Rikaenōm̧m̧an Eo
Jān Būreejtōn Henry B. Eyring
Rikakpilōklōk eo Kein Kajuon ilo Būreejtōnji eo Kein Kajuon
Ij lewaj aō kam̧ool bwe Kraist ej mour im Ej jilkintok Jetōb Kwojarjar, Rikaenōm̧m̧an eo, n̄an ro rej aikuj jipan̄ E kaenōm̧m̧an.
Kōrā ro jeiū im jatū rejitōnbōro, ekar juon menin m̧ōņōņō ippa bwe in pād ippām̧i. Ikar kōļmenļo̧kjeņ kōn jinō, kōrā eo pāleeō, leddik ro nejū, leddik ro nej nejin kōrā eo pāleeō, leddik ro jibū—juon oran nōm̧ba in ro rej pād ijin. Būrookraam̧ in em̧m̧an ekar kōm̧m̧an bwe en ļapļo̧k aō kam̧m̧oolol. Ij kile bwe an lōn̄ juon baam̧le im āinwōt mour an juon baam̧le em̧m̧an ej itok jān aer likūt Rilo̧mo̧o̧r eo ilo kajjojo mour ko aer. Jaar kakeememej E joteenin ilo al ko, ilo jar ko, im ilo kwaļo̧k ko reim̧we. Juon iaan m̧wil ko an Rilo̧mo̧o̧r eo jej lukkuun kam̧m̧oolol kake ej tiriam̧o̧ eo An eļap.
Joteenin kom̧ ar en̄jake bwe E ejeļā kajeemi im Ej iakwe kom̧. Kom̧ ar en̄jake iakwe eo An n̄an ro rej jijet iturimi. Er rej kōrā ro jeimi im jatimi, Leddik jetōb ro nejin Jemedwōj Ilan̄. Ej kea kōn er āinwōt An kea kōn eok. E emeļeļe aolep būrom̧ōj ko aer. Ekōņaan in jipan̄ er.
Ennaan eo aō n̄an kom̧ joteen in ej bwe kom̧ maron̄ im aikuj erom juon m̧ōttan eo eaorōk eo An ilo leļo̧k kaenōm̧m̧an n̄an ro rej pād ilo aikuj. Kom̧ maron̄ kōm̧m̧ane ijo koņaami em̧m̧antata n̄e kom̧ij jeļā eļapļo̧k kōn wāween An uwaake jar ko n̄an jipan̄.
Elōn̄ rej jar n̄an Jemedwōj Ilan̄ kōn deoor, n̄an jipan̄ ilo ineek eddo in liajļo̧ļ ko aer, ajim̧akeke, im mijak. Jemedwōj Ilan̄ ej ron̄jake jar ko im E emeļeļe aikuj ko aer. E im Nejin Ejitōn Bōro, Jisōs Kraist eo ekar jerkakpeje, rekar kallim̧ur n̄an jipan̄.
Jisōs Kraist ekar letok kallim̧ur in em̧m̧an:
“Kom̧win itok n̄an Ippa, kom̧ otemjej rej jerbal im ban, im Inaaj kakkijeik kom̧.
“Kom̧win bōk Aō ine im likūte i aerami, im katak Ippa, bwe Ij ineem̧m̧an im ettā būruō, im kom̧ naaj lo ami kakkije.
“Bwe Aō ine ej em̧m̧an, im men eo Ij ineke e mera.”1
Eddo ko rikarejar ro An retiljek rej aikuj ineeki ilo mour in rej meraļo̧k kōn Pinmuur eo An. Eddo ko kōn jerawiwi maron̄ in būklo̧ki, ak kapo ko an mour in n̄an armej ro rem̧m̧an remaron̄ in eddo ko reppen.
Em̧ōj ami ellolo mālijjon̄ ko ilo mour ko an armej ro rem̧m̧an. Kom̧ ar en̄jake juon ikdeleel n̄an jipan̄ er. Ewōr juon un kōn ami tiriam̧o̧ kōn er.
Kwōj juon membōr em̧ōj an kōm̧m̧an bujen ilo Kabun̄ eo an Jisōs Kraist. Juon oktak eļap ekar jino ilo būruwōm̧i ke kwar deļo̧n̄etok Kabun̄ in An. Kwar kōm̧m̧ane juon bujen, im kwar bōk juon kallim̧ur eo ej ukōt aolepān paotokim.
