2010–2019
Epepen eo Em̧m̧an tata an Rūm̧m̧an Ded ro
Eprōļ 2015
15:45

Epepen eo Em̧m̧an tata an Rūm̧m̧an Ded ro

Jān Elder M. Russell Ballard

Jen Doulul eo an Jon̄oulruo Rijilōk ro

Ta eo jej aikuji rainin kiiō ej epepen eo em̧m̧an tata an rūm̧m̧an ded ro ilo bwebwenato in Kabun̄ in. Kōm̧ij aikuji aolepen būruōm̧ im am̧.

Juon iaan lan̄lōn̄ eo aō eļap ilo aō ito-itak ipeļaakin laļin ej iien em̧m̧an n̄an ioon im iak-iakweik mijinede ro. Elder im sister rein rem̧m̧an rej kwaļo̧k Meram eo an Kraist, im ij aolep iien im̧we kōn iakwe eo aer n̄an Irooj Jisōs Kraist im aer wūjļepļo̧k im jerbal n̄an E. Aolep iien ij iak-iakweiek er im en̄jake jetōb im tōmak eo aer eļap, Ij ba n̄an eō make, “Rein raiboojoj nejid ļaddik im leddik rej lukkunin menin kabwilōn̄lōn̄!”

Ilo Oktoba 2002 kweilo̧k eo eļap an priesthood, iaar kōketak bisop ro, m̧am̧a im baba ro, im ļaddik ro rej kōppopo n̄an “kōļapļo̧k jon̄ak eo” n̄an jerbal eo an mijinede ro rej jerbal aolep raan.

Innām iaar ba bwe “ta eo jej aikuji … ej epepen eo em̧m̧an tata an mijinede ro ilo bwebwenatoin Kabun̄ in. Jej aikuji ro rerreeo, rekarbab, mijinede ro rej kōppopo ilo jetōb. …

“…Jej aikuji aolepān būruōm̧ im am̧. Jej aikuji ro remourur, ro rebolel, mijinede ro retinkwadik ro me rejeļā ron̄jake im uwaak n̄an unojdikdik ko an Jetōb Kwojarjar.”1

Ilo laļ in rainin elōn̄ wāween ko eļap ļo̧k aer pen jen kar 13 iiō ko rem̧ootļo̧k. Likao ro im jiron̄ ro nejid eļap ļo̧k men ko rej m̧ad kaki ilo aer kōppopo jim̧or n̄an mijen im mour lemōņōnō ilju im jekļaaj. Kein jerbal ko raan kein em̧ōj an ļapļo̧k, im enan̄in aolep rej kōjerbal taļeboon ko kam̧putōr jidik ko ko me remaron̄ kōm̧ad baam̧le ko an Anij jim̧or ilo em̧m̧an im nana.

Joteen in ikōņaan kōnono n̄an mijinede ro rej jerbal kiiō, mijinede ro ilju im jeklaj, im mijinede ro rej kab ro̧o̧ltok, im aolep em̧m̧aan ro rem̧m̧an ded ilo Kabun̄ in. Ij jar bwe kom̧ naaj meļeļe im lukkuun ļōmņak kōn ta eo ij ba n̄an kom̧ ilo am̧ dibuki ial in kōn iiō kein rekaitoktok limo im reppen ilo mour ko ami.

Ilo tore ko jem̧aan ilo Kabun̄ in, mijinede ro rekōn intōrpiu jen juon Routiej an Kabun̄ in m̧okta jen aer ilo̧k n̄an mijen ko aer. Raan kein kwoj intōrpiu n̄an jerbal āinwōt mijinede jen bisop im stake būreejtōn ro am, im elōn̄ iami renaaj etal ilo aolepen mour eo ami ilo ami jab intōrpiu jen juon Routiej an Kabun̄ in. En̄in ej juon jōkjōk em̧ool aolepen laļin ilo kabun̄ in im elōn̄ ļo̧k jen 15 milien membōr ro. Ijeļā ij kōnono n̄an Em̧m̧aan ro karejera ilo aō ba kōm̧ij kōjatdikdik en kar em̧m̧an n̄an kōm̧ n̄an lukkuun jeļā kajjiemi aolep im n̄an ba n̄an kom̧ ke kōm̧ij iakwe kom̧ im rejetak kom̧.

Ilo m̧ool Irooj eaar letok n̄an kōj eļōn̄ iaļ ko n̄an am̧ tōpar kom̧. N̄an waanjon̄ok, juon membōr in Doulul eo an Jon̄oulruo ro rej jitōn̄ kajjojo mijinede n̄an mijen ko aer. Jekdoon n̄e menin ej dedeļo̧k ilo jab jelm̧ae doon ilo intōrpiū, kein jerbal ko raan kein im revelesōn rej ippān doon n̄an letok juon en̄jake me ekabwilōn̄kōn̄ im an juon make. In jiron̄ kom̧ ekōjkan an jerbal men in.

