ti’i nō Petero e tāpe’a ra i te mau tāviri

26 nō Tetepa

Nō te aha e mea faufa’a ’ia vai te mau tāviri o te autahu’ara’a i ni’a i te fenua nei i teie mahana ?

Te Parau Ha’api’ira’a ’e te mau Parau Fafau 106–108

’ītona tāu’aparau ʼāmui

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e ’ia fa’anaho i te mau rāve’a nō te ’ohipa i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau tumu parau e ’āparau) :

• Tā tātou pupu ’aore rā piha. E aha tā tātou e nehenehe e rave nō te fa’atupu i te hō’ēra’a i roto i te mau melo o te pupu ’aore rā, o te piha ? E aha te mau ’ōpuara’a tā tātou e hina’aro e rave ’āmui ?

• Tā tātou mau ’ohipa ’aore rā mau hōpoi’a. E aha tā tātou e rave ra nō te fa’a’ite i te ’evanelia ? E aha te mau ’itera’a tā tātou i fāri’i nō te ravera’a i te ’ohipa hiero ’e te ’ā’amu ’utuāfare ?

• Tō tātou orara’a. Nāhea tātou i te ’itera’a i te rima o te Fatu i roto i tō tātou orara’a ? E aha te mea tei fa’auru ia tātou i roto i tā tātou tuatāpapara’a pāpa’ira’a mo’a i teie hepetoma ?

I te hope’a o te ha’api’ira’a, mai te mea e tano, e rave i te mau mea i muri nei :

• ’A fa’a’ite pāpū nō ni’a i te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

’ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

‘’Ua ha’api’i Elder Gary E. Stevenson, « ’E ’īriti te mau tāviri o te autahu’ara’a i te mau ha’amaita’ira’a, te mau hōro’a, ’e te mau mana o te ra’i nō [tātou]» (« Tei hea te mau tāviri ’e te mana o te autahu’ara’a ? » Liahona, Mē 2016, 32). Tē mau nei o Iesu Mesia i te mau tāviri ato’a o te autahu’ara’a, ‘e ’ua fa’ati’a ’oia i te mau ve’a nō te ra’i ’ia hōro’a atu i te mau tāviri o te autahu’ara’a i ni’a ia Iosepha Semita. I teie mahana, tē mau ato’a nei te mau melo o te Peresidenira’a Mātāmua ’e te pupu nō te Tino Ahuru ma Piti ’āpōsetolo i te reira mau tāviri (hi’o Te Parau Ha’api’ira’a ’e te mau Parau Fafau 90:3–4, 6 ; 107:35 ; 132:7). « Teie mau tāviri, ’o te mana ïa tā te Atua i hōro’a i te feiā fa’atere o te autahu’ara’a nō te arata’i i te fa’a’ohipara’a o tāna autahu’ara’a i ni’a i te fenua nei.

’Ia tai’o ’outou i Te Parau Ha’api’ira’a ’e te mau Parau Fafau 107 i teie hepetoma, ’a feruri nō ni’a e nāhea te Atua i te ha’amaita’i ia ’outou ’e ia rātou tā ’outou e ha’api’i ra nā roto i tōna autahu’ara’a. E aha tā ’outou e ’ite nei i roto i teie tuha’a o tē riro ’ei mea faufa’a nō te mau melo o te pupu ’aore rā, o te piha ’ia ’ite ? ’A fa’aineine ai ’outou nō te ha’api’i, e nehenehe ’outou e hi’o fa’ahou i te parau poro’i a Elder Gary E. Stevenson i fa’ahitihia i ni’a nei ’e « Te mau tāviri o te autahu’ara’a » i roto i te Mau Māite i te Fa’aro’o ([2004], 126–27).

feiā ’āpī tamāroa e ’ōpere ra i te ’ōro’a mo’a

Rahi te mau ha’amaita’ira’a pae vārua e roa’a ia tātou nā roto i te mau tāviri o te autahu’ara’a.

Ha’api’i-’āmui-ra’a mai

E nehenehe Te Parau Ha’api’ira’a ’e te mau Parau Fafau 107 e tauturu i te pāhono i te uira’a « ’E aha te mau ha’amaita’ira’a tā tātou e fāri’i nā roto i te autahu’ara’a ’e te tāvinira’a a te feiā fa’atere o te autahu’ara’a ? » E nehenehe paha te mau melo o te pupu ’aore rā, o te piha, e ’imi i te mau pāhonora’a i roto i te mau ’īrava 18–23, 85–89. Nō te tauturu ia rātou ’ia ta’a maita’i a’e nāhea te autahu’ara’a ’e te feiā fa’atere o te autahu’ara’a i te ha’amaita’i i tō tātou orara’a, ’a fa’a’ohipa i te hō’ē, ’aore rā, hau atu, o teie mau ’ohipara’a.

• E nehenehe ’outou e ha’amata i te hō’ē ’āparaura’a nō ni’a i te mau tāviri o te autahu’ara’a nā roto te anira’a i te hō’ē melo o te pupu ’aore rā, o te piha, ’ia haere mai ma te ineine nō te fa’a’ite mai i te ’ā’amu nō te tere o te peresideni Spencer W. Kimball e fārerei i te hō’ē ’Ēkālesia i Danemaka, ’ā’amu tei fa’ati’ahia e te peresideni Boyd K. Packer i roto i tāna parau poro’i Te Tino ’Ahuru ma piti » (Liahona, Mē 2008, 83–87 ; hi’o ato’a te video « Te fa’aho’i-fa’ahou-ra’a mai o te mau tāviri o te autahu’ara’a » [ChurchofJesusChrist.org]). E nehenehe ato’a ’outou e ani i tā ’outou pupu ’aore rā, te piha ’ia tai’o ’āmui i te tuha’a « Te mau tāviri o te autahu’ara’a » i roto i te Mau Māite i te Fa’aro’o (mau ’api 126–27). ’A hōro’a ia rātou i te taime nō te ha’api’i ’āpipiti te tahi i te tahi e aha te mau tāviri o te autahu’ara’a, ma te turu’i i ni’a i tā rātou i ha’api’i mai. E aha te mau ha’amaita’ira’a tei fāri’ihia e tātou nā roto i te ’ohipa tāvinira’a a te feiā e mau nei i te mau tāviri o te autahu’ara’a ?

• E hina’aro paha ’outou e fa’a’ite i te ’ā’amu o Elder Gary E. Stevenson nō ni’a i te mo’era’a tāna mau tāviri i roto i nā paratarāfa mātāmua e ono o tāna parau poro’i « Tei hea te mau tāviri ’e te mana o te autahu’ara’a ? » (’aore rā ’a fa’a’ite i te video « Tei hea te mau taviri » ? [ChurchofJesusChrist.org]). E nehenehe ’outou e fa’a’ite i te tahi mau tāviri ’e e ani i tā ’outou pupu ’aore rā, piha, ’ia fa’a’ite mai nāhea terā mau tāviri e tū’ati ai i te mau tāviri o te autahu’ara’a. E nehenehe te feiā tā ’outou e ha’api’i ra e hi’o fa’ahou ’e e ’āparau i te mau pāpa’ira’a mo’a i fa’ahitihia e Elder Stevenson (Iosepha Semita—’Ā’amu 1: 68–72 ; Te Parau Ha’api’ira’a ’e te mau Parau Fafau 110:11–16), ’o tē fa’ata’a nei i te hōro’ara’ahia mai te mau tāviri o te autahu’ara’a i te fenua nei. E nehenehe ’outou e ani i te mau melo o te pupu ’aore rā, o te piha, ’ia mā’iti tāta’itahi i te hō’ē o te mau ’īrava i muri nei, ’e ’ia fa’a’ite poto noa mai i te mea tā rātou i ’apo mai nō ni’a i te mau mana ’e te mau ha’amaita’ira’a tā tātou i fāri’i nā roto i te mau tāviri o te autahu’ara’a: Mataio 16:18–19 ; Te Parau Ha’api’ira’a ’e te mau Parau Fafau 27:12 ; 65:2 ; 84:19–20. Nō te aha e mea faufa’a ’ia vai te mau tāviri o te autahu’ara’a i ni’a i te fenua nei i teie mahana ?

• E nehenehe ’outou e hōro’a i te melo tāta’itahi o tā ’outou pupu ’aore rā, o te piha, i te hō’ē tāviri parau ’e e fa’aue i te ta’ata tāta’itahi ’ia tai’o i te tuha’a II, III, IV, ’aore rā,V o te parau poro’i a te peresideni Dallin H. Oaks « Te mau tāviri ’e te mana o te autahu’ara’a » (Liahona, Mē 2014, 49–52). E ani ia rātou ’ia pāpa’i i ni’a i te tāviri i te mea tā rātou i ’apo mai nō ni’a i te autahu’ara’a, ’e i muri iho, ’ia fa’a’ite mai i te mea tā rātou i pāpa’i. Nāhea teie mau parau mau i te fa’auru i tō tātou mana’o nō ni’a i te feiā fa’atere o tā tātou pupu ’aore rā, piha, ’e te mau tītaura’a tā tātou e fāri’i nā roto mai ia rātou ?

’A rave ma te fa’aro’o

’A fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te ’ohipa i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tū’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e hōro’a mai i tō rātou mau mana’o.

Mau rāve’a tauturu pāturu

• Russell M. Nelson, « Te mau tao’a rahi pae vārua », Liahona, Novema 2019, 76–79

• « Te mau tāviri o te autahu’ara’a », i roto i Te buka arata’i : Te tāvinira’a i roto i te ’Ēkālesia a Iesu Mesia i te Feiā Mo’a i te mau Mahana Hope’a nei, 3.4.1

• Te mau video « Ha’api’i mai i tā ’outou ’ohipa », « Te autahu’ara’a, hō’ē rāve’a nō te tāvini », ChurchofJesusChrist.org

Ha’api’ira’a mai tā te Fa’aora

’Ua pi’i ’e ’ua fa’ata’a te Fa’aora i te feiā fa’atere nō te arata’i ’e nō te fa’atere i tāna ’Ēkālesia (hi’o Mataio 10:1–5). Nāhea e nehenehe ai ia ’outou ’ia tauturu i te feiā tā ’outou e ha’api’i nei ’ia ’ite i te mana’o māuruuru nō te feiā tei pi’ihia nō te tāvini ’e nō te tauturu ia rātou ?

Hi’o ato’a i te video « Ui i te mau uira’a ’āpe’e » (ChurchofJesusChrist.org).