Kōjeram̧m̧an ko an Tampeļ
Jān Būreejtōn Thomas S. Monson
Ilo ad pād ilo tampeļ eo, ijeņ ej itok n̄an kōj juon jon̄ak in jetōb im juon en̄jake in aenōm̧m̧an.
Ro jeiū im jatū jitōnbōro, eļap aō kam̧m̧oolol bwe imaron̄ pād ippāmi ilo jibbon̄ in Ijtō in eaiboojoj ilo an ļōmņak ko ad oktakļo̧k n̄an Rilo̧mo̧o̧r eo an laļ in. Ij lewaj aō iakwe im iakiakwe n̄an kom̧ kajjojo im ij jar bwe Jemedwōj Ilan̄ enaaj im̧we naan ko aō.
Kweilo̧k in ej kōkkaļļeik jiljilimjuon iiō ko jān iien eo kar rejtake eō āinwōt Būreejtōn eo an Kabun̄ in. Rekar jet iiō ko reboub, rekar jab obrak wōt kōn apan̄ ko, ak rekar barāinwōt obrak kōn kōjeram̧m̧an ko ijjab maron̄ bwini. Ilubwilijin kōjeram̧m̧an kein eļap aer kam̧ōņōņō im ekwojarjar, rekar jet iien ko rem̧m̧an ilo aō kar aje im bar aje tampeļ ko.
Eo ej kab jem̧ļo̧kļo̧k, Nobōm̧ba eo ļo̧k, ekar aō jeram̧m̧an n̄an aō bar aje Tampeļ eo ekāāl im aiboojoj ilo Phoenix Arizona. Kar kobatok ippa Būreejtōn Dieter F. Uchtdorf, Elder Dallin H. Oaks, Elder Richard J. Maynes, Elder Lynn G. Robbins, im Elder Kent F. Richards. Joteen eo m̧okta jān aje eo, juon iien ekam̧ōņōņō ekabwilōn̄lōn̄ ikkijien m̧anit eo ekar kōm̧m̧an ijo ekar lōn̄ļo̧k jān 4,000 jodikdik ro nejid jān tampeļ disrict eo me ekanooj kar aiboojoj aer ikkure.
Ekkal an tampeļ ko ej juon kōkkaļļe elukkuun alikkar kōn eddōkļo̧k eo an Kabun̄ in. Ewōr ippād ilo tōre in 144 tampeļ ko rej jerbal ipeļaakin laļ in, ekoba 5 emōj kōkāāli im 13 rej pād ilo jerbal in ekkal. Ilo kakkobaba, 13 tampeļ ko me emōj kōjjeļļā kaki m̧oktaļo̧k repād ilo elōn̄ jekjek ko n̄an kōbpopo m̧okta jān an jerbal in ekkaļ ko ijjino. Iiō in jej kōtmāne n̄an bar aje 2 tampeļ ko im aje 5 tampeļ ko rekāāl ko emōj jikejuuļi aer dedeļo̧k.
Ium̧win ruo iiō ko rem̧ootļo̧k, ilo ad leļo̧k ad aolep ad kijejeto n̄an kadedeļo̧k tampeļ ko me emōj kōjjeļļā kaki m̧oktaļo̧k, jaar bōjrak jiddik n̄an karōk ko n̄an elōn̄ elōn̄ bar tampeļ ko. Jibbon̄ in, kōn menin, ij m̧ōņōņō in kōjjeļļā kōn jilu tampeļ ko rōkāāl, ko renaaj ekkal ilo jikin kein rej ellaajrak: Abidjan, Ivory Cost; Port-au-Prince, Haiti; im Bangkok, Thailand. Ej lukkuun kōjeram̧m̧an ko rekabwilōn̄lōn̄ im repād n̄an membōr ro ad retiljek ilo eria kein im, em̧ool, jekdo̧o̧n ia eo tampeļ ko rej pād ie ipeļaakin laļ.
Wāween jerbal eo n̄an ņamejļan aikuj ko im pukōt jikin ko n̄an bar elōn̄ļo̧k tampeļ ko ej wōnm̧aanļo̧k wōt, kōnke jekōņaan bwe en lōn̄ļo̧k membōr ro n̄e ekkar bwe en wōr juon aer iien em̧m̧an n̄an pād ilo tampeļ ilo aer jab aikuj kōm̧m̧an kaarmejet ko reļļap kōn iien im jeram̧m̧an ko. Āinwōt ad kar kōm̧m̧ane m̧oktakļo̧k, jenaaj karon̄ kom̧ n̄e kālet ko emōj errā kaki ilo wāween in.
