eb’ li saaj chirix li santil ochoch

25 septiembre

K’a’ru li qateneb’ankil sa’ li k’anjel re li kolb’a-ib’ ut li taqenaqil loq’al?

Isaias 40–49

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. K’a’ru xoo’aatinak wi’ sa’ li ch’utam xnume’, ut k’a’ru li xqaye naq taqab’aanu? K’a’ru ak qab’aanuhom re xk’anjelankil li na’leb’ xqak’uub’?

• Rilb’aleb’ li wankeb’ sa’ rajb’al ru. K’a’ru naru taqaye malaj taqab’aanu re xtenq’ankileb’ li neke’reek’a naq xjunes wankeb’ malaj naq najt wan li qaChoxahil Yuwa’?

• Xb’oqb’aleb’ chixjunil chixk’ulb’al li evangelio. K’a’ru naru taqab’aanu re xtenq’ankileb’ li qas qiitz’in chireek’ankil lix rahom li Jesukristo?

• Xjunajinkileb’ li junkab’al chi junelik. Kʼaʼru chi naʼlebʼ naru taqawotz chiqibʼil qibʼ re xkawob’resinkileb’ li qajunkab’al?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Li loq’laj hu naxk’ut chi saqen ru naq eb’ li saaj ut li kok’al neke’ru ajwi’ tenq’ank sa’ xk’anjel li Qaawa’. Yal ch’ina al laj Samuel naq ki’aatinaak xb’aan li Qaawa’ xb’een sut. Li xMaria a’an jun saaj ixq naq li anjel kirula’ani chixyeeb’al re naq a’anaq xna’ li Kolonel. Ut 14 chihab’ wan re laj Jose Smith naq li Qaawa’ kixb’oq chixk’ojob’ankil wi’chik li evangelio. Toje’, li Awa’b’ej Russell M. Nelson kixb’oq chixjunileb’ li saaj “chi ok sa’ li teep chi saaj kristiaan re li Qaawa’ re xch’utub’ankil Israel” (“Juventud de Israel” [ch’utam choq’ reheb’ li saaj sa’ chixjunil li ruchich’och’, 3 junio, 2018], ChurchofJesusChrist.org). Relik chi yaal, naq li Qaawa’ kixye, “Israel, aj k’anjelat chiwu” (Isaias 41:8), yoo chi aatinak chirix chixjunil lix tenamit re sumwank, jo’eb’ li saaj sa’ laa tzoleb’aal.

Us ta noko’ok sa’ sumwank chi k’anjelak chiru li Dios naq nakub’e qaha’, moko chixjunileb’ ta li saaj neke’ril rib’ jo’ xmoos li Qaawa’. Maare ink’a’ neke’xnaw chan ru te’tenq’anq sa’ lix k’anjel. Sik’eb’ li raqal sa’ Isaias 41–44 ut li tasal 1.2 sa’ li Manual General: Servir en La Iglesia de Jesucristo de los Santos de los Últimos Días li naru te’xtenq’aheb’ li saaj chixtawb’al ru li wank choq’ xmoos li Qaawa’.

eb’ li saaj ixq chirix li santil ochoch

Li junjunq saaj naru taatenq’anq sa’ li k’anjel re li kolb’a-ib’ ut li taqenaqil loq’al.

Tzolok sa’ komonil

Isaias 41–44 naru tixtenq’aheb’ li saaj chixtawb’al ru li wank choq’ xmoos li Qaawa’. Re aatinak chirix a’in, naru taatz’iib’aheb’ li raqal a’in chiru li pizarron: Isaias 41:8–10; 42:6–7; 43:9–12; 44:21. Eb’ li saaj naru te’xsik’ ru jun raqal, te’ril ru, ut te’xwotz k’a’ru xe’xtzol chirix li wank choq’ xmoos li Qaawa’. Chan ru naq laa’o xmoos li Qaawa’? K’a’ru li osob’tesiik naqak’ul naq nokok’anjelak chiru? Naru taawoksi li na’leb’ a’in re xtenq’ankileb’ li saaj chixk’amb’al chaq kristiaan rik’in li Kristo jo’ aj tenq’anel sa’ xk’anjel a’an.

