Eļan̄n̄e Kwonaaj Bōk Eddo
Jān Eļtōr Jorge F. Zeballos
Jen Jiljilimjuonn̄oul eo
Jen bun̄m̧aanļo̧k jān katak eddo eo ad, kajim̧we jokālet ko ad, m̧akūtkūt ekkar n̄an jabdewōt jokālet, im bōk ankilaan Jemed.
Ekar 12 iiō rūtto eō ke mijenede ro rekar itaaktok ej kab kein kajuon n̄an kwaļo̧k ilo bukwōn eo iaar ļo̧tak ie ituiōn̄ in Chile. Juon Jabōt, ālkin aō kar itok im jar ilo juon branch edik ium̧win 6 allōn̄, juon mijenede ekar letok n̄an eō pilawe eo ke ej leto letak kwokwoj eo. Ikar kalimjek e im unoojdikdik, “Ij jab maron̄ bōke.”
“Etke?” ekar uwaak.
Ikar ba n̄an e, “Kōnke ij jab juon membōr in Kabun̄ in.”1
Mijenede eo ekar jab tōmak. Mejān ekar kabrōrō. Ijeļā bwe ekar ļōmņak, “Ak likao in ej pād ilo aolep iien kwojkwoj! Elmen an maron̄ jab erom juon membōr in Kabun̄ in?”
Raan eo juon, mijenede ro rekar mōkaj im pād m̧weo im̧ō, im raar kōm̧m̧an jabdewōt men remaron̄e n̄an katakin baam̧le eo aō. Ak kōnke baam̧le eo aō rekar jab itok limo, kar aō maron̄ pād ilo Mōnjar eo kajjojo wiik ekar men eo ekar kōm̧m̧an bwe mijenede ro en wōr aer lōke n̄an wōnm̧aanļo̧k wōt. Āliktata, iien eo eļap ikar kōttare ekar itok ke rekar karuwaineneik eō bwe in erom juon membōr an Kabun̄ eo an Jisōs Kraist. Mijenede ro rekar kōmeļeļeiki eō bwe kōnke ij dik wōt, inaaj aikuj bōk mālim jān jinō im jema. Ikar etal im loļo̧k jema, ļōmņak bwe uwaak eo an em̧m̧an enaaj kar “Nejū, n̄e kwe rūtto n̄an am̧ peek eok, kwonaaj maron̄ kālet kōņaan eo am̧”
Ke mijenede ro rekar kōnono ippān, ikar lukkuun in jar bwe būruwōn en maron̄ en̄jake bwe en maron̄ letok mālim eo ikōņaan. Uwaak eo an n̄an mijenede ro ekar āinwōt in: “Eļtōr raņ, ium̧win 6 allōn̄ ko rej m̧ootļo̧k, iaar kalimijōk an Jorge ruj in jibbon̄tata aolep Jabōt, kōņak nuknuk ko an rem̧m̧antata, im etetal laļo̧k n̄an m̧ōn jar eo. Imaron̄ loe wōt juon kareel em̧m̧an jān Kabun̄ ņe ilo mour eo an.” Innām, kōnono n̄an eō, ekar kaļo̧kjenaō ke ej ba, “Neju, eļan̄n̄e kwonaaj bōk eddo in kālet in, innām mālim eo aō epād ippām̧ n̄an peptaij.” Ikar bakwij jema, um̧m̧aki, im kam̧m̧oolol e kōn ta eo ekar kōm̧m̧ane. Raan eo juon ikar peptaij. Wiik eo ļo̧k ekar kein 47 iiō in iien in em̧m̧an ilo mour eo aō.
