eb’ li saaj neke’b’atz’un chirix kab’l

14 agosto

Chan ru naq tintaw xsahil inch’ool sa’ xtaaqenkil li Kolonel?

Salmos 1–2; 8; 19–33; 40; 46

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. Chan ru naq yooko chixtawb’al xsahil qach’ool sa’ xtaaqenkil li Jesukristo?

• Rilb’aleb’ li wankeb’ sa’ rajb’al ru. Ani sa’ li qateep malaj qatenamit naraj ru qatenq’? Chan ru taqatenq’a?

• Xb’oqb’aleb’ chixjunil chixk’ulb’al li evangelio. Chan ru taqakawresi qib’ chiqib’il qib’ re xik sa’ mision?

• Xjunajinkileb’ li junkab’al chi junelik. Chan ru tootenq’anq sa’ li teep re xb’aanunkil li k’anjel re li santil ochoch ut li junkab’al?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

K’a’ru naxk’e xsahil aach’ool? Maare taaye naq nasaho’ aach’ool xb’aan laa wamiiw ut laa junkab’al, xb’aanunkil li nawulak chawu, malaj yal jun kutan naq maak’a’ laa ch’a’ajkilal. Li Awa’b’ej Russell M. Nelson kixye: “Lix sahil li qach’ool ink’a’ nayo’la sa’ li k’a’ru naqak’ul. Nayo’la b’an sa’ li k’a’ru naqataaqe. Naq naqajayali li qayu’am rik’in lix k’uub’anb’il na’leb’ li kolb’a-ib’ re li Dios … jo’ ajwi’ li Jesukristo ut lix evangelio, naru naqeek’a xsahil qach’ool a’ yaal k’a’ru li nak’ulman—malaj li ink’a’ nak’ulman—sa’ li qayu’am. Li sahil ch’oolejil nachal rik’in ut sa’ xk’ab’a’ a’an” (Li sahil ch’oolejil ut kole’k sa’ musiq’ejil,” Jolomil ch’utub’aj-ib’ re octubre 2016). A’an ajwi’ li na’leb’ li nak’utman sa’ li hu Salmos: “Taak’ut chiwu xb’ehil li yu’am: k’a’jo’ xnimal li sahilal chawe chawu” (Salmos 16:11).

K’oxlaheb’ li ch’a’ajkilal neke’xnumsi li saaj sa’ laa tzoleb’aal. Chan ru taatenq’aheb’ chixtawb’al ru naq li tz’aqal sahil ch’oolejil nachal rik’in xk’anjelankil li paab’aal chirix li Kolonel—us ta wan li qach’a’ajkilal. K’oxla li patz’om a’in naq nakakawresi li tzolok. Sik’ xkomon chik li raqal naru taawotz rik’ineb’ li saaj sa’ Salmos malaj sa’ li raatin li Awa’b’ej Nelson, “Li sahil ch’oolejil ut kole’k sa’ musiq’ejil.”

eb’ li saaj winq sa’ li tzoleb’aal

Li tz’aqal sahil ch’oolejil nachal rik’in xk’anjelankil li paab’aal chirix li Kolonel, us ta wan li qach’a’ajkilal.

Tzolok sa’ komonil

Naru taapatz’ reheb’ li saaj naq te’ril junjunq reheb’ a’in: Salmos 1; 8; 19; 23; 27. K’a’ru naqatzol sa’eb’ li Salmo a’in chirix li sahil ch’oolejil? Toja’ naq naru taab’aanu wiib’ oxib’ reheb’ li na’leb’ a’in re xtenq’ankileb’ li saaj chixtawb’al ru naq li tz’aqal sahil ch’oolejil nachal rik’in xtaaqenkil li Jesukristo.

