Māe 22

Ewi Wāween Aō Kwaļo̧k Kam̧m̧oolol n̄an Anij?

Duteronomi 6–8; 15; 18; 29–30; 34

Ko̧o̧njeļ Ippān Doon

Kar tōl jān eo juon uwaan būreejtōnji eo an doulul eo ak kūlaaj eo; 10–20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ ro ak Unin Tōl eo an Doulul eo an Priesthood eo an Aron. Innām tōl juon iien ekōnono kōn jerbal in lo̧mo̧o̧r eo im mour ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe, 10.2, 11.2, ChurchofJesusChrist.org). Karōk wāween ko n̄an kōm̧m̧ane ta eo kom̧ij kōnono kake.

• Mour kōn gospel eo. Ta eo jekar ekōnono kake iien eo ļo̧k, im ta kūr ko ak ijjitōn̄ ko rekar kōm̧m̧an? Ta eo em̧ōj ad kar kōm̧m̧ane n̄an jerbal kōn kūr ko ak ijjitōn̄ ko?

• Kea kōn ro rej pād ilo aikuj. Ta eo jemaron̄ kōm̧m̧ane ak ba n̄an pukōtļo̧k ro me remaron̄ en̄jake ajimakeke ak ettoļo̧k jān Jemedwōj Ilan̄?

• Karuwaineneik aolep n̄an bōk gospel eo. Ta jet iaan wāween ko jemaron̄ jipan̄ ro jet en̄jake iakwe eo an Jisōs Kraist?

• Kobaik baam̧le ko n̄an indeeo. Ta ļōmņak ko jemaron̄ kwaļo̧ki ippān ro jet n̄an jipan̄ kōkajoorļo̧k baam̧le ko ad?

Ilo jem̧ļo̧kin katak in, n̄e ekkar, kōm̧m̧an laajrak in:

• Kam̧ool kōn katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko kar kōm̧m̧ani ilo iien kweilo̧k eo.

Katakin Katak eo

Kar tōl jān juon ritōl erūtto ak jodikdik; 25–35 minit ko

Kōpooj Eok Make ilo Jetōb

Anij ejjab jokod an mije kōj im kōjeraam̧m̧an kōj. Ak kōn aolep kōm̧ad im kapo ko jej jelm̧aeiki, epidodo n̄an meļo̧kļo̧k E. Menin ekar waļo̧k n̄an Risrael ro elōn̄ alen, ekoba ilo iien ko reppen rear jebwābwe ilo āne jam̧den. Ak Irooj ekar tūriam̧o ilo an tōl er n̄an āneen kallim̧ur—juon jikin eļap inem̧m̧an im elōn̄ kapo ko, ijo remaron̄ bar po n̄an bar meļo̧kļo̧k e. Kōmeļeļe eo an Irooj ilo Duteronomi 6 kar n̄an jipan̄ RiIsrael ro keememej E im naan ko an aolep iien (lale eoon ko 6–9).

Ewi wāween am̧ likūt Irooj im naan ko An ilo būruōm̧—“N̄e Kwo Ab Meļo̧kļo̧k Irooj”? (Duteronomi 6:12). Ewi wāween ilo ad keememej Irooj ej jipan̄ kōj en̄jake kam̧m̧oolol ilo jabdewōt jekjek ko ilo mour ko ad? Ilo am̧ kōppopo n̄an katakin, ļōmņak in etale Duteronomi 12:6–9, 12 im Luk 17:11–19. Kwomaron̄ bar etale ennaan eo an Būreejtōn Dieter F. Uchtdorf “Kam̧m̧oolol ilo Jabdewōt Jekjek ko” (Liaona, Māe 2014, 70–77).

Keememej Irooj emaron̄ jipan̄ kōj en̄jake kam̧m̧oolol ilo aolepān jekjek in mour ko jej iooni.

Ekkatak Ippān Doon

N̄an jino juon ekōnono kōn keememej Irooj, kwomaron̄ karuwaineneik jodikdik ro n̄an kwaļo̧k en̄jake ko ke rekar meļo̧kļo̧k juon men eaorōk. Ta kar tōprak ko? Ta eo ej waļo̧k n̄e jej meļo̧kļo̧k men ko rem̧m̧an Irooj ekar kōm̧m̧ane n̄an kōj? Karuwaineneik kūlaaj eo ak doulul eo am̧ n̄an etale Duteronomi 6:4–9, 20–25. Ta eo eoon kein rej katakin kōn keememej em̧m̧an an Anij ilo mour ko ad? Kāālet juon ak elōn̄ļo̧k jān m̧akūtkūt ko itulaļ n̄an jipan̄ ro kwoj katakin er en̄jake eļapļo̧k kam̧m̧oolol kōn em̧m̧an eo an Anij im kwaļo̧k aer kam̧m̧oolol n̄an E.

