Pād Iturin Wōjke eo
Jān Eļtōr Kevin W. Pearson
Jen Jiljilimjuonn̄oul eo
Visōn eo an Liai kōn wōjke in mour eo ej juon būrabōl ekajoor kōn niknik n̄an jem̧ļo̧k in.
M̧okta wōt jān an Būreejtōn Heber J. Grant kar mej, juon iaan Rutiej ro an Kabun̄ kar loļo̧k ilo m̧weo im̧ōn. M̧okta jān an ilo̧k, Būreejtōn Grant eaar jar, “O Anij, kōjeram̧m̧an eō bwe in jamin luuji naan in kam̧ool eo aō im tiljek wōt n̄an jem̧ļo̧kin!”1 Ālkin epaakeļo̧k 27 iiō ko in an Būreejtōn an Kabun̄ in, en̄in eaar jar eo an ekajoor. Waanjon̄ak eo an eaar kein kakememej ekajoor bwe ejjeļo̧k juon, ilo jabdewōt iiō, ej deeor jān kareel eo an Satan. Ruo iaan kein jerbal ko rekajoor tata an Satan rej kapok im m̧oņ.
Niknik n̄an jem̧ļo̧k in ej juon kōkaļļe an rikaļoor m̧ool im ej aorōk n̄an mour indeeo. Bōtaab n̄e mālijjon̄ im apan̄ ko rej itok ilo iaļ eo ad, emakijkij ad jiron̄ kōj “dāpdep wōt.” In bar kalikkar: n̄an “dāpdep wōt” ejjab juon pedped an gospel. Niknik n̄an jemļo̧k in meļeļe in jab jokad am itok n̄an Kraist im erom weppān ilo E.
Eļan̄n̄e niknik n̄an jem̧ļo̧k in ej aorōk n̄an mour indeeo, etke jej kakkōt n̄an tiljek? Jej kakkōt n̄e jej aikuj kar kālet ikōtaan menin aorōk ko. Pokake ilo ejjeļo̧k lukkun ikdeelel n̄an pokake im kallim̧ur ilo jab wujlepļo̧k eļap ekōm̧ōjņo̧ ļo̧k tōmak. Niknik n̄an jem̧ļo̧k in ej aikuji kallim̧ur edipio n̄an Rilo̧mo̧o̧r eo im n̄an bujen ko ad.
Visōn eo an Liai kōn wōjke in mour eo ej juon būrabōl ekajoor kōn niknik n̄an jem̧ļo̧k in. Jouj im kanooj jar ilo ekkatak im kejōkļo̧kjeņ kōn ettōņak eo an Liai; innām keidi eok make n̄an e. Ilo am̧ kōm̧m̧ane, lukkuun ļōmņak kōn jiljino pedped ko raorōk me rej jipan̄ kōj niknik n̄an jem̧ļo̧k in.
1. Jab Meļo̧kļo̧k in Jar
Jej ijjino kōn Liai make “ilo juon jikin emarok im ejjeļo̧k kwobban.”2 Kajjojo iaad jej en̄jaake iien ko remarok im ajimakeke. “N̄e elōn̄ me ko rebin nae yuk, kememej im jar.”3 Ļoor waanjon̄ak eo an Būreejtōn Heber J. Grant. Jar kōn kajoor n̄an niknik n̄an jem̧ļo̧k in. Kajjitōk ippān Jemedwōj Ilan̄, “Ta eo eļapļo̧k Kwoj kōņaan bwe in kōm̧m̧ane?”
2. Itok n̄an Kraist im Weppān ilo E
Wōjke in mour eo ej ioļapļap in jibadbad ilo ettōņak eo an Liai. Aolep men rej tōļļo̧k n̄an wōjke in mour eo. Wōjke eo ej jutak kōn Kraist, eo ej kōkaļļe ealikkar iakwe eo an Anij. Leen eo ej Pinmuur eo ejjeļo̧k jem̧ļo̧k in An im ej kein kam̧ool eo eļap kōn iakwe eo an Anij. Mour indeeo ippān ro jej iakwe er ej em̧m̧anļo̧k im eļapļo̧k ikdeelel kake jān jabdewōt men ko jet. N̄an kile menin letok in, jej aikuj “itok n̄an Kraist, im weppān ilo E.”4 E ej “iaļ, im m̧ool, im mour.”5 Jemaron̄ kobrak mour ko ad kōn tōpar im jerbal em̧m̧an, ak ilo jem̧ļo̧k in, eļan̄n̄e jejjab deļo̧n̄ ilo bujen ko rekwojarjar n̄an ļoor Kraist im tiljek ilo kōjparoki, jenaaj kanooj im lukkun jerwane kōkaļļe eo.
