Li Dios tixb’aanu li k’a’ru numtajenaq xnimal ru
Li Dios kixkawresiheb’ li ralal xk’ajol ut lix Iglees choq’ re li kutankil a’in.
Chirix naq ke’wulak sa’ li ru taq’a Lago Salado, eb’ laj santil paab’anel ke’ok chixkab’lankil jun li santil ochoch. Ke’reek’a naq xe’xtaw jun na’ajej b’ar wi’ te’ruuq chixloq’oninkil li Dios sa’ tuqtuukilal.
A’b’an, naq yoo chaq chi choymank xk’ojleb’aal li santil ochoch, yoo ajwi’ chi nach’ok jun teep aj pleet aj Estados Unidos re xk’eeb’al jun ak’ jolominel tenamit.
Eb’ laj jolominel re li Iglees ink’a’ ke’xnaw k’a’ru taak’ulmanq, jo’kan naq laj Brigham Young kixtaqlaheb’ laj santil paab’anel chi eelelik ut chixmuqb’al xk’ojleb’aal li santil ochoch.
Maare ke’wan li komon li ke’xpatz’ k’a’ut naq nasache’ chi kok’ aj xsa’ xwankil lix k’anjeleb’ re xkab’lankil li rawa’b’ejihom li Dios.
Kinume’ li ch’a’ajkilal, ut ki’isiik ut kitz’ile’ rix xk’ojleb’aal li santil ochoch. Toja’ naq laj kab’lanel ke’xk’e reetaleb’ li ninqi itz’il chiruheb’ li pek ut naq moko us ta a’an choq’ k’ojleb’aal.
Chi jo’kan, laj Brigham kixye reheb’ naq te’xyiib’ wi’chik re naq tz’aqal tixk’e xk’ojleb’aal lix tz’akil1 li santil ochoch re Lago Salado.2 Eb’ laj santil paab’anel ke’ru chi jo’kan chixxb’ichankil li b’ich “Kawil k’ojleb’aal”3xb’aan xnawomeb’ naq k’ojk’o li santil ochoch sa’ xb’een jun kawil k’ojleb’aal li taakanaaq chiru k’iila chihab’.
Li seraq’ a’in naxk’ut naq li Dios naru naroksi li ch’a’ajkilal re xk’eeb’al chi uxmank li rajom.
Jun yajel re chixjunil li ruchich’och’
Yaal li na’leb’ a’an sa’ li qakutankil laa’o.
Ma wan tab’i’ li ani narab’i malaj naril li waatin li ink’a’ ak toch’b’il xyu’am xb’aan li nimla yajel sa’ ruchich’och’ anajwan?
Eb’ li neke’yaab’ak xb’aan xkamik li xkomon malaj li ramiiw, nokoyaab’ak eerik’in. Naqatz’aama chiru li qaChoxahil Yuwa’ naq tixk’ojob’ ut tixtuqub’ eech’ool.
Lix toch’om li yajel a’in moko yal ta re xkawilal li tib’elej. K’iheb’ li junkab’al li maak’a’ chik xtrab’aaj ut neke’tz’okaak, neke’ka’ch’ino’ xch’ool, ut neke’xuwak. Naqak’e reetaleb’ li neke’xyal xramb’al ru lix puktesinkil li yajel a’in. Nakana chi sachso qach’ool xb’aaneb’ li neke’k’anjelak re xtenq’ankil ut xk’irtesinkileb’ li wankeb’ sa’ rajb’al ru. Chi anchal qach’ool, naqab’antioxi eere lee chaab’ilal ut lee ruxtaan.
Naqatz’aama naq li Dios tixte rokeb’aal li choxa ut tixnujob’resi lee yu’am rik’in li junelikil osob’tesink.
Iyajo
Toj wan naab’al li ink’a’ naqanaw chirix li yajel a’in. A’b’an wan li k’a’ru ninnaw, moko sachso ta xch’ool li qaChoxahil Yuwa’ xb’aan li yajel a’in. Ink’a’ x’ajman naq tixb’oq xkomon chik li teep chi anjel, naq tixkawresi k’iila ch’utam, malaj naq tixkanab’ lix k’anjel re xtuqub’ankil ru li ch’a’ajkilal a’in.
Tinye naq us ta moko xqaj ta chi moko xqanaw naq taachalq li yajel a’in, li Dios ak xkawresiheb’ li ralal xk’ajol ut lix Iglees choq’ re li kutan a’in.
