Pāpode 27

Etke M̧are Indeeo Eaorōk?

Jenesis 24–27

Ko̧o̧njeļ Ippān Doon

Kar tōl jān juon uwaan būreejtōnji eo an doulul eo ak kūlaaj eo; 10–-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ Ro ak Unin Tōl eo an Doulul eo an Priesthood eo an Aron Innem tōl juon iien ekōnono kōn jerbal in lo̧mo̧o̧r im mour eo eaibojooj ijo eutiejtata ilo am̧ kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe Eļap, 10.2, 11.2, ChurchofJesusChrist.org). Karōk wāween ko n̄an kōm̧m̧an ekkar n̄an ta eo kwoj ekōnono kake.

• Mour kōn gospel eo. Ta unin kōnono ko me bisoprik eo rekar kōnono kaki ilo iien kweilo̧k ko an ward ko̧o̧njeļ eo an jodikdik ro? Ta eo jej aikuji n̄an kōm̧m̧ane āinwōt juon doulul ak kūlaaj pedped wōt ilo ekōnono ko?

• Kea kōn ro rej pād ilo aikuj. Ewi wāween ad jipan̄ armej ro ilo wāween ko an Kraist n̄e jej lo juon aikuj im jejjab jeļā ta eo jen ba?

• Karuwaineneik aolep n̄an bōk gospel eo. Ta eo jej loe ilo gospel eo an Jisōs Kraist me ej bōktok n̄an kōj lan̄lōn̄? Ewi wāween ad jeere lan̄lōn̄ in n̄an ro jet?

• Kobaik baam̧le ko n̄an indeeo. Ta eo jenaaj kōm̧m̧ane n̄an lo āt ko etan ro jibūd im jim̧m̧aad ro rej aikuj kain̄i ko an tampeļ? Ta eo jemaron̄ kōm̧m̧ane n̄an jipan̄ doon lo et ko etan ro jibūd im jim̧m̧aad?

Ilo jem̧ļo̧kin katak in, n̄e ekkar, kōm̧m̧ane laajrak in:

• Kam̧ool kōn katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

Katakin Katak eo

Kar tōl jān juon ritōl erūtto ak jodikdik; 25–35 minit ko

Kōpooj Eok Make ilo Jetōb

Ke ekar itok n̄an iien eo an Aisak n̄an m̧are, Ebream ekar kajjitōk ippān rijerbal eo an n̄an kappukot juon pāleen Aisak. Ebream im Aisak ekar kōņaan kappukot juon pāleen Aisak eo emaron̄ kōm̧m̧an im kōjparok bujen ko ippān Irooj im katakini n̄an ajri ro nejin. Rebeka ekar juon kōrā etiljek eo ekar deļo̧n̄e juon bujen m̧are ippān Aisak. Ilo an jeje ko rekwojarjar kalikkar e bwe m̧are eļap an aorōk ippān Anij, katak ko an Anij kōn m̧are rej jet idajon̄jon̄ ilo raan kein. Ak rikanaan ro An rekar kwaļo̧k bwe m̧are ej “ekkapit in Anij” (“Baam̧le Eo: Juon Naan in Kean̄ n̄an Laļ in,” ChurchofJesusChrist.org). Ej aorōk n̄an ro kwoj katakin er n̄an meļeļe m̧ool ko indeeo kōn m̧are. Kōm̧m̧ane āindein enaaj jipan̄ er pojak n̄an im kam̧ool kōn m̧ōttan in eaorōk ilo karōk eo an Jemedwōj Ilan̄.

Ewi wāween an jodikdik ro kwoj katakin er en̄jake kōn m̧are n̄an indeeo? Ewi wāween am̧ jipan̄ er ļōmņak etke m̧are n̄an indeeo ej dilepen karōk eo an Jemedwōj Ilan̄? Ilo am̧ kōppopo n̄an katakin, kwomaron̄ lale ennaan eo an Elder D. Todd Christofferson “Etke Mare, Etke Baam̧le” (Liaona, Māe 2015, 50–53). Kwomaron̄ bar etale “Baam̧le Eo: Juon Naan in Kean̄ n̄an Laļ in” (ChurchofJesusChrist.org).

M̧are n̄an indeeo im baam̧le ko rej dilepen karōk eo an Jemedwōj Ilan̄.

Ekkatak Ippān Doon

Jodikdik ro kwoj katakin er remaron̄ kar kejōkļo̧kjeņ kōn aorōk in m̧are ilo aer riiti Jenesis 24–27 ilo wiik in. Karuwaineneik er n̄an etale Jenesis 24. Kajjitōk ippāer n̄an kwaļo̧k eoon ko me rej kwaļo̧k ke m̧are elukkun aorōk n̄an armej ro me kar kōmeļeļe kake er ilo jebta in. Karuwaineneik er n̄an ļōmņak etke m̧are indeeo ej dilepen karōk eo an Anij. M̧akūtkūt ko ijin ilaļ remaron̄ jipan̄ er em̧m̧anļo̧k aer meļeļe aorōk in m̧are.

