Rijojomar ro an Naan in Kean̄ eo an Baam̧le
Jān Bonnie L. Oscarson
Būreejtōn eo an Doulul eo Eutiej an Jiron̄ ro
Jān jipan̄ kalōk aelōn̄ in kiin̄ eo an Anij ilo ad jutak pen im rijojomar ro kōn m̧are, eddo ko an m̧am̧a im baba, im ilo kapijuknen.
Ej juōn jeram̧m̧an im m̧ōņōņō n̄an pād ilo kweilo̧k in em̧m̧an an leddik ro im kōrā ro. Jelukkuun jeram̧m̧an āinwōt kōrā ro n̄an kobatok ippān doon joteenin ilo bōro kūk im iakwe.
Jem̧aan ļo̧k iaar riiti bwebwenato eo an Marie Madeline Cardon, eo, ippān baam̧le eo an, raar bōk ennaan in gospel eo an Jisōs Kraist jān mijinede ro m̧oktata im raar kūr er n̄an jerbal ilo Italy ilo 1850. Eaar juōn jiron̄ wōt bōlen 17 ak 18 iiō ke raar peptaij. Juon Jabōt, ke rej kabun̄jar ilo m̧weo im̧weer itulōn̄in to̧l ko iturear in Italy, juōn jarlepju in em̧m̧aan ro renana, ekoba jet iaan rūkaki in kabun̄ ko ilo jikin eo, raar doululi m̧weo im jino ekeroro, lam̧ōj, im ba bwe mijenede ro ren diwōj nam̧ōjtak. Ijjab tōmak raar ikdeleel in ekkatak gospel in—raar kōņaan kakkure er. Marie eo edik eaar diwōj nam̧ōj ļo̧k im jeļm̧ae rinana ro.
Raar lelam̧ōjm̧ōj wōt im kar kajjitōk bwe mijenede ro ren diwōj tok. Marie eaar kotak Baibōļ eo ilo pein im jiron̄ er bwe ren ilo̧k. Eaar jiron̄ er bwe elder ro rej pād ilo kōjparok eo an im bwe reban kōmetak er. Ron̄jake naan kein an make: “Aolep raar ikūn̄. … Anij eaar pād ippa. Eaar likūt naan kein ilo lon̄iū bwe in kōnono, ak n̄a make, ijjab maron̄ kar kwaļo̧ki. Eaar m̧ōkaj, an aolep ikūn̄. Jarlepju in em̧m̧aan diben ro raar leln̄o̧n̄ im mijak ke rej jutak im̧aan mejen leddik eo.” Rūkaki ro raar ba n̄an em̧m̧aan ro bwe ren em̧akūt, im raar em̧akūt ilo jook, mijak, im raar joļo̧k aer bōd. Jarlepju jidikdik in rekar kadedeļo̧k kweilo̧k eo aer ilo aenōm̧m̧an.1
Baj pijaiki ļo̧k m̧ōk jon̄an peran in an leddik in edik, jon̄an wōt iiō kane an elōn̄ iami, ej jutak ņae jarlepju in em̧m̧aan ro renana im jojomare tōmak ko an kōn peran im kajoor?
Jejtōr raņ, jet iaad remaron̄ in jelm̧ae juōn jarlepju in rinana, ak ewōr juōn tariņae ej bōk jikin ilo laļ in rainin eo me rej kajjieon̄ kakkure katak ko ad rem̧m̧an im relukkuun aorōk. Ij kōnono kōn pedped in katak eo an baam̧le. Kwojarjar eo an kapijuknen im kōttōbar ko raorōk an baam̧le rej elootani, kōnanaiki, im kakkuri ilo elōn̄ wāween ko.
