vai fa’afāriu-noa-hia ia Iesu Mesia noa atu i roto i te mau taime fifi ? E nehenehe ’outou e fa’a’ohipa i te hō’ē o teie mau ’ohipara’a, ’aore rā, hau atu, nō te tauturu i tā ’outou pupu ’aore rā, piha, ’ia ha’apūai i tō rātou fa’afāriura’a i te Fa’aora.

• E nehenehe Alama 32:27–43 e tauturu i te feiā tā ’outou e ha’api’i nei ’ia hāro’aro’a e nāhea ’ia ha’apūai i tō rātou fa’aro’o ’e ’ia fa’afāriu-rahi-hia atu i te ’evanelia a Iesu Mesia. E nehenehe paha ’outou e vāhi i te mau melo o te pupu ’aore rā, o te piha, i roto e rave rahi pupu ’e e ani i te pupu tāta’itahi ’ia tai’o i teie mau ’īrava ’e ’ia ’āparau e aha tā te reira e ha’api’i nei nō ni’a i te fa’aro’o ’e te fa’afāriura’a. E ani i te pupu tāta’itahi ’ia fa’a’ite mai i te mea tā rātou i ha’api’i mai. E nehenehe ’outou e fa’aitoito i te ’āparaura’a nā roto i te anira’a i te mau uira’a mai teie te huru : Nō te aha te hō’ē huero e tupu mai ’ei tumu rā’au e riro ai ’ei fa’ata’ara’a maita’i nō te fa’afāriura’a ? E aha te aura’a e « tāmata i te parau [a te Atua] ?’īrava 27). E aha te aura’a « ia fa’a’amu ’outou i te tumu rā’au » ?’īrava 41). Nāhea e nehenehe ai ia tātou ’ia parau ē, te huero o te fa’afāriura’a, « te ’oru ra, ’e te ’oteo ra, ’e te ha’amata ra ho’i te huero i te tupu, » i roto ia tātou ? (’īrava 30). ’A hōro’a i te mau melo o te pupu ’aore rā, o te piha, i te taime nō te feruri e aha tē tītauhia ia rātou ’ia rave nō te fa’a’amu i tō rātou iho fa’afāriura’a ia Iesu Mesia.

• Tē vai nei e rave rahi mau pūai i roto i te ao nei e pāto’i nei i tō tātou fa’afāriura’a ia Iesu Mesia ra. E nehenehe te tai’ora’a i te Helamana 5:12 e ha’api’i i te mau melo o te pupu ’aore rā, o te piha, nāhea ’ia vai pa’ari noa noa atu te pāto’ira’a. E aha te aura’a o te parau te « ha’amaura’a i tō ’outou niu » i ni’a i te papa o Iesu Mesia ? E nehenehe ’outou e hōro’a i te ta’ata tāta’itahi i te hō’ē tuha’a o te parau poro’i a Elder Quentin L. Cook « Te mau niu o te fa’aro’o » (Liahona, Mē 2017, 127–31) ’e e ani ia rātou ’ia ’imi i te mau hi’ora’a ’e te a’o ’o tē tauturu ia rātou ’ia patu i tō rātou niu i ni’a i te Fa’aora.

• E nehenehe ānei ’outou e feruri i te hō’ē ravera’a māramarama nō te fa’a’ite i te parau tumu i ha’api’ihia e te peresideni Bonnie H. Cordon i roto i tāna parau poro’i « Ti’aturi i te Fatu ’eiaha e turuʼi atu i tō ʼoe iho ra haʼapaʼo » ? ’Ei hi’ora’a, e nehenehe ’outou e vāhi i tā ’outou pupu ’aore rā, piha, i roto e rave rahi pupu, ’e ’a tītau i te pupu tāta’itahi ’ia patu i te hō’ē patura’a teitei roa a’e i ni’a i te hō’ē tahua ’opa ri’i, ma te fa’a’ohipa i te mau tāpū rā’au ’aore rā, te tahi atu tauiha’a. I muri iho, e ’āparau nāhea te reira i te tū’ati i ni’a i te parau poro’i a te peresideni Cordon. I muri iho, e nehenehe te pupu ’aore rā, te piha e ’imi i roto i te parau poro’i i te mau mana’o tauturu nō ni’a e nāhea ’ia tāpe’a i tō tātou orara’a fa’atumuhia i ni’a ia Iesu Mesia. E aha te mau ’itera’a tā tātou e nehenehe e fa’a’ite atu ’ia ti’aturi ana’e tātou i ni’a iho i tō tātou māramarama ’aore rā, ’ia ti’aturi ana’e tātou i te Fa’aora ?

’A rave ma te fa’aro’o

’A fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te ’ohipa i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tū’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e hōro’a mai i tō rātou mau mana’o.

Mau rāve’a tauturu pāturu

• Alama 5 (Tē ha’api’i nei Alama nō ni’a i te rirora’a ’ei ta’ata fa’afāriuhia)

• David A. Bednar, « Fa’afāriuhia i te Fatu », Liahona, Novema 2012, 106–9

• Richard J. Maynes, « Te ’oa’oa nō te orara’a i te hō’ē orara’a tei fa’atumuhia i ni’a i te Mesia », Liahona, Novema 2015, 27–30

• Becky Craven, « Ara ’eiaha e nevaneva », Liahona, Mē 2019, 9–11

Ha’api’ira’a mai tā te Fa’aora

’Ua parau te Fa’aora ē, « ’E ’ere i tā tā’u e ha’api’i nei, nāna rā, nā tei tono mai iā’u nei » (Ioane 7:16). ’Ua ha’api’i ’oia i te ha’api’ira’a tumu ’o tāna i ’apo mai nā roto mai i tōna Metua. Nāhea ’outou ’ia ha’apāpū ē, tē ha’api’i nei ’outou i te ha’api’ira’a tumu ? (Hi’o Ha’api’ira’a mai tā te Fa’aora [2016], 20–21.)