• Chiqajunilo naqaj xtawb’al xsahil qach’ool, a’ut tento taqataw ru k’a’ru naxk’e li tz’aqal sahil ch’oolejil ut k’a’ru naxk’e li rahilal. Patz’ reheb’ li saaj naq te’xye k’a’ru naxk’e xsahileb’ xch’ool, ut k’a’ut. Tz’iib’a chiru li pizarron “Nekeʼwan li winq re naq teʼwanq xsahilebʼ xchʼool” (2 Nefi 2:25). Patz’ reheb’ li saaj naq, sa’ junesal malaj kok’ ch’uut, te’ril jun reheb’ li raqal re li loq’laj hu sa’ “Xkomon chik li tenq’,” ut naq te’xtz’iib’a k’a’ru naxk’e xsahileb’ xch’ool. Naru ajwi’ taak’ut li video “Podemos hallar la felicidad” (ChurchofJesusChrist.org). K’a’ru neke’xb’aanu li kristiaan re xsik’b’al xsahil xch’ool rik’in li k’a’ru naxk’e chi yaal xrahil xch’ool. Chan ru naq li Kolonel naxk’e xsahil qach’ool?

• Naqanaweb’ ru li kristiaan li k’iheb’ lix ch’a’ajkilal us ta yalb’ileb’ xq’e chixyu’aminkil li evangelio. Chan ru taatenq’aheb’ li saaj chixtawb’al ru naq naru taasaho’q qach’ool us ta ch’a’aj li qayu’am? Naru taapatz’ reheb’ naq te’ril li raatin li Awa’b’ej Russell M. Nelson, “Li sahil ch’oolejil ut kole’k sa’ musiq’ejil,” malaj li raatin li Awa’b’ej Steven J. Lund, “Xtawb’al li sahil ch’oolejil rik’in li Kristo” (Jolomil ch’utub’aj-ib’ re octubre 2020). K’a’ruheb’ li seraq’ naqataw chirixeb’ li ke’saho’ xch’ool rik’in li Kristo us ta lix ch’a’ajkilaleb’? K’a’ru naqatzol rik’ineb’? Ma wan k’a’ru xqak’ul sa’ qayu’am li naru naqawotz?

• Chiqajunilo nalukta ut naraho’ qach’ool chi jo’q’ehaq naq yooko chixnumsinkil li qach’a’ajkilal sa’ li yu’am a’in. Choq’ re junjunq, nak’ulman a’in chiru chixjunil lix yu’am. Maare us naq tex’aatinaq chirixeb’ li ch’a’ajkilal a’an ut li tenq’ naru tixk’e li Kolonel reheb’ li neke’lukta ut neke’raho’ xch’ool. Re aatinak chirix a’an, naru taapatz’ reheb’ li saaj naq te’ril li kaahib’ raqal sa’ xraqik li raatin li Elder Jeffrey R. Holland, “Como una vasija quebrada” (Liahona, noviembre 2013, 40–42), malaj li raatin li Hermana Reyna I. Aburto, “Saʼ choql ut saʼ saqen, chatwanq wikʼin!” (Jolomil ch’utub’aj-ib’ re octubre 2019). Patz’ reheb’ li saaj naq te’xsik’ li na’leb’ li naxtoch’ xch’ooleb’, ut naq te’xwotz k’a’ru xe’xtaw. Waklesi xch’ooleb’ li saaj chi aatinak rik’in xna’ xyuwa’ malaj jun aj jolominel, malaj naq te’xik sa’ mentalhealth.ChurchofJesusChrist.org wi neke’raj xtenq’.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Mateo 5:1–12; 1 Pedro 4:12–13; 2 Nefi 2:25–27; Mosiah 2:41; 3:3–7; 4:2–3; Alma 36:16–22; 4 Nefi 1:15–16 (Chan ru natawman li sahil ch’oolejil)

• D. Todd Christofferson, “Lix sahileb’ xch’ool laj santil paab’anel,” Jolomil ch’utub’aj-ib’ re octubre 2019

• “Prevención del suicidio y ministración,” ChurchofJesusChrist.org

Li k’utuk jo’ li Kolonel

Li Kristo kixnaweb’ ru lix tzolom—ut kixnaw chan raj ru toj te’wanq. Naq ke’wan xch’a’ajkilal, kixraheb’. Chan ru taak’ut naq nakaraheb’ li saaj ut naq nakawaj xtenq’ankileb’?