Juļae 24

Ta Kōjeraam̧m̧an ko Rej Itok jān Ad Bōk Kain̄i ko an Tampeļ?

Ezra 1; 3–7; Nihimaia 2; 4–6; 8

Ko̧o̧njeļ Ippān Doon

Kar tōl jān juon uwaan būreejtōnji eo an doulul eo ak kūlaaj eo; 10–-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ ro ak Unin Tōl eo an Doulul eo an Priesthood eo an Aron. Innām tōl juon iien ekōnono kōn jerbal in lo̧mo̧o̧r eo im mour ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe, 10.2, 11.2, ChurchofJesusChrist.org). Karōk wāween ko n̄an jerbali ta eo kom̧ kar kōnono kake.

• Mour kōn gospel eo. Ekōjkan ad en̄jake pein Irooj ilo mour ko ad?

• Kea kōn ro rej pād ilo aikuj. Ewi wāween ad rie doon ilo men ko jej dibuki?

• Karuwaineneik aolep n̄an bōk gospel eo. Ewi wāween an em̧m̧anļo̧k ad kōjerbal technology āinwōt juon kein jerbal n̄an kwaļo̧k gospel eo?

• Kobaik baam̧le ko n̄an indeeo. Ta eo jej kōm̧m̧ane n̄an jipan̄ baam̧le ko ad itok n̄an Kraist?

Ilo jem̧ļo̧kin katak in, n̄e ekkar, kōm̧m̧an laajrak in:

• Kam̧ool kōn katak ko kar katakin kaki.

• Kakeememej ro uwaan doulul eo ak kūlaaj eo kōn karōk im kajjitōk ko n̄an kōm̧m̧ani ko me kar kōm̧m̧ani ilo iien kweilo̧k eo.

Katakin Katak eo

Kar tōl jān juon ritōl erūtto ak jodikdik; 25–35 minit ko

Kōpooj Eok Make ilo Jetōb

Ke Riju ro rekar kam̧akoko ilo Babilon, rekar lo an jorrāān Jerusalem im tampeļ eo ie (lale 2 Kiin̄ Ro 25:1–10; 2 Kronikles 36:17–19). Eto an armej ro kōņaan bar kalōk tampeļ eo. Kōn menin, ilo juon iien ekadu, rekar jino bar kalōk im lan̄lōn̄ ke tampeļ eo ekar dedeļo̧k (lale Ezra 3:8–13; 6:16–22). Rainin, āinwōt armej in bujen ro an Anij, jej barāinwōt kalōk tampeļ im lan̄lōn̄ n̄e juon tampeļ ej tin ekkal. Etke? Kōnke kain̄i ko an tampeļ rej tōlļo̧k n̄an kōjeraam̧m̧an ko reļļap an Jemedwōj Ilan̄. Rej letok n̄an kōj kajoor ilo jetōb. Rej letok n̄an kōj tōl. Im rej jipan̄ kōj erom̧ āinwōt Anij im bōk aolep men ko ewōr Ippān. (Lale Katak im Bujen Ko 84:19–22; 109:22–26.)

Ewi wāween am̧ jipan̄ jodikdik ro kijorjor tampeļ eo āinwōt kar Risrael ro? Ewi wāween am̧ jipan̄ er ikdeleel kōn aolepān būruweer n̄an kōm̧m̧an bujen ko ippān Anij ilo m̧weo Imōn ekwojarjar? Ilo am̧ m̧aajabpopo n̄an katakin, ļōmņak in ekkatak kōn ennaan eo an Būreejtōn Thomas S. Monson “Kōjeraam̧m̧an ko an Tampeļ” (Liahona, Māe 2015, 91–93) im bwebwenato eo “Why Ordinances and Covenants Matter” at temples.ChurchofJesusChrist.org.

Kain̄i ko an tampeļ rej jipan̄ kōj erom̧ āinwōt Anij im bōk aolep men ko ewōr Ippān.

Ekkatak Ippān Doon

N̄an jipan̄ ro uwaan kūlaaj eo erreim̧aanļo̧k n̄an kōjeraam̧m̧an ko me remaron̄ bōki jān kain̄i ko an tampeļ, kwomaron̄ karuwaineneik er n̄an lale Ezra 3:10–13; 6:16, 21–22. Kajjitōk ippān n̄an kwaļo̧k naan ko im jentōj ko me rej kwaļo̧k kōn ewi wāween an riju ro etto kar en̄jake kōn bar kalōk tampeļ eo. Etke ekkal juon tampeļ ej juon men n̄an kam̧ōņōņō kake? Ewi wāween an tampeļ ko ad im jerbal eo jej kōm̧m̧ane ilowaan jipan̄ kōj epaakeļo̧k Rilo̧mo̧o̧r eo? Erkein rej jet iaan ļōmņak ko me remaron̄ jipan̄ jodikdik ro bwe en meļeļe kōn kōjeraam̧m̧an ko remaron̄ bōki ilo tampeļ eo.