Toonumtaaq sa’ xb’een a’in. Ink’a’ yal taqakawresi ut taqachap qib’ ut taqoyb’eni naq tooq’ajq chi wank jo’ xoowan junxil. Tooxik b’an chi uub’ej, ut chi jo’kan toochaab’ilo’q.
Laa’o chanchan li iyaj. Re naq taak’iiq li iyaj, tento taak’ehe’q sa’ ch’och’ re naq taamoq. Ninnaw naq us ta wan naq naqeek’a naq aalob’resinb’ilo xb’aan li ch’a’ajkilal malaj sutinb’ilo xb’aan li rahil ch’oolejil, lix rahom li Dios ut lix evangelio li Jesukristo te’xk’e li k’a’ru numtajenaq xnimal ru sa’ li qayu’am.
Li osob’tesink nachal rik’in li ch’a’ajkilal
Chalen chaq xtiklajik, wanjenaq li yalok-ix ut li ch’a’ajkilal.
Kiwan li maa’usilal, li pleetik, ut li hoyok kik’ sa’ xkutankil laj Enok ut lix tenamit. “A’b’anan li Qaawa’ kichal ut kiwan rik’in lix tenamit.” Kiraj xk’eeb’al reheb’ li k’a’ru numtajenaq xnimal ru. Kixtenq’aheb’ chixxaqab’ankil Sion—jun tenamit “junajeb’ xch’ool ut junajeb’ xk’a’uxl” li “ke’wan sa’ tiikilal.”4
Laj Jose, li ralal laj Jakob, kikute’ sa’ jul, kik’ayiik choq’ loq’b’il moos, kiq’axtesiik, ut kikanab’aak xjunes. Maare kixpatz’ laj Jose ma sachb’il sa’ xch’ool li Dios. Li Dios kiraj xk’eeb’al li k’a’ru numtajenaq xnimal ru re laj Jose. Kiroksi li yalok-ix a’in re xkawresinkil laj Jose ut xk’eeb’al sa’ jun na’ajej b’ar wi’ taaruuq tixkol lix junkab’al.
K’oxlahomaq li profeet aj Jose Smith sa’ li tz’alam sa’ Liberty, naq kixtz’aama xtenq’ankileb’ laj santil paab’anel li rahob’tesinb’ileb’. Maare kixpatz’ chan ru naq taaxaqab’amanq Sion sa’ li ch’a’ajkilal a’an. A’b’an, li Qaawa’ kixye tuqtuukilal re li raam, ut li xnimal ru na’leb’ li kixk’utb’esi kixtuqub’ xch’ooleb’ laj santil paab’anel—ut toj naxtuqub’ li qach’ool laa’o.7
Jarub’ sut sa’ xtiklajik lix Iglees li Jesukristo kisach xyo’onihomeb’ laj santil paab’anel ut ke’xpatz’ ma neke’jultikaak xb’aan li Dios? A’b’an sa’ xyanq li rahob’tesink, li xiwxiw, ut li yeechi’ink kamk, li Qaawa’ Dios re Israel kiraj xk’eeb’al li k’a’ru numtajenaq xnimal ru re lix ch’ina ketomq. Li k’a’ru numtajenaq xnimal ru
K’a’ru naqatzol sa’eb’ li seraq’ a’in—ut li k’iila cient chik sa’eb’ li loq’laj hu?
Xb’een, ink’a’ taa’isiiq li ch’a’ajkilal chiruheb’ li tiikeb’ xch’ool. Chiqajunilo tento taqanumsi li ch’a’ajkilal, xb’aan naq sa’ li qach’a’ajkilal naqatzol li na’leb’ li tooxkawob’resi ut tooxjilosi rik’in li Dios.
Xkab’, li qaChoxahil Yuwa’ naxnaw naq naqak’ul rahilal, ut xmaak naq laa’o li ralal xk’ajol, ink’a’ tooxkanab’ qajunes.
K’oxlahomaq aj uxtaan, li Kolonel, li kirileb’ li yaj, li wankeb’ sa’ junesal, li neke’laj xpaab’aal, ut li maak’a’eb’ xyo’onihom. Ma nekek’oxla naq a’an ink’a’ yoo chek’oxlankil laa’ex sa’ li kutan a’in?
Ex wamiiw, ex was wiitz’in, li Dios tooril ut tooxb’eresi sa’ li kutankil a’in re ch’a’ajkilal ut xiw. A’an naxnaw eeru. A’an narab’i lee tz’aam. Naru taqapaab’ a’an. Tixb’aanu li naxyeechi’i.
Li Dios naraj xk’eeb’al li k’a’ru numtajenaq xnimal ru aawe laa’at ut re chixjunil li Iglees—jun li sachb’a-ch’oolejil k’anjel ut jun li eetalil.
B’antiox xaq aawe
Chi uub’ej wankeb’ li qakutan q’axal chaab’il, ink’a’ chi ixb’ej. Jo’kan naq li Dios naxk’utb’esi xna’leb’ choq’ re li kutankil a’in. Chi maak’a’ a’an, chanchano li so’sol ch’iich’ li yal naroyb’eni naq taa’isiiq li tuntuukil choql re naq taakub’eeq chi tuqtu. Q’axal taqenaq wi’chik li rajom li Qaawa’ choq’ qe chiru a’an. A’in lix Iglees li yo’yookil Kristo, ut a’an naxb’eresiheb’ lix profeet, jo’kan naq yooko chi xik chi uub’ej ut chi taqe’q, toj sa’eb’ li na’ajej maajun wa wanjenaqo, q’axal taqe’q chiru li naru taqak’oxla!
Anajwan ut, toj taawanq li qach’a’ajkilal sa’ qaxikik chiru xb’ehil li yu’am. Toj taapo’e’q li qak’anjeleb’aal ut li qach’iich’, ut taachalq li kawil hab’ ut iq’. Relik chi yaal, maare taanimanq li ch’a’ajkilal naq maji’ taak’osq.
Jo’ aj ch’e’ol so’sol ch’iich’, xintzol naq us ta ink’a’ taaruuq tinsik’ ru li ch’a’ajkilal li tink’ul, taaruuq tinsik’ ru chan ru xkawresinkil qib’ ut chan ru xsumenkil. Li na’ajman sa’ xhoonalil li ch’a’ajkilal, a’an li paab’aal li tz’aqal xaqxo.
Chan ru naqab’aanu a’an?
Naqak’e reetal li yoo chi k’ulmank, ut naqachap qib’ chiru xna’leb’ li evangelio ut li k’a’ru q’axal aajel ru. Nakakawresi aawib’ sa’ li tijok, sa’ xtzolb’aleb’ li loq’laj hu, ut sa’ xpaab’ankileb’ lix taqlahom li Dios. Nakasik’ ru xb’aanunkil li ak nawb’il naq us.
K’oxla li naru nakab’aanu sa’ xna’aj li ink’a’ naru nakab’aanu.
Tento taakawob’resi aapaab’aal. Ut nakawab’i li raatin li Qaawa’ ut lix profeet re aab’eresinkil sa’ kolb’a-ix.
Chijultiko’q aawe, a’in lix Iglees li Jesukristo—a’an najolomink re.
K’oxla li k’iila ak’ na’leb’ xqak’ul yal chiru li lajeeb’ chihab’ xnume’. A’in junjunq reheb’:
-
Xka’jultikaman naq li loq’laj wa’ak, a’an xch’oolil li loq’onink sa’ domingo.
-
Xk’uub’aman Kim, Taaqehin choq’ re xkawresinkileb’ li komon ut li junkab’al, chi tenq’anb’il xb’aan li Iglees.
-
Xqatikib’ qilb’al qib’ chiqib’il qib’ jo’ aj ilol komon.
-
Na’oksiman li tecnologia re xwotzb’al li evangelio ut xb’aanunkil lix k’anjel li Qaawa’ sa’ li Iglees.
Ink’a’ raj tooruuq chixpuktesinkil li jolomil ch’utub’aj-ib’ a’in wi ta maak’a’ li tecnologia.
Ex was wiitz’in, rik’in li Kristo jo’ aj jolominel qe, us taa’elq chixjunil, ut taa’uxq li k’a’ru numtajenaq xnimal ru.
Li k’anjel re xch’utub’ankil Israel naxik chi uub’ej
Sa’ xtiklajik, chanchan naq li nimla yajel sa’ ruchich’och’ tixram ru lix k’anjel li Qaawa’. Ink’a’ chik naru xwotzb’al li evangelio jo’ k’aynaqo chixb’aanunkil. A’b’an, sa’ li yajel a’in yoo chi k’utb’esiik jalaneb’ chik li b’e re xtawb’aleb’ li neke’sik’ok re li yaal. Yoo chi nimank xwankil li k’anjel re xch’utub’ankil Israel. K’iila mil chi seraq’ neke’xch’olob’ xyaalal a’an.
