Eddo ko an ro Jemād—Mejān Kajjik eo Ad n̄an Indeeo
Jān Larry M. Gibson
Rikakpilōklōk eo Kein Kajuon eo ej kab m̧ōj Kōtļo̧ke ilo Būreejtōnji eo Eļap an Doulul eo an Likao ro
En lapļo̧k ad en̄jaake kōjeram̧m̧an ko relikio an Jemād ilo mour in im kakūrm̧ool jerbal eo An im aiboojoj eo An ilo ad erom jet baba ro ilo baam̧le ko ad n̄an indeeo.
Jema eaar katakin eō juon katak eo eaorōk ke iaar dik. Eaar kūle bwe iaar jino iakwe men bajjōk ko an laļ in. Ke eaar wōr aō jāān, emōkaj aō kōmaate—eiten aolepān n̄an kōņaan ko aō make.
Juon ālkin rālep eaar bōk eō n̄an wia jet aō juuj kāāl. Ilobūļoor eo kein karuo ilo mōn wia eo, eaar kūr eō bwe in reiņabōj ļok ilo wintō eo.
“Ta eo kwoj lo̧e?” eaar kajjitōk.
“Em̧ kilep ko, mejatoto, armej” eaar uwaak eo aō.
“Jete?”
“Elōn̄!”
Innām eaar kwaļo̧k tok jejjo jāān jidik jān bōjo̧ eo an. Ke eaar letok n̄an eō, eaar kajjitōk, “Ta in?”
Ikajju jeļā: “Jāān jiddik tarrin juon taļa!”
Ilo an kortokjān jeļāļo̧kjeņ eo an kōn chemistry, eaar ba, “N̄e kwoj kōōnļo̧ke jāān jiddik kein im kereiki ippān kōbwebweien ko rejejjet, enaaj kar waļo̧k jelba nitrate. Eļan̄n̄e jenaaj unoik wintō in kōn jelba nitrate, ta eo kwonaaj kar loe?”
Ejjeļo̧k aō jeļā, eaar itok ippa tok n̄an juon kūlaaj eaitok im kajjitōk, “Kiiō ta ņe kwoj loe?”
“Ij lo eō .”
“Jaab,” eaar ba, “men ņe kwoj loe ej jelba men ņe ej kwaļo̧k nememeiūm̧. Eļan̄n̄e kwoj lukkuun lale jelba ņe, men eo kwoj loe ej kwe make, im āinwōt juōn rōn̄ōl, enaaj kapenjak am loe mejān kajjik eo n̄an indeeo me emōj an Jemedwōj Ilan̄ kōpooje n̄an kōj.”
“Larry,” eaar wōnm̧aanļo̧k wōt im ba, “jab pukot men ko an laļin ak pukot … m̧okta … aelōn̄ in Anij, im kwōjarjar eo [An]; im naaj korļo̧k men kein otemjej n̄an kom̧’” (Joseph Smith Translation, Matu 6:38 [in Matu 6:33, footnote a]).
Eaar ba n̄an n̄a bwe in kōjparok taļa eo im jab jerwane. Kajjojo iien ij lale, iaar ļōmņake mejān kajjik eo n̄an indeeo me Jemed Ilan̄ eaar kōpooje n̄an eō.
Iaar iakwe jema im wāween an katakin eō. Iaar kōņaan bwe in kar āinwōt e. Eaar katakin eō kōn ikdeleel ko n̄an erom juōn baba eo em̧m̧an, im kōjatdikdik eo aō eļap in bwe in mour ekkar n̄an waanjon̄ak eo an.
Rikanaan eo ad ejitōnbōro, Būreejtōn Thomas S. Monson, ekkā an ba bwe kālet ko ad rej ļame mejān kajjik eo ad im ewōr ie kaje ko n̄an indeeo (lale “Decisions Determine Destiny” [Church Educational System fireside, Nob. 6, 2005], 2, lds.org/broadcasts ).
