Eprōļ 24

Etke Anij ej Letok N̄an Kōj Kien ko?

Exodus 18–20

Ko̧o̧njeļ Ippān Doon

Kar tōl jān eo juon uwaan būreejtōnji eo an doulul eo ak kūlaaj eo; 10–20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ ro ak Unin Tōl eo an Doulul eo an Priesthood eo an Aron. Innem tōl juon iien ekōnono kōn jerbal in lo̧mo̧o̧r eo im mour ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe, 10.2, 11.2, ChurchofJesusChrist.org). Karōke wāween ko n̄an kōm̧m̧an ekkar n̄an ta eo kar kōnono kake.

• Mour kōn gospel eo. Ta eo en̄jake kein rekāāl rekar kepaake kōj n̄an Jemedwōj Ilan̄ im Jisōs Kraist?

• Kea kōn ro rej pād ilo aikuj. Em̧ōj ke an juon armej em̧m̧akūt tok n̄an ward eo ad ak kar kobatok n̄an Kabun̄ in? Ewi wāween ad jipan̄ er en̄jake aer ruwainene?

• Karuwaineneik aolep n̄an bōk gospel eo. Elōn̄ ke jabdewōt m̧akūtkūt ko me rej pojen bōk jikier me jemaron̄ karuwaineneik ro m̧ōttad n̄an pād ie?

• Kobaik baam̧le ko n̄an indeeo. Ta kijejeto ko jemaron̄ kōm̧m̧ane n̄an je bwebwenato ko ad make?

Ilo jem̧ļo̧kin katak in, n̄e ekkar, kōm̧m̧ane laajrak in:

• Kam̧ool kōn katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

Katakin Katak eo

Kar tōl jān juon ritōl erūtto ak jodikdik; 25–35 minit ko

Kōpooj Eok Make ilo Jetōb

Riiti Exodus 20 emaron̄ im̧we eok n̄an ļōmņak kōn etke ejaam̧ wōr kien. Jet armej rej loe kien ko āinwōt kam̧o̧ ak āinwōt juon kein kajjieon̄ kantōrooļ e kōj. Ak kōnke jejeļā bwe Anij ej juon Jemed eo ej iakwe kōj, jemaron̄ lōke bwe kakien ko An rej n̄an em̧m̧an eo ad, men̄e jejjab jeļā un ko kōn kien ko. Ekar kallim̧uri kōj bwe jemaron̄ jeļā kien ko An rem̧ool n̄e jej mour kaki (lale Jon 7:17).

Būreejtōn Russell M. Nelson ekar katakin: “Kōnke Jemen im Nejin rej iakwe kōj kōn iakwe eo ejjeļo̧k jem̧ļo̧kin im ewānōk im kōnke Rejeļā jejjab maron̄ lo aolep men Rej loe, Rekar letok n̄an kōj kakien ko me enaaj tōl im kōjparok kōj. Ewōr juon kooneekjeņ ekajoor ikōtaan iakwe eo an Anij im kakien ko An” (“The Love and Laws of God” [Brigham Young University devotional, Sept. 17, 2019], 2, speeches.byu.edu).

Etke kwoj kam̧m̧oolol kōn kien ko? Ta eo kwokōņaan bwe membōr ro ilo kūlaaj eo ak doulul eo ren meļeļe kake kōn etke Anij ekar letok n̄an kōj kien ko? Kwomaron̄ kōppopo n̄an katakin ilo am̧ bar lale Exodus 20 im ennaan eo an Būreejtōn Dallin H. Oaks “Iakwe ro jet im Mour kōn Oktak ko” (Liaona, Nob. 2014, 25–28).

Jemaron̄ jeļā bwe kien ko an Anij rej m̧ool n̄e jej mour kaki.

Ekkatak Ippān Doon

N̄an jipan̄ ro uwaan kūlaaj eo ak doulul eo ekkatak Kien ko Jon̄oul, kwomaron̄ kajjitōk ippāer n̄an kōlaajraki kien kein jon̄an eo rekeememeji. Eļan̄n̄e rej aikuj jipan̄, remaron̄ lale ilo Exodus 20:3–17. Etke Anij ej letok n̄an kōj kien ko? N̄an jipan̄ uwaake kajjitōk in, remaron̄ ekkōnono kōn jejjo Kien ko Jon̄oul ilo kurup ko reddik. Ewi wāween an mour kōn kien kein jipan̄ kōj kappukot m̧ōņōņō im epaakeļo̧k Anij? Ļōmņak kein remaron̄ jipan̄ ro kwoj katakin er ekkatak eļapļo̧k kōn etke Anij ej letok n̄an kōj kien ko.