Ke Būreejtōn Gordon B. Hinckley eaar jino ritti “Baam̧le Eo: Juon Kean̄ n̄an Laļ in” 20 iiō ko rem̧ootļo̧k ilo iiō in, jej m̧ōņōņō kake im kaorōke, pedped in, im m̧ōdenļo̧k eo em̧ool an peba in. Jaar jab lukkuun meļeļe kake tōre eo ewi jon̄an ad lukkuun aikuji kain ennaan kein ilo laļ in rainin āinwōt jon̄ok ko me jemaron̄ kālet jeļā eo an laļ in me rej waļo̧k n̄an kōj jān pija, Intōrnet, rijeje ro, TV im pija ko, im em̧ool jikin pepe ko. Kean̄ eo an baam̧le eaar erom̧ pedped in katak eo ad n̄an jum̧ae jeļā ko an laļin, im ij kam̧ool bwe pedped ko kar kwaļo̧ki ilo ennaan in rej m̧ool rainin āinwōt aer kar litok n̄an kōj jen juōn rikanaan an Anij enan̄in 20 iiō rem̧ootļo̧k.
In kwaļo̧k jet alikar ko? Mour ej ettōr ekkar n̄an karōk eo an kajjojo, im jej lukkuun jeļā bwe ejjab aolep kōrā rej en̄jake ta kean̄ eo ej kōmeļeļeki. Ej aorōk wōt n̄an meļeļe im katakin jon̄ok eo an Irooj im kajjieon̄ dāpij jon̄ok ko jon̄an wōt ad maron̄.
Kōj Kajjojo ewōr juōn ad eddo, im kōj kajjojo jej juōn wōt imaan mejān Irooj. Jej aikuj keememej bwe Jemedwōj Ilan̄ eo eļap iakwe ippān ejeļā kōn wānōk in kōņaan ko ad im naaj kautiej kallim̧ur ko An me ejjeļo̧k enaaj dāpiji jān ro rej kōjparok bujen ko aer. Ewōr juōn an Jemedwōj Ilan̄ mijen im karōk n̄an kōj kajjojo, ak E ebarāinwōt wōr An make iien. Juōn iaan idajon̄jon̄ ko reppen ilo mour in ej n̄an bōk tōmak ilo Irooj. Ej juōn ļōmņak emman n̄an bōk juōn karōk eo eokoktak, eo ejipan̄ kōj n̄an dāpij bujen ko, m̧ōņōņō, im kōrā ro rōwānōk ro rej kalōk aelōn̄ in kiin̄ eo an Anij jekdo̧o̧n kain jekjek rot eo jej jelm̧ae. Jej aikuj katakin leddik ro nejid juōn men eo eaorōk im n̄an jutak ņae iien ko renana.
Ilo 20 iiō in ad kemeem kean̄ eo an baam̧le, ij kwaļo̧k juon idajon̄jon̄ n̄an kōj aolep āinwōt kōrā in Kabun̄ in n̄an rijojomar ro an ”Baam̧le Eo: Juon Kean̄ n̄an Laļ in.” Āinwōt Marie Madeline Cardon ke eaar peran ilo an kōjparok mijinede ro im tōmak ko ad, jej aikuj lukkuun peran n̄an jurake katak ko Irooj eaar kwaļo̧ki kōn m̧are, baam̧le ko, jerbal ko rekwojarjar an em̧m̧aan im kōrā, im aorōk eo an kapijuknen ko āinwōt jikin ko rekwojarjar—men̄e laļin ej lam̧ōj n̄an lo̧jiln̄id bwe pedped in katak kein rejjab m̧ool, ejjeļok meļeļeier, im ejjeļok tokjier. Kajjojo, jekdo̧o̧n ta jekjek ko aer ak jete ajri, remaron̄ in rijojomar ro n̄an karōk eo an Irooj me emōj kōmeļeļeiki ilo kean̄ eo an baam̧le. Eļan̄n̄e ej karōk eo an Irooj, ej aikuj barainwōt karōk eo ad!