3. Bun̄ M̧aanļo̧k kōn Tōmak
Ewōr juon iaļ me ej tōl ļo̧k n̄an wōjke in mour eo, n̄an Kraist. Eaidik im aidin̄, ju im jejjet. Kein ko an Anij rej jejjet ak ejjeļo̧k jon̄aer. Rej kōjparok kōj jān kauwōtata ilo jetōb im kanniōk im bōbrae kōj jān jōbwābwe.
Pokake kalōk tōmak ilo Kraist. Tōmak ej juon pedped in m̧akūtkūt im kajoor. Kije ilo ļoor waanjon̄ak eo an Kraist ej letok kajoor im maron̄ ilo jetōb. Ilo an ejjeļo̧k kajoor eo im kajoor in kōmaron̄ eo an Pinmuur eo, epen n̄an pād ioon iaļ eo im niknik.
“Būn̄ m̧aanļo̧k kōn dim ilo Kraist.”6
4. Bok in Mormon Ej Kii eo n̄an Mour ilo Jetōb
Em̧m̧akūt eo an mour eo epen. Epidodo n̄an po, jejļo̧k jān iaļ eo, im jebwābwe. Melijjon̄ ej juon men ban joļo̧k im menin aikuj m̧ōttan eddōkļo̧k indeeo eo ad. N̄e apan̄ ej itok, jab kōtļo̧k bwe jabdewōt men kwojjab lukkuun meļeļe kake, en kakkure men otemjej kwojeļā. Kijenmej, dāpdep ilo m̧ool eo; meļeļe enaaj itok. Mālijjon̄ ko rej āinwōt tab in marok ko me remaron̄ kapiloik mejād im kapen būruwōd. Ijello̧kin jej “jirok likatōttōt wōt”7 n̄an naan an Anij im mour kaki, jenaaj pilo ilo jetōb ijello̧kin kobrak ļōmņak kōn men an jetōb. Etale Bok in Mormon im naan ko an rikanaan ro remour aolep raaan, aolep raan, aolep raan! Ej kii eo n̄an mour ilo jetōb im joļo̧k m̧oņ. N̄e ejjeļo̧k, jej jebwābwe ilo jetōb.
5. Jab M̧ad im Po
N̄an ron̄jake ej n̄an leļo̧k eļap ad. Ron̄jake ro me rejjab tōmak ilo Kraist ejjamin naaj jipan̄ kom̧ lo E. Pukōt em̧ kileplep eo n̄an jeļāļo̧kjeņ ejjamin naaj tōl kom̧ n̄an m̧ool eo. Ejjab pād ijōņ. Rilo̧mo̧o̧r eo wōt epād ippān “naan ko naan in mour indeeo.”8 Men ko jet rej naan bajjōk. M̧weo eļap im kilep rej kōkaļļe in “kōļmenļo̧kjeņ waan im uteej būro”9 eo an laļ in—ilo naan ko jet, m̧ad im po. Ej kobrak kōn armej ro em̧m̧an idier me rej āinwōt ewōr ippāer men otemjej. Bōtaab rej kajirere kōn Rilo̧mo̧o̧r eo im ro rej ļoor E. Rej “katak iien otemjej im re jab maron̄ tōpar jeļā m̧ool jabdewōt iien.”10 Remaron̄ in jim̧we ilo kien, bōtaab rej jebwābwe ilo jetōb.
6. Pād iturin Wōjke eo
Ennaan eo an Liai ej n̄an pād iturin wōjke eo. Jej pād kōnke jej rioktak n̄an Irooj. Alma eaar katakin, “Lo, Eaar ukōt burueer; aaet, Eaar karuj er jān kiki leplep eo, im raar rujļo̧k n̄an Anij.”11 Ilo ad kōtļo̧k būruwōd n̄an Anij, Jetōb Kwojarjar eo ej ukōt lukkun piktok ko ad, ej m̧wilaļ ļo̧k ad oktak n̄an Irooj, im ejako ad pukōt m̧weo eļap. Eļan̄n̄e jej bōjrak ad kōm̧m̧ane men kein me rej bōktok oktak eo em̧wilaļ, jej bar oktak likļo̧k ilo jetōb. Bun̄ jān tōmak ej jum̧ae oktak.
N̄an aolep mijenede ro etto im kiio: Eļtōr im jijtōr ro, kom̧ij jab maron̄ baj ro̧o̧l tok jān mijen eo ami, innām bar lukkun ro̧o̧l n̄an wāween ko an laļ in, im joļo̧k awa ko rellōn̄ n̄an wiini men ko ejjeļo̧k tokjāer ilo ikkure video ko ilo ami jab lukkun m̧ōjņo̧lo̧k ilo jetōb. Ak kom̧ij jab maron̄ kam̧ōņōņō ilo pija ko renana ilo online im kowaan wānōk im erreo ilo kanniōk ilo ejjeļo̧k kaje ko renana ilo jetōb. Eļan̄n̄e ejako Jetōb eo, kom̧ij jebwābwe. Jab m̧ad im po.
