Kobrak M̧ōko Im̧ōd kōn Meram im M̧ool
Jān Cheryl A. Esplin
Rikakpilōklōk eo Kein Karuo ilo Būreejtōnji eo Eļap an Būraimere
Bwe kōj im baamle ko ad jen anjo jān nana ko an laļ, jej aikuj obrak kōn meram im m̧ool.
Buruō eaar obrak kōn Jetōb ilo roñjake an baamle kein katakin kōn m̧ool eo ekwojarjar, “Baamle eo ej jān Anij.”1 Al ko reimwe ej juon wāween ko rellōñ jemaroñ eñjake an Jetōb wunōjdikdik ñan kōj, kobrak kōj kōn meram im m̧ool.
Meļeļe eo ikkijen obrak kōn meram im m̧ool eaar erom juon menin aorōk ñan ña jen wōt eñjake eo aō elōñ iiō ko remootļo̧k. Iaar pād ilo juon kweilo̧k eo ro uwaan boot eo an Doulul eo an Jiroñ raar katakin kōn kōkajoor in jetōb ilo baam̧le ko im ilo m̧oko. Ñan an alikkar lo kōmeļeļe in, juon ritōl an Doulul eo an Jiroñ ro ekar kotak ruo kāān in kola. Ilo juon pā eaar kotak kāān eo ejjeļo̧k kobban im ilo pā eo irājet juon kāān eo ejañin kar rub im eobrak kobban. Moktata, eaar keen kāān eo ejjeļo̧k kobban; ekar jino nokjōk innem jebdak kōn kajoor eo. Tokālik, kōn pā eo irājet, eaar keen kāān in koļa eo ejjañin kar rub. Ear kijñeñe wōt. Eaar jab nokjōk ak jorrāān āinwōt kāān eo ejjeļo̧k kobban kōnke eaar obrak.
Jej keidi wāween in kōmeļeļe kake ñan mour kein ad kajojo im ñan mōko im baam̧le ko ad. Ilo ad obrak kōn Jetōb im kōn m̧ool eo an ko̧jpeļ, ewōr ad kajoor ñan anjo jān kapo ko an laļ in im rej jebo̧o̧l im kinōōr ļo̧k kōj. Ijokwe, eļan̄n̄e jejjab obrak kōn jetōb, ejako kajoor eo ippād ñan ad bōbrae kapo im maron̄ jebdak ilo an kapo ko iuun kōj.
Setan ejjelā bwe kōj im baam̧le ko ren maroñ anjo jān kapo an laļ in, jej aikuj obrak kōn meram im m̧ool an gospel. Im ej kōm̧m̧an jabdewōt men ilo an kajoor ñan kōmōjno̧, pukwōj im kakkure m̧ool eo an gospel im dāpij kōj jān m̧ool in.
Elōn̄ wōt iaad raar peptaij im bōk menin letok eo an Jetōb Kwojarjar, eo eddo eo an ej ñan kwaļo̧k im katakin kōn m̧ool eo ilo men otemjej.2 Kōn jeram̧m̧an in ilo menin letok in ej itok eddo eo ñan pukōt m̧ool eo, mour kōn m̧ool eo jejelā kake, innem kwaļo̧k im dāpij m̧ool eo.
Juon jikin eo jej pukōt em̧m̧an tata ñan obrak kōn meram im m̧ool ej ilo m̧ōko imōd make. Naan ko ilo ko̧rāj in al n̄e jaar roñjake ekakememej kōj “Anij eaar letok ad baam̧le ko ñan jipan̄ kōj ñan erom ta eo ekōnaan bwe jen āinwōt.”3 Baam̧le ko rej jikin katakin ko an Irooj ioon laļ in ñan jipañ kōj katak im mour kōn gospel in. Jaar itok ñan baam̧le ko ad kōn juon un ekwojarjar ñan jipan̄ kōkajoor doon ilo jetōb.
Baam̧le ko rekajoor ñan indeeo im m̧ōko robrak kōn Jetōb rejjab jide. Raar kijejeto, raar bōk iien, im raar bōk kajjojo membōr in baam̧le eo ñan kōm̧m̧ane ijo koņaer. Aolep em roktak, ak aolep em ijo men̄e juon wōt armej ej pukōt m̧ool eo emaron̄ kōm̧m̧an oktak.