• Jeje ko rekwojarjar repād ie uwaak ko n̄an kajjitōk in “Etke Anij ej letok n̄an kōj kien ko? Kwomaron̄ karuwaineneik ro uwaan kūlaaj eo ak doulul eo n̄an kappukot uwaak ok ilo juon ak elōn̄ eoon ko me rej pād ilo “Supporting Resources.” Innem kajjitōk ippāer n̄an kwaļo̧k jet men ko rej loi. Remaron̄ bar alooj jet iaan pija in alooj kein rej ellaajrak n̄an kappukot meļeļe ko rem̧wūlaļļo̧k: “Instructions Included,” “Why Does God Give Us Commandments?” (ChurchofJesusChrist.org

• N̄an jipan̄ ro uwaan kūlaaj eo ak doulul eo meļeļe etke Anij ej letok n̄an kōj kien ko, kwomaron̄ keidi kien kein jān Anij n̄an en̄jake ko me remaron̄ iookļo̧k n̄ani. N̄an waanjon̄ak, kwomaron̄ kajjitōk ippāer n̄an pijaikļo̧k aer ettōr ioon juon toļ epaake jem̧ļo̧kin toļ eo im em̧ōj oror e tōrerein iaļ ko. Kajjitōk ippāer n̄an ekōnono ippān bar juon armej kōn kajjitōk ko āinwōt kein rej ellaajrak: Ewi wāween an kien ko an Anij āinwōt oror in? Ewi wāween n̄e jej pokake kien ko kōjeraam̧m̧an kōj? Ta ko jet rej ekkeijel me remaron̄ jipan̄ kōj meļeļe etke Anij ej letok n̄an kōj kien im etke jej aikuj pokaki? N̄an jet waanjon̄ak, kwomaron̄ karuwaineneik er n̄an etale juon iaan ennaan ko ak pija in alooj ko me rej pād ilo “Supporting Resources.” Kajjitōk ippāer n̄an kwaļo̧k men ko rej ekkeijel me rej loi im ekōnono kaki ta ko rej ekkatak.

• Ekōnono ko am̧ remaron̄ tōl ro uwaan kūlaaj ak doulul eo n̄an ekōnono kōn wāween ad aikuj kōm̧m̧an n̄an ro rejjab tōmak ak ro rej mour kōn kien ko. Kwomaron̄ karuwaineneik er n̄an kappukot kapilōk ko ilo ennaan eo an Būreejtōn Dallin H. Oaks “Iakwe ro jet im Mour kōn Oktak ko.” Kwomaron̄ kajjitōk kajjitōk ko āinwōt kein: Ewi wāween ad aikuj kōm̧m̧an n̄an ro rej kālet n̄an mour eoktak jān kōj? Ewi wāween ad loe em̧m̧an ko ilo ro jet n̄e rej make kōm̧m̧ani jokālet ko aer reoktak jān kōj?

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbali im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Duteronomi 10:12–13; Alma 36:30; Katak im Bujen Ko 1:24–28; 82:8–10; 93:20, 28; 130:18–21 (Etke Anij ej Letok n̄an Kōj Kien Ko)

• Jeffrey R. Holland, “We Are All Enlisted” (Liahona, Nov. 2011, 44–47; bar lale pijaan alooj eo “Stay within the Lines”); Richard G. Scott, “The Atonement Can Secure Your Peace and Happiness” (Liahona, Nov. 2006, 40–42; bar lale pijaan alooj eo “A Secure Anchor”); Von G. Keetch, “Rejeraam̧m̧an im Rem̧ōņōņō Ro Rej Kōjparok Kien ko an Anij” (Liahona, Nov. 2015, 115–17; bar lale pija in alooj eo video with the same title)

Teaching in the Savior’s Way

“Ilo kijejeto eo am̧ n̄an mour im katakin eļapļo̧k āinwōt Rilo̧mo̧o̧r, kojāmin likjab n̄an tōpar kōttōpar eo am̧ ilo iien ko. Jab ebbweer; ijjeļo̧kin, kōtļo̧k bwe bōd im m̧ōjņo̧ ko am̧ ren kooktak kwe n̄an Jemedwōj Ilan̄ im Rilo̧mo̧o̧r” (Teaching in the Savior’s Way, 14).