Alma ekar kōmeļeļeik, ilo naan ko an ilo Dān ko iMormon, ta eo kwaar kallim̧ur kake ilo am kar peptaij im enaaj ta meļeļein n̄an eok im aolep ro ipeļaakūm̧—eļaptata ilo baam̧le ko am̧. Ekar kōnono n̄an ro rekar iten kōm̧m̧ani bujen ko kwaar kōm̧m̧ani, im rekar bar bōk kallim̧ur eo Irooj ekar kōm̧m̧ane ippam̧:
“Lo, er kein rej dān ko iMormon (bwe āindein kar kūr er) im kiiō, āinwōt kom̧ij kōņaan itok ilo wōrwōr an Anij, im n̄an kūr kom̧ armej ro An, im kom̧ij m̧ōņōņō n̄an ineek eddo ko an ro jet, bwe ren maron̄ mera;
“Aaet, im kom̧ij m̧ōņōņō in jan̄ ippān ro rej jan̄; aaet, im kaenōm̧m̧an ro rej pād ilo aikuj in aenōm̧m̧an, im n̄an jutak āinwōt ri kam̧ool ro an Anij ilo aolep iien ko im ilo aolep men ko otemjeļo̧k, im ilo aolep jikin ko kom̧ maron̄ pād ie, em̧ool m̧ae mej, bwe kom̧in maron̄ bōk lo̧mo̧r an Anij, im bōnbōn ippān ro ilo jerkakpeje eo m̧oktata, bwe kom̧in maron̄ bōk mour indeeo.”2
En̄in ej etke ekar wōr juon ami en̄jake n̄an kōņaan jipan̄ juon armej ej en̄taan n̄an em̧m̧akūt m̧aanļo̧k kōn eddo in liiajlo̧ļ im mour epen. Kom̧ ar kallim̧ur bwe kom̧ naaj jipan̄ Irooj kōmeraikļo̧k eddo ko aer im kaenōm̧m̧an er. Kom̧ kar bōk kajoor eo n̄an jipan̄ Irooj kōmeraikļo̧k eddo ko ke kwaar bōk menin letok eo an Jetōb Kwojarjar.
Rilo̧mo̧o̧r eo ekar kōmeļeļeik wāween eo ilo An jipan̄ kōmeraikļo̧k eddo ko im leļo̧k kajoor n̄an ineeki. Ekar jeļā bwe rikaļoor ro An renaaj liiajlo̧ļ. Ekar jeļā bwe renaaj mijak ilju im jekļaj eo aer. Ekar jeļā reban lukkuun jeļā jon̄ok eo ippāer n̄an wōnm̧aanļo̧k wōt.
Innām Ekar leļo̧k n̄an er kallim̧ur ko E ej kōm̧m̧ani n̄an kōj im aolep rikaļoor ro An rem̧ool:
“Im Inaaj jar im kajjitōk ippān Jema, im Enaaj lewōj n̄an kom̧ bar juon Ri Kaaenōm̧m̧an, bwe En pād ippemi indeeo;
“Im Jetōb in m̧ool, Eo laļ e ban bōk E, bwe e jab lo E, im e jab jeļā E: A kom̧ jeļā, bwe Ej jokwe ippemi, im Enaaj pād ilo kom̧.”3
Innām Ekar kallim̧ur:
“A Ri Kaaenōm̧m̧an, E Jetōb Kwojarjar, Eo Jema enaaj jilkintok ilo Eta, Enaaj katakin kom̧ men otemjej, im kakememej men otemjej n̄an kom̧, men ko Iar ba n̄an kom̧.
“Aenōm̧m̧an Ij likūt ņa ippemi, Aō aenōm̧m̧an Ij lewōj n̄an kom̧. N̄an Ij lewōj n̄an kom̧, jab āinwōt an laļ lewōj. En jab pok būruemi, im en jab lōļn̄o̧n̄.”4
Ilo baj wiik ko ļo̧k, ikar lo kallim̧ur in ilo an jilkintok Jetōb Kwojarjar eo ekar kūrm̧ool ilo mour ko an ajri ro nejin Anij ro rekar akweļap ilo jar bwe eddo ko aer ren maron̄ meraļo̧k. Kabwilōn̄lōn̄ ko kōn eddo ko rekar maron̄ meraļo̧k ilo wāween an Irooj kar kallim̧ur kake, E im Jemedwōj Ilan̄ rekar jilkintok Jetōb Kwojarjar eo āinwōt Rikaenōm̧m̧an eo n̄an rikaļoor ro An n̄an jipan̄.
