eb’ li saaj neke’ril li jolomil ch’utub’aj-ib’ sa’ celular

10 julio

K’a’ut naq aajel ru xtaaqenkil lix yo’yookil profeet li Dios?

2 Reyes 2–7

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. K’a’ru xe’aatinak wi’ li obispil sa’ li jolomil ch’utam choq’ reheb’ li saaj sa’ li teep? A’ yaal li xe’aatinak wi’, k’a’ru taqab’aanu?

• Rilb’aleb’ li wankeb’ sa’ rajb’al ru. K’a’ru naru taqab’aanu re xtenq’ankileb’ li qas qiitz’in jo’ naraj li Kristo naq naqil li na’ajman ru a’b’an ink’a’ naqanaw k’a’ru xyeeb’al?

• Xb’oqb’aleb’ chixjunil chixk’ulb’al li evangelio. K’a’ru ak xqataw sa’ lix evangelio li Jesukristo li naxsahob’resi qach’ool? Chan ru taqawotz li sahil ch’oolejil a’an rik’ineb’ li qas qiitz’in?

• Xjunajinkileb’ li junkab’al chi junelik. K’a’ru naru taqab’aanu re aatinak chi kok’ aj xsa’ rik’in li qajunkab’al ut li qech alal.

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Chiqajunil chanchano b’ayaq laj Nahaman li saqlep rix (chi’ilmanq 2 Reyes 5:1–15). Jo’ laj Nahaman, li kijosq’o’ naq li profeet aj Eliseo kixye re naq yal taa’atinq sa’ jun li nima’ re taak’iraaq, wan naq ink’a’ naqataw ru k’a’ru aj-e xna’leb’ li profeet. Maare naqak’oxla naq ink’a’ ch’olch’o ru junaq na’leb’ naxye, jo’kan naq maak’a’ na’ok wi’ sa’ li qayu’am. A’b’an li Dios naxyeechi’i ninqi osob’tesink qe wi tuulan qach’ool chixtaaqenkil li profeet (chi’ilmanq Tzol’leb’ ut Sumwank 21:4–7). Chan ru naq xtaaqenkil li profeet ak xatxtenq’a chi nach’ok rik’in li Qaawa’? K’a’ chik ru sa’ 2 Reyes 4–6 naxk’ut chan ru naq osob’tesinb’ilo naq naqataaqeheb’ li yo’yookil profeet?

Naq nakakawresi li tzolok chirix li osob’tesiik li nachal rik’in xtaaqenkil li yo’yookil profeet, k’oxlaheb’ lix yalb’aleb’ rixeb’ li saaj. Chan ru naq xtaaqenkil li profeet naru tixtenq’aheb’ sa’ xyalb’aleb’ rix? Naru ajwi’ taawil li raatin li Elder Neil L. Andersen, “Lix profeet li Dios” (Jolomil ch’utub’aj-ib’ re abril 2018), malaj li raatin li Elder L. Whitney Clayton, “ B’aanuhomaq li k’a’ru tixye eere” (Jolomil ch’utub’aj-ib’ re abril 2017).

eb’ li saaj winq sa’ li tzoleb’aal

Xtaaqenkil li profeet naru tixtenq’aheb’ li saaj rik’in lix yalb’aleb’ rix.

Tzolok sa’ komonil

Re aatinak chirix a’in, naru taapatz’ reheb’ li saaj naq te’ril jun reheb’ li raqal a’in, sa’ junesal malaj sa’ kok’ ch’uut: 2 Reyes 4:1–7; 5:6–14; 6:8, 13–17. Patz’ reheb’ naq te’xsik’ li na’leb’ li naxmusiq’aheb’, ut naq te’ril ut te’xpaab’ li raatineb’ li profeet ut li apostol re li qakutankil. Chirix naq neke’xwotz lix na’leb’, naru taapatz’ reheb’ li saaj naq te’xtz’aqob’resi ru li aatin a’in: “Naq nintaaqeheb’ li yo’yookil profeet ut apostol, laa’in …” Re aatinak xkomon chik chirix xtaaqenkil li profeet, naru taab’aanu jun reheb’ li na’leb’ a’in.