Pijaim ej itok ilo computer, ippān tok meļeļe ko kar litok jen bisop im stake būreejtōn eo am̧. Ilo an pijaim waļo̧k, kōm̧ij kalimjōk mejam̧ im etale uwaak ko am̧ n̄an kajjitōk ko ilo peba in mijen eo. Ilo iien in, ej āinwōt n̄e kwoj pād im uwaak tok n̄an kōm̧.

Ilo am̧ lale pijaim, kōm̧ij leke bwe kopojak ilo jabdewōt wāween n̄an “kōļapļo̧k jon̄ak eo” eo im rekkar rainin n̄an eo etiljek, mijinede eo epolel. Innām, jen kajoor in Jetōbin Irooj im ium̧win tōl eo an Būreejtōn Thomas S. Monson, kōm̧ij jitōn̄ eok n̄an juon iaan mijen ko an kabun̄ in 406 ipeļaakin laļin.

Jaab, ejjab āinwōt juon make ak jelm̧ae ilo intōrpiū. Bōtaab epaak.

Kweilo̧k ilo video ej bar juon wāween n̄an jipan̄ kōm̧ tōpar ritōl ro an Kabun̄ in im membōr ro rej jokwe etto ļo̧k jān opiij eo eļap an Kabun̄ in.

Kōn lōmņak in, Ikōņaan bwe ro iami rej kōppopo n̄an jerbale mijen ko, ro em̧ōj aer ro̧o̧ltok, im aolep rūm̧m̧an ded ro n̄an joļo̧k jidik iien ippa āinwōt n̄e jej bwebwenato ilo video juon ilo̧k juon kiiō. Jouj im kalimjōk eō jidik āinwōt n̄e kwe im n̄a kejro ej make wōt ilo ruum̧ eo, jekdo̧o̧n ia eo kwoj pād ie joteen in.

N̄an n̄a, Inaaj pijaikļo̧k āinwōt n̄e ij kalimjōk mejām im lukkuun ron̄jake uwaak ko am̧ n̄an jejjo iaan kajjitōk ko me ij tōmak renaaj ba n̄an eō eļap melele kōn naan in kam̧ool eo am̧ im am̧ wūjlepļo̧k n̄an Anij. In kōmeļeļik ilo tukadu in ta eo iaar ba n̄an mijinede ro 13 iiō ko rem̧ootļok, ta eo jej aikuji rainin kiiō ej epepen eo em̧m̧an an rūm̧m̧an ded ro ilo bwebwenatoin Kabun̄ in. Kōm̧ij aikuji aolepen būruōm̧ im am̧. Jej aikuji ro remourur, jeļā ļōmņak, mijinede ro retinkwadik ro me rejeļā ron̄jake im uwaak n̄an unojdikdik ko an Jetōb Kwojarjar ilo am̧ dipļo̧ki apan̄ ko im kapo ko kajjojo raan āinwōt juon jodikdik in Armej ro Rekwojarjar ilo Raan-ko Āliktata.

Ilo naan ko jet, ej iien n̄an kōļapļo̧k jon̄ak ko ejjab mijinede ro wōt ak ej barāinwōt mijinede ro rej kab ro̧o̧ltok im aolepen epepen in. Kōn unin, jouj im kejo̧kļo̧kjeņ ilo būruwōmi uwaak ko n̄an kajjitōk kein:

  1. Emakijkij ke am riiti jeje ko rekwojarjar?

  2. Kwoj ke bukwelōlō ilo jar im kōnono ippān Jemedwōj Ilan̄ kajjojo jibbon̄ im kajjojo jota?

  3. Kwoj ke jitlo̧k im leļo̧k jortak in jitlo̧k kajjojo allōn̄―men̄e kwoj juon rijeram̧ōļ, rijikuul eo epen auia eo ejjab maron̄ leļo̧k eļap?

  4. Kwoj ke lukkuun ļōmņak kōn Rilo̧mo̧o̧r im en̄taan in Pinmuur eo An kōn kwe n̄e kwoj kūr n̄an kepooje, kōjeram̧m̧ane, leto-letake, ak bōk m̧ōttan kwojkwoj eo?