• Ke Josep Smith ekar aje Kirtland Tampeļ, ekar jar in kōjeraam̧m̧ane eo me epād ilo Katak im Bujen Ko 109. Jar in ej kōmeļeļeiki elōn̄ kōjeraam̧m̧an ko me jemaron̄ bōki kōn kain̄i ko an tampeļ. Ro uwaan kūlaaj ak doulul eo remaron̄ kappukot m̧ōttan ko ilo jar in, eļaptata eoon ko 12–26, kappukot kōjeraam̧m̧an ko me Josep Smith ekar jar kaki. Remaron̄ bar kōllaajrake kōjeraam̧m̧an kein ioon boot eo. Kwomaron̄ kajjitōk ippān jodikdik ro n̄an kōmeļeļeik wāween an kajjojo kōjeraam̧m̧an kein maron̄ kōkajoorļo̧k er kiiō im ilju im jekļaj. Kwaļo̧k am̧ naan in kam̧ool kōn kōjeraam̧man ko me rekar bōki kōn kain̄i ko an tampeļ.

• N̄an jipan̄ ro uwaan kūlaaj eo ak doulul eo kwaļo̧k en̄jake ko aer kōn tampeļ, kajjitōk ippāer n̄an kadedeikļo̧k jentōj in: “N̄e ij ļōmņak kōn tampeļ eo, Ij en̄jake …” Kwomaron̄ karuwaineneik er n̄an riiti pārokūrāāp ko lalem jinointata ilo ennaan eo an Elder Kent F. Richards “Kajoor eo an Anij” (Liaona, Māe 2016, 118–20). Etke jej aikuj tampeļ eļapļo̧k jān jabdewōt men ko? Ta eo jej ekkatak kōn kajoor eo me Anij ej letok n̄an kōj kōn kain̄i ko an tampeļ? Innem jodikdik ro rej ekkatak aolep ennaan eo an Elder Richard, kappukot kōjeraam̧m̧an ko me rej itok n̄an kōj ilo ad bōk koņaad ilo kain̄i ko an tampeļ. Ak remaron̄ kappukot kōjeraam̧m̧an kein ilo ennaan eo an Būreejtōn Thomas S. Monson’s message “Kōjeraam̧m̧an ko an Tampeļ.”

• N̄an jipan̄ ro uwaan kūlaaj ak doulul eo kejōkļo̧kjeņ kōn kaarmejete ko me jet iaaer emōj aer ikdeleel n̄an kōm̧m̧an im bōk kain̄i ko an tampeļ, kwomaron̄ kwaļo̧k pija in alooj eo “Temples Are a Beacon” (ChurchofJesusChrist.org). Etke Mou Tham family rekar kōņaan kōm̧m̧an kaarmejet eļap n̄an etal n̄an tampeļ? (Bar lale Thomas S. Monson, “The Holy Temple—a Beacon to the World,” Liaona, Māe 2011, 90–94.) Ta kaarmejete ko jej kōm̧m̧ani n̄an bōk kōjeraam̧m̧an ko an tampeļ? Bolen juon armej eo ej kab tin deļo̧n̄e tampeļ emaron̄ kobaļo̧k ilo kweilo̧k eo im kwaļo̧k en̄jake eo an make. Kwomaron̄ karuwaineneik jodikdik ro n̄an ekkatak ennaan eo an Elder Ronald A. Rasband “Mālim eo n̄an Irooj” (Liaona, Nob. 2020, 22–25) im kwaļo̧k kōjeram̧m̧an ko rej itok jān ad kabwijer peba in mālim n̄an deļo̧n̄e tampeļ eo. Kwomaron̄ etale kajjitōk ko ippān doon n̄an kabwijer peba in mālim n̄an deļo̧n̄e tampeļ (lale Russell M. Nelson, “Naan in Ikkilōk ko,” Liaona, Nob. 2019, 120–22).

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbali im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Quentin L. Cook, “Lo Eok Make ilo Tampeļ eo,” Liaona, Māe 2016, 97–100

Teaching in the Savior’s Way

“Ilo am̧ katakin, ijello̧kin baj kwaļo̧k wōt meļeļe eo, jipan̄ jodikdik ro lo m̧ool ko an gospel eo kōn er make ilo jeje ko rekwojarjar im naan ko an rikanaan ro” (Teaching in the Savior’s Way, 28).