Li wank jo’ chanru a’an

Xb’aan li Elder Scott D. Whiting

Re li Setenta

Ka’ajwi’ chi tenq’anb’il xb’aan li Kolonel naru toowulaq chiqajunilo chi wank jo’ chanru a’an.

Us ta nokotzolok chi us chirix lix yu’am ut lix k’anjel li Jesukristo, li raatin li Kolonel naq toowanq “jo’ chanru ajwi’ a’an” ” ¹ chanchan ch’a’aj ut maare ink’a’ naru xb’aanunkil. Maare laa’ex, jo’ laa’in ajwi’, rik’in xnawb’al naq wan eemaak ut eemajelal, nekek’oxla naq mas sa wi’chik b’eek sa’ jun li b’e maak’a’ wi’ li tzuul, us ta rik’in a’an ink’a’ mas li k’iik nak’ulman. Maare naqaye, “Ch’olch’o naq li aatin a’in ink’a’ naru xpaab’ankil chi tz’aqal,” ut naqasik’ ru jun li b’e li moko ch’a’aj ta, sa’ li ink’a’ naniman wi’ li qametz’ew.

A’ut k’a’ru nak’ulman wi li wank “jo’ chanru ajwi’ a’an” maawa’ yal jaljookil ru aatin, us ta sa’ li yu’am a’in wanko? K’a’ru nak’ulman wi naru natawman, us ta chi yal b’ab’ay, sa’ li yu’am a’in, ut wi na’ajman ru re naq toowanq wi’chik rik’in a’an? K’a’ru nak’ulman wi li aatin “jo’ chanru ajwi’ laa’in” a’an tz’aqal li yoo chixyeeb’al li Kolonel? K’a’ru pe’ a’an chi jo’kan? K’a’ru wan qach’ool chixb’aanunkil re taa’ok lix sachb’a-ch’oolejil wankilal sa’ li qayu’am, re taaruuq taqajal chan ru tz’aqal naq wanko?

Li Elder Neal A. Maxwell kixye: “Naq naqak’oxla rix lix taqlahom li Jesus naq toowanq jo’ chanru a’an, naqak’e reetal naq li wanko wi’ moko maa’usilal ta, a’ut moko yalb’il ta qaq’e sa’ lix k’anjel, a’an ajwi’ li qak’anjel laa’o! Naqanima ru, a’ut ink’a’ naqak’am qib’ rik’in.” ² Jun saaj pastor, aj Charles M. Sheldon, kixye chi jo’ka’in: Sa’ li qawanjik jo’ aj taaqehom re li Kristo, wan naq naqara li hilank ut li sahilal, ut ink’a’ naqaj xpaqonkil li k’a’ru aal ut ch’a’aj jo’ jun li krus.” ³

A’b’anan, chiqajunilo taqlanb’ilo chi wank jo’ chanru li Jesus, jo’ naq li Jesus kiwan jo’ chanru li Yuwa’b’ej. ⁴ Naq nokob’eek chi uub’ej, noko’ok chi chaab’ilo’k, chi tz’aqlok qe qu. ⁵ Li na’leb’ a’in maawa’ yal xk’utum junaq ch’uut chi paab’aal, a’an tz’aqal xyehom li Qaawa’. A’ rik’in li na’leb’ a’in naq tento raj taqak’am li qayu’am, taqak’oxla li aatin taayeemanq, ut taqakawob’resi li wank sa’ komonil. Relik chi yaal naq maak’a’ chik junaq b’e re xb’anb’al xrahilal jun komonil malaj jun tenamit, ka’ajwi’ xk’amb’al qib’ rik’in li Awa’b’ej re Tuqtuukilal. ⁶

Qak’oxlahaq chan ru naq naru taqayal qaq’e, chi k’oxlanb’il ut chi na’leb’anb’il, re toowanq jo’ chanru li Jesukristo.

Rajb’al ut xk’eeb’al qach’ool

Wiib’ oxib’ chihab’ chaq, laa’in ut li wixaqil kiqak’e qach’ool chi taqsink sa’ xb’een li tzuul q’axal nim xteram sa’ Japon, a’an li tzuul Fuji nayeeman re. Naq koo’ok chi taqsink, kiqil chi najt lix b’een li tzuul, ut koo’ok chixk’oxlankil, ma taaruuq toowulaq aran?

