saaj ixq nase’ek

28 agosto

Chan ru naq li Kolonel tinixtenq’a sa’ inch’a’ajkilal?

Salmos 102–103; 110; 116–119; 127–128; 135–139; 146–150

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. Ma wan li toje’ xqak’ul li xooxnach’ob’resi rik’in li qaChoxahil Yuwa’ ut li Jesukristo?

• Rilb’aleb’ li wankeb’ sa’ rajb’al ru. Ma wan ani toje’ x’ok sa’ li qateep malaj x’ok sa’ li Iglees? Chan ru taqak’e xsahileb’ xch’ool?

• Xb’oqb’aleb’ chixjunil chixk’ulb’al li evangelio. K’a’ruheb’ li kok’ k’anjel chalkeb’ re, b’ar wi’ naru taqab’oqeb’ li qamiiw chi tz’aqonk?

• Xjunajinkileb’ li junkab’al chi junelik. K’a’ru naru taqab’aanu re xtz’iib’ankil resil li qayu’am?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Eb’ li qach’a’ajkilal naru nokohe’xk’e chi luktaak, josq’o’k, tawasiik, ut chireek’ankil naq qajunes wanko. Eb’ laj tz’iib’ahom re li hu Salmos ke’xtaw ruheb’ li eek’ahom a’an, ut ke’xyaab’asiheb’ rik’in anchalil ch’oolej: “Li waam teninb’il aj chik, nachaqik kama’ li pim; … Nintz’uynak, chanchanin li junaatalil xul sa’ xb’een li kab’l” (Salmos 102:5, 8). A’b’an, chi anchaleb’ ajwi’ xch’ool, ke’xch’olob’ xyaalal naq xsik’b’al li Qaawa’ naxtuqub’ li qaam: “Tinnima ru li Qaawa’ chi anchal lin ch’ool, ut ink’a’ taasachq sa’ li waam chixjunil li rusilal. A’an nakuyuk re chixjunil lin maak ut naxk’irtesi chixjunil lin yajel; narisi lin yu’am sa’ ruq’ li kamk ut naxhoy sa’ inb’een li rusilal ut ruxtaanal” (Salmos 103:2–4).

K’oxla chan ru naq te’osob’tesiiq li saaj naq neke’ok chixtawb’al ru chan ru naq li Kolonel naru tixtenq’aheb’ sa’ xch’a’ajkilaleb’. Chan ru naq xatxtenq’a li Kolonel? Naq nakakawresi li tzolok, naru taawil li raatin li Awa’b’ej Henry B. Eyring, “Tooyale’q, taqayal qix, ut toochaab’ilo’q” (Jolomil ch’utub’aj-ib’ re octubre 2020), ut “Adversidad” sa’ Temas del Evangelio (topics.ChurchofJesusChrist.org).

li ch’utub’aj-ib’ choq’ reheb’ li saaj

Li Kolonel naru tixk’ojob’ qach’ool sa’ li qach’a’ajkilal.

Tzolok sa’ komonil

Naru taapatz’ reheb’ li saaj naq te’ril Salmos 102, 103, ut 116, ut naq te’xsik’ chan ru naq li Kolonel nokoxtenq’a chixq’axb’al ru li qach’a’ajkilal. Naru te’k’anjelaq sa’ junesal malaj sa’ kok’ ch’uut re xtz’iib’ankil k’a’ru xe’xtaw, toja’ naq te’xwotz k’a’ru xe’xtz’iib’a. Sik’ jun malaj wiib’ oxib’ reheb’ li kok’ k’anjel a’in re xtenq’ankileb’ chixtawb’al ru li na’leb’ a’in chi us.

• Eb’ li b’ich naru neke’xb’oq li Musiq’ej ut neke’xk’ut li tzol’leb’ rik’in wankilal. Naru teetz’il rix jun li b’ich chirix li Kolonel ut li tenq’ naxk’e qe sa’ qach’a’ajkilal, maare “Kawil k’ojleb’aal,” (Eb’ li B’ich, 45). K’a’ru naxk’ut li b’ich chirix li tenq’ naxk’e li Kolonel? Toja’ naq li saaj naru te’rileb’ li raqal sa’ “Xkomon chik li tenq’.” Maare taawulaq chiruheb’ xtz’iib’ankil jun aatin re li b’ich malaj li loq’laj hu li naxjultika reheb’ naq te’xsik’ li Kolonel naq wankeb’ xch’a’ajkilal.

• Li raatin li Awa’b’ej Henry B. Eyring, “Tooyale’q, taqayal qix, ut toochaab’ilo’q,” naru tixtenq’aheb’ li saaj chixtawb’al ruheb’ li patz’om a’in: K’a’ru aj-e li yale’k-ix naqak’ul sa’ li yu’am a’in? Chan ru naq tooxtenq’a li Kolonel sa’ li qach’a’ajkilal? K’a’ru naru taqab’aanu re roksinkil lix tenq’ ut lix wankil li Kolonel? Naru taatz’iib’aheb’ li patz’om a’an chiru li pizarron. Eb’ li saaj naru te’xsik’ xsumenkileb’ sa’ li raatin li Awa’b’ej Eyring. K’a’ru naqatzol sa’ li naxseraq’i li Awa’b’ej Eyring chirix lix na’ sa’ xtiklajik ut xraqik li raatin? Naru taapatz’ reheb’ li saaj naq te’xk’oxla chan ru naq te’xk’anjela li xe’xtzol sa’eb’ lix ch’a’ajkilal. Maare wankeb’ li saaj li te’raj xwotzb’al xna’leb’.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Isaias 53:3–5; Hebreos 2:17–18; Alma 7:11–13; 36:3; Eter 12:27 (Li Kolonel tooxtenq’a sa’ li qach’a’ajkilal)

• Dieter F. Uchtdorf, “Li Dios tixb’aanu li k’a’ru numtajenaq xnimal ru,” Jolomil ch’utub’aj-ib’ re octubre 2020

• Cristina B. Franco, “Lix wankilal li Jesukristo re k’irtesink,” Jolomil ch’utub’aj-ib’ re octubre 2020

• “Montañas que ascender” (video), ChurchofJesusChrist.org

Li k’utuk jo’ li Kolonel

“Rik’ineb’ li patz’om li neke’xwaklesi xch’ooleb’ li komon sa’ li tzoleb’aal chixwotzb’al xnawomeb’ xch’ool chirix li na’leb’ li yoo chi k’utmank, naru nab’oqman li Musiq’ej rik’in wankilal. … Eb’ lix nawomeb’ xch’ool—ut lix nawomeb’ xch’ool xkomoneb’ chik sa’ li tzoleb’aal—te’nimanq naq li Musiq’ej naxch’olob’ xyaalal li yaal” (Li k’utuk jo’ li Kolonel, 32).