Aaet, Jej Maron̄ im Naaj Anjo̧!

Jān Elder Ulisses Soares

Jen Būreejtōnji eo an Jiljilimjuonn̄oul eo

Ej aikuj in ļapļo̧k an dim ad kabwijer naan in kam̧ool eo ad kōn gospel eo an Jisōs Kraist. Innām jenaaj anjo̧ ioon tariņae ko raan otemjeļo̧k ņae devil.

Em̧m̧aan ro jeiū im jatū jitōnbōro, ittā kōn iien in em̧m̧an ewōr ippa n̄an kōnono n̄an kom̧, rikabwijer ro an priesthood eo an Anij ilo aolepān Kabun̄ in rainin.

Būreejtōn Thomas S. Monson kar ba juon iien:

“Laļ in emaron̄ ilo iien ko āinwōt jikin ekamijak me jej jokwe ie. Aorōk ko an mour an jukjuk in pād rej āinwōt dikļo̧k ilo juon jon̄ak em̧ōkaj. Ejjeļo̧k juon—men̄e edik ak rūtto ak em̧m̧an ded—emaron̄ deeor jān ioon men kein me remaron̄ in kūnōōrļo̧k kōj laļļo̧k im kakkure kōj. …

“… Bōtaab jej aikuj in jab ebbwer. … Jej bōk kuņaad ilo juon tariņae ippān jerawiwi. … Ej juon tariņae jemaron̄ im naaj wiin. Jemed Ilan̄ eaar letok n̄an kōj kein jerbal ko jej aikuji n̄an anjo.”¹

Aolepādwōj, dik im rūtto, rej jelm̧ae raan otemjeļo̧k tariņae eo kar kwaļo̧k jān Būreejtōn Monson. Rūkōjdet eo im enjeļ ro an rej kajieon̄ kapok kōj. Jibadbad eo aer ej n̄an kōketak kōj n̄an jejļo̧k jān bujen ko me jaar kōm̧m̧ani ippān Irooj, kōm̧m̧an bwe jān bōk mejād jān jolet indeeo eo ad. Ekanooj ļap aer jeļā kōn karōk eo an Jemedwōj Ilan̄ n̄an ajri ro Nejin, bwe raar pād ippād ilo Kweilo̧k eo eļap ilo Lan̄ ke kar kwaļo̧k aolepān. Raar kajieon̄ bōk kōn maron̄ eo ippāer m̧ōjņo̧ ko im jaje ko ad, m̧oņe kōj kōn “tab in marok ko … , ko rej kapiloik mej ko, im kapen buruōn ro nejin armej, im tōļļo̧k er ilo iaļ ko redebakbak, bwe rej jako im rej jebwābwe.”²

Jekdo̧o̧n jum̧ae eo jej jelm̧ae, āinwōt Būreejtōn Monson eaar katakin, en̄in ej juon tariņae me jemaron̄ naaj wiini. Irooj ej lōke ilo kekemo̧o̧j eo ad im kijejeto eo n̄an wiin.

Jeje Ko Rekwojarjar epād ie waanjon̄ak ko ejjeļo̧k jem̧ļo̧kier kōn ro me raar wiini tariņae ko aer, em̧ool ilo ioļapļap in jekjek ko rekanooj nana. Juon iaan waanjon̄ak kein ej Kiāptin Moronai ilo Bok in Mormon. Likao in ekabwilōn̄lōn̄ kar wōr ippān peran eo n̄an bōbrae m̧ool eo ilo juon tōre ke eaar lōn̄ jab errā ko im tariņae ko me eaar kamijak n̄an kakkure aolepān laļ eo an Rinipai. Men̄e eaar lo̧ļe ilo kōjerbal eddo ko an, Moronai eaar pād wōt ilo an ettā. Menin im m̧wil ko jet raar kōm̧m̧an bwe en juon kein kōm̧adm̧ōd eo ejej uwaan, em̧ool kabwilōn̄lōn̄, ilo pein Anij ilo tōre jab eo. Bok in Alma ej kōmeļeļeik bwe eļan̄n̄e aolep armej raar āinwōt Moronai,“lukkuun kajoor ko an hell renaaj kar idikdik indeeo; [im] devil enaaj kar ejjeļo̧k an kajoor ioon buruōn ro nejin armej.”³ Aolep m̧wil ko an Moronai raar itok āinwōt uwaakin tōmak eo an eļap ilo Anij im ilo Irooj Jisōs Kraist⁴im kijetoto eo an epen n̄an ļoor ainikien Anij im rikanaan ro An.⁵

