santil ochoch

24 julio

Chan ru naq noko’osob’tesiik naq naqak’ul lix k’ojob’anb’il k’anjel li santil ochoch?

Esdras 1; 3–7; Nehemias 2; 4–6; 8

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. B’ar ak xqil li ruq’ li Qaawa’ sa’ li qayu’am?

• Rilb’aleb’ li wankeb’ sa’ rajb’al ru. Chan ru naq taqatenq’a qib’ chiqib’il qib’ sa’ li naqanumsi?

• Xb’oqb’aleb’ chixjunil chixk’ulb’al li evangelio. Chan ru naq taqoksi li tecnologia re xwotzb’al li evangelio?

• Xjunajinkileb’ li junkab’al chi junelik. K’a’ru yooko chixb’aanunkil re xtenq’ankil li qajunkab’al chi chalk rik’in li Kristo?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Naq eb’ laj Judio ke’sutq’i chaq Babilonia, ke’xtaw naq sachb’il li tenamit Jerusalen ut li santil ochoch (chi’ilmanq 2 Reyes 25:1–10; 2 Kronikas 36:17–19). Ke’raj xkab’lankil chi ak’il li santil ochoch. Sa’ junpaat ke’ok chixkab’lankil wi’chik ut ke’saho’ xch’ool naq ke’raqe’ chixyiib’ankil li santil ochoch (chi’ilmanq Esdras 3:8–13; 6:16–22). Sa’ li kutan a’in, jo’ xtenamit li Dios re sumwank, laa’o ajwi’ naqakab’la li santil ochoch ut nasaho’ qach’ool chirixeb’. K’a’ut? Xb’aan naq li k’ojob’anb’il k’anjel re li santil ochoch naxk’am li xninqal ru reheb’ lix maatan li qaChoxahil Yuwa’. Naxk’am li musiq’ejil wankilal. Naxk’am qab’e. Ut nokoxtenq’a chi wank jo’ li Dios ut chixk’ulb’al chixjunil li wan re. (Chi’ilmanq Tzol’leb’ ut Sumwank 84:19–22; 109:22–26.)

Chan ru taatenq’aheb’ li saaj chixk’oxlankil li santil ochoch jo’ ke’xb’aanu laj Israelita? Chan ru taatenq’aheb’ chirajb’al chi anchaleb’ xch’ool ok sa’ sumwank rik’in li Dios sa’ lix santil ochoch? Naq nakakawresi li tzolok, naru taawil li raatin li Awa’b’ej Thomas S. Monson, “Li osob’tesink re li santil ochoch” (Jolomil ch’utub’aj-ib’ re abril 2015) ut li hu “Por qué son importantes las ordenanzas y los convenios” sa’ temples.ChurchofJesusChrist.org.

eb’ li saaj chirix li santil ochoch

Li k’ojob’anb’il k’anjel re li santil ochoch nokoxtenq’a chi wank jo’ li Dios ut chixk’ulb’al chixjunil li wan re.

Tzolok sa’ komonil

Re xtenq’ankileb’ li saaj chixyo’oninkil li osob’tesiik te’xk’ul rik’in li k’ojob’anb’il k’anjel re li santil ochoch, naru taapatz’ reheb’ naq te’ril Esdras 3:10–13; 6:16, 21–22. Patz’ reheb’ naq te’xwotz li aatin li naxk’ut li ke’reek’a li najter aj Judio chirix xkab’lankil chi ak’il lix santil ochoch. K’a’ut naq naninq’ehiman ru xkab’lankil junaq santil ochoch? Chan ru naq li santil ochoch ut li naqab’aanu aran sa’ li kutan a’in nokoxtenq’a chi nach’ok rik’in li Kolonel? Naru xb’aanunkil a’in re xtenq’ankileb’ li saaj chixtawb’al ru li osob’tesiik naru te’xk’ul sa’ li santil ochoch.

