Maati 13

Ti na Kanga ni Kaeka nakon te Kangaanga ma te Onimaki?

Karikani Bwaai 37–41

Te Uaia ni Marooro

E kairaki irouia kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, ikotaki kaokioka n atonga Ana Botoniango te Bootaki n Ataeinnaine ke ana Botoniango Te Nakoanibonga ae te Aaron. Ngkanne kaira te marooro iaon te mwakuri ni kamaiu ao karietataaki kabongana teuana ke raka man taian titiraki inano ke oin am titiraki (taraa Aeniboki ni Kabuta, 10.2, 11.2, ChurchofJesusChrist.org). Babaire ao mwakuria te bwai ae maroroakinaki.

• Maiuakina te euangkerio. Ti kanga n tia n nora bain te Uea inanon maiura?

• Tararuakiia naake iai kainnanoia. Ti na kanga ni buokiira i bon iroura inanon bwaai ake ti rinanona?

• Kaoaiia ni kabane ni karekea te euangkerio. Ti na kanga ni katamaroa kabonganakin bwaai n rabakau aika boou bwa bwaai ni mwakuri n tibwaua te euangkerio?

• Katiteuanakiia utu in akea tokina. Tera ae ti na karaoia ni buokiia ara utu n roko nakon Kristo?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringa te kiraati ao membwa n te kooram iaon babaire ao kakao ake a karaoaki n tain te bootaki.

Reirei te Reirei

Kairaki iroun te tia kairiiri ae ikawai ke te kairake; 25–35 te miniti

Katauraoiko n te Maiu n Tamnei

Ngke te kairake n ataeinimwane, Iotebwa mai Aikubita e rinanon mwaitin aekan nako kakaitara. E kaaitara ma te itaberaara n ana utu ao te iowawa ae karaoaki mairouia tarina. E kaaitara ma te kaririaki n urua tuan te itiaki. Ma onean mwiin n riki ni karineaki ibukin onimakinana, e teweakinako inanon te nne kaikain. Kaain am kiraati ke kooram a na bon kaaitaraa aekakin taian kataaki ao a mwaiti riki. Ngkai ko kamatebwaia, ana taneiai Iotebwa inanon Karikani Bwaai 37–41, iangoia ake ko reireiniia. Iangoia bwa tera kakawakin reirei iaon maiun Iotebwa ae e na reke ibukiia (taraa nab Ita 12:27; Henry B. Eyring, “Kataia, Kataia, Kataia,” Riaona, Nob. 2018, 90–93). Rongorongon Iotebwa e kona ni kaungaia kiraati ke membwa n te kooram n titiraki, “Ti na Kanga ni Kaeka nakon te Kangaanga ma te Onimaki?”

Man te taratara iaon ara onimaki iroun Iesu Kristo, ti kona ni kunea te korakora inanon kakaitaraara.

Te Uaia n Reirei

Iangoia n tuanga te kiraati ke membwa n te kooram ni karinani iaon te burakibooti tabeua bwaai aika riki ni maiun Iotebwa mai Aikubita, ngkai e kabwarabwaraaki n Karikani Bwaai 37 ao 39–41. Kaoti tamnei tabeua, n aron ake inanon Nakomai, Iriirai—Ibukiia Aomata n Tatabemaniia ao Utu e kona ni buokiia bwa a na uring taai akanne. E kanga kataakin Iotebwa ti te arona ma kangaanga are kairake n aomata a kaitaraa n te bong aei? Ngke arona bwa e maiu Iotebwa ngkai, tera ana marooro are e na anganiira iaon te kaeka nakon te kakaitara? Tera are e riai n taekinna iaon bwa e kanga ana iraorao ma te Uea are e buokiia? Kabonganai waaki ni kakukurei n aron aika mwiina ni buokiia kairake n iangoa taekan bwa a kanga ni kaeka nakon aia kangaanga ma te onimaki iroun Iesu Kristo.

• Kamatebwaia bwa e kanga te Tia Kamaiu ni kaeka nakon te kakaitara e kona ni buokiira ni kaitaraa kakaitaraakira ma te onimaki. Kairake a riai n taekin tabeua katooto man kakaitara are e kaitaraa te Tia Kamaiu ao rinanoia n ikotaki (taraa “Reitan Bwaai ni Mwakuri” ibukin tabeua iango). Tera ae riingi nanora bwa e kanga te Tia Kamaiu ni kaeka nakon Ana tai ni kakaitaraaki? Ti na kanga n ira Ana katooto ngkana ti kaitarai kakaitaraakira?