Rikaļoor ro rem̧ool rej wōnm̧aanļo̧k n̄an rūj n̄an Anij kajjojo raan ilo jar eo an juon make eļap meļeļe in, m̧ool ilo ekkatak jeje ko rekwojarjar, pokake, im jerbal in jipan̄. Pād iturin wōjke eo im ruj wōt.
Jet iiō ko remootļo̧k, Jijtōr Pearson im n̄a kar kūr n̄an tōl Washington Tacoma Mission. Kūr eo kar juon eo lukkuun bwilōn̄ kake. Kōn jet ikūm̧kūm̧ iaar kweilo̧k ippān chairman im CEO eo an kom̧bani eo iaar jerbal ie im jiron̄ er kōn mijen kūr eo aō. Eaar alikkar aer inepata kōn jokālet eo aō n̄an em̧m̧akūt jān kom̧bani eo. “N̄aat eo kwar kōm̧m̧ane jokālet in, im etke kwar jab ekōnono kake ippām̧ m̧oktaļo̧k?” raar kōņaan jeļā.
Ilo juon iien alikkar, juon uwaak ekajoor eaar itok n̄an ļōmņak eo aō, iaar ba, “Iaar kōm̧m̧ane jokālet in āinwōt juon ļaddik 19 iiō-dettan, ke iaar kōm̧m̧ani bujen ko rekwojarjar ippān Anij ilo tampeļ eo n̄an ļoor Rilo̧mo̧o̧r eo. Em̧ōj aō kalōk aolepān mour eo aō ilo bujen kein, im ij lukkun in kajeon̄ kōjparoki kiiō.”
Ke jaar deļo̧n̄e bujen ko ippān Anij, ejjeļo̧k bar kōm̧tālik. Leļo̧k jidik, bōjrak, im m̧ōjņo̧ rejjab ļōmņak ko. Ilo aelōn̄ in kiin̄ eo an Anij, ewōr juon jon̄ak eweppān n̄an mour ippān Anij. Ej aikuji rikaļoor ro reperan! Ejjeļo̧k ruum̧ n̄an rikaļoor ro rebwe ak nōbar make e. Ebwe ej rikōjrat eo an weppān, im kallim̧ur eo ebwe enaaj bōbrae eok jān niknik n̄an jem̧ļo̧k in.
Eļan̄n̄e kom̧ij kakkōt, tarpok, ak jebwābwe ilo jetōb, ij rōjan̄ kom̧ n̄an kōm̧m̧ane juon men ijeļā enaaj jipan̄ eok bar ro̧o̧l tok. Bar jino lukkun jar ilo ekkatak Bok in Mormon im mour katak ko ie, aolep raan, aolep raan, aolep raan! Ij kam̧ool kōn kajoor eo em̧wilaļ ilo Bok in Mormon eo me enaaj ukōt mour eo ami im kōkajoorļo̧k ikdeelel eo ami n̄an ļoor Kraist. Jetōb Kwojarjar eo enaaj ukōt būruwōmi, im jipan̄ kom̧ lo “men ko āinwōt aer lukkun waļo̧k.”12 Enaaj kwaļo̧k n̄an kom̧ ta eo kom̧ij aikuj n̄an kōm̧m̧ane tokālik. En̄in ej kallim̧ur eo an Nipai n̄an kom̧:
“Im iaar jiron̄ir … eo enaaj kar eo̧ron̄ naan in Anij, im naaj jirok likatōttōt ilo e, renaaj jamin jako; barāinwōt kapo ko im m̧ade kijeek ko an ri kapo rejamin anjo̧ iooer im kapiloik er, n̄an tōļļo̧k er n̄an jako.
“Kōn menin, N̄a … iaar kaketak er n̄an … bwe ren eo̧ron̄ naan ko an Anij im kememej im kōjparok kien ko iien otemjej ilo men otemjej.”13
Ro jeiū im jatū, niknik n̄an jem̧ļo̧k in ej mālijjon̄ eo eļap an rikaļoor. Kaļoor eo an kajjojo raan enaaj kōmlet jibadbad indeeo eo ad. Ruj n̄an Anij, atartar n̄an m̧ool eo, kōjparok bujen tampeļ ko ami rekwojarjar, im pād wōt iturin wōjke eo!
Ij kwaļo̧k kam̧ool kōn Kraist eo emour, kar jerkakpeje. Ijeļā bwe E emour. Ikideelel eo aō eļaptata ej bwe inaaj m̧ool im tijlek n̄an jem̧ļo̧kin ilo aō ļoor waanjon̄ak eo An eļap. Ilo etan ekwojarjar Irooj Jisōs Kraist, amen.