Innām, jen jab ke, ejaake juon kōjatdikdik eo ealikar kōn mejān kajjik eo ad n̄an indeeo, eļaptata men eo Jemād Ilan̄ ekōņaan bwe jen kōtōprake—eddo ko an juon jemād? Kōm̧m̧an bwe mejān kajjik eo ad en tōl aolep jokālet ko ad. Jekdo̧o̧n ewi jon̄an an pen jokālet ko, Jemād enaaj rie kōj.
Iaar katak kōn kajoor in juon kōttōpar ke iaar kobaļo̧k ippān ļaddik ro nejū 12- im 13- iiō dettaer ilo juon jiāe 50/20. Jiāe in 50/20 ekoba etetal 50 m̧aeļ (80km) edikļo̧k jān 20 awa. Kōm eaar jinoe 9 awa jota im etetal aolepān joten eo im eiten aolepān raan eo juon. Eļap an kar kamōkmōk 19 awa ko, ak kōm ar tōprak.
Ilo am̧ kar ro̧o̧l n̄an kapijuknen, mōttan jidik kōm tapōlpōl n̄an lowaan m̧weo, ijo lio pāleō im juon m̧am̧a n̄an ro nejū eaar kōpooje juon kōjota enno, eo kōm kar jab kan̄e. Ļaddik eo nejū edik eaar okjakļo̧k, kanooj in m̧ōk, ioon kauuj eo, ilo an ļaddik eo nejū erūtto tōpal laļļo̧k n̄an ruum̧ in kiki eo an.
Ālkin aō kar kakkije, iaar etal ippān ļaddik eo nejū edik im lale n̄e ej mour wōt.
“Emman ke am Mour?” Iaar kajjitōk.
“Baba, ej juon men eo eļap an pen Ij kab tōn kōm̧m̧ane, im ijjamin bar kōņaan kōmmane.”
Iaar jab tin ba n̄an e ke iban bar kōm̧m̧ane. Ijjeļo̧kin, iaar ba n̄an e ewi jon̄an an utiej būruō ke eaar maron̄ tōpar juon men eo epen. Iaar jeļā bwe enaaj kar kōpooj e n̄an men ko jet reppen ļo̧k me enaaj jeļmaeiki ilju im jekļaj eo an. Kōn ļōmņak in, Iaar ba, “Nejū, in m̧ōk kōm̧m̧ane kallim̧ur in ippam̧. N̄e koņaaj etaļ n̄an mijen eo am̧, kojjamin naaj aikuj etetal 50 m̧aeļ ilo juon raan.
“Em̧m̧an, Baba! Kōn menin, ij etal.”
Naan dikdik kein raar kobrak būruō kōn kam̧m̧oolol im lan̄lōn̄.
Innām iaar wanlaļļok n̄an ippān ļaddik eo nejū erūttotata. Iaar babu iturin—innām jibwe. “Nejū, em̧m̧an ke am̧ pād?
“Baba, eaar juon iaan men ko elukkuun pen ij kab tōn kōm̧m̧ane ilo mour eo aō, im ijjamin bar kōm̧m̧ane.” Mejān ar kilōk—innām bar peļļo̧k—im eaar ba, “Mae iien ļaddik eo nejū ekōņaan bwe in kōm̧m̧ane.”
Iaar jino aō jan̄ ke ij kwaļo̧k aō mōņōņō kōn e. Iaar ba n̄an e ke enaaj juon baba eo em̧m̧an ļo̧k jān n̄a. Iaar lukkuun m̧ōņōņō kōnke ilo an em̧m̧an dettan im jouj eaar jeļā kadede bwe juon iaan eddo ko rekwojarjar an priesthood ej n̄an erom juon baba. Eaar ejjeļo̧k an mijak kōn eddo im taitōļ in—lukkun taitōļ in me Anij ekōņaan bwe jān kōjerbale n̄e jej kōnono n̄an E. Iaar jeļā ke ewōr ippa eddo in n̄an kōlapļo̧k ikdelel in kōm̧m̧ane eddo ko an juon baba me repād ippān ļaddik eo nejū.