Jej wōnmaanļo̧k wōt im bōk kapilōk ñan kōlapļo̧k jetōbōn jeļā ilo ad jar im ilo ad ekatak im kōļmenļo̧kjeņ kake jeje ko rekwojarjar im naan ko an rikanaan ro rej mour. Ilo ennaan eo an ilo kweio̧k eo eļap ikkijen bōk juon naan in kam̧ool kōn meram im m̧ool, Būreejtōn Dieter F. Uchtdorf eaar ba:
“Anij Indeeo im Ekajoor Bōtata … naaj kōnono n̄an ro rej kepaak E kōn juon bōro ettā im lukkuun kōttōpar.
“Enaaj kōnono n̄an er ilo ettōņak ko, vison ko, kōļmenļo̧kjeņ ko, im en̄jake ko.”
Būreejtōn Uchtdorf eaar wōnmaanļo̧k wōt: “Anij ej kea kake kom̧. Enaaj ron̄jake, im Enaaj uwaaki kajjitōk ko ami make. Uwaak in jar eo ami enaaj itok ilo wāween eo An make im ilo iien eo An make, im kōn menin, kom̧ij aikuj in ekatak n̄an ron̄jake Ainikien.”4
Juon bwebwenato in baam̧le ej kōmeļeļeik kōkapilōklōk in.
Jet allōñ ko rem̧ootļo̧k iaar riiti naan in kam̧ool eo an jejtōr eo an lōļļap eo jimaan jinō Elizabeth Staheli Walker. Ke eaar juon ajri eaar em̧m̧akūt ļo̧k ñan Amedka jān Switzerland ippān baamle eo an.
Ālkin an Elizabeth kar m̧are, e im leo pāleen im ajri ro nejin raar jokwe epaake ļo̧k tōrerein Nevada, ijo raar lale juon mōn meel. Mweo mweer eaar juon jikin bōjrak ñan elōñ ritoitak ro. Raan im boñ eiieo rej aikuj bojak in kōmat im naajidik ritoitak ro. Ekar pen, ekam̧ōkm̧ōk, im edik aer kakkije. Ak men eo eļap tata Elizebath eaar inepata kake ej kōnono ko an armej ro ej iiaio ippāer.
Elizebeth eaar ba bwe jān iien eo ñan kiiō ekkein ļōmņake im kaorōke Bok in Mormon eaar m̧ool ilo an jab lukkuun jeļā, bwe Rikanaan Joseph Smith eaar bōk an mālim jān Anij n̄an kōm̧m̧ane ta eo eaar kōm̧m̧ane, im bwe ennaan eo an ikkijen karōk an mour im lo̧mo̧o̧r. Ak mour eo eaar kōtmane ekar jabdewōt men emaroñ kōkajoorlo̧k ta eo ej tōmak kake.
Jet iian rito tak ro rej bōjrak raar lukkuun jeļā riit, mōj aer jikuuļ, em̧m̧aan māletlet ro rekkein kōnono ipeļaakin tebōļ eo an bwe Joseph Smith ekar juon “riko̧o̧t” eo ekar make je Bok in Mormon innem leto letak im kōm̧m̧an jāān. Raar kōm̧m̧an āinwōt ñe aolep men raar bōd, im likūt “bwe aolep men kōn Mormon rōkkōwadoñ.”
Aolep kōnono kein rekōmman an Elizabeth ettoļo̧k im ajimakeke iaan. Ekar ejjeļo̧k juon ñan kōnono ippān, ejjeļo̧k an iien ñan kōm̧m̧ani jar ko an—meñe ej jar ilo an jerbal. Ekar mijak in bar ba jabdewōt ñan ro rej kariab kabuñ eo an. Ekar ba ejaje ak bwe eļan̄n̄e rej kwaļo̧k m̧ool eo, im ekar eñjake an jab maron̄ kar jojomare tōmak eo n̄e en kar kajjieoñ.