• N tabetai e bon bebete te kaeka nakon te kakaitara ngkana ti kataia n taraia man ana taratara te Uea. Ni buokiia koraki ake ko reireiniia n oota n aei, tuangiia ni kakae katooto aika kaokoro are te taratara e kona ni karaoki man rinanoan ana maooro Unimwaane Rafaek E, Pino “The Eternal Perspective of the Gospel (Te Taratara ae Akea Tokina n te Euangkerio)” (Liahona, May 2015, 117–19). Kaoiia bwa a na tibwaua te bwai are a kunei. Tera ae taekinaki ni katooto aikai iaona bwa ti kanga ni kona n noori ao ni kaeka nakon kakaitaraara? Ngke arona bwa te Tia Kamaiu e kona n taetae nakoira iaon ara kangaanga, tera ara iango n te bwai ae E na taekinna? Ni buoka kaekaana te titiraki, te kairake e kona n rinanoi koroboki aika tabu inanon “Reitan Bwaai ni Mwakuri.”

• Iangoia n tuanga te kairake n tibwaua te katooto iroun temanna (tao ana bakatibu) are e kaunga nanoia man kawai ake teuanne ke neienne a kaitarai katakiia ae kangaanga. Ke ko kona n tibwaa teuana te katooto ae kaunganano mairouia aomata ae ko kinaia. Rongorongo man te Maungatabu ni Kabua aki toki ni karinaki karakinaia aomata ake a kaeka nakon kakaitara ma te onimaki (taraa tabeua katooto inanon “Reitan Bwaai ni Mwakuri). Iangoia bwa tera ae ko kona n tibwaia man aron rongorongo ake ana kona n riki n ringa nanoia koraki ake ko reireiniia. Ngkai kam marooroakin katooto aikai n ikotaki, taekinna are kiraati ke membwa n te kooram a na katurua aia taratara iaon bwa e kanga ana onimaki Iesu Kristo ni buokiia aomata inanon kakaitarakiia. Ko kona naba n tibwai bwaai n ibuobuoki are katauraoia Bitiobi W. Christopher Waddell ni buokiira inanon ara kangaanga, e kuneaki n tokin ana rongorongo “Rairaki nakon te Uea” (Riaona, Nov. 2017, 94–96).

Karaoia inanon te Onimaki

Kaunga te kiraati ke membwa n te kooram bwa a na iangoi man korei baike a na karaoi n mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoiia n iangoa taekana bwa e kanga mwakurian aia namakinan are e na kakorakorai reitakiia ma Tamara are i Karawa ao Iesu Kristo.

Reitan Bwaai n Mwakuri

• Mataio 4:1–11 (Te Tia Kamaiu iai ana onimaki inanon tain te mwakuri ni kakaitara)

• Mataio 14:10–21; Ruka 23:33–34; Ioane 19:25–27 (Te Tia Kamaiu e buokiia tabeman inanon Ana tai n kakaitaraaki)

• Mataio 27:45–46; Ruka 23:44–46 (Te Tia Kamaiu e namakina te maroa inanon te kakaitara ma e onimakina te Atua)

• Mataio 5:38–45; Motiaea 24:8–15; Reirei ao Berita aika Tabu 121:1–8; 122:5–9 (Ana reirei te Tia Kamaiu iaon kaitaraan te kakaitara)

• Neil L. Andersen, “Ikoaki,” Riaona, Nov. 2018, 83–86

• L. Todd Budge, “Te Onimaki ae Marurung man Korakora,” Liahona, Nov. 2019, 47–49

• Jean B. Bingham, “That Your Joy Might Be Full (Bwa E na Bwanin Kukureim),” Liahona, Nov. 2017, 85–87

Reirei n ana Kawai te Tia Kamaiu

“Ngkana ko katauraoi, karika am atatai irouia aomata ake ko reireniia bwa kairam n am babaire” (Reirei n Ana Kawai te Tia Kamaiu,7). Ibukin te katooto, tataromwaakai babaire iaon waaki ni kakukuei kabonganai koroboki aika tabu ao tabeua bwaai ni ibuobuoki ake e na kona ni buokiko ma kangaanga are a kaitarai kiraati ke membwa n te kooram.