Raan ko ļo̧k jilu epepen an juon baam̧le rekar liajļo̧ļ ilo mej eo an juon ļaddik ļalem iiō ritto̧o̧ņ. Ekar jidilo̧k im mej ippān baam̧le eo an ilo juon iien kakkije. Kar letok iien in em̧m̧an n̄an aō alooje bar juon alen wāween an Irooj kōjeram̧m̧an ro rej tōmak ilo leļo̧k deoor im kajoor ilo kijenmej.
Ikar lale wāween an Irooj kar kōmeraikļo̧k eddo eo aer eļap. Ikar pād ippāer āinwōt rikarejar an Irooj—āinwōt enaaj emakijkij an waļo̧k ilo mour eo ami—“n̄an jan̄ ippān ro rej jan̄ … im kaenōm̧m̧an ro rej pād ilo aikuj in aenōm̧m̧an.”5
Kōnke ikar jeļā bwe ekar m̧ool, ikar m̧ōņōņō im pād ilo aenōm̧m̧an ke ro jibuer im jim̧aer rekar karuwaineneik eō n̄an kweilo̧k ippāer im jinen im jemān ļaddik jidikdik eo m̧okta jān kallūb eo.
Ikar jar bwe in jeļā ewi wāween aō maron̄ kaenōm̧m̧an er. Rekar jijet ippa ilowaan m̧weo im̧ō. Ikar kōmāņāān ruum̧ eo bon̄ōn eo em̧ōļo̧ kōn jidik kijeek ilo jikin kijeek eo.
Ikar en̄jake bwe in jiron̄ er bwe ij iakwe er. Ikar jiron̄ er bwe ikar en̄jake iakwe eo an Irooj n̄an er. Ilo jejjo naan ko ikar kajjieon̄ in ba n̄an er bwe ikar jan̄ kōn er ak bwe Irooj wōt ejeļā im emaron̄ e metak im liiajļōļ eo aer.
Ālkin aō kar ba jejjo naan ko, ikar en̄jake im̧we n̄an ron̄jake kōn iakwe ke rekar kōnono kōn en̄jake ko aer.
Ilo awa eo kōm̧ kar jijet ippān doon, rekar kōnono eļapļo̧k jān n̄a. Ikar maron̄ en̄jake ainikier im loe ilo mejāer bwe Jetōb Kwojarjar eo ekar un̄n̄ir er. Ilo naan in kam̧ool ko remeļak, rekar kōnono kōn ta eo ekar waļo̧k im ewi wāween aer kar en̄jake. Jetōb Kwojarjar ekar leļo̧k n̄an er aenōm̧m̧an eo ej leļo̧k kōjatdikdik kōn mour indeeo, ke ļaddik eo nejier, eo ekar mej ilo an ejjeļo̧k an jerawiwi, enaaj aer n̄an indeeo.
Ke ikar leļo̧k n̄an er kajjojo juon kōjeram̧m̧an an priesthood, ikar kam̧m̧oolol kōn im̧we eo an Jetōb Kwojarjar eo ekar pād ijo. Rikaenōm̧m̧an eo ekar bōktok, kōjatdikdik, peran, im kōļapļo̧k kajoor n̄an kōj aolep.
Bon̄ōn eo, ikar loe kōmeļeļe eo kōn wāween an Irooj jerbal ippād n̄an kōmeraikļo̧k eddo ko an armej ro An. Kom̧ij ke keememej ilo Bok in Mormon ke armej ro An rekar iten jakoļo̧k jān eddo ko kar likūt ioer jān rikam̧akoko eo ekar kipel er.
Armej ro rekar pukōt deeor, āinwōt an lōn̄ ro jej iakwe im jerbal n̄an er. En̄in ej ļo̧o̧k eo, eo ijeļā bwe ej m̧ool:
“Im Inaaj barāinwōt kōmeraik eddo ko kar likūt ioon aerami, bwe em̧ool kom̧ make kom̧in jab en̄jaki ioon ālkimi, em̧ool n̄e kom̧ij pād ilo kōm̧akoko; im men in Inaaj kōm̧m̧an bwe kom̧in maron̄ jutak āinwōt ri kam̧ool ro n̄an Eō tokālik, im bwe kom̧in maron̄ jeļā kōn m̧ool in bwe N̄a, Irooj Anij, ij loļo̧k armej ro Aō ilo en̄taan ko aer.