Ilo m̧ool, aolepādwōj jej aikuj in ukōt kōj make n̄an Kiāptin Moronai in raan kein rainin n̄an wiini tariņae ko ņae kareel ko renana ilo mour ko ad. Ijeļā juon tikōn edik eo eaar ukōt e make n̄an Kiāptin Moronai ilo raan kein. Likao in ekanooj in tiljek im kar pukōt n̄an ļoor kapilōk eo an ro jinen im jemen im ritōl ro an Kabun̄, tōmak im kijejeto eo an kar idajon̄jon̄e aolep raan, em̧ool ilo an dik wōt iiō eo an. Eaar jiron̄ eō juon raan eaar ilbōk kōn juon jekjek eo epen im ejjab em̧m̧an—ro m̧ōttan raar alooji pija ko renana ilo jeeļ boon ko nejier. Ilo ejja iien eo wōt, likao in eaar aikuj kālet ta eo eaar aorōk tata—bun̄bun̄ eo an ak an jim̧we. Ilo jōkōn jejjo ko raar itok, eaar obrak kōn peran im kar jiron̄ ro m̧ōttan bwe ta eo raar kōm̧m̧ane eaar jab jim̧we. Eļapļo̧k jān in, eaar jiron̄ er bwe rej aikuj bōjrak jān ta eo raar kōm̧m̧ane ak renaaj erom rikōm̧akoko n̄an e. Elōn̄ wōt iaan rijikuuļ ro m̧ōttan kar kajirere kōn kapilōk eo an, ba bwe eaar m̧ōttan wōt mour im bwe ejjeļo̧k jorrāān. Mekarta, eaar wōr juon ibwilijier eaar ron̄jake kapilōk eo an likao jab in im jokālet n̄an bōjrak jān ta eo eaar kōm̧m̧ane.

Waanjon̄ak in an tikōn in eaar wōr kareel em̧m̧an ilo juon iaan rijikuuļ ro m̧ōttan. Ilo ejjeļo̧k pere, e im eo m̧ōttan raar jelm̧ae kajirere im kaen̄taanan kōnke kōn jokālet in. Ilo bar juon jekjek, raar ļoor kallōk eo an Alma n̄an armej ro doon ke eaar ba, “Diwōjtok jān nana, im kom̧in jenoļo̧k, im jibwe jaab men ko aer retton.”⁶

Bok jidikdik eo N̄an Kakajoorļo̧k Jodikdik Ro epād ie kapilōk kein jān Būreejtōnji eo Kein Kajuon n̄an jodikdik ro an Kabun̄ in: “Kom̧ij eddo n̄an kālet ko kom̧ij kōm̧m̧ani. Anij ej ļōmņak kōn kom̧ im naaj jipan̄ kom̧ kōm̧m̧ani kālet ko rem̧m̧an, men̄e eļan̄n̄e baam̧le eo im ro m̧ōttami rej kōjerbal anemkwoj in kālet eo aer ilo wāween ko me rejjab jim̧we. Wōr kajoor eo ilo mour n̄an jutak pen ilo pokake ankilaan Anij, men̄e eļan̄n̄e kom̧ij jutak makeļo̧k. Ilo ami kōm̧m̧ane menin, kom̧ij kōm̧m̧ane juon waanjon̄ak n̄an an ro jet ļoore.”⁷

Tariņae eo an emman ņae nana enaaj wōnm̧aanļo̧k ilo aolepān ad mour, kōnke jibadbad eo an rijum̧ae eo ej n̄an kōm̧m̧an bwe aolep armej ren en̄taan āinwōt e. Satan im enjeļ ro an renaaj kajieon̄ n̄an kapok ļōmņak ko ad im ba rej kōjbwebwe n̄an kapoik kōj n̄an jerawiwi. Eļan̄n̄e remaron̄, renaaj kakkure aolep men remman. Mekarta, ej aorōk n̄an meļeļe bwe enaaj wōr aer kajoor iood wōt eļan̄n̄e jej kōtļo̧k e.