Ewōr jilu pedped in katak ko kar kwaļo̧ki ilo kean̄ in me ij ļōmņak relukkuun menin aikuj n̄an rijojomar ro. Men eo m̧oktata ej m̧are eo ikōtaan juōn em̧m̧aan im juōn kōrā. Kar katakin kōj ilo jeje ko rekwojarjar, ”Ijoke kōrā e jab anemkwōj jān m̧aan, ak m̧aan anemkwōj jān kōrā, ilo Irooj.”2 Bwe aolep ren bōk kōjeram̧m̧an ko an relippio an priesthood, eaikuj wōr liāp ikōtaan ļeo im lieo pālele ilo m̧weo im̧ōn Irooj, jerbal ippān doon ilo kwojarjar, im pen wōt n̄an bujen ko aer. En̄in ej karōk eo an Irooj n̄an ajri ro Nejin, im ejjeļo̧k jon̄an kōnono ko ak jum̧ae ko naaj ukōt ta eo Irooj eaar kwaļo̧k. Jej aikuj in wōnm̧aanļo̧k kōn jon̄ok ko an m̧are, pukōt kōjeram̧m̧an ko n̄an mour ko ad, im bōk tōmak eļan̄n̄e edik an waļo̧k. Jen rijojomar ro an m̧are āinwōt ilo wāween eo kar kōmeļeļeiki jen Irooj n̄an kwaļo̧k wōt iakwe im tūriam̧o n̄an ro eoktak aer loe.
Pedped in katak eo tok juōn ņaetan n̄an jurake ainikiid ilo kautiej ej jerbal ko rekwojarjar an m̧am̧a ro im baba ro. Jej kijerjer in katakin ro nejid n̄an kōtōbar joko reutiej ilo mour in. Jej barāinwōt kōņaan bwe leddik ro nejid ren jeļā bwe remaron̄ tōpar im erom wōn eo rej kōņaan. Jej kōjatdikdik bwe renaaj iakwe ekkatak, jeļāļo̧kjeņ, taļen, im bōlen erom Marie Curie ak Eliza R. Snow.
Jej ke barāinwōt katakin ļaddik ro im leddik ro nejid bwe ejjeļo̧k nōbar eļap ļo̧k, ejjeļo̧k taitōļ en eļap ļo̧k, im ejjeļo̧k jerbal eaorōk ļo̧k ilo mour in jen jerbal eo an m̧am̧a im baba? Ij kōjatdikdik bwe ilo ad rōjan̄ ajri ro nejid n̄an bōk men eo em̧m̧aantata ilo mour in bwe jen barāinwōt katakin er n̄an kautiej im kile jerbal ko me m̧am̧a im baba ro rej kōm̧m̧ani ilo karōk in an Jemedwōj Ilan̄.
Leddik eo nejūm̧ ediktata, Abby, eaar lo juōn iien em̧m̧an n̄an jutak āinwōt juōn rijojomar ilo jerbal an juōn m̧am̧a. Juōņ raan eaar bōk juōn leta jān jikin jikuul eo an ro nejin bwe ewōr aer Career Day Presentations ilo jikuul eo. M̧am̧a im baba ro rej ruwainene n̄an jilkinļo̧k juōn peba eļan̄n̄e rekōņaan etal n̄an jikuul eo n̄an katakin ajri ro nejier kōn jerbal ko aer, im Abby eaar en̄jake n̄an kanne bwe en im kōnono kōn eddo ko an juon m̧am̧a. Eaar jab ron̄ jān jikuul eo, im ke Career Day eaar epaak tok, eaar kūr ļo̧k jikuul eo ilo taļepo̧o̧n, ļōmņak remaron̄ kar kajakoik aplikeijen eo an. Rilorlorjake ro raar kappok kūlaj ko emaron̄ bōk kūņaan ie im raar lo rūkaki ro raar errā bwe Abby en itok im kōnono n̄an kūlaj ko aer ilo jem̧ļo̧kin ļo̧k Career Day eo.
Ilo presentation eo an ekalimomo n̄an ajri ro, Abby eaar katakin er, ibwiljin men ko jet, bwe en juōn kōrā eo ejeļā jabdewōt kōn uno, jukjukinpād, kabun̄, katakin, al, jeje, jin̄a, jāān, kainōknōk, kilen kōm̧m̧an bar, kattōr, ikkure, kōmat, im elōn̄ men ko. Ajri ro raar bwilōn̄. Eaar kadedeļo̧k bwe kajjojo ajri ren keememej jineer ilo aer je leta in kam̧oolol im kwaļo̧k kam̧oolol kōn eļap kea im jerbal in jipan̄ eo rej būki kajjojo raan. Abby eaar en̄jake bwe ajri ro raar lo ro jineer ilo juōn meram ekāāl im bwe erom̧ juon m̧am̧a ak baba ej juōn men eo eļap an aorōk. Eaar kōņaan bar kwaļo̧ke ilo iiō in im kar kūr tok bwe en kwaļo̧k n̄an kūlaj ko jiljino.