• Naq laj Jose Smith kirosob’tesi li santil ochoch re Kirtland, li tij li kixye natawman sa’ Tzol’leb’ ut Sumwank 109. Li tij a’in naxye resileb’ li k’iila osob’tesiik naru naqak’ul rik’in li k’ojob’anb’il k’anjel re li santil ochoch. Eb’ li saaj naru te’ril jun raqal re li tij, maare eb’ li raqal 12–26, re xte’xtaw li osob’tesiik kixpatz’ laj Jose Smith sa’ xtij. Naru te’xtz’iib’aheb’ chiru li pizarron. Naru taapatz’ reheb’ li saaj chan ru naq li osob’tesiik a’an naru tixkawob’resiheb’ anajwan ut sa’ li kutan chalel. Ch’olob’ xyaalaleb’ li osob’tesiik nakak’ul rik’in li k’ojob’anb’il k’anjel re li santil ochoch.

• Re xtenq’ankileb’ li saaj chixwotzb’al li neke’reek’a chirix li santil ochoch, patz’ reheb’ naq te’xtz’aqob’resi ru li ch’ol aatin a’in: “Naq nink’oxla li santil ochoch, naweek’a …” Naru taapatz’ reheb’ naq te’ril li oob’ raqal sa’ xtiklajik li raatin li Elder Kent F. Richard, “Lix wankilal li choxahilal” (Jolomil ch’utub’aj-ib’ re abril 2016). K’a’ut naq jwal nim xwankil choq’ qe li santil ochoch chiru yalaq chik k’a’ru? K’a’ru xqatzol chirix li wankilal naxk’e li Dios qe rik’in li k’ojob’anb’il k’anjel re li santil ochoch? Toja’ naq eb’ li saaj naru te’ril xkomon chik li na’leb’ sa’ li raatin li Elder Richards, re te’xtaw li osob’tesiik naqak’ul rik’in li k’ojob’anb’il k’anjel re li santil ochoch. Malaj naru te’xsik a’an sa’ li raatin li Awa’b’ej Thomas S. Monson, “Li osob’tesink re li santil ochoch.”

• Re xtenq’ankileb’ li saaj chixk’oxlankil li mayejak neke’xb’aanu k’iila kristiaan re xk’ulb’al li osob’tesiik sa’ li santil ochoch, naru taak’ut li video “Los templos son un faro” (ChurchofJesusChrist.org). K’a’ut naq li junkab’al Mou Tham naab’al li ke’xmayeja re te’wulaq sa’ li santil ochoch (Chi’ilmanq ajwi’ Thomas S. Monson, “El Santo Templo: Un faro para el mundo,” Liahona, mayo 2011, 90–94.) K’a’ru tento taqamayeja laa’o re xk’ulb’al li osob’tesiik sa’ li santil ochoch? Maare junaq li toje’ xwulak sa’ li santil ochoch naru tixwotz xna’leb’ eerik’in. Naru taapatz’ reheb’ li saaj naq te’ril li kixye li Elder Ronald A. Rasband sa’ “K’ulub’anb’il chiru li Qaawa’ ” (Jolomil ch’utub’aj-ib’ re octubre 2020), ut naq te’xwotz li osob’tesiik li nachal rik’in li recomendacion re li santil ochoch. Naru ajwi’ teeril li napatz’man sa’ li tz’ilok-ix re xk’ulb’al li recomendacion (chi’ilmanq Russell M. Nelson, “Aatin re xraqb’al li jolomil ch’utub’aj-ib’,” Jolomil ch’utub’aj-ib’ re octubre 2019).

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Quentin L. Cook, “Il aawib’ sa’ li santil ochoch,” Jolomil ch’utub’aj-ib’ re abril 2016

Li k’utuk jo’ li Kolonel

“Ruuchil yal xk’utb’al li na’leb’ chiruheb’, tenq’aheb’ li saaj chixtawb’al ru xjuneseb’ rib’ lix yaalil na’leb’ li evangelio sa’eb’ li loq’laj hu ut li raatineb’ li profeet” (Li k’utuk jo’ li Kolonel, 28).