Naq yooko chi taqsink, koo’ok chireek’ankil li lub’k, xrahil li qatib’el, ut xch’a’ajkil li musiq’ak, xb’aan naq q’axal taqenaq wanko. Sa’ li qak’a’uxl, ki’ajman ru naq yal taqak’oxla li yokb’ li wanko wi’ sa’ li hoonal a’an. Kiqaye, “Maare ink’a’ taaruuq tinwulaq toj sa’ xb’een li tzuul, a’ut naru ninb’aanu li jun yokb’ a’in.” Rik’in xnumik li hoonal, kiruhan xb’aanunkil li ch’a’ajkil taqsink—chi junjunq li yokb’.

Li xb’een yokb’ sa’ li b’e a’in re wulak jo’ chanru li Jesukristo, a’an rajb’al xb’aanunkil. Us xtawb’al ru li taqlahom naq toowanq jo’ chanru a’an, a’ut tento ajwi’ naq taqak’e qach’ool chixjalb’al qib’, chixk’eeb’al li junjunq chi yokb’ re xkanab’ankil chiqix li ruchich’och’il winq. ⁷ Re taawanq qajom chixb’aanunkil, tento taqanaw ani li Jesukristo. Tento taqanaw b’ayaq chan ru naq wan a’an, ⁸ ut tento taqasik’eb’ li chaab’ilal li wankeb’ re, sa’eb’ li loq’laj hu, sa’ li iglees, ut sa’eb’ chik li santil na’ajej. Naq noko’ok chixtawb’al chik qana’leb’ chirix a’an, taqil chi k’utunk lix jar chaab’ilal sa’ xyu’ameb’ li qas qiitz’in. A’in tooxtenq’a sa’ li qab’eenik, xb’aan naq wi eb’ li qakomon neke’ru chixtawb’al b’ayaq lix chaab’ilal li Jesus, naru ajwi’ naq laa’o taqab’aanu.

Wi ink’a’ naqatik’ti’i qib’ sa’ li qach’ool, lix saqen li Kristo ⁹ li wan qik’in tixye qe naq li b’ar wanko wi’, jalan rik’in lix chaab’ilal li Kolonel li naqaj wulak wi’. ¹⁰ Aajel ru naq ink’a’ taqatik’ti’i qib’ wi naqaj xik chi uub’ej re toowulaq jo’ chanru a’an. Ut xyeeb’al li yaal, a’an jun reheb’ lix chaab’ilal li Jesus.

Ut wi kaw qach’ool, maare taqaj xpatz’b’al re junaq qakomon, qasum, qamiiw, malaj jun aj b’eresinel sa’ li iglees k’a’ru junaq lix chaab’ilal li Jesukristo li toj naqaj ru xtawb’al—a’ut tento naq taawanq qach’ool chirab’inkil li k’a’ru tixye. Wan naq naqil qib’ jo’ sa’ junaq lem li k’onk’o, li naxnimob’resi malaj naxka’ch’inob’resi li qajalam-uuch.

Eb’ li qamiiw ut li qakomon neke’ru chiqatenq’ankil re taqil qib’ jo’ chanru tz’aqal wanko, a’ut eb’ ajwi’ a’an maare ink’a’ tz’aqal saqen neke’ilok. Xb’aan a’in, aajel ajwi’ ru naq taqapatz’ chiru li qaChoxahil Yuwa’ k’a’ru li namajelo’ qe, ut k’a’ru taqayal qaq’e chixb’aanunkil. A’an nokoril chi tz’aqal tz’aqal, ut rik’in rahok tixk’ut chiqu b’ar wan lix q’unal li qu. ¹¹ Maare rik’in a’an taatzol naq tento taasik’ chik mas li kuyum, li tuulanil, li rahok, li yo’onink, li sak’ahil, li chaab’ilal chi paab’ank, malaj k’a’aq chik re ru. ¹²