  5. Kwoj ke pād ilo kweilo̧k ko am̧ im kajieon̄ kōjparok kwojarjar eo an raan in Jabōt?

  6. Kwoj ke m̧ool ilo kapijuknen, jikuul, kabun̄, im ilo jikin jerbal?

  7. Kwoj ke erreeo ilo ānbwiin im ilo jetōb? Kwoj ke kejekdoon pija ko renana ak lale website ko, māākjiin ko, pija ko, ak app ko, ekoba Tinder ak kein pija ko, me remaron̄ kajook eok eļan̄n̄e ro jinōm̧ im jem̧ōm̧, ritōl ro am ilo Kabun̄, ak Rilo̧mo̧o̧r Make eloe eok?

  8. Kwoj ke kōjparok iien ko am―kōjekdoon kein jerbal ko raan kein im social media ko, ekoba video game ko, me remaron̄ kakkure mour in jetōb eo am̧?

  9. Ewōr ke jabdewōt men ilo mour eo am̧ kwoj aikuj in ukōte ak kōm̧m̧ane, jinoe joteenin?

Kom̧ool kōn iien lotok in am ekadu. Ij kōjatdikdik bwe kwar uwaaki kajjojo iaan kajjitōk ilo m̧ool im jejjet. Eļan̄n̄e kwoj lo ke ejako jabdewōt iaan pedped in katak kein, innām ij kipel eok n̄an ukweļo̧k im jino mour ekkar n̄an jon̄ok ko an ko̧jpeļ in kōn jerbal in rikalo̧o̧r ewānok.

Kiiō em̧m̧aan ro jeiū im jatū, Ij lewaj jet kapilōk me enaaj jipan̄ kom̧ bōk naan in kam̧ool eo am̧ epen ilo būruōm̧ im am̧?

In kakeememej kom̧ mijinede ro rej kab ro̧o̧l tok bwe am̧ kōppopo n̄an mour im baam̧le eaikuj in wōnm̧aanļo̧k wōt. “RM” ejjab meļeļe “bōjrak jān Mormon!” Āinwōt juon mijinede eo ej kab ro̧o̧l tok, kwoj aikuj bōk kūņaam̧ ilo men eo em̧m̧an, kōm̧m̧ani men ko ilo iien ko am make, im bōktok mour kwojarjar.2

Jouj kōjerbal kapeel ko kwar ekkatak ilo mijen eo am̧ n̄an kōjeram̧m̧an mour ko an armej ro ipeļaakūm̧ kajjojo raan. Jab joļo̧k mije eo am̧ n̄an jipan̄ ro jet n̄an mije eļaptata ilo jikuul, jerbal, ak m̧akūtkūt ko. Ijoke, pelane mour eo am ippān en̄jake ko an jetōb me ekakeememej im kepooj eok n̄an wōnm̧aanļo̧k wōt, kwaļo̧k kajjojo raan n̄an ro jet.

Ilo mijen ko ami kwar katak aorōk eo an loļo̧k armej ro ilo m̧oko im̧weer. Ij kōjatdikdik bwe aolep rūm̧m̧an ded ro nejid, men̄e kwar jab jerbale juon mijen aolep raan, meļeļe aorōk eo an loļo̧k armej ro remake, nan̄inmej, ak būrom̧ōj―ejjab wōt ilo juon ijjitōn̄ ak kōn iakwe eo am̧ n̄an Jemedwōj Ilan̄ im ajri ro Nejin.

N̄an kom̧ ro rej pād ilo high school im pojak n̄an mijen, Ij rōjan̄ kom̧ n̄an bōk kuņami im diwōjļo̧k jān jemenere. Kom̧ rūm̧m̧an ded ro kom̧win deļo̧n̄eļo̧k jikuul an kabun̄ in.3 Eļan̄n̄e kwoj pād ilo jikuul an Kabun̄ in, ekutkut am kobaiki juon kūlaj kajjojo jemejta ilo jikuul ko an kabun̄ in. Ilo tōre in kōppopo in am̧i eaorōk n̄an mijen ak m̧are indeeo im mour āinwōt juon rūm̧m̧an ded, kom̧ij aikuj wōnm̧aanļo̧k wōt im pukot wāween ko n̄an ekkatak im eddōk ļo̧k im bōk im̧we im tōl an Jetōb Kwojarjar. Lukkuun ekkatak ko̧jpel ilo jemenere, jikuul an kabun̄ in, ak kūlaj ko ilo jikuul ko an kabun̄ in remaron̄ jipan̄ eok ilo kōttōbar eo am̧.

