Xtawb’al li sahil ch’oolejil rik’in li Kristo

Xb’aan laj Steven J. Lund

Jolomil awa’b’ej reheb’ li Saaj Winq

Li tz’aqal b’e re xtawb’al li sahil ch’oolejil sa’ li yu’am a’in, a’an xtenq’ankileb’ li qas qiitz’in qochb’een li Kristo.

Li Qaawa’ ink’a’ naxpatz’ reheb’ li saaj sa’ li Tijonelil re Aaron naq te’xb’aanu chixjunil, a’b’an nim ru li k’a’ru naxpatz’ reheb’.

Wiib’ oxib’ chihab’ chaq, xqak’ul jun rahilal sa’ qajunkab’al. Li qalal li iitz’inb’ej, laj Tanner Christian Lund, kiyajer rik’in li cancer. Jwal chaab’il li raam, jo’ xk’ihaleb’ li kok’al beleeb’ chihab’ xyu’am. Seeb’ xna’leb’ ut k’a’jo’ naq xk’e reetal li musiq’ejil na’leb’. Ch’ina xul ut ch’ina anjel. Naq toj ka’ch’in ut xqil chixjunil li naxb’aanu, xqapatz’ ma taa’ok choq’ profeet malaj choq’ aj elq’ sa’ junaq kutan. Relik chi yaal naq tixjal li ruchich’och’.

A’b’an, sa’ jun kutan xyajer. Chiru oxib’ chihab’, eb’ laj b’anonel xe’xyal xq’e chixkolb’al xyu’am; wiib’ sut xcho’e’k; ut xyal xq’e rik’in li pulmonia chiru lajeeb’ xamaan sa’ ventilador. Xk’ira chiru jarub’aq kutan,; toja’ naq xnaq wi’chik li cancer.

Ka’ch’in ma nakam, ak okenaq li cancer sa’ xb’aqel, ut us ta wan xb’an, q’axal ra a’an. Jwal ch’a’aj li elk chaq sa’ ch’aat choq’ re. Sa’ jun li domingo eq’la, xKalleen, lix na’, xwulak chirilb’al naq maji’ naxik li junkab’al sa’ iglees. Xsach xch’ool naq chunchu laj Tanner sa’ ch’aat, ak tiqto ut yoo xyalb’al xq’e rik’in xboton lix kamiis. Xchunla xKalleen chixk’atq. “Tanner,” chan, “ma yaal naq tatruuq chi xik sa’ iglees anajwan? Maare us naq tatkanaaq arin ut tathilanq anajwan.”

Laj Tanner xxulub’ xjolom. A’an aj tenq’anel sa’ li tijonelil. Wan xmolam. Wan xk’anjel.

“Tento tinjek’i li loq’laj wa’ak anajwan.”

“Nink’oxla naq taawanq li ani tixb’aanu sa’ aana’aj.”

“Yaal,” chan, “a’b’an … nink’e reetal chan ru nikine’ril li kristiaan naq ninjek’i li loq’laj wa’ak. Nink’oxla naq naxtenq’aheb’.”

Chi jo’kan naq li xKalleen xtenq’a rik’in xkamiis ut xkorb’aat, ut xkoheb’ sa’ iglees. Aajel ru li yoo chi uxmank.

Naq xinwulak sa’ iglees, xsach inch’ool naq xwil laj Tanner rik’in li rech aj tenq’anel. Li xKalleen xye we k’a’ut naq wan li qalal aran ut k’a’ru xye: “Naxtenq’aheb’ li kristiaan.”

Xin’ok chirilb’aleb’ laj tenq’anel naq xe’xxaqab’ rib’ chiru li meex re li loq’laj wa’ak. Li walal xranab’ rib’ chiru jun chik aj tenq’anel naq eb’ laj tij xe’xk’e xsek’il li kaxlan wa reheb’. Toja’ naq laj Tanner xko’o sa’ xna’aj ut, chi chapcho li ruq’ chiru roq li chunleb’aal re xxaqab’ankil rib’, x’ok chixjek’inkil li loq’laj wa’ak.

Chanchan naq chixjunileb’ yookeb’ chixka’yankil, neke’toch’e’ xch’ool xb’aan xyalb’al xq’e. Laj Tanner yoo chaq chixk’utb’al xpaab’aal chi maak’a’ naxye naq chi timil timil naxjek’i li loq’laj wa’ak—yoo chaq chireetalinkil li Kolonel jo’ neke’xb’aanu laj tenq’anel. Li yaj aj tenq’anel a’in yoo chixyalb’al xq’e rik’in lix tenb’il junxaqalil re k’anjelak chiruheb’ li ras riitz’in sa’ xjek’inkil reheb’ li reetalil lix tojb’al rix li maak xb’aan li Kolonel.

Naq xqil chan ru naxb’aanu xk’anjel jo’ aj tenq’anel, xjala li naqak’oxla chirix li loq’laj wa’ak, chirix li Kolonel, ut chirixeb’ laj tenq’anel, laj tzolonel, ut laj tij.

Sachso inch’ool xb’aan li sachb’a-ch’oolej li xreek’asi chi k’anjelak chi jo’kan sa’ li eq’la a’an, ut xb’aan ajwi’ xkawilal ut xseeb’al li qasaaj naq neke’xyal xq’e chixpaab’ankil li raatin li profeet re ok sa’ xteep li Dios re xb’aanunkil li k’anjel re li kolb’a-ib’ ut li taqenaqil loq’al.

Naq jun laj tenq’anel naxchap xsek’il li loq’laj wa’ak, najultiko’ qe li loq’laj seraq’ chirix li wa’ak sa’ roso’jik, li Getsemani, li Calvario, ut li muqleb’aal kamenaq sa’ li awimq. Naq li Kolonel kixye reheb’ lix apostol, “Cheb’aanu a’in re xnimankil injultikankil,” ¹ yoo ajwi’ chixyeeb’al qe. Yoo chi aatinak chirix li sachb’a-ch’oolej maak’a’ roso’jik tixb’aanu sa’ junaq kutan naq eb’ laj tenq’anel, laj tzolonel, ut laj tij te’xjek’i reetalil a’an ut te’xb’oq li ralal xk’ajol chixk’ulub’ankil lix tojb’al rix li maak.

Chixjunileb’ li reetalil li loq’laj wa’ak nokohe’xjayali rik’in li maatan a’an. Naqak’oxla li wa li kixjach li Kolonel junxil—ut li wa li neke’xjach laj tij anajwan. Naqak’oxla xyaalalil li osob’tesinb’il ha’, junxil ut anajwan, naq na’el li raatinul li tij re li loq’laj wa’ak sa’ xtz’uumal reheb’ laj tij toj sa’ qach’ool ut sa’ choxa, re rak’ob’resinkileb’ li qasumwank li nokohe’xlaqab’ rik’in xwankilal lix kolb’al li Kristo. Maare naqak’oxla k’a’ut naq laj tenq’anel naxk’ameb’ chaq li loq’laj eetalil qik’in, xaqxo chiqu jo’ chanru xaqxo raj li Kristo wi ta taawanq aran, xyeechi’inkil xwaklesinkil li qiiq ut xk’irtesinkil li qarahilal.

Moko na’ajman ta naq te’yajerq li saaj winq ut saaj ixq re xtawb’al xsahileb’ xch’ool sa’ k’anjelak chiru li Kolonel.

Li Elder David A. Bednar kixye naq re took’iiq ut too’ok choq’ misioneer, tento taqab’aanu li neke’xb’aanu, toja’ naq “chi junjunqil li raqal, chi junjunqil li na’leb’, … naru too’ok choq’ li misioneer … li naraj li Kolonel.” ²

Chi jo’kan ajwi’, wi naqaj “wank jo’ li Jesus,” ³ tento taqab’aanu li naxb’aanu li Jesus, ut a’an naxch’olob’ k’a’ru naxb’aanu chi jo’ka’in: “K’e reetal, a’in lin k’anjel ut lin loq’al—xk’eeb’al chi uxmank lix kolb’al chiru li kamk ut lix yu’am chi junelik li winq.” ⁴

Chalen chalen ut chi junelik, li Kolonel nak’anjelak chiru lix Yuwa’ sa’ xkolb’aleb’ li ralal xk’ajol.

Ut li tz’aqal b’e re xtawb’al li sahil ch’oolejil sa’ li yu’am a’in, a’an xtenq’ankileb’ li qas qiitz’in qochb’een li Kristo.

A’in li na’leb’ li k’ojob’anb’il wi’ li k’anjel choq’ reheb’ li kok’al ut li saaj.

Chixjunileb’ li kok’ k’anjel reheb’ li kok’al ut li saaj tento te’xtenq’aheb’ chi wulak jo’ li Jesus naq neke’k’anjelak rochb’een a’an sa’ li k’anjel re li kolb’a-ib’ ut li taqenaqil loq’al.

Li k’anjel a’in, a’an jun k’anjeleb’aal re xtenq’ankileb’ chixjunileb’ li kok’al ut saaj chi ok choq’ tzolom ut chixk’eeb’al reetal rik’in xpaab’aal k’a’ru li sahil ch’oolejil. Naru te’royb’eni li k’a’ru te’xk’ul sa’ xb’ehil li sumwank naq te’kub’eeq xha’, te’k’ojob’aaq choq’ komon, ut te’ok sa’ xmolameb’ li tijonelil malaj xtzoleb’aaleb’ li Saaj Ixq, b’ar wi’ te’saho’q xch’ool sa’ k’anjelak chiruheb’ li ras riitz’in jo’ li Kristo. Te’xk’e xmeta, ninqeb’ ut kok’eb’, li te’xxaqab’ xyu’ameb’ naq neke’wulak jo’ li Kolonel. Eb’ li ch’utub’aj-ib’, eb’ li hu, li Amigo, ut li aplicacion Xyu’aminkil li Evangelio tixtenq’aheb’ chixtawb’al li sahil ch’oolejil rik’in li Kristo. Te’royb’eni xk’ulb’al xliceens chi ok sa’ li santil ochoch, ut naab’al reheb’ te’reek’a xmusiq’ laj Elias rik’in lix wankil li Santil Musiq’ej naq te’xsik’eb’ li rosob’tesihom li santil ochoch ut li resilal li junkab’al. K’amb’ilaqeb’ xb’e xb’aan li rosob’tesinkil xb’aan li yuwa’b’ejil aj k’anjel. Moqon, te’ok sa’ li santil ochoch re te’tiqib’aaq rik’in wankilal, ut re te’xtaw xsahil xch’ool aran naq te’tz’ape’q sa’ junajil rik’in lix junkab’al.

Sa’ xq’ehil li nimla yajel a’in ut xkomon chik li ch’a’ajkilal, xtawb’al lix tz’aqal chaab’ilal li k’anjel choq’ reheb’ li kok’al ut li saaj toj yoo chi uxmank—ut jwal aajel ru. Eb’ li qasaaj ink’a’ naru te’royb’eni naq li ruchich’och’ tixtuqub’ rib’ toj reetal naq te’xnaw ru li Kolonel. Wankeb’ li saaj li neke’xsik’ ru xb’aanunkil li ink’a’ te’xb’aanu raj wi ta te’xtaw ru aniheb’ a’an—ut ani li Kolonel.

Chi jo’kan, li Dios nokoxb’oq chiqajunilo chixtenq’ankileb’!

Ex na’b’ej ut yuwa’b’ej, aajel ru naq teetenq’a lee kok’al chi anchal eech’ool anajwan jo’ ak xeb’aanu junxil naq yal ka’ch’ineb’. Ex na’b’ej ut yuwa’b’ej, ex aj jolominel reheb’ li saaj, wi neke’ch’a’ajko’ lee saaj, li k’anjel a’in tixjilosiheb’ rik’in li Kolonel, ut li Kolonel tixk’e tuqtuukilal reheb’. ⁵

Ex awa’b’ejil re molam ut tzoleb’aal, k’ehomaq eech’ool chi k’anjelak sa’ xk’anjel li Qaawa’.

Ex obiisp, chejunaji lee laaw rik’in xlaaweb’ laj jolominel re molam, ut chi jo’kan te’jalaaq lee molam ut lee teep chi junelik.

Ex saaj, ninch’olob’ xyaalal naq laa’ex ralal xk’ajol li Dios, raarookex xb’aan, ut a’an wan xk’anjel choq’ eere.

Naq teeyal eeq’e chi anchal eech’ool, eemetz’ew, eek’a’uxl, ut eekawilal sa’ li b’oqb’ilex wi’, taanimanq eerahom choq’ re li Dios ut teepaab’ lix tijonelil a’an naq nekexk’anjelak chiru lee ras eeriitz’in, xb’een wa sa’ lee rochoch.

Nintz’aama naq teeyal eeq’e chi anchal eech’ool re k’anjelak, re paab’ank, re xjalb’al eek’a’uxl, ut re chaab’ilo’k wulaj wulaj, re teek’ul li osob’tesink re li santil ochoch ut li sahil ch’oolejil li nachal ka’ajwi’ rik’in lix evangelio li Jesukristo. Nintz’aama naq teekawresi eerib’ re wulak choq’ misioneer, choq’ tiikil b’eelomej malaj ixaqilb’ej, choq’ yuwa’b’ej malaj na’b’ej aj rahonel, jo’ yeechi’inb’il eere wi texwanq jo’ xtzolom li Jesukristo.

Chekawresi li ruchich’och’ choq’ re xkab’ xk’ulunik li Kolonel rik’in xb’oqb’al chixjunileb’ chi chalk rik’in li Kristo ut chi osob’tesiik xb’aan lix tojb’al rix li maak. Sa’ xk’ab’a’ li Jesukristo, amen.