Ilo aō kōļmenļo̧kjeņ kōn tampeļ ko, ļōmņak ko aō rej oktakļo̧k n̄an elōn̄ kōjeram̧m̧an ko jej būki ilowaer. Ilo ad deļo̧n̄e kōjem̧ in tampeļ eo, jej likūt itulikid m̧ad ko im poktak ko an laļ in. Ilowaan im̧wiin ekwojarjar, jej loe aiboojojo im kōllaajrak ko. Ewōr kakkije n̄an jetōb ko ad im juon deoor jān kōjparok an mour ko ad.
Ilo ad pād ilo tampeļ eo, ijeņ emaron̄ itok n̄an kōj juon jon̄ak in jetōb im juon en̄jake in aenōm̧m̧an eo enaaj maron̄ ļapļo̧k jān jabdewōt bar en̄jake ko remaron̄ itok n̄an būruwōn armej. Jenaaj meļeļe meļeļe eo em̧ool an naan ko an Rilo̧mo̧o̧r eo ke Ekar ba: “Aenōm̧m̧an Ij likūt ņa ippemi, Aō aenōm̧m̧an Ij lewōj n̄an kom̧. … En jab pok būruemi jab lōļn̄o̧n̄.”1
Kain aenōm̧m̧an in emaron̄ kobrak jabdewōt bōro—bōro ko rej inepata, bōro ko rej eddo kōn liajļōļ, bōro ko repoktak, bōro ko me rej akweļap kōn jipan̄.
Ij kab jeļā kōn juon likao ekar pād ilo tampeļ eo kōn juon bōro eo me ej akweļap kōn jipan̄. Elōn̄ allōn̄ ko m̧oktaļo̧k ke ekar bōk kūr eo an n̄an jerbal ilo juon mijen ilo South America. Ijoke, visa eo an ekar rum̧wijļo̧k n̄an juon iien eaitok kitien innām ekar bar ijjitōn̄ n̄an bar juon mijen ilo United State. Men̄e ekar inepata bwe ekar jab maron̄ jerbal ilo jikin eo ilo kūr eo an jinoin, ekar kōjekdo̧o̧n im lukkuun jerbal ilo jerbal eo an ekāāl, im ekar kate e bwe enaaj jerbal jon̄an wōt an maron̄. Ekar jino inepatak, ijoke, kōnke en̄jake ko renana ekar iiooni ippān mijenede ro me, n̄an e, āinwōt eļap wōt aer limo jān aer kwaļo̧k gospel eo.
Jet allōn̄ tokālik, likao in ekar en̄taan kōn juon nan̄inmej eļap eo ekar kōm̧m̧an bwe en mej rājet in ānbwinnin, innām kar kōro̧o̧l e n̄an kapijuknen eo an n̄an an maron̄ taktō.
Jet allōn̄ tokālik, likao in ekar lukkuun mour, im an mej ānbwinnin ekar jako. Kar kōjjeļļāiki bwe emaron̄ bar etal im jerbal āinwōt juon mijende, juon kōjeram̧m̧an eo me ekar jar kake aolep raan. Kar nuuj eo wōt im ekar kainepataiki bwe enaaj maron̄ wōt jepļaakļo̧k n̄an ejja mijen eo ekar ro̧o̧l jāne, ijo me ekar en̄jake bwe m̧wil ko im wāween mour ko an mijenede ro rekar jab ekkar āinwōt rej aikuj kar.
E eaar aikuj in itok n̄an tampeļ eo n̄an pukōt kaenōm̧m̧an im juon kam̧ool bwe en maron̄ wōr juon an en̄jake em̧m̧an āinwōt juon mijenede. Jinen im jemān raar barāinwōt jar bwe loļo̧k in n̄an tampeļ en maron̄ leļo̧k jipan̄ eo ļaddik eo nejier eaikuji.
Ke likao in ekar deļo̧n̄e celestial ruum̧ eo ilo m̧wen̄an eo juon, ekar jijet ilo juon jea im kar jino an jar n̄an pukōt tōl jān Jemān Ilan̄.
Bar juon armej ekar deļo̧n̄e celestial ruum̧ eo jidik iien tokālik, ekar juon likao etan in Landon. Ke eaar etetal tok n̄an ruum̧ eo, ekar m̧ōkaj an loe likao eo ej jijet ioon jea eo, mejān rekilōk im ej jar. Landon ekar bōk juon im̧we ejim̧we bwe ej aikuj kōnono ippān likao eo. Ekar āliklik in kakkure an ļaddik in jar, kōn menin, ekar pepe ippān bwe en kōttar. Ālkin an eļļā jet minit, likao in ekar jar wōt. Landon ekar jeļā bwe ej jab maron̄ tarelikļo̧k im̧we eo. Ekar kepaake likao eo im jidik wōt an pikpikir aeran. Likao eo ekar kōppeļļo̧k mejān, jebarujruj bwe emōj kabōņōņōiki jān an jar. Landon ekar unoojdikdik im ba, “Ikar en̄jake bwe ij aikuj in kōnono ippam̧, mekarta ijjab lukkuun jeļā etke.”