“Im kiiō ālkin men kein, eddo ko kar likūt ioon Alma im ro jein im jatin kar kōm̧m̧an bwe ren mera; aaet, Irooj Eaar kōkajoorļo̧k er bwe ren maron̄ kotak eddo ko aer ilo ejjeļo̧k pen, im raar ajeļo̧k er ilo itok limo im kōn inem̧m̧an n̄an aolep ankilaan Irooj.”6
Ikar loe kabwilōn̄lōn̄ in jān iien n̄an iien. Jej kōmeraikļo̧k eddo ko an ro jet ijo em̧m̧an tata ilo ad jipan̄ Irooj kōkajoorļo̧k er. En̄in ej etke Irooj ej koba ilo eddo eo ad n̄an kaenōm̧m̧an ro jet kean̄ n̄an erom An rikam̧ool ro ilo iien otemjej im ilo jikin otemjej.
Jemān in jinen ļaddik jidikdik in rekar kwaļo̧k aer kam̧ool kōn Rilo̧mo̧o̧r eo joteen eo ilowaan m̧weo im̧ō. Jetōb Kwojarjar ekar itok, kōm̧ ar aolep aenōm̧m̧an. Jinen im jemān rekar kajoorļo̧k. Eddo in liaajlo̧ļ eo ekar jako, ak er rekar maron̄ in būrom̧ōj. Aer tōmak ekar ļapļo̧k. Im kajoor eo aer enaaj wōnm̧aanļo̧k im eddōkļo̧k āinwōt aer kajjitōk kake im mour kake.
Jetōb eo ej kam̧ool kōn Pinmuur eo ekar itok bon̄ōn eo barāinwōt kar kōkajoorļo̧k Job n̄an ineeke eddo eo an:
“A kōn n̄a, I jeļā bwe aō ri Lo̧mo̧o̧r ej mour wōt, im ilo iien eo āliktata Enaaj jutak ioon laļ in:
“Ilo ālkin an jako kilū, ilo ānbwinnū in wōt inaaj lo Anij.” 7
Ekar kam̧ool jen Jetōb eo bwe ekar leļo̧k n̄an e kajoor n̄an niknik wōt. Enaaj anjo jān liaajļo̧ļ im ejjeļo̧k kaenōm̧m̧an jān armej ro ipeļaakin n̄an an loe lan̄lōn̄ eo enaaj itok n̄an eo etiljek ālkin an anjo ilo tōmak jān kapo ko.
Ekar m̧ool n̄an Job. Kōjeram̧m̧an ko rekar itok ilo mour in. Bwebwenato eo an Job ekar jem̧ļo̧k kōn kabwilōn̄lōn̄:
“Āindein Irooj ekar kōjeram̧m̧an jem̧ļo̧kōn Job eļap jān jinoin. …
“Ejjeļo̧k ear lo juon kōrā ilo aolepen āne eo me ear deo̧ jon̄an wōt lim̧aro nejin Job, im jemaer ear leļo̧k n̄an er men in jolōt ippān ro jeir im jatier em̧m̧aan.
“Im ālkin men in Job ear mour ium̧win jibukwi en̄oul iiō, im ear lo ro nejin, im ro jibwin lo̧k n̄an emān epepen.
“Āindein Job ear mej, im e kanooj rūtto, im elōn̄ an raan.”8
Ekar jān kam̧ool an Jetōb eo kōn itok eo an Pinmuur eo ekar loe Job jān mālijjon̄ ko an mour ko rekar aikuj in waļo̧k. Ekar m̧ōttan wōt karōk in m̧ōņōņō eo eļap Jemād ekar letok n̄an kōj. Ekar kōtļo̧k bwe Nejin en letok, jān katok in pinmuur eo An, kōjatdikdik bwe ej kaenōm̧m̧an kōj jekdo̧o̧n ewi jon̄an an maron̄ pen ad ro̧o̧l n̄an Ippān.
Jemān im Nejin kar jilkintok Jetōb Kwojarjar eo n̄an kaenōm̧m̧an im kōkajoorļo̧k rikaļoor ro an M̧aajta eo ilo ito itak eo aer.
