Jesukristo

9 octubre

K’a’ut naq wanq raj li Jesukristo jo’ xch’oolil lin yu’am?

Isaias 58–66

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Rochb’een li aatinak chirix li na’ajman sa’ lee tzoleb’aal malaj molam, naru tex’aatinaq chirix li xeril ut xerab’i sa’ li jolomil ch’utub’aj-ib’. Naru roksinkileb’ li patz’om a’in.

• Ma wankeb’ li na’leb’ malaj esil li xe’xtoch’ qach’ool? K’a’ru xnimob’resi li qapaab’aal chirix li Jesukristo?

• K’a’ru xnimob’resi lix nawom qach’ool chirixeb’ li yo’yookil profeet? K’a’ru nokomusiq’aak chixb’aanunkil xb’aan li k’a’ru xqatzol malaj xqeek’a?

• Ma wan k’a’ruhaq tento taqab’aanu sa’ komonil re xjultikankil ut xb’aanunkil li xqab’i sa’ li jolomil ch’utub’aj-ib?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

“K’a’jo’ naq nasaho’k lin ch’ool rik’in li Qaawa’, jwal nim lix sahil li waam rik’in lin Dios, xb’aan naq xinxtiqib’ rik’in lix kolom ut xinxlan rik’in lix tiikilal jo’ rik’in junaq b’aatal” (Isaias 61:10). K’a’ut naq “nasaho’ laa ch’ool rik’in li Qaawa’ ”? Jo’ laj Isaias, naq naqak’e reetal li xb’aanuhom li Qaawa’ choq’ qe, nasaho qach’ool, ut noko’aatinak rajlal chirix “li ruxtaan li Qaawa’ ut li xnimal xloq’al” (Isaias 63:7).

K’a’ru neke’reek’a li saaj sa’ laa tzoleb’aal chirix li Kolonel? K’a’ru tixtenq’aheb’ chireek’ankil xkomon chik li rahok ut li oxloq’ choq’ re? K’a’ru tixtenq’aheb’ chireek’ankil lix rahom a’an? Naq nakak’oxlaheb’ li patz’om a’in ut nakawil Isaias 58–66, naru ajwi’ taawil li raatin li Elder Matthew S. Holland, “Li maatan q’axal nim re li Alalb’ej” (Jolomil ch’utub’aj-ib’ re octubre 2020) ut li raatin li Hermana Cristina B. Franco, “Lix wankilal li Jesukristo re k’irtesink” (Jolomil ch’utub’aj-ib’ re octubre 2020).

jun saaj ixq natzolok sa’ li loq’laj hu

Naq nokotzolok chirix li Kolonel, nokomusiq’aak chixk’eeb’al a’an jo’ xch’oolil li qayu’am.

Tzolok sa’ komonil

Naq eb’ li saaj neke’tzolok chirix li k’anjel kitaqlaak wi’ li Jesukristo, te’musiq’aaq chixk’eeb’al li Kolonel jo’ xch’oolil lix yu’ameb’. Naru te’ril Isaias 61:1–3 ut te’xtz’iib’a chiru li pizarron k’a’ru kiyule’ wi’ li Kolonel chixb’aanunkil (chi’ilmanq ajwi’ Lukas 4:16–20). Chan ru naq li Kolonel kixtz’aqob’resi ru li junjunq raqal re lix k’anjel? Chan ru naq toj yoo chixtz’aqob’resinkileb’ ru sa’ li qayu’am anajwan? Xb’aanunkil a’in naru tixtenq’aheb’ li saaj chi aatinak chirix li Jesukristo ut k’a’ut naq a’an taawanq raj jo’ xch’oolil li qayu’am.

• Junelik nach’olob’aman xyaalal li Jesukristo sa’ li jolomil ch’utub’aj-ib’. Naru taapatz’ reheb’ li saaj naq te’xwotz k’a’ru xe’xtzol chirix li Kolonel sa’ li jolomil ch’utub’aj-ib’. Ye reheb’ naq te’xwotz k’a’ru neke’reek’a chirix li Kolonel a’ yaal li xe’xtzol.

• Li loq’laj hu naru tixtenq’aheb’ li saaj chixtawb’al ru k’a’ut naq li Kolonel taawanq raj jo’ xch’oolil lix yu’ameb’. Naru taatz’iib’a chiru li pizarron K’a’ut naq li Kolonel taawanq raj jo’ xch’oolil lin yu’am? Patz’ reheb’ li saaj naq te’xwotz lix k’oxlahomeb’. Toja’ naq taapatz’ reheb’ naq te’rileb’ (sa’ junesal malaj sa’ kok’ ch’uut) li raqal re li loq’laj hu sa’ “Xkomon chik li tenq’ ” re te’xtaw xsumenkil li patz’om a’an. Patz’ reheb’ naq te’xwotz li xe’xtzol ut k’a’ut naq nawulak chiruheb’.

• Naru taapatz’ reheb’ li saaj naq te’xye resil li kutan jwal nim xwankil sa’ xyu’ameb’. K’a’ raj ru li kutan jwal nim xwankil chalen chaq xtiklajik li ruchich’och’? Ye reheb’ naq te’xtaw chan ru naq li Elder Dieter F. Uchtdorf kixsume li patz’om a’an sa’ “Waye’ li Winq!” (Jolomil ch’utub’aj-ib’ re abril 2018). Ye reheb’ li saaj naq te’xsik’ li osob’tesiik kixyeechi’i li Elder Uchtdorf reheb’ li neke’ilok re li Jesukristo. Naru ajwi’ te’xwotz k’a’ru yookeb’ chixb’aanunkil re xk’eeb’al li Kolonel jo’ xch’oolil lix yu’ameb’ wulaj wulaj. Naru ajwi’ taaye reheb’ naq te’xk’oxla k’a’ru naru te’xb’aanu re te’nach’oq rik’in li Kristo, ut naq te’wanq xmeta re xb’aanunkil.

• Wi ta ani tixpatz’ qe k’a’ut naq naqapaab’ li Jesukristo, k’a’ raj ru taqaye? Patz’ reheb’ li saaj naq te’xwotz lix na’leb’ ut te’xtz’iib’a chiru li pizarron. Naru ajwi’ taapatz’ reheb’ naq te’ril “Li yo’yookil Kristo: Lix ch’olob’ahomeb’ li Apostol” (ChurchofJesusChrist.org) malaj “La misión divina de Jesucristo” sa’ li ch’ol 3 re Predicad Mi Evangelio ([2019], 60–61). Ye reheb’ naq te’xsik’ li na’leb’ te’xwotz raj re xch’olob’ankil k’a’ut naq aajel ru li Kolonel choq’ reheb’. Naru te’xtz’iib’a li na’leb’ li neke’xtaw sa’ li pizarron, ut te’xye chan ru naq te’ruuq chixwotzb’al li na’leb’ a’an rik’ineