Beberuare 27

Bukin Tera E Kakaawaki te Mare are Akea Tokina?

Karikani Bwaai 24–27

Te Uaia ni Marooro

E kairaki irouia kaain te beretitentii n te kooram ke te kiraati; 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke aia Botoniango te Kooram n Nakoanibonga ae te Aaron. Ngkanne kaira te marooro iaon te mwakuri ni kamaiu ao karietataaki kabongana teuana ke raka man taian titiraki inano ke oin am titiraki (taraa Aeniboki ni Kabuta, 10.2, 11.2, ChurchofJesusChrist.org). Bairei kawai aika ko na karaoi n te bwai ae ko maroroakinna.

• Maiuakina te euangkerio. Tera atuun reirei ae e a tia ni maroroakinna te bitiobiriki ni bootakin kauntira ni kairake n te uoote? Tera ae ti kona ni karaoia n te kiraati ke n te kooram ae boboto iaon marooro aikanne?

• Tararuakiia naake iai kainnanoia. Ti na kanga ni karoko nakoia aomata n ana kawai Kristo ngkana ti noora kainnanoana ao n aki ata te bwai ae ko na taekinna?

• Kaoia ni kabane bwa ana karekea te euangkerio. Tera ae ti kunea n ana euangkerio Iesu Kristo ae uota te kimwareirei nakoira? Ko na kanga n tibwaua te kimwareirei anne ma tabeman?

• Katiteuanakiia utu ibukin te maiu ae akea tokina. Tera ae ti karaoia ni kakaei araia ara bakatibu aika a kainnanoi otenanti n te tembora? Tera ae ti kona ni karaoia ni buokiia tabeman ni kakaei araia aia bakatibu?

N tokin te reirei, ngkana e riai, karaoi waaki aikai:

• Kaota am koaua n reirei ake ko anga.

• Kauringiia kaain te kiraati ke te kooram iaon babaire ao kakao ake a karaoi n tain te bootaki.

Reirei te Reirei

Kairaki iroun te tia kairiiri ae ikawai ke te kairake; 25–35 te miniti

Katauraoiko n te Maiu n Tamnei

Ngke e a roko te tai ibukin Itaaka bwa e nang mare, Aberaam e tuangiia ana toro bwa a na kakaea buun Itaaka. Aberaam ao Itaaka a tangiria ni kakaea buun Itaaka ae kona ni karaoi ao ni kawakin berita aika tabu ma te Uea ao n reireinia iai natina. Rebeka bon te aine ae kakaonimaki are e karekea te berita ae tabu n te mare ma Itaaka. Ngkai booki aika tabu e kamatata ae te mare bon te bwai ae moan te kakawaki nakon te Atua, a tia ana reirei te Atua iaon te mare n riki bwa kakaewenako ni maiura aei. Ma a tia Ana burabeti ni katanoata ae te mare “e katabuaki iroun te Atua” (“Te Utu: Te Katanoata nakon te Aonaaba,” ChurchofJesusChrist.org). E rang kakawaki ibukiia ake ko reireiniia bwa a na atai koaua aika akea tokiia n taekan te mare. Karaoakina e na buokiia ni katauraoia ibukin ao ni kakoaua mwakoron ana babaire Tamara are i Karawa ae kakawaki aei.

A kanga aia namakin kairake aika ko reireiniia ibukin te mare ae akea tokina? Ko na kanga ni buokiia n ataia ae te mare ae akea tokina e kakawaki nakon ana babaire Tamara are i Karawa? Ngkana ko katauraoi n reirei, ko kona n rinanon ana rongorongo Unimwaane D. Todd Christofferson“Bukin Tera te Mare, Bukin Tera te Utu” (Liahona, Meei 2015, 50–53). Ko kona n rinanon nab “Te Utu: Te Katanoata nakon te Aonaaba” (ChurchofJesusChrist.org).

Maare ao utu aika akea tokiia a kakawaki n ana baire Tamara are i Karawa.

Te Uaia n Reirei

Kairake aika ko reireiniia a bae n tia n iangoa kakawakin te mare ngke a wareka Karikani Bwaai 24–27 n te wiiki aei. Kaoia bwa a na rinanon Karikani Bwaai 24. Tuangiia bwa a na tibwauai kiibu aika a kaotia bwa e kakawaki te mare nakoia aomata ae kabwarabwaraaki n te mwakoro aei. Kaoia bwa a na iangoia bwa bukin tera te mare ae akea tokina e kakawaki nakon ana baire te Atua. Waaki ni kakukurei aika oti inano a kona ni buokiia n ataa kakawakin te mare.

• Membwa n am kiraati ke te kooram e na iai aia tai ni kabwarabwara bwa bukin tera te mare e kakawaki nakoia. Kaoia bwa a na iangoia ae ao ngkoa iai raoraoia ae kakoaua bwa e aki bwainaki ao n aki riai karaoan te mare. A kona ni korea te taeka nakon te rao aei ni kabwarabwara kakawakin te mare n ana baire Tamara are i Karawa. Kaungaia bwa a na karin koaua aika a kunei inanon “Te Utu: Te Katanoata nakon te Aonaaba.” A kona naba ni kabonganai booki aika tabu aika kuneaki inanon “Reitan Bwaai n Mwakuri” ke inanon “Mare” n te Bwai ni Kairi nakon Koroboki Aika Tabu (scriptures.ChurchofJesusChrist.org). Kaoia bwa a na tibwauai ma kain te kiraati bwaai ake a koroi.

• Ni moana te marooro iaon kakawakin te mare, koroia iaon te boote Bukin tera e kakaawaki te mare? Angania kairake tabeua te miniti bwa a na korei kaeka nakon titiraki. Ngkanne kaungaia bwa a na tibwauai aia kaeka. A kona n tarai kaeka riki tabeua inanon a na rongorongo Unimwane D. Todd Christofferson “Bukin Tera te Mare, Bukin Tera te Utu” (Liahona, Meei 2015, 50–53). A kona naba ni mataku n te witeo “Why Is Marriage Sacred to Heavenly Father?” man “Face to Face with Elder and Sister Renlund” (ChurchofJesusChrist.org). Kaoia bwa a na tibwaua aia koaua ibukin kakawakin te mare.

• Ngkana ti kariai a na reirei te Atua iaon te mare ao ni kekeiaki ni maiuakin, ti na karekei kakabwaia aika mwaiti. Ma tabeman aomata—n raonaki ma naake a karaoa aia kabanea ni kona ni maiuakina te euangkerio—a kaitara ma kakaewenako ni karekei maare aika kakukurei, ao akea tokiia. Ko kona n tuangiia kairake bwa a na taekin tabeua kakaewenako aikanne. Tera ae ti kona ni karaoia ngkai ibukin kakaewenako aikanne? Ko kona naba ni kaoia bwa a na wareki kabanean mwakoro ake uoua n ana marooro Unimwaane Neil L. Andersen “Te Mata n Onimaki” (Riaona, Meei 2019, 34–38). A kona membwa n am kooram ni maroroakin katooto aika a tia n noori ni maiuia ke n rongorongon aia utu irouia aomata ake a tabeakin kakaewenako ma te onimaki n aron are e taekinna Unimwaane Andersen. E na kanga te Tia Kamaiu ni buokiia naake a kaitara ma kakaewenako ngkana a ukoukori kakabwaia n te mare are akea tokina?

Karaoia inanon te Onimaki

Kaunga te kiraati ke membwa n te kooram bwa a na iangoi man korei baike a na karaoi n mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoiia n iangoa taekana bwa e kanga mwakurian aia namakinan are e na kakorakorai reitakiia ma Tamara are i Karawa ao Iesu Kristo.

Reitan Bwaai n Mwakuri

• Reirei ao Berita aika Tabu 49:16–17 (Taian mare a ibuobuoki ni kakoroa nanon te kantaninga n te Karikibwai)

• Reirei ao Berita aika Tabu 131:1–4; 132:15–21 (Te mare ae akea tokina e kainnanoaki ibukin te karietataaki)

• “Renaissance of Marriage,” “How Did Elder and Sister Bednar Meet?” man “Face to Face with Elder and Sister Bednar” (witeo), ChurchofJesusChrist.org

Reirei n ana Kawai te Tia Kamaiu

Te Tia Kamaiu e kaoiia Ana taan iriiria bwa a na mwakuri inanon te onimaki ao ni maiuakin koaua ake E reirei. Ko na kanga ni kaoia naake ko reireiniia bwa a na maiuakin koaua ake a reiakini?