Naan kein an Rilo̧mo̧o̧r eo eaar wōr meļeļeier eļapļo̧k n̄an n̄a āinwōt juon baba:
“Nejin e jab make maron̄ kōm̧anm̧an jabdewōt, a men eo Ej lo Jemān kōm̧m̧ane; bwe [men ko jabdewōt Ej] kōm̧m̧ani, men kein barāinwōt Nejin ej kōm̧m̧ani āindein” (Jon 5:19).
“Im ejjeļo̧k Aō make kōm̧anm̧an; bwe āinwōt Jema ear katakin Eō” (Jon 8:28).
Ij m̧ōņōņō āinwōt juon baba ak ļeo pālele—eo eaar m̧areiki juon jiron̄ kar kālete nejin jemād im jined ilan̄. Ij iakwe e. Ej juon iaan m̧ōttan ko rekam̧ōņōņō ilo mour eo aō. Kōjatdikdik eo aō bon̄ōn eo eaar bwe ļaddik ro nejū ļalem im jijtōr eo aer renaaj iien otemjej lo ilo n̄a lan̄lōn̄ eo me ej itok jān m̧are indeeo, eddo ko an ro jemād, im baam̧le.
Baba ro, Ij tōmak em̧ōj ami ron̄ naan in “Kwaļo̧k ko̧jpeļ eo iien otemjej, im n̄e ekkar kōjerbali naan ko” (ekkar n̄an Francis ilo Assissi). Aolep raan kwōj katakin ajri ro nejūm ta meļeļein n̄an erom juon baba. Kwōj kalōk juon pādpād n̄an epepen eo tokālik. Ļaddik ro nejūm renaaj katak ekōjkan n̄an erom ļōm̧aro pālele ak baba ro ilo aer lale am kakūrmo̧o̧l eddo ko am̧. N̄an waanjon̄ak:
Rejeļā ke jon̄an am̧ iakwe im kaorōk jineer im jon̄an am̧ iakwe er āinwōt juon eo jemeer?
Renaaj katak wāween aer kōm̧m̧an n̄an kōrā ro pāleier im ajri ro nejier ilo aer lale am̧ kōm̧m̧an n̄an kajjojo iaer ejja āinwōt an Jemād Ilan̄ naaj kar kōm̧m̧an.
Jān waanjon̄ak eo am̧, remaron̄ katak ekōjkan n̄an kautiej, nōbar, im kōjparok eddo ko an juon m̧am̧a.
Ilo kapijuknen eo am̧, remaron̄ katak n̄an tōl baam̧le eo aer ilo iakwe im jim̧we. Remaron̄ katak n̄an kabwe aikuj ko an mour im kōjparok baam̧le ko aer—mour in kanniōk im jetōb jimo̧r (lale “Baamle Eo: Juōn Kean̄ n̄an Laļin” Ensign ak Liaona, Nob. 2010, 129).
Emm̧aan ro jeiū im jatū, kōn aolepān aō kajoor, Ij kajjitōk ippamiwōj bwe kwom̧in lōmņak kōn kajjitōk in: Ļaddik ro nejūm rej ke loe am̧ kajjieon̄ n̄an kōm̧m̧ane ta eo Jemād Ilan̄ ekōņaan bwe ren kar kōm̧m̧ane?
Ij jar bwe uwaak eo ej aeet. Eļan̄n̄e uwaak eo ej jaab, ejjab rumwij n̄an ukōte, bōtaab kwoj aikuj jino rainin. Ij kamo̧o̧l bwe Jemād Ilan̄ enaaj jipan̄ eok.
Kiiō, kom̧ likao ran, ro ij kanooj iakwe er, kom̧ jeļā kom̧ij kōppopo n̄an bōk Priesthood eo an Melkisedek, bōk kain̄i ko rekwojarjar an tampeļ, kakūrmo̧o̧l jerbal im eddo eo n̄an jerbale juon mijen elikio, innām, ilo am̧ jab kōttar aitok, m̧are ilo tampeļ ippān juon jiron̄ eo nejin Jemād Ilan̄ im ejaak juon am baam̧le. Kwoj kiiō tōl baam̧le eo am̧ ilo men ko an jetōb ilo an Jetōb Kwojarjar jipan̄ eok (lale D&C 20:44; 46:2; 107:12).