• Membōr ro ilo kūlaaj ak doulul eo am̧ remaron̄ wōr aer iien em̧m̧an n̄an kōmeļeļeiki etke elukkuun aorōk m̧are n̄an er. Karuwaineneik er n̄an pijaikļo̧k n̄e en kar wōr juon m̧ōttaer eo ej tōmak bwe m̧are an ro wōt jem̧aan im ejjab menin aorōk. Remaron̄ je juon no̧o̧t n̄an in m̧ōttan n̄an kōmeļeļeiki aorōk in m̧are ilo karōk eo an Jemedwōj Ilan̄. Rōjan̄ er n̄an kobaik m̧ool ko rej loi ilo “Baam̧le Eo: Juon Naan in Kean̄ n̄an Laļ in.” Remaron̄ barāinwōt kōjerbal jeje ko rekwojarjar me rej pād ilo “Supporting Resources” ak ilo “Marriage, Marry” ilo Unin Tōl eo n̄an Jeje ko Rekwojarjar (scriptures.ChurchofJesusChrist.org). Innām kajjitōk ippāer n̄an kwaļo̧k n̄an kūlaaj eo ta eo rej je.

• N̄an jino juon ekkōnono kōn aorōk in m̧are, je ioon boot eo Etke m̧are n̄an indeeo elukkuun aorōk? Leļo̧k n̄an jodikdik ro jejjo minit n̄an je uwaak ko an kajjitōk eo. Innem karuwaineneik er n̄an kwaļo̧k uwaak ko aer. Remaron̄ kappukot uwaak ko jet ilo ennaan eo an Elder D. Todd Christofferson “Why Marriage, Why Family” (Liaona, Māe 2015, 50–53). Remaron̄ bar alooje pija in alooje eo “Why Is Marriage Sacred to Heavenly Father?” jān “Face to Face with Elder and Sister Renlund” (ChurchofJesusChrist.org). Kūr er n̄an kwaļo̧k naan in kam̧ool ko aer kōn etke m̧are n̄an indeeo ej aorōk.

• Ilo ad bōk katak ko an Anij kōn m̧are im kajjieon̄ mour kaki, jej bōk elōn̄ kōjeraam̧m̧an ko. Ak jet armej—ekoba ro rej kate er jon̄an wōt aer maron̄ n̄an mour kōn gospel eo—jelm̧ae apan̄ ko ilo aer ejaake m̧are ko relem̧ōņōn̄ō im n̄an indeeo. Kwomaron̄ kajjitōk ippān jodikdik ro n̄an kōnono kōn jet iaan apan̄ ko. Ta eo jemaron̄ kōm̧m̧ane kiiō n̄an kōppopo n̄an apan̄ kein? Kwomaron̄ barāinwōt kajjitōk ippāer n̄an riiti jekjōn ko ruo āliktata an ennaan eo an Elder Neil L. Andersen “Mejān Tōmak” (Liaona, Māe 2019, 34-38). Membōr ro ilo kūlaaj ak doulul eo am̧ remaron̄ ekōnono kōn waanjon̄ak ko me rekar loi ilo mour ko aer ilo bwebwenato ko an baam̧le ko aer kōn armej ro me rekar niknik im tiljek ilo apan̄ ko me Elder Andersen ekar ba kaki. Ewi wāween an Rilo̧mo̧o̧r maron̄ jipan̄ aolep ro rej jelm̧ae apan̄ ko ilo aer kappukot kōjeraam̧m̧an ko an m̧are eo n̄an indeeo?

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan jerbalki im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Katak im Bujen Ko 49:16–17 (M̧are ej jipan̄ kakūrm̧ool un in Kōm̧anm̧an eo)

• Katak im Bujen Ko 131:1–4; 132:15–21 (M̧are Indeeo emenin aikuj mour eo eaibojooj ijo eutiejtata)

• “Renaissance of Marriage,” “How Did Elder and Sister Bednar Meet?” jān “Face to Face with Elder and Sister Bednar” (pija in alooj ko), ChurchofJesusChrist.org

Katakin ilo Wāween eo an Rilo̧mo̧o̧r

Rilo̧mo̧o̧r ekar kajjitōk ippān ro Rikaļooran n̄an jerbal ilo tōmak im mour kōn m̧ool ko Ekar katakin. Ewi wāween am̧ karuwaineneik ro kwoj katakin er n̄an mour kōn m̧ool ko rej ekkatak?