Ta eddo eo ippād āinwōt membōr in Kabun̄ eo an Jisōs Kraist? Būreejtōn Joseph Fielding Smith ekar kwaļo̧k āinwōt in: “Ewōr ippād eddo kein ruo reļļap. … Juon, n̄an pukōt lo̧mo̧o̧r eo ad make; im, ruo, eddo eo ad n̄an armej ro m̧ōttad.”2
Innām, men kein, rej eddo ko raorōktata Jemedwōj Ilan̄ ekar letok n̄an kōj: pukōt lo̧mo̧o̧r eo ad make im eo an ro jet, kōn meļeļe in bwe lo̧mo̧o̧r meļeļein kōttōbarļo̧k aiboojoj eo ilōn̄tata eo me Jemād ekar kōpooje n̄an ajri ro nejin rej pokake. 3 Eddo kein kar kōmālim kōj kaki—im jej aikuj m̧ōņōņō in būki—jej aikuj kōmeļeļeik kālet ko ad im̧aantata, kōņaan ko ad, kālet ko ad, im kōm̧anm̧an ko ad.
N̄an juon eo ej jino meļeļe menin, kōnke pinmuur eo an Jisōs Kraist, jikin eo ilōn̄tata em̧ool epidodo tōpare, likjab n̄an bōke enaaj jon̄an wōt en̄taan. Barāinwōt, oktak eo ikōtaan lo̧mo̧o̧r ej en̄taan, āinļo̧k wōt oktak eo ikōtaan tōprak im likjab. Būreejtōn Thomas S. Monson ekar katakin kōj bwe “armej eban maron̄ bwe jerbal ko aer m̧ae iien rej lo jerbal ko rem̧m̧an ippāer make.”4 Innām, ewi wāween, ad maron̄ m̧ōņōņō ilo jabdewōt men ejjeļo̧k tokjāer jān jikin eo ilōn̄tata eļan̄n̄e jikin eo ilōn̄tata maron̄ tōpare?
Kōtļo̧k bwe in kwaļo̧k emān pedped in katak ko renaaj jipan̄ kōj kakūrm̧ool kōņaan eo ad n̄an bōk eddo n̄an Jemād ilo Lan̄ barāinwōt uwaake kōtmāne eo An bwe jen erom āinwōt E.
1. Katak Eddo eo Ad
Eļan̄n̄e jaar iten kōm̧m̧ane ankilaan Anij, eļan̄n̄e jej bōk eddo n̄an E, jej aikuj ijjino katak, meļeļe, errā, im mour ekkar n̄an ankilaan E n̄an kōj. Irooj ekar ba bwe kajjojo armej ej aikuj eddo eo an, im n̄an jerbal ilo opiij eo emōj jitōn̄e ie, ilo niknik.5 An wōr ikdeleel n̄an kōm̧m̧ane ta eo ejim̧we ejjab bwe eļan̄n̄e jejjab kōm̧m̧an bwe jen meļeļe ta eo Jemed ekōņaan jān kōj im aikuj ad kōm̧m̧ane.
Ilo bwebwenato in Alice ilo Wonderland, Alice ekar jab jeļā ia eo ej etal ie ļo̧k, kōn menin ekar kajjitōk ippān Cheshire Cat, “Komaron̄ ke kwaļo̧k n̄an n̄a, jouj, ia eo ij aikuj etal ie ļo̧k jān ijin?”
Kuuj eo ekar uwaak, “Ej pedped wōt ioon pepe eo em̧m̧an kōn ia eo kwokōņaan etal n̄ane.”
Alice ej ba, “Ij jab lukkuun kea ia eo.”
“Innām ej jab aorōk ia eo kwoj etal ie ļo̧k,” kuuj eo ekar ba.6
Kōn menin, jejeļā iaļ eo ej tōl ļo̧k kōj n̄an “wōjke, eo leen [ej] kaijoļjoļ n̄an kōm̧ōņōņō jabdewōt”7—“iaļ eo, ej tōl ļo̧k n̄an mour”—e aidik. Ebōk kijejeto n̄an ilo̧k ilo iaļ in, im “e iiet ro rej loe.”8
Nipai ej katakin bwe “naan ko an Kraist renaaj jiron̄ kom̧ aolep men ko komij aikuj kōm̧m̧an.”9 Innām ej kobaiktok “Jetōb Kwojarjar eo … enaaj kwaļo̧k n̄an kom̧ aolep men ko kom̧ij aikuj kōm̧m̧ani.”10 Men̄e, jipan̄ kein rej kōtļo̧k ad katak eddo eo ad rej naan ko an Kraist me jaar būki jān rikanaan ro etto im raan kein im revelesōn eo ad make jān Jetōb Kwojarjar eo.