Emoj aō kar kajjitōk ippān elōn̄ likao ro ipeļaakin laļ in, “Kwoj ita ilo mour in?”
N̄an kiiō, ejjan̄in wōr juon enan̄in kar uwaak, “N̄an katak n̄an erom juon baba, bwe in maron̄ pojak im karbōb n̄an bōk aolep men ko Jemād Ilan̄ ej litok .”
Jen ettaļe eddo ko am ilo Priesthood eo an Aron āinwōt an kōmeļeļeik ilo jepta 20 in Doctrine and Covenants. Pukōt en̄jaake eo am̧ ilo Aō kōm̧m̧ani eddo kein n̄an jerbal in jipan̄ eo am̧ ilo baam̧le eo am̧.
Kūr n̄an aolep [ilo baam̧le eo am̧] n̄an itok n̄an Kraist (eo̧o̧n 59 ).
Lale er iien otemjej, im pād ippāier im kakajoor er (eoon 53).
Kwaļo̧k, katakin, kōmeļeļe, kōketak, im peptaij ro uwaan baam̧le eo am̧ (eoon 46).
Kōketak er n̄an jar im jar ilo ittiņo im pād ilo aolep jerbal ko an baam̧le (eoon 47).
Lale bwe en ejjeļo̧k nana ilo [baam̧le eo am], bārainwōt pen in būro n̄an doon, ekoba riab, ruruwe, ak kōnono naan ko renana (eoon 54).
Lale bwe en emakijkij an [baam̧le eo am̧ ippān doon] (eoon 55).
Jipan̄ eo jem̧am̧ ilo jerbal ko an āinwōt juon petriak. Rejtake jinōm̧ kōn kajoor eo an Priesthood eo n̄e ejako jem̧am̧ (lale eoon ko 52, 56).
N̄e ekkar, kapit pris ro, rūkaki ro, im tikōn ro ilo baam̧le eo am̧ (eoon 48).
Ej ke jerbal ko im eddo ko an juon baba ilo am̧ lale?
Kakūrm̧ool jerbal ko am̧ ilo Priesthood eo an Aron ej kōpooj kom̧ likao ro n̄an eddo ko an ro jemād. Bok eo etan Jerbal N̄an Anij emaron̄ jipan̄ eok katak kōn im kōm̧m̧ani karōk ko rejeno̧lo̧k n̄an kakūrm̧ool jerbal ko am̧. Emaron̄ jerbal āinwōt juon unin tōl im jipan̄ ilo am̧ pukōt ankilaan Jemād Ilan̄ im kōm̧m̧ani kōttōpar ko n̄an tōpari.
Jemād Ilan̄ emōj an likūt kōj ioon laļ in ilo tōre in ejjejet n̄an juon jerbal eo eaorōk im un eo an ej n̄an indeeo. Ekōņaan bwe en alikkar am̧ loe im meļeļe ta un eo. Ej juon jem̧am̧, im komaron̄ iien otemjej reilo̧k n̄an E bwe en tōl eok.
Ijeļā bwe Jemād Ilan̄ ej lukkun ļōmņak kōn kōj kajjojo im ewōr juon an karōk n̄an kōj bwe jān maron̄ tōpar mejān kajjik eo ad n̄an indeeo. Eaar jilkintok Nejin Eo Emake Wōt, Jisōs Kraist, bwe en jipan̄ kōj eļļā ioon likjab ko ad kōn Pinmuur eo. Eaar kōjeram̧m̧an kōj kōn Jetōb Kwojarjar bwe en juōn rikamo̧o̧l, eo mōttad, im unin tōl n̄an mejān kajjik eo ad n̄an indeeo eļan̄n̄e jej likūt ad kōjatdikdik ilo E. Kōm̧m̧an bwe jān aolep en̄jaake tarlep in kōjeram̧m̧an ko an Jemād ilo mour in im n̄an kakūrm̧ool jerbal eo An im aiboojoj eo An ilo ad erom baba ro n̄an indeeo (lale Moses 1:39). Ilo etan Jisōs Kraist, amen.