Wan k’a’ru xink’ul ink’a’ mas najter, naq jun aj b’eresinel sa’ li Iglees xye we chi ch’olch’o naq wan jun li chaab’ilal li toj na’ajman ru sa’ lin yu’am. Rik’in rahok, a’an xk’ut chiwu lin majelal. Sa’ li ewu a’an, xinye resil a’in re li wixaqil. Ut li wixaqil, rik’in ajwi’ rahok ut uxtaan, xye we naq yaal ajwi’ li xye. Li Santil Musiq’ej xk’ut ajwi’ chiwu naq li na’leb’ xe’xk’e we, chalenaq rik’in jun Choxahil Yuwa’b’ej aj rahonel.

Maare us ajwi’ choq’ qe xb’aanunkil li k’anjel re xsik’b’al lix chaab’ilal li Kristo, li natawman sa’ li ch’ol 6 re Predicad mi Evangelio. ¹³

Chirix naq xasik’ li yaal chawix ut xak’e aach’ool chixtikib’ankil li taqsink chiru li tzuul, taa’ajmanq ru naq taajal aak’a’uxl. Li Awa’b’ej Russell M. Nelson kixk’ut rik’in rahok: “Naq naqasik’ ru xjalb’al qak’a’uxl, naqasik’ ru jalaak. Naqakanab’ li Kolonel chiqajalb’al re naq laa’aqo li q’axal chaab’il li naru chiqu. Naqasik’ ru nimank sa’ musiq’ej ut xk’ulb’al li sahil ch’oolejil—li sahil ch’oolejil re toje’k qix xb’aan a’an. Naq naqasik’ ru xjalb’al qak’a’uxl, naqasik’ ru wank jo’ chanru li Jesukristo.” ¹⁴

Re toowanq jo’ chanru li Jesukristo, na’ajman ru xjalb’al li qach’ool ut li qak’a’uxl, na’ajman ru xjalb’al chan ru tz’aqal naq wanko, ut a’in ka’ajwi’ naru na’uxman rik’in li rusilal li Jesukristo. ¹⁵

Reetalinkil ut xb’aanunkil

Anajwan, chirix naq xak’e aach’ool chi jalaak ut xasik’ aatenq’ankil rik’in li tijok, rik’in xsik’b’al li yaal chawix, ut maare rik’in patz’ok reheb’ aakomon, na’ajman ru naq taasik’ ru junaq xchaab’ilal li Kristo li taayal aaq’e chixk’ulb’al. Aajel ru naq taayal aaq’e chi tz’aqal chixb’aanunkil. Eb’ li chaab’ilal a’in ch’a’aj xk’ulb’aleb’ ut ink’a’ neke’chal sa’ junpaat, a’ut timil timil te’chalq wi yalb’il li qaq’e.

Eb’ lix chaab’ilal li Kristo a’aneb’ maatan k’eeb’ileb’ xb’aan li qaChoxahil Yuwa’ re qosob’tesinkil laa’o ut eb’ li wankeb’ chiqasutam. Xb’aan a’in, re xk’ulb’aleb’ tento taqatz’aama chi anchal qach’ool chiru li Dios naq tixk’e qatenq’ankil. Wi naqasik’eb’ li chaab’ilal a’in re k’anjelak chiruheb’ li qas qiitz’in, a’an toorosob’tesi sa’ li k’a’ru naqasik’. Wi naqasik’ junaq maatan rik’in li Dios yal choq’ qe laa’o, yal sachk naqab’aanu.

Wi nakayal aaq’e chixk’ulb’al jun lix chaab’ilal li Kristo, naq nakak’ul li chaab’ilal a’an, jalaneb’ chik li chaab’ilal te’ok ajwi’ chi chalk. Ma ink’a’ yaal naq li ani yoo chixsik’b’al li rahok taanimanq ajwi’ lix chaab’ilal xch’ool, ut lix tuulanil? Ma ink’a’ yaal naq li ani yoo chixsik’b’al li paab’ank taanimanq ajwi’ sa’ li sak’ahil ut li yo’onink? Wi naqayal aaq’e chixtawb’al jun li chaab’ilal, naru neke’tam chawu chixjunileb’ chik li chaab’ilal.