Ke rej jino bwebwenato, likao eo ekar kwaļo̧k būruwōn n̄an Landon, kōmeļeļeik e jekjek ko repād ippān im kajem̧ļo̧k an bwebwenato kōn an kōņaan in bōk jet kaenōm̧m̧an im rōjan̄ kōn mijen eo an. Landon, eo ekar ro̧o̧l jān juon mijen em̧m̧an juon iiō m̧oktaļo̧k, ekar kwaļo̧k kōn en̄jake ko an make jān mijen eo an, apan̄ ko im inepata ko ekar jelm̧ai, kōn wāween in, ekar oktakļo̧k n̄an Irooj kōn jipan̄, im kōjeram̧m̧an ko ekar būki. Naan ko an rekar kōpperan im rie, im an lem̧ōņōņō kōn mijen eo an ekar ajedeed. Ilo m̧ool, ke mijak eo an likao in ej jako, juon en̄jake in aenōm̧m̧an ekar itok n̄an e. Ekar en̄jake kam̧m̧oolol eļap ke ekar kile bwe jar eo an ekar uwaak.
Likao rein ruo rekar jar ippān doon, innām Landon ekar pojak im em̧m̧akūt, m̧ōņōņō bwe ekar ron̄jake im̧we eo ekar itok n̄an e. Ke ekar jutak in etal, likao in ekar kajjitōk ippān Landon, “Ia eo kwaar jerbale mijen eo am̧ ie?” N̄an tōre in, ejjeļo̧k juon iaer ekar kwaļo̧k n̄an doon etan mijen eo erro kar jerbal ie. Landon ekar jerbal ilo ejja mijen eo wōt me likao in enaaj jepļaakļo̧k n̄ane!
Ilo juon leta ekāāl n̄an n̄a, Landon ekar kwaļo̧k n̄an n̄a naan in iakweiakwe eo an likao in n̄an e: “Ewōr aō tōmak bwe Jemedwōj Ilan̄ enaaj kōjeram̧m̧an eō, ak ikar jab ļōmņak bwe Enaaj kar jilkintok juon armej bwe en jipan̄ eō, eo eaar jerbal ilo mijen eo aō. Ijeļā bwe aolep men renaaj em̧m̧an.”2 Jar eo ettā an juon bōro em̧ool emōj eo̧ron̄e im kar uwaake.
Ro jeiū im jatū, ilo mour ko ad, jenaaj ioon kapo ko; jenaaj ioon mālijjon̄ ko im apan̄ ko. Ilo ad etal n̄an tampeļ eo, ilo ad keememej bujen ko jekar kōm̧m̧ani ilowaan, jenaaj maron̄ jelm̧ae mālijjon̄ ko im eļļā ioon kajjojo iaan menin kapo ko. Ilo tampeļ eo jemaron̄ loe aenōm̧m̧an eo ie.
Kōjeram̧m̧an ko an tampeļ ejjeļo̧k wōnāer. Juon men ij kam̧m̧oolol kake aolep raan ilo mour eo aō ej bwe eo ejitōn bōro ippa, Frances, im n̄a kar bōke ke kōm̧ro kar būkwelōlō ilo juon jikin katok ekwojarjar im kar kōm̧m̧an bujen ko rej liāpe kōm̧ro ippān doon n̄an indeeo. Ejjeļo̧k bar juon kōjeram̧m̧an eaiboojojļo̧k n̄an n̄a jān inem̧m̧an im kaenōm̧m̧an in ikar bōke jān jeļāļo̧kjeņ in ippa bwe kōrā eo pāleeō im n̄a naaj bar ippān doon.
Jemedwōj Ilan̄ en kōjeram̧m̧an kōj bwe en wōr ippād jetōb in kabun̄jar ilo tampeļ eo, im bwe jen pokake kien ko An, im bwe jen ļo̧o̧r bun̄tōn nee ko neen ad Irooj im Rilo̧mo̧o̧r, Jisōs Kraist. Ij kam̧ool bwe E ej ad Ripinmuur. E ej Nejin Anij. E ej eo ekar jerkaktok jān lōb eo ilo jibbon̄ in Ijtō eo jinointata, bōktok Ippān menin letok eo an mour eo ejjeļo̧k jem̧ļo̧kin n̄an aolep ajri ro nejin Anij. Ilo raan in eaiboojoj, ilo ad kōjeram̧m̧an m̧akūtkūt in em̧m̧an, jen leļo̧k jar in kam̧m̧oolol ko ad kōn menin letok ko An rekabwilōn̄lōn̄ im reļļap n̄an kōj. Bwe menin en āindein, ij jar ilo ettā ilo Etan Ekwojarjar, amen.