• Ma neke’xtaw ru li saaj k’a’ru “li k’anjel re li kolb’a-ib’ ut li taqenaqil loq’al”? Re xtenq’ankileb’, naru taaye reheb’ naq te’ril (sa’ junesal malaj sa’ kok’ ch’uut) jun reheb’ li kaahib’ tasal sa’ li tasal 1.2 re li Manual General. Li junjunq tasal naxch’olob’ jun raqal re li k’anjel. Ye reheb’ li saaj naq te’xk’oxlaheb’ li patz’om a’in: K’a’ru naru tixb’aanu li ani saaj re tz’aqonk sa’ li k’anjel re li kolb’a-ib’? K’a’ru naru taqab’aanu jo’ tzoleb’aal malaj molam? Naru te’xwotz k’a’ru xe’xtzol, ut te’xsumeheb’ li patz’om a’in.

• Maare us naq eb’ li saaj te’xtzol xkomon chirixeb’ li kaahib’ chi raqal a’in sa’ li k’anjel re li kolb’a-ib’ ut li taqenaqil loq’al—xyu’aminkil lix evangelio li Jesukristo, xch’olaninkileb’ li wankeb’ sa’ rajb’al ru, xb’oqb’aleb’ chixjunil chixk’ulb’al li evangelio, ut xjunajinkileb’ li junkab’al chi junelik. Naru te’xsik’ ru jun reheb’ li na’leb’ li neke’raj xtzolb’al, ut te’ril li na’leb’ chirix a’an sa’ “Xkomon chik li tenq’.” Kanab’eb’ li saaj chixwotzb’al li xe’xtaw li naxmusiq’aheb’ chi jalaak xch’ooleb’ choq’ re li Qaawa’ ut chixtenq’ankileb’ li ras riitz’in chixb’aanunkil ajwi’ a’an. Toja’ naq te’xk’uub’ xb’aanunkil li k’a’ru taatenq’anq chixb’aanunkil li k’anjel a’an. Li awa’b’ej re li tzoleb’aal malaj molam naru tixb’eresi li aatinak a’in.

• Re xtenq’ankileb’ li saaj chixk’oxlankil chan ru te’xk’ameb’ chaq li aamej rik’in li Kristo, naru taapatz’ reheb’ naq te’ril jun raqal re li kixye li Elder John C. Pingree, alalb’ej, sa’ “Wan jun ink’anjel choq’ aawe” (Jolomil ch’utub’aj-ib’ re octubre 2017). Naru te’xwotz k’a’ru xe’xtzol li naru tixtenq’a li ani ink’a’ naxnaw ma naru taatenq’anq sa’ xk’anjel li Qaawa’. Naru ajwi’ teeril li raqal “Taweb’ ut k’anjelaheb’ li maatan re musiq’ej” sa’ li raatin li Elder Pingree. Chan ru naq li Qaawa’ nokoxtenq’a chixtawb’al ut chixk’anjelankil li qamaatan?

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Xyu’aminkil lix evangelio li Jesukristo: 2 Nefi 31:17–21; 3 Nefi 27:13–21; “Seguir a Dios” (video), ChurchofJesusChrist.org

• Xtenq’ankileb’ li wankeb’ sa’ rajb’al ru: Mateo 25:34–40; Mosiah 18:8–9

• Xb’oqb’aleb’ chixjunil chixk’ulb’al li evangelio: Mateo 5:14–16; 1 Pedro 3:15; “Comparte tus creencias” (video), ChurchofJesusChrist.org

• Xjunajunkileb’ li junkab’al chi junelik: Tzol’leb’ ut Sumwank 2; 128:18; “Gracias a James” (video), ChurchofJesusChrist.org

Li k’utuk jo’ li Kolonel

“Wi eb’ li saaj neke’reek’a naq nakawil xchaab’ilaleb’, taanimanq lix kawilal xch’ooleb’ chirix lix choxahil eechanihom” (Li k’utuk jo’ li Kolonel, 28).