chunchuukeb’ li saaj sa’ li q’a

26 junio

K’a’ut naq aajel ru li saq ru ch’oolej sa’ lix k’uub’anb’il na’leb’ li Dios?

2 Samuel 5–7; 11–12; 1 Reyes 3; 8; 11

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. Chan ru naq xoonacho’ rik’in li Kolonel? K’a’ru yooko chixb’aanunkil re wank jo’ a’an?

• Rilb’aleb’ li wankeb’ sa’ rajb’al ru. Ani wan sa’ qak’a’uxl? Chan ru naq taqatenq’a?

• Xb’oqb’aleb’ chixjunil chixk’ulb’al li evangelio. Chan ru naq taqasume lix patz’omeb’ li qamiiw chirix li Iglees re naq taakawob’resiiq xpaab’aaleb’ chirix li Kolonel?

• Xjunajinkileb’ li junkab’al chi junelik. K’a’ru naru taqab’aanu re aatinak chi kok’ aj xsa’ rik’in li qajunkab’al ut li qech alal?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Li qaChoxahil Yuwa’, li naraj naq sahaq qach’ool, kixk’e qe li chaq’rab’ re saq ru ch’oolej. Ut laj Satanas, li naraj naq rahaq qach’ool, naxye naq maak’a’ aj-e li chaq’rab’ a’in. A’an naxb’aanu chixjunil li naru re qaalenkil re naq toomaakob’q rik’in tz’ejwalej. Eb’ li saaj neke’xk’ul k’iila jalam-uuch ut na’leb’ li neke’xka’pak’ali li naxk’ut li Dios chirix li saq ru ch’oolej. Chiqajunilo tento taqak’e reetal li aaleek a’an ut taqayal qaq’e re naq saqaq ru li qak’a’uxl, li qaatin, ut li qab’aanuhom chiru li qayu’am. Naqatzol li na’leb’ a’in rik’in li rahilal kixk’ul li rey aj David. A’an tiik chaq chi paab’ank. A’ut ki’aaleek ut kixq’et li chaq’rab’ re saq ru ch’oolej (chi’ilmanq 2 Samuel 11:1–5).

Naru taakawresi li tzolok rik’in rilb’al 2 Samuel 11, ut li raatin li Elder David A. Bednar, “Creemos en ser castos” (Liahona, mayo 2013, 41–44), ut xkomon chik li hu chirix li saq ru ch’oolej. K’a’ru tixtenq’aheb’ li saaj chirilb’al li saq ru ch’oolej jo’ chanru li Dios naril? K’a’ru tixtenq’aheb’ chixtz’eqtaanankil lix na’leb’ laj Satanas?

eb’ li saaj winq sa’ li tzoleb’aal

Re taqapaab’ junelik lix chaq’rab’ li Dios chirix li saq ru ch’oolej, tento taqayal qaq’e wulaj wulaj re naq saqaq ru li qak’a’uxl, li qaatin, ut li qab’aanuhom.

Tzolok sa’ komonil

Naru xb’aanunkil a’in re aatinak chirix li saq ru ch’oolej ut re xtenq’ankileb’ li saaj chixtzolb’al li k’a’ru xe’ril sa’ li loq’laj hu. Tz’iib’aheb’ chiru li pizarron li aatin David ut Jose. Chirix a’an, ilomaq 2 Samuel 11:1–5 ut Genesis 39:7–12. Chan ru naq laj David ut laj Jose kixsume li aaleek ke’xk’ul chirix li saq ru ch’oolej? K’a’ru naqatzol rik’in li ke’xb’aanu? Naru xb’aanunkil a’in malaj jalan chik aana’leb’ re aatinak chirix xnimal xwankil li saq ru ch’oolej sa’ lix k’uub’anb’il na’leb’ li Dios.