Jeje Ko Rekwojarjar epād ie barāinwōt jet waanjon̄ak ko an ro me raar leļo̧k mālim eo n̄an rikapo eo im raar erom pok im em̧ool kar kakkure,āinwōt Nehor, Korihor, im Sherem. Jej aikuj mejmejkaruo n̄an kauwōtata in. Jejjab maron̄ kōtļo̧k kōj make n̄an erom pok jān ennaan ko rebun̄bun̄ me epidodo būki jān laļ in im me rej jum̧ae katak eo im pedped ko rem̧ool an gospel eo an Jisōs Kraist. Elōn̄ iaan ennaan kein an laļ in rej jutak kōn ejjeļo̧k aorōk in ijello̧kin an juon kijejeto an jukjuk in pād eo ad n̄an kabun̄ būruwōn jerawiwi. Jej aikuj kememej bwe, ilo jem̧ļo̧kin, aolep renaaj jutak im̧aan Kraist n̄an ekajet kōn jerbal ko ad, eļan̄n̄e rem̧m̧an ak eļan̄n̄e re nana.⁸ Ilo ad ioon ennaan kein an laļ in, peran eļap im juon jeļāļo̧kjeņ epen kōn karōk eo an Jemedwōj Ilan̄ enaaj aikuji n̄an kālet jim̧we eo.

Aolepādwōj maron̄ bōk kajoor eo n̄an kālet jim̧we eo eļan̄n̄e jej pukōt Irooj im likūt aolepān ad lōke im tōmak ilo E. Bōtaab, āinwōt an jeje ko rekwojarjar katakin, ej aikuj wōr ad “juon bōro em̧ool,” im “lukkuun kōttōpar.” Innām Irooj, ilo jouj eo An ejjeļo̧k jemļo̧kin, “naaj kwaļo̧k m̧ool eo n̄an kōj, kōn kajoor eo an Jetōb Kwojarjar. Im jān kajoor eo an Jetōb Kwojarjar [jej] maron̄ jeļā m̧ool eo an men otemjej.”⁹

Jeļāļo̧kjeņ in bōk jān Jetōb Kwojarjar ejjab ļapļo̧k jān ad naan in kam̧ool, eo ej katōk tōmak eo im kijejeto eo ad n̄an ļoor katak ko an ko̧jpeļ eo kar kōjepļaaktok ilo raan kein āliktata, jekdo̧o̧n bun̄bun̄ in ennaan ko jej ron̄ jān laļ in. Naan in kam̧ool eo ad aikuj in likōpejn̄ak eo ad n̄an kōjparok kōj ņae m̧ade kijeek ko an rikapo eo ilo kajjieon̄ ko an n̄an lukorkore kōj.¹⁰ Enaaj tōl kōj ilo ineem̧m̧an ilo marok im lōkapokpok ko me rej waļo̧k ilo laļ in rainin.¹¹

Iaar katak pedped in ke iaar jerbal āinwōt juon mijedede edik. Eo m̧ōtta im n̄a kar jerbal ilo juon branch ekanooj dik im ettoļo̧k an Kabun̄ in. Kōm kar kajieon̄ kōnono ippān aolep armej ilo bukwōn. Eaar em̧m̧an aer karuwainekeik kōm, bōtaab raar kōņaan kōbauwe kōn jeje ko rekwojarjar im kajjitōk ippām kōn kein kam̧ool ko reppen ikkijein tarlep in m̧ool eo kōn ta eo kōm kar katakin.