• Ka’ajwi’ sa’ lix Iglees li Qaawa’ li k’ojob’anb’il wi’chik wankeb’ li yo’yookil profeet, jo’kan naq eb’ li saaj sa’ laa tzoleb’aal te’ruuq chixsumenkil xpatz’omeb’ jalan chik li kristiaan chirixeb’ li yo’yookil profeet. Naru taatz’iib’a chiru li pizarron eb’ li patz’om a’in li maare te’xpatz’ jalan chik li kristiaan chirix li yo’yookil profeet: K’a’ut naq wan lee profeet? Chan ru naq sik’b’il ru jun li profeet? Chan ru nakanaw naq na’aatinak ruuchil li Dios? Eb’ li saaj naru te’xsik’ xsumenkileb’ li patz’om a’in sa’ “Xkomon chik li tenq’.” Naru te’xyal xsumenkileb’ li patz’om a’in ut xkomoneb’ chik rik’in li na’leb’ neke’xtaw, ut rik’in ajwi’ xna’leb’eb’ a’an.

• Chan ru naq li raatin li yo’yookil profeet nokoxtenq’a naq wankeb’ li qach’a’ajkilal? Re xtenq’ankileb’ li saaj chixsumenkil li patz’om a’in, naru taaye reheb’ naq te’xtz’iib’a chiru li pizarron lix na’leb’ ut lix b’oqom li profeet li xye sa’ li jolomil ch’utub’aj-ib’ toje’ xnume’. K’a’ru ak qab’aanuhom re xb’aanunkil li xye? K’a’ru xqak’ul sa’ li qayu’am naq xqab’aanu? Naru taapatz’ re jun li saaj naq tixwotz chan ru naq kitenq’aak xb’aan raatin li profeet rik’in junaq xch’a’ajkilal.

• Chan ru taatenq’aheb’ li saaj chixtawb’al ru naq xtaaqenkil li profeet tixtenq’aheb’ chi nach’ok rik’in li Kolonel? Naru taak’e jun ch’ina hu re li junjunq, ut taaye reheb’ naq te’ril li raatin li Elder Neil L. Andersen, “Lix profeet li Dios.” Naru te’xtz’iib’a chiru jun xpak’al li ch’ina hu k’a’ru xe’xtzol chirix xtaaqenkil li profeet ut li nach’ok rik’in li Kristo. Chixjunpak’al chik, naru te’xtz’iib’a li musiq’anb’ileb’ chixb’aanunkil re xtaaqenkil li profeet. Patz’ reheb’ naq te’xwotz li k’a’ru xe’xtz’iib’a.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Amos 3:7; Tzol’leb’ ut Sumwank 1:4, 37–38; Moises 6:26–27, 32–36; Temas del Evangelio, “Profetas,” topics.ChurchofJesusChrist.org; “¿Por qué necesitamos profetas?” (video), ChurchofJesusChrist.org (K’a’ut naq wankeb’ li profeet)

• Gary E. Stevenson, “Li raam jun li profeet,” Jolomil ch’utub’aj-ib’ re abril 2018 (Chan ru naq sik’b’il ru jun li profeet)

Li k’utuk jo’ li Kolonel

“Lix jalajik li qach’ool chi tz’aqal yaal ink’a’ yal naraj naq li Santil Musiq’ej tixye li yaal sa’ qach’ool; tento aj b’an wi’ naq taqayu’ami li yaal.” Tenq’aheb’ li komon chixnawb’al ru li Santil Musiq’ej sa’ xch’ool jo’ ajwi’ chixyu’aminkil li k’a’ru naxye” (Li k’utuk jo’ li Kolonel, 10).