Jun wamiiw aran Noruega xtaqla resil qe, xHarriet ut laa’in, naq k’iheb’ chik li yookeb’ chi kub’eek xha’ aran. “Sa’eb’ li na’ajej b’ar wi’ moko k’iheb’ ta li komon re li Iglees,” chan, “eb’ li uq’ej te’nimanq ut te’ok choq’ teep!”
Sa’ Letonia, jun ixq li xtaw li Iglees sa’ internet q’axal kiraj xtzolb’al lix evangelio li Jesukristo, jo’kan naq xwulak sa’ xch’utam rik’ineb’ li misioneer jun hoor ma neke’wulak a’an, ut naq maji’ xe’xchoy chixtzolb’al, ak xpatz’ reheb’ jo’q’e naru taakub’eeq xha’.
Sa’ Europa, jun ixq li xk’ul xb’oqb’al xb’aaneb’ li misioneer kixye, “Ex hermana, k’a’ut naq ink’a’ xineeb’oq junxil? Ak yookin cheroyb’eninkil!”
Naab’al reheb’ li qamisioneer jwal laatz’eb’ ru wi’chik chiru junxil. Yookeb’ chixtzolb’al nab’aaleb’ chik li kristiaan. Junajeb’ chik li komon ut li misioneer sa’ li k’anjel.
Junxil, maare q’axal k’aynaqo rik’in li ak yooko chixb’aanunkil, jo’kan naq x’ajman jun nimla yajel re xjalb’al qana’leb’. Maare yooko chaq chi kab’lak rik’in li pek wan ritz’il us ta ak wan li pek kaw wi’chik chiru a’an. Xmaak li yajel, yooko chixtzolb’al chan ru roksinkil jalan chik li na’leb’ ut li tecnologia re xk’eeb’al xb’oqb’al li qas qiitz’in chi chalk ut chirilb’al, chi chalk ut chi tenq’ank, ut chi chalk ut chi kanaak.
Lix k’anjel, lix b’e
A’in lix k’anjel li Qaawa’. A’an nokoxb’oq chixb’aanunkil, ut maare jalan li tento taqab’aanu rik’in li xqab’aanu junxil.
Kik’ulman a’in rik’in laj Simon Pedro ut eb’ li tzolom li yookeb’ chi karib’k sa’ li palaw Tiberias.
“Maak’a’ ke’xchap chiru li q’ojyin a’an.
“Naq ak xsaqewk, koxxaqliiq li Jesus chire li ha’. …
“Ut a’an kixye reheb’: Kutomaq lee yooy chixk’atq li jukub’ chixjunpak’al sa’ lee nim, ut teetaw.”
Ke’xb’aanu chi jo’kan ut “ink’a’ chik neke’xkuy xkelonkil chaq xb’aan xk’ihal li kar.”10
Li Dios ak xk’utb’esi ut toj tixk’utb’esi lix nimajwal uq’. Taachalq li kutan naq too’iloq chi ixb’ej ut taqak’e reetal naq sa’ li ch’a’ajkil kutan a’in, li Dios yoo chaq chiqatenq’ankil re taqataw chan ru—jo’ naraj a’an—xkab’lankil li rawa’b’ejihom sa’ xb’een li kawil k’ojleb’aal.
Ninch’olob’ xyaalal naq a’in lix k’anjel li Dios ut naq a’an toj tixb’aanu k’iila k’anjel numtajenaq xninqaleb’ ru sa’ xyanqeb’ li ralal xk’ajol, a’ lix tenamit. Wanko sa’ ruq’ li Dios aj rahonel ut aj uxtaan.
Ninch’olob’ xyaalal naq li Awa’b’ej Russell M. Nelson, a’an lix profeet li Dios choq’ re li qakutan.
Jo’ x’apostol li Qaawa’, nekexinb’oq ut nekexwosob’tesi naq “chi sa eech’ool cheb’aanu chixjunil li k’a’aq re ru li naru cheru; toja’ ut naq texruuq chi xaqliik, chi anchal xkawilal eech’ool, re teeril lix kolb’a-ib’ li Dios, ut re taak’utb’esimanq lix tel.”11 Ut ninye naq li Qaawa’ tixk’e chi uxmank li k’a’ru numtajenaq xnimal ru sa’ xk’ab’a’ lee tiikil b’aanuhom. Sa’ xk’ab’a’ li Jesukristo, amen.