Ij kememej bwe kajjojo iien eo m̧ōtta im n̄a kajieon̄ kam̧ool kōn jabdewōt n̄an armej, Jetōb eo an Anij eaar ilo̧k jān kōm im kōm kar en̄jaake jōbwābwe im pok. Kōm kar en̄jaake bwe kōmij aikuj in kar kakkeijeļo̧k ilo kajoor naan in kam̧ool eo am ippān m̧ool ko an ko̧jpeļ eo kōm kar katakin. Jān tōre eo m̧aanļo̧k, ij kememej ke kōm kar kwaļo̧k naan in kam̧ool kōn aolepān būruōm, juon kajoor in kapen emera itok jān Jetōb Kwojarjar kobrak ruum̧ eo, im eaar ejjeļo̧k jikin pok ak arto artak. Iaar katak bwe ejjeļo̧k kajoor ko an nana rej pād me rej maron̄ kapok, m̧oņ, ak kōm̧ad kajoor eo an juon naan in kam̧ool em̧ool an juon rikaļoor em̧ool an Jisōs Kraist.

Āinwōt Rilo̧mo̧o̧r eo E make kar katakin, rikapo eo eikdeleel n̄an etale kōj āinwōt wit, kōm̧m̧an bwe jān luuji maron̄ eo ad n̄an kareel laļ in n̄an em̧m̧an.¹²

Emm̧aan ro jeiū im jatū, kōn pok eo eļap im pere ko rej ajeded ilo aolepān laļ in rainin, en ļapļo̧k an dim ad kabwijer naan in kam̧ool eo ad kōn ko̧jpeļ eo an Jisōs Kraist. Innām maron̄ eo ad enaaj bōbrae m̧ool im jim̧we eo ekanooj ļap. Jenaaj anjo̧ ioon tariņae ko raan otemjeļo̧k ņae devil, im ijello̧kin bun̄ ilo jikin pata an mour, jenaaj kareel ro jet n̄an jon̄ak ko an M̧aajta eo.

Ij kūr aolep n̄an pukōt ineem̧m̧an ilo katak ko repād ilo jeje ko rekwojarjar. Kiāptin Moronai eaar kakkejel tōmak eo an ilo Anij im naan in kam̧ool eo an kōn m̧ool eo n̄an jeļā im meletlet eo loi ilo jeje ko rekwojarjar. Ilo wāween in, eaar lōke bwe enaaj kar bōk kōjeram̧m̧an ko an Irooj im naaj kar bōk anjo̧ ko rellōn̄, eo ej ta eo, ilo m̧ool, eaar waļo̧k.

Ij kūr aolep n̄an pukōt ineem̧m̧an ilo naan ko rekapeel an rikanaan ro ad kiiō. Būreejtōn Thomas S. Monson ekar ba: “Kōj ro em̧ōj kar ekkapit n̄an priesthood eo an Anij remaron̄ kōm̧m̧ane juon oktak. N̄e jej dāpij wōt erreo eo an juon make im kauteij priesthood eo ad, jej erom waanjon̄ak ko rejim̧we n̄an an ro jet ļoore … [im jān] jipan̄ kōmeramļo̧k juon laļ eo eļapļo̧k an marok.”¹³

Ij kūr aolep n̄an lōke im ilo kajooor eo an Pinmuur eo an Jisōs Kraist. Kōn en̄taan in pinmuur eo An, jemaron̄ bōk peran eo n̄an wiini aolep tariņae ko an tōre in ad, em̧ool ilo ibwilijin apan̄ ko, idajon̄jon̄ ko, im kapo ko ad. Jān lōke ilo iakwe eo An im kajoor eo n̄an lo̧mo̧o̧ren kōj. Kraist Make kar ba:

“N̄a iaļ, im m̧ool, im mour. Ejjeļo̧k armej ej itok n̄an Jema, eļan̄n̄e jab kōn Eō.”¹⁴

“N̄a, meram in laļ; eo ej ļoor Eō e jāmin etal ilo marok, a enaaj an meram in mour.”¹⁵

“Men kein Iar kōnono n̄an kom̧, bwe ilo N̄a kom̧win aenōm̧m̧an. Ilo iaļ kom̧ij en̄taan, ak kom̧win m̧ōņōņō; N̄a Iar bōk anjo̧ ioon laļ.”¹⁶

Ij kwaļo̧k kam̧ool kōn m̧ool kein ilo āt kwojarjar eo etan Jisōs Kraist, amen.