Tokālik, Elizabeth im baam̧le eo an kar em̧m̧akūt. Elizabeth ekar ba eaar lapļo̧k an iien ļōmņak im jab lukkuun mad aolep iien. Emakūjkūj an wanļaļļo̧k ñan ruum in jikin kakkon mweik eo ilal im jar ñan Jemedwōj Ilañ kōn ta eo ej kainepataiki—kōn bwebwenato ko ļōmaro rej ļōmņak remāletlet raar jiroñļo̧k kōn gospel in an kowadoñ im kōn Joseph Smith im Bok in Mormon.
Juon bon̄ Elizabeth ekar ettōņak. Ekar ba: “Āinwōt ñe ikar jutak iturin juon iaļan wāikōn, eo ej ettōr tōrerein toļ ko rōttā, iolāpān ļo̧k toļ jidikdik eo iaar lo juon em̧m̧aan ej reilaļtak im kōnono, ak āinwōt ej kōnono ñan juon likao eo ej bukwelōlō; im ej pedoļo̧k ioon juon roñ ioon bwidej. Ekar erļo̧ke pein āinwōt ñe ej iten jibwe juon men ilowaan roñ eo. Iaar maroñ lo penjen ron̄ eo āinwōt ñe emōj kōmakūti jen ijo ļaddik eo ej pedo ļo̧k ioon. Ioon iial eo bwijin armej, ak ejjeļo̧k ej itok limo ippān ro ruo ilo tōrerein toļ eo. Ekar wōr juon men ekar itok ilo ettōnak eo me ekabwilōñ iō im iuruj; … iaar jab ba kōn ettōnak eo aō ñan jabdewōt ak eaar buñ buruwō bwe āinwōt ñe meļeļein enjeļ Moronai ej jiron̄ Joseph ilo iien eo ej bōk pileej ko.”
Ilo jibūriin̄ in 1893, Elizabeth eaar etal ñan Salt Lake City ñan kōjeram̧m̧an tampeļ eo. Eaar kōmeļeļe ta eo ekar loe: “Ijen iaar bar lo ejja pija eo wōt iaar lo ilo ettōnak eo aō. Ij lōmnak ej juon winto kilaaj ekōlar. Eju buruō bwe iaar lo tol Cumorah make, eban kar wōr oktak ie. Iaar eñjake m̧ōņōnō bwe kar kwaļo̧k ñan iō ilo ettōnak juon pija in an enjeļ Moronai ej leļo̧k gold pileej ko ñan Joseph Smith.”
Elōñ iiō ko ālkin bōk ettōņak in jet allōñ m̧okta jān an kar mej ke enañin 88 an iiō, Elizabeth eaar bōk juon eñjake ekajoor. Ekar ba, “Ļōmņak eo eaar itok ilo an alikkar … āinwōt juon armej ej ba ñan ña, … ‘Jab kalbwin naan in kam̧ool eo am ibulōn bwidej.’”5
Epepen ko tokālik, ro ineen rej wōnm̧aanļo̧k im kajoorļo̧k jān naan in kam̧ool eo an. Āinwōt Elizabeth, jej mour ilo juon laļ ebooļ ripere im rikōnana ro rej kakkure im jum̧ae m̧ool ko jej kabwijeri. Jemaron̄ in ron̄ bwebwenato ko rekapokpok im ennaan ko reidaabtōk. Bar āinļo̧k wōt Elizabeth, jenaaj aikuj kōm̧m̧ane ijo em̧m̧antata n̄an kabwijer jabdewōt meram im m̧ool eo ippād, eļaptata ilo jekjek ko reppen. Uwaak ko n̄an jar ko ad remaron̄ jab itok iien eo wōt, ak jej aikuj pukōt iien ko remeļak n̄an pukōt eļapļo̧k meram im m̧ool. Im n̄e jej būki, ej ad eddo n̄an mour kake, n̄an kwaļo̧ke, im n̄an jojomar e.
Ij likūt naan in kam̧ool in aō bwe ijeļā ilo ad kobrak būruwōd im m̧ōko im̧ōd kōn meram eo an Rilo̧mo̧o̧r eo im m̧ool eo, enaaj wōr ippād kajoor eo n̄an anjo ilo aolep jekjek ko. Ilo etan Jisōs Kraist, amen.