• Maare us xch’olob’ankil chiruheb’ li saaj k’a’ru naxye li Qaawa’ chirix li saq ru ch’oolej. Ye reheb’ naq te’ril “Xsaqal ru li tib’elej” sa’ Choq’ re Xkawilaleb’ li Saaj ([hu, 2011], 35–37) malaj li xkaa raqal re “Li Junkab’al: Jun Jek’inb’il Aatin choq’ re li Ruchich’och’ ” (ChurchofJesusChrist.org). Chan ru naq jalan lix na’leb’ li Qaawa’ chirix li saq ru ch’oolej rik’in li na’leb’ naraj laj Satanas naq taqapaab’? Eb’ li saaj naru te’ril “Li Junkab’al: Jun Jek’inb’il Aatin choq’ re li Ruchich’och’,” ut te’xsik’ li aatin li naxch’olob’ k’a’ut naq aajel ru li saq ru ch’oolej sa’ lix k’uub’anb’il na’leb’ li qaChoxahil Yuwa’. K’a’ru naqatzol rik’in li aatin a’an li nokoxtenq’a chixb’aanunkil li k’a’ru tiik sa’ li kutan a’in?

• Wan naq eb’ li kristiaan ink’a’ neke’xtaw ru li qana’leb’ chirix li saq ru ch’oolej, xb’aan naq jwal jalan jalanqeb’ li na’leb’ sa’ ruchich’och’ chirix a’an. Chan ru te’qasume lix patz’om? K’a’ru naqatzol rik’in li Elder ut Hermana Renlund sa’ li video “¿Por qué es importante vivir la ley de castidad?” re li “Cara a Cara con el élder y la hermana Renlund”? (ChurchofJesusChrist.org). Eb’ li saaj naru te’rileb’ li raqal re li loq’laj hu sa’ “Xkomon chik li tenq’ ” re te’xtaw li aatin li naxch’olob’ li osob’tesiik li nachal rik’in li saq ru ch’oolej. Naru taapatz’ reheb’ naq te’xye k’a’ut naq neke’xsik’ ru xpaab’ankil lix chaq’rab’ li Qaawa’ chirix li saq ru ch’oolej.

• Li ruchich’och’ naxk’ut naq maak’a’ aj-e li saq ru ch’oolej. A’ut ink’a’ naxk’e reetal li osob’tesiik li nachal rik’in li saq ru ch’oolej ut li xiwxiw li nachal rik’in li maakob’k rik’in tz’ejwalej. Re xtzolb’al xkomon chik chirix li na’leb’ a’in, eb’ li saaj naru te’ril li kixye li Elder David A. Bednar sa’ “Creemos en ser castos.” Junjunq reheb’ naru te’ril li raqal “El propósito del adversario,” ut lix komoneb’ chik te’ril li raqal “Las bendiciones de ser castos.” Toja naq’ naru te’xwotz chirib’ileb’ rib’ li xe’xtzol. Ye reheb’ naq te’xtz’iib’a li na’leb’ nawulak chiruheb’ li neke’raj xjultikankil naq neke’xk’ul li b’alaq’il na’leb’ chirix li saq ru ch’oolej. Naru ajwi’ taaye reheb’ naq te’ril li raqal “El principio del arrepentimiento.” K’ut chiruheb’ chan ru naq li Kolonel naru tixk’irtesiheb’ chixjunil li neke’raj xjalb’al xk’a’uxl chirix lix maak. Jultika reheb’ li saaj naq naru neke’aatinak rik’ineb’ xna’ xyuwa’ malaj li obiisp wi wankeb’ xpatz’om malaj wi tento te’xjal xk’a’uxl.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• 1 Korintios 6:19–20 (Li qajunxaqalil a’an jun li santil ochoch)

• Alma 38:12 (Wi naqaram li qatawom, naru toonujaq rik’in li rahok)

• Tzol’leb’ ut Sumwank 25:2; 121:45–46 (Li osob’tesiik li nachal rik’in li saq ru ch’oolej)

• “La castidad: ¿cuáles son los límites?” “La verdadera confianza,” “Yo escojo ser limpio” (eb’ li video), ChurchofJesusChrist.org

Li k’utuk jo’ li Kolonel

Yalaq ta b’ar wan wi’, li Kolonel kixk’ut chiqu chan ru tento toowanq. Kixk’ut chan ru li tijok rik’in xb’aanunkil li tijok rochb’eeneb’ lix tzolom. Kixk’ut chiruheb’ li rahok ut li k’anjelak chiru ras riitz’ineb’ rik’in chan ru naq a’an kixraheb’ ut kik’anjelak chiruheb’. Kixk’ut chiruheb’ chan ru xk’utb’al lix evangelio rik’in chan ru kixk’ut a’an.