Juļae 10

Etke Ej Aorōk n̄an Ļoor Rikanaan ro Remour an Anij?

2 Kiin̄ Ro 2–7

Ko̧o̧njeļ Ippān Doon

Kar tōl jān eo juon uwaan būreejtōnji eo an doulul eo ak kūlaaj eo; 10–20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ ro ak Unin Tōl eo an Doulul eo an Priesthood eo an Aron. Innem tōl juon iien ekōnono kōn jerbal in lo̧mo̧o̧r im mour eo eaibojooj ijo eutiejtata ilo am̧ kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe Eļap, 10.2, 11.2, ChurchofJesusChrist.org). Karōk wāween ko n̄an kōm̧m̧ane ta eo kom̧ij kōnono kake.

• Mour kōn gospel eo. Ta eo bisoprik ro rekar kōnono kaki ilo kweilo̧k ko an ko̧o̧njeļ eo an jodikdik an ward eo ad? Ta kōm̧m̧an ko jemaron̄ bōki pedped ioon ta ko kar ekkōnono?

• Kea kōn ro rej pād ilo aikuj. Ekōjkan ad maron̄ pukōtļo̧k armej ro ilo wāween ko āinwōt an Kraist n̄e jej lo juon aikuj im jab jeļā ta eo n̄an ba?

• Karuwaineneik aolep n̄an bōk gospel eo. Ta men eo jej loe ilo gospel eo an Jisōs Kraist me ej bōktok n̄an kōj lan̄lōn̄? Ewi wāween ad jeere lan̄lōn̄ in n̄an ro jet?

• Kobaik baam̧le ko n̄an indeeo. Ta jet iaan wāween ko emaron̄ em̧m̧anļo̧k ad ekkejel ippān ro uwaan baam̧le eo, ro āinwōt ro jibūd im jim̧m̧aad im ro rilikiid?

Ilo jem̧ļo̧kin katak in, n̄e ekkar, kōm̧m̧an men kein:

• Kam̧ool kōn pedped in katak ko kar katakin kaki.

• Kakeememej ro uwaan kūlaaj eo ak doulul eo kōn karōk im kūr ko me kar kōm̧m̧ane ilo iien kweilo̧k eo.

Katakin Katak eo

Kar tōl jān juon ritōl erūtto ak jodikdik; 25–35 minit ko

Kōpooj Eok Make ilo Jetōb

Emaron̄ wōr jidikin Neaman rileper eo ilo kōjwōj aolep (lale 2 Kiin̄ Ro 5:1–15). Āinwōt Neaman, eo ekar illu ke rikanaan Ilaisha ekar ba n̄an e n̄an kwaļ pein ilo juon reba bwe en mour, jemaron̄ jab aolep iien meļeļe kōn un ko n̄an kapilōk ko an rikanaan ro ad. Jemaron̄ ļōmņak bwe jet iaan kapilōk ko jejjab meļeļe kaki im kōn menin jejjab mour kaki. Ak Anij ekar kallim̧ur kōn kōjeraam̧m̧an ko reļļap eļan̄n̄e jenej ettā n̄an ļoor rikanaan eo (lale Katak im Bujen Ko 21:4–7). Ewi wāween ilo am̧ kar ļoor rikanaan eo kar jipan̄ eok epaakeļo̧k Irooj? Ta waanjon̄ak ko jet jān 2 Kiin̄ Ro 4–6 rej kwaļo̧k wāween ad kar jeraam̧m̧aan ilo ad ļoor rikanaan ro remour?

Ilo am̧ kōppopo n̄an katakin kōn kōjeraam̧m̧an ko me rej itok jān ļoor rikanaan eo emour, ļōmņak kōn apan̄ ko me jodikdik ro rej jelm̧ae. Ewi wāween ilo aer ļoor rikanaan eo jipan̄ er kōn apan̄ kein? Kwomaron̄ bar riiti ennaan eo an Elder Neil L. Andersen “Rikanaan eo an Anij” (Liaona, Māe 2018, 24–27) ak ennaan eo an Elder L. Whitney Clayton “Men eo Jabdewōt Ej ba n̄an Kom̧, Kom̧win Kōm̧m̧ane” (Liaona, Māe 2017, 97–99).

Ļoor rikanaan eo emaron̄ jipan̄ rūm̧m̧an ded ro kōn apan̄ ko rej jelm̧aeiki.