2. Kōm̧m̧an Jokālet
Men̄e jaar katak kōn Jepļaaktok eo an gospel in, juon baj kien, eddo ko rej ekkejel tok ilo kūr eo ad, ak bujen ko jej kōm̧m̧ani ilo tampeļ eo, kālet eo ej ad men̄e jej ak jejjab m̧akūtkut ekkar n̄an jeļāļo̧kjeņ in ekāāl. Kajjojo armej ej anemkwoj n̄an e make ļeo ak lio n̄an deļo̧n̄ ilo juon bujen ekwojarjar āinwōt peptaij ak kain̄i ko an tampeļ. Kōnke kallim̧m̧ur ko kaje kaki ekar m̧ōttan imminene in mour ko an armej in kabun̄ etto “kom̧win jab kallim̧ur kōn Eta ilo riab.” 11 Ijoke, ilo juon tōre im Kraist ej mour, Rilo̧mo̧o̧r eo ekar katakin juon wāween eutiej ļo̧k ilo ad kōjparok kallim̧ūr ko ke Ekar ba bwe aaet meļeļein aaet im jaab meļeļein jaab.12 Naan an juon armej aikuj in em̧m̧an n̄an an ejaake m̧ool eo an im kallim̧ur eo ņae bar juon armej im aaet ebarāinwōt ļapļo̧k n̄e armej eo bar juon ej Jemed ilo Lan̄. Kautiej juon kallim̧ur n̄an erom kōkkaļļe in m̧ool im jim̧we an naan ko ad.
3. M̧akūtkūt Ekkar N̄ane
Ālkin ad katak kōn eddo eo im kōm̧m̧an jokālet ko rej ekkejelļo̧k ippān ta eo jej katak im meļeļe, jej aikuj m̧akūtkūt ekkar n̄ane.
Juon waanjon̄ok ekajoor kōn jibadbad edim n̄an kallim̧ur eo An ippān Jemān ej itok jān en̄jake eo an Rilo̧mo̧o̧r eo ke kōjeram̧an eo an em̧m̧aan eo eake kar bōktok n̄an E n̄an kōmour i . “Ke Jisōs ej lo aer tōmak, E ba n̄an ļeo e ākā, nejū, e jako jero̧wiwi ko am̧.”13 Jejeļā bwe Pinmuur eo an Jisōs Kraist ej aorōk n̄an bōk jeorļo̧k bōd kōn jerawiwi ko ad, ak bwebwenato in kōjeram̧m̧an em̧m̧aan eo e akā, iien in eļap ekar jab bōk jikin; Gethsemane eaar aikuj bōk jikin. Ijoke, Jisōs ekar jab kōjeram̧m̧an wōt em̧m̧aan in e akā kōn maron̄ eo n̄an jutak im etetal, ak Ekar barāinwōt leļo̧k n̄an e jeorļo̧k bōd in jerawiwi ko an, kōnke juon kōkkaļļe eo ej kwaļo̧k bwe E ej jāmin likjab, bwe E enaaj kakūrm̧ool kallim̧ur eo Ekar kōm̧m̧ane ippān Jemān, im bwe Gethsemane im ioon dōbwāāl eo Enaaj kōm̧m̧ane ta eo Ekar kallim̧ur n̄an kōm̧m̧ane.
Iaļ eo me jekar kālete n̄an etetal ie eadik. Ippān iaļ in ewōr apan̄ ko renaaj aikuji tōmak eo ad ilo Jisōs Kraist im kijejeto ko ad n̄an pād wōt ilo iaļ in im wōnm̧aanļo̧k wōt. Jej aikuj in ukweļo̧k im pokake im kijenmej, men̄e jejjab meļeļe aolep jekjek ko rej jebo̧o̧ļ kōj. Jej aikuj in jeorļo̧k an ro jet bōd im mour ekkar n̄an ta eo jaar katak kake im ippān kālet ko jaar kōm̧m̧ani.