Ikar loe kabwilōn̄lōn̄ in kaenōm̧m̧an in ke ikar itaaktok inabwij in im̧ōnjar eo ijo ilo̧mej eo an ļaddik jidikdik eo ekar kōm̧m̧an ie. Juon kōrā em̧m̧an dettan ikar jab kile ekar kabōjrak eō. Ekar ba bwe ekar itok n̄an ilo̧mej eo n̄an jan̄ im leļo̧k kaenōm̧m̧an eo emaron̄ in leļo̧k.
Ekar ba bwe ekar itok n̄an ilo̧mej eo āinwōt m̧ōttan wōt an pukōt aenōm̧m̧an n̄an e. Ekar jiron̄ eō bwe m̧aanje eo nejin ekar mej. Ej kōjajaiki juon leddik jidikdik edeo̧. Ikar malļo̧k im kalimōj ajri eo edik ej ettōn̄dikdik. Ikar kajjitōk ippān jinen nin̄nin̄ eo, “Etan nin̄nin̄ eo?” Ekar ettōn̄dikdik ilo an kar ba, “Etan in Joy. Joy aolep iien ej itok ālkin būrom̧ōj.”
Ekar kwaļo̧k an kam̧ool n̄an n̄a. Ikar maron̄ loe ineem̧m̧an im kaenōm̧m̧an eo ekar itok n̄an e jān jipan̄ eo wōt em̧ool. Anij wōt ejeļā bōro ko, im E wōt emaron̄ ba men eo em̧ool, “Ijeļā ewi wāween am̧ en̄jake.” Innām imaron̄ wōt pijaiki jim̧or lan̄lōn̄ im bōrom̧ōj eo ej ilo̧k im̧aan, ak Irooj eo ej iakwe, Ejeļā.
Imaron̄ jeļā wōt jidikin jon̄an An en̄jake lan̄lōn̄ kajjojo iien kom̧, āinwōt rikaļoor ro An, rej jipan̄ E bōktok juon iien eineem̧m̧an im lan̄lōn̄ n̄an juon ajri nejin Jemedwōj Ilan̄.
Ij kwaļo̧k aō kam̧ool bwe Irooj ekar kajjitōk ippād kajjojo, rikaļoor ro An, n̄an jipan̄ doon ineek eddo ko an doon. Jaar kallim̧ur n̄an kōm̧m̧ane. Ij kwaļo̧k aō kam̧ool bwe Irooj, jān Pinmuur eo An im Jerkakpeje eo, ekar rube kajoor an mej. Ij lewaj aō kam̧ool bwe Kraist eo emour ej jilkintok Jetōb Kwojarjar, Rikaenōm̧m̧an eo, n̄an ro jej kallim̧ur n̄an jipan̄ E kaenōm̧m̧an er.
Kom̧ aolep rej rikam̧ool ro, āinwōt n̄a, kōn m̧ool eo kōn naan jidikdik eo ilo piin eo an jinō eo ekar kōņake elōn̄ļo̧k jān 20 iiō ko āinwōt juon membōr in bo̧o̧t eo eļap an Doulul eo an Kōrā ro, “Iakwe eo an Kraist Ejjāmin Jako.”9Ij jab jeļā likio in meļeļe in naan ko. Ak ikar jab maron̄ bōk mejā jāne ke ikar loe an pukōtļo̧k ro rej pād ilo aikuj. Jeje ko rekwojarjar rej jiron̄ kōj m̧ool in: “Iakwe-em̧ool ej iakwe erreo an Kraist.”10
An iakwe ej jāmin jako, im jej jāmin bōjrak ad en̄jake ilo būruwōd rōjan̄ in “n̄an jan̄ ippān ro rej jan̄ … im kaenōm̧m̧an ro rej pād ilo aikuj in aenōm̧m̧an.”11Barāinwōt ineem̧m̧an eo E ej kallim̧ur ej jāmin ilo̧k jān kōj ilo ad jerbal n̄an ro jet n̄an E.
Āinwōt An rikam̧ool, ij lewaj kam̧m̧oolol kōn ta eo kwoj kōm̧m̧ane em̧m̧an n̄an jipan̄ Irooj Jisōs Kraist eo emour im Jetōb Kwojarjar eo, Rikaneōm̧m̧an eo, kōkajoorļo̧k bukwei ko remōjņo̧ im kotak pā ko remōjņo̧,12 Ij kam̧m̧oolol, kōn aolepān būruwō, kōn kōrā ro ilo mour eo aō ro rekar jipan̄ eō im kōjeram̧m̧an eō āinwōt rikaļoor ro rem̧ool an Jisōs Kraist. Ilo etan Jisōs Kraist, amen.