Men̄e kwoj pād ilo juon jikuul an Kabun̄ ak jaab, men̄e kwoj pād ilo college ak jaab, jab ļōmņak koboub n̄an ekkatak ko̧jpeļ eo. Jemenere institute an kabun̄, ak kūlaj ko ilo jikuul ko an kabun̄ in naaj pelane ilo mour eo am im kōļap jeļāļo̧kjeņ eo am im bar lewaj am̧ iien em̧m̧an n̄an ekkatak jeje ko rekwojarjar im katak ko an rikanaan ro im rijilōk ko. Ewōr emen kooj ko rekāāl me ikōņaan rōjan̄ aolep rūm̧m̧an ded n̄an lali im ekkatak jeni.4

Im jab meļo̧kļo̧k bwe kūlaj ko im m̧akūttkūt ko an jikuul an kabun̄ in ijo kwoj jokwe ie ak ilo YSA ward ak stake naaj barāinwōt juon jikin ijo komaron̄ in pād ippān likao im jiron̄ ro jet im lōn̄aj im jipan̄ doon ilo am ekkatak im eddōkļo̧k ippān doon ilo jetōb. Em̧m̧aan ro jeiū im jatū, eļan̄n̄e kwonaaj likūt jeeļ bo̧o̧n eo am̧ im reito-reitak jidik, kwonaaj bōlen lo karejeram̧ eo ilju im jeklaj.

Eo ej kōm̧m̧an bwe in kwaļo̧k bar jidik kapilōk me ijeļā ta eo inaaj kar kōnono kake: Kom̧ rūm̧m̧an ded ro kom̧ij aikuj date im m̧are. Jouj im jab karum̧wijļo̧k! Ijeļā jet iami remijak in m̧are. Ijoke, eļan̄n̄e konaaj mareiki armej eo ejejet ilo iien eo ejejet im ilo jikin ko rejejet, kojamin mijak. Ilo mool, elōn̄ būrabōlem̧ ko kom̧ij ioone naaj jako eļan̄n̄e kwoj “lukkun bōk kuņaam” ilo date ko rerreo, jerā, im m̧are. Jab jeje n̄an e! Kōjerbal ainikiem̧ make n̄an kwaļo̧k kadkadim make n̄an leddik ro raorōk nejin Anij me repād ipeļaakūm̧. N̄an ron̄jake ainikien juon armej enaaj kailbōk e im jujen ba aeet.

Kiiō, ro jeiū im jatū, Ij kam̧ool n̄an kom̧ bwe Irooj Jisōs Kraist emaron̄ jipan̄ kōj mijaļ jabdewōt men eaikuj mijaļ ilo mour ko ad kōn en̄taan in pinmuur eo An.

Joteen in, ilo ad kōpooj kōj n̄an kemeememej Jabōt in Ijtō in ilju, jouj im bōjrak ippa n̄an keememej menin letok eo an Pinmuur eo an Kraist. Keememej bwe Jemedwōj Ilan̄ im ad Rilo̧mo̧or Jisōs Kraist, ejeļā kajjiem̧ im eļap an iakwe eok.

Kōn Pinmuur eo, Ripinmuur eaar bōk ioon E make inepata ko ad, metak ko, im jerawiwi ko. Rilo̧mo̧o̧r eo an laļin eaar jeļā kōj kajjojo ilo an kar idajon̄jon̄ kōjatdikdik ko ad, apan̄ ko im būromōj ko ad kōn en̄taan eo An ilo Getsemane ioon dābwāāl.5Eaar mej ilo iakwe āinwōt juon jem̧ļo̧k eo āliktata im kar kalbwini ilo juon lōb ekāāl ilo joteen eo.

Ilo jibbon̄in Jabōt, Jisōs eaar jerkak jān mej―letok juon mour ekāāl n̄an kōj kajjojo. Irooj eo em̧ōj an jerkak eaar jiron̄ rikaļoor ro An n̄an katakin aolep n̄an bōk tōmak ilo Kraist, ukwelo̧k jen jerawiwi, peptaij, bōk menin letok eo an Jetōb Kwojarjar, im niknik n̄an jem̧ļo̧kin. Em̧m̧aan ro jeiū im jatū, jej jeļā bwe Anij Jemed im Nejin Jitenbōro kar loļo̧k Rikanaan Joseph Smith im kōn e kar kōjepļaaktok tarlep in ko̧jpeļ eo an Jisōs Kraist

Kom̧in kajoor, em̧m̧aan ro jeiū im jatū, Kōjparok kien ko an Anij. Irooj Jisōs Kraist eaar kallim̧ur kōn aolep kōjeram̧m̧an ko jej kōņaan kōm̧m̧ani ilo jim̧we bwe naaj ad. Ritōl ro an Kabun̄ in rej lōke kom̧. Ko̧m̧ij aikuji elōn̄ iami rūm̧m̧an ded ro rej kōppopo n̄an m̧are, n̄an jerbal in mijinede, im n̄an tōl ilo raan kane rej itok, kōn men kein ij jar ilo etan ad Irooj Jisōs Kraist, amen.