Ekkatak Ippān Doon

N̄an jino juon ijjino, kwomaron̄ kajjitōk ippān kajjojo uwaan kūlaaj ak doulul eo (ak kurup jiddik ko) n̄an etale juon iaan bwebwenato kein rej elaajrak: 2 Kiin̄ Ro 4:1–7; 5:6–14; 6:8, 13–17. Kajjitōk ippāer n̄an kappukot juon men eo ej im̧we er n̄an riit im ļoor katak ko an rikanaan im rijilōk ro an raan kein. Ālkin an kajjojo kurup kwaļo̧k juon men rekar loe, kwomaron̄ kajjitōkin jejjo jodikdik ro n̄an kadedeikļo̧k jentōj in: “N̄e ij ļoor rikanaan ro remour im rijilōk ro, Ij …” N̄an wōnm̧aanļo̧k wōt kōn juon ekkōnono kōn rikanaan ro remour, kālet juon ak elōn̄ iaan itia kein rej elaajrak.

• Kōnke rikanaan ro remour rej pād wōt ilo Kabun̄ eo an Irooj me em̧ōj an jepļaaktok, ro uwaan kūlaaj ak doulul eo am̧ emaron̄ wōr aer iien em̧m̧an n̄an uwaak kajjitōk ko jet kōn rikanaan ro remour. Kwomaron̄ je ioon bo̧o̧t eo kajjitōk kein rej elaajrak me emaron̄ kar wōr an armej kōn rikanaan ro remour: Etke ewōr ami juon rikanaan? Ewi wāween aer kālet juon rikanaan? Ewi wāween am̧ jeļā bwe rikanaan eo ekar lukkuun kōnono ilo etan Anij? Jodikdik ro remaron̄ kappukot uwaak ko n̄an kajjitōk kein ilo kein jipan̄ ko me rej pād ium̧win “Supporting Resources.” Remaron̄ kaminene uwaaki kajjitōk kein im ko jet me ewōr ippāer ilo aer kōjerbal m̧ool ko me rekar loi im ļōmņak kab en̄jake ko aer make.

• Ewi wāween an naan ko an rikanaan ro remour jipan̄ kōj n̄e jej jelm̧aeiki idajon̄jon̄ ko ad make? N̄an jipan̄ jodikdik ro uwaake kajjitōk in, kwomaron̄ karuwaineneik er n̄an kōlaajraki ioon boot eo jet iaan kapilōk ko im kajjitōk ko me rikanaan eo ekar kajjitōk bwe jen kōm̧m̧ani ilo iien kweilo̧k ko reļļap rej kab jem̧ļo̧kļo̧k. Ta eo jekar kōm̧m̧ane n̄an kōm̧m̧an ekkar n̄an kapilōk kab kajjitōk ko an? Ta oktak ko em̧ōj ad loi ilo mour ko ad kōn wōt kijejeto kein? Kwomaron̄ karuwaineneik juon armej n̄an kwaļo̧k en̄jake eo an make eo kōn an kapilōk eo an rikanaan eo kar jipan̄ e kōn juon idajon̄jon̄ an make.

• Ewi wāween am̧ jipan̄ ro kwoj katakin er meļeļe bwe ļoor rikanaan eo enaaj jipan̄ er epaake ļo̧k Rilo̧mo̧o̧r? Juon wāween ej n̄an leļo̧k n̄an er juon kaat jidikdik im karuwaineneik er n̄an riiti m̧ōttan ko ilo ennaan eo an Elder Neil L. Andersen “Rikanaan eo an Anij.” Remaron̄ je ioon juon jait ilo kaat eo juon me rekar ekkatak kōn wāween an rikanaan eo maron̄ jipan̄ er epaake ļo̧k Kraist. Ilo bar jait eo juon ilo kaat eo, remaron̄ je juon me kar im̧we er n̄an kōm̧m̧ane n̄an ļoor rikanaan eo. Kajjitōk ippāer n̄an kwaļo̧k ta eo rekar je.

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbali im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Amos 3:7; Katak im Bujen Ko 1:4, 37–38; Moses 6:26–27, 32–36; Gospel Topics, “Prophets,” topics.ChurchofJesusChrist.org; “Why Do We Have Prophets?” (pija in alooj eo), ChurchofJesusChrist.org (Why we have prophets)

• Gary E. Stevenson, “Būruwōn Juon Rikanaan,” Liaona, Māe 2018, 17–20 (Ewi wāween aer kālet juon rikanaan)

Teaching in the Savior’s Way

“M̧ool in oktak ekoba eļapļo̧k jān baj en̄jake an Jetōb eo kapen m̧ool eo n̄an jetōb ko ad; jej aikuj barāinwōt jerbale m̧oo ko. Ilo kakobaba n̄an jipan̄ rūkkatak ro en̄jake im kile Jetōb eo, jipan̄ er jerbale im̧we ko rej būki” (Teaching in the Savior’s Way, 10).