Xtz’iib’ankil resil ut kanaak sa’ xb’aanunkil

Aajel ru choq’ we naq sa’ xyalb’al inq’e chi wank jo’ chanru li Kristo, tintz’iib’a resil li k’a’ru yookin chixtzolb’al. Naq nintzolok chirix jun lix chaab’ilal li Kristo rik’in xchamal ink’a’uxl, eb’ li loq’laj hu neke’ak’ob’resiik chiwu naq nawil reetalil li chaab’ilal a’an sa’ lix tzol’leb’ li Kristo, sa’ lix k’anjel, ut sa’eb’ lix tzolom. Jo’kan ajwi’ ninyal inq’e chirilb’al li chaab’ilal a’an rik’ineb’ li was wiitz’in. Wankeb’ ani nekeb’innaw ru, li wankeb’ sa’ li Iglees jo’ ajwi’ li moko wankeb’ ta, li wankeb’ xchaab’ilal jo’ chanru xchaab’ilal li Kristo. Eb’ a’an neke’xk’ut chiwu rik’in kawilal chan ru naq eb’ li chaab’ilal a’in naru neke’wan rik’ineb’ li winq xb’aan li rusilal ut lix rahom.

Re taaruuq tat-usaaq chi yaal, tento naq ink’a’ taakanab’ xyalb’al aaq’e. Jo’ chanru naq re taqsink chiru jun nimla tzuul na’ajman ru xkawresinkil aawib’ xb’een wa, ut xyalb’al aaq’e naq yookat chi taqsink, jo’kan ajwi’ a’in xyalb’al aaq’e naraj. Re xtawb’al li tz’aqal Kristianil li naqasik’, a’an li wank jo’ li qaKolonel, junelik na’ajman ru naq tz’aqal yalb’ilaq qaq’e. ¹⁶

Anajwan, nawaj naq teeb’aanu weent. Moko k’eeb’il ta li taqlahom a’in re wank jo’ chanru a’an re taaweek’a naq wan aamaak, naq maak’a’ aak’ulub’, malaj naq moko raab’ilat ta. Wanko arin sa’ ruchich’och’ re tooxik chi uub’ej, re taqayal qaq’e, ut wan naq toot’ane’q ut wan naq us too’elq. Jo’ laa’in ut li wixaqil naq xootaqsink chiru li nimla tzuul, maare kiqaj raj naq yal sa’ junpaat k’amb’ilaqo toj sa’ xb’een, a’b’anan a’in maawa’ li ajom wanko wi’ sa’ li yu’am a’in.

Laa’at wan aachaab’ilal, laa’at raab’ilat, a’ut a’in ink’a’ naraj naxye naq tz’aqlojenaq aawe aawu. Toj wan li k’anjel tento taqab’aanu sa’ li yu’am a’in ut sa’ li yu’am chalel. Ka’ajwi’ chi tenq’anb’il xb’aan li Dios naru toowulaq chiqajunilo chi wank jo’ chanru li Kristo.

Sa’eb’ li kutan a’in naq chanchan naq “chixjunil li k’a’aq re ru wan chi choqinb’il, ut … nachal li xiw sa’ xb’eeneb’ chixjunil li tenamit,” ¹⁷ jun ajwi’ li b’an wan, jun ajwi’ li taak’irtesinq, a’an naq taqayal qaq’e chi wank jo’ chanru li Kolonel, ¹⁸ laj Tojol rix ¹⁹ chixjunileb’ li winq, lix saqenkil li ruchich’och’, ²⁰ ut taqasik’ jilok rik’in li ani kixye, “Laa’in li b’e.” ²¹

Ninnaw naq chi tenq’anb’il xb’aan li Dios ut lix nimal xmetz’ew, naru toowanq jo’ chanru a’an. Wi ta ink’a’ jo’kan, ink’a’ raj kixk’e qe li taqlahom a’in. ²² Ninnaw naq yaal a’in—ut nawil lix chaab’ilal li Kristo rik’in naab’al eere. Ninch’olob’ xyaalal eere li na’leb’ a’in, sa’ xk’ab’a’ li Jesukristo, amen.