Abby eaar ba kōn en̄jake in an: “Iaar ļōmņak enaaj kar pidodo ilo laļin bwe juon ajri en meļeļe bwe erom juon m̧am̧a ak baba ej jerbal eo kein karuo ak bōlen jet iien ejjab ekkar. Ikōņaan bwe aolep ajri ren en̄jake ke reluukkuun aorōk ippān ro jineer im jemeer, im bōlen jiron̄ er ewi aorōkin āinwōt juōn m̧am̧a ak baba n̄an eō enaaj jipan̄ er kile aolep men ko ro jineer im jemeer rej kōm̧m̧ane im etke.”
Rikanaan eo ad ejitenbōro, Būreejtōn Thomas S. Monson, ej juōn waanjon̄ok eo em̧m̧an n̄an kautiej kōrā ro im jerbal ko aer, eļaptata kōrā eo jinen. N̄an kōnono kōn ro jined ilo laļin, eaar ba: “Jen kajjojo kaorōk m̧ool in; juōn eban meļo̧kļo̧k jinen im keememej Anij. Juōn eban keememej jinen im meļo̧kļo̧k Anij. Etke? Kōnke armej rein ruo raorōk, Anij im eo jineed [ilo laļin], rej ippān doon ilo kōm̧anm̧an eo, ilo iakwe, ilo en̄taan, ilo jerbal in jipan̄, rej juōn wōt.”3
Pedped in katak eo āliktata ej aikuj in jurake im jojomare ej kwojarjar eo an kapijuknen. Jej aikuj bōk juōn naan eo jet iien ej waļo̧k ilo kajirere im ļōn̄aj e. Naan eo ņe ej rilolorjake m̧weo. Kōj kajjojo—kōrā ro, em̧m̧aan ro, jodikdik ro, im ajri ro, jab m̧are ak m̧are—maron̄ jerbal āinwōt Rilolorjake m̧weo. Jej aikuj ”kōm̧m̧an bwe kapijuknen ko ad” ren jikin kone, kwojarjar, im jo̧ko̧ne. Kapijuknen ko ad reaikuj in jikin ko ijo jemaron̄ en̄jake Jetōbin Irooj im ijo jemaron̄ ekkatak jeje ko rekwojarjar im gospel, katakin, im mour kaki. Enaaj kōm̧m̧an juōn oktak eļap ilo laļ in eļan̄n̄e aolep armej renaaj lo er make āinwōt rikōm̧m̧an jim̧we ilo kapijuknen ko. Jen aolep kōjparok kapijuknen eo āinwōt jikin eo wōt ekwojarjar āinwōt tampeļ eo.
Jejtōr raņ, ij m̧ōņōņō bwe in juōn kōrā ilo raan kein āliktata. Ewōr ad iien em̧m̧an im maron̄ eo me ejjan̄in kar wōr ippān epepen ko jet an kōrā ilo laļin. Jān jipan̄ kalōk aelōn̄ in kiin̄ eo an Anij ilo ad jutak pen im rijojomar ro kōn m̧are, eddo ko an m̧am̧a im baba, im ilo kapijuknen. Irooj ekōņaan bwe jen kajoor, dim, im ritariņae ro repen me renaaj kōjparok karōk eo An im katakin epepen ko rej itok kōn m̧ool ko An.
Ij kam̧ool bwe Jemedwōj Ilan̄ emour im ej iakwe kōj aolep. Nejin, Jisōs Kraist, ej ad Rilo̧mo̧o̧r im Ripinmuur. Ij likūt aō naan in kam̧ool in ippāmi ilo etan Jisōs Kraist, amen.