• Riiti Luke 17:11–19 ippān doon emaron̄ jipan̄ jodikdik ro ļōmņak kōn etke eaorōk n̄an kōj n̄an kwaļo̧k ad kam̧m̧oolol n̄an Anij. Ļōmņak in kajjitōk kajjitōk ko me rejipan̄ er iookļo̧k bwebwenato in n̄an mour ko aer. N̄an waanjon̄ak, ta un ko rekkar unin an ruatimjuon iaan jon̄oul rilepa ro rekar jab kam̧m̧ool Rilo̧mo̧o̧r eo? Etke jet iien jej likjab n̄an kwaļo̧k ad kam̧m̧oolol Anij? Kajjitōk ippān ro kwoj katakin er n̄an ļōmņak kōn iien ko rekar en̄jake kam̧m̧oolol, jekdo̧o̧n n̄e ekar pen. Ta tōprak eo jej loe itok jān ad kwaļo̧k kam̧m̧oolol? Etke eaorōk n̄an kwaļo̧k ad kam̧m̧oolol n̄an Anij? (Lale eoon in jipan̄ ko ilo “Supporting Resources” kōn jet uwaak ko.) Ta eo jemaron̄ kōm̧m̧ane n̄an kwaļo̧k ad kam̧m̧oolol n̄an Anij?

• Elōn̄ al in jar ko n̄an nōbar im kam̧m̧oolol, āinwōt “How Great Thou Art” im “N̄e Kwoj Ion Buktak Ko An Mour” (Al ko Al in Ajri, no̧ ko. 86, 6). Kwomaron̄ kajjitōk ippān jodikdik ro n̄an kappukot naan ko an al in jar kein jet men ko me rej kam̧m̧oolol kaki. Karuwaineneik ajri ro n̄an men ko rekar loi im kōmeļeļeiki etke rej kam̧m̧oolol kaki. Kom maron̄ al kōn jejjo iaan al in jar ko ippān doon.

• Ennaan eo an Būreejtōn Dieter F. Uchtdorf “Kam̧m̧oolol ilo Jabdewōt Jekjek ko” ej jipan̄ kōj meļeļe wāween n̄an lukkuun kam̧m̧oolo Juon wāween n̄an jipan̄ jodikdik ro ekkatak jān ennaan in ej n̄an kōjepelļo̧k er n̄an kurup jiddik ko im leļo̧k n̄an kajjojo kurup juon jekjen ilo ennaan eo. Kajjitōk ippāer bwe ren kwaļo̧k juon naan ak jentōj me rej en̄jake ej kōmeļeļeik ilo tukaduin ta eo Būreejtōn Uchtdorf ekar katakin. Karuwaineneik er bwe ren kwaļo̧k juon men rekar ekkatak kōn kam̧m̧oolol. Remaron̄ bar alooje pija in alooj eo “President Russell M. Nelson on the Healing Power of Gratitude” (ChurchofJesusChrist.org). Ta eo jemaron̄ kōm̧m̧ane n̄an “kam̧m̧oolol ilo jabdewōt jekjek ko,” jekdo̧o̧n ta ko? Ta waanjon̄ak ko jekar loe ilo an armej kam̧m̧oolol jekdo̧o̧n jekjek ko reppen rej iooni?

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn wāween kōm̧m̧an ekkar n̄an im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Mosaia 2:19–24 (Jej aikuj nōbar im kam̧m̧oolol Anij )

• Alma 34:38; 37:37; Katak im Bujen Ko 46:32; 59:7, 15–21 (Jej aikuj leļo̧k kam̧m̧oolol ilo aolep men otemjej)

• Sam Ko 107:8–9; Pilippai 4:6–7; Katak im Bujen Ko 78:19 (Kōjeraam̧m̧an ko kōn kam̧m̧oolol)

• Dale G. Renlund, “Ļōmņak kōn Em̧m̧an im Meanwōd an Anij,” Liaona, Māe 2020, 41–44

• “Kam̧m̧oolol,” ilo N̄an Kōkajoorļo̧k Jodikdik ro (bok jidikdik eo, 2011), 18

Teaching in the Savior’s Way

Rilo̧mo̧o̧r eo make ekar jeļā kajjien ro Rikaļooran im ro wōn ro me remaron̄ erom̧. Jeļāļo̧kjeņ in ekar im̧we wāween An kar katakin er. Ewi wāween am̧ ekkatak kōn itok limo ko, aikuj ko, idajon̄jon̄ ko an ro kwoj katakin er bwe en wejepedikļo̧k am̧ katakin er?