4. M̧ōņōņō in Bōk Ankilan Jemān
Rikaļo̧o̧ran ej kōm̧m̧an bwe jen katak wōt eddo eo ad, kōm̧m̧ani jokālet ko rejim̧we, m̧akūtkūt ekkar n̄ani, ak barāinwōt men eo eaorōk ej ad ejaake m̧ōņōņō eo ad im maron̄ eo ad n̄an bōk ankilan Anij men̄e ejjab jejjet in wōt kōņaan eo ad ak meļeļe.
Eļap aō m̧weer jān im kautiej m̧wil eo an rilepa eo ekar itok n̄an Irooj, “akweļap n̄an E, im bukwelōlō n̄an E im ba n̄an E, eļan̄n̄e kwō kōņaan, Kwōj maron̄ in karreo eō.”14 Rilepa eo ekar jab kajjitōk jabdewōt men, men̄e kōņaan eo an emaron̄ kar wāppen; ekar baj m̧ōņōņō wōt in bōk ankilan Irooj.
Juon m̧ōtta iiō ko ļo̧k, ripāleļe rein jera retiljek rekar jeram̧m̧an kōn itaaktok eo an ļaddik eo nejier, eo etto aer baj jar kake. M̧weo ekar obrak kōn m̧ōņōņō ke rein m̧ōttam̧ im leddik eo nejier, eo ekar make wōt ajri ekar pād ippāer, ekar m̧ōņōņō kōn kōm̧ao eo aer ippān ļaddik in nejier ej kab itok. Juon raan, ijoke, juon men ejjeļo̧k kar kōtmāne en kar waļo̧k: ļaddik in edik, eo ekar jilu wōt iiō rūttoon, kar jidimikij im deļo̧n̄ im pād ilo kom̧a. Iien eo wōt iaar ron̄ kōn jekjek eo, ikar kūrļo̧k rein m̧ōtta im kwaļo̧k aō jipan̄ ilo iien in eppen. Ak an uwaak ekar juon katak n̄an n̄a. Ekar ba, “Eļan̄n̄e ej ankilan Jemān n̄an bōke, innām em̧m̧an ippām̧.” Naan ko an rein m̧ōtta rekar jab kwaļo̧k jidik in n̄ūrbōkta, jum̧ae, ak jab errā. Ekar oktak, aolep men ko ikar maron̄ en̄jake ilo naan ko an ekar kam̧m̧oolol n̄an Anij kōn an kōtļo̧k bwe er ren m̧ōņōņō ippān ļaddik eo nejier jidik iien, barāinwōt an m̧ōņōņō in bōk ankilaan n̄an er. Jet iiō tokālik, in edik kar bar bōkļo̧k e n̄an manjen eo An ilo jikin eo eutiej tata.
Jen wōnm̧aanļo̧k jān katak eddo eo ad, kōm̧m̧an kālet ko rejim̧we, m̧akūtkūt ekkar n̄an kālet ko, im bōk ankilaan Jemed.
Ewi jon̄an kam̧m̧oolol im m̧ōņōņō in aō kōn kālet eo me jema ekar kōtļo̧k aō kōm̧m̧ane 47 iiō rem̧ootļo̧k. Ium̧win iien ko, ikar jino meļeļe bwe jekjek eo ekar letok n̄an n̄a—n̄an maron̄ meļeļe bwe kālet eo—meļeļe bōk eddo n̄an Jemedwōj Ilan̄ im pukōt aō make lo̧mo̧o̧r im bwe bar n̄an ro m̧ōtta, bwe in erom eļapļo̧k āinwōt an Jemed kōņaan im Ekōņaan bwe in erom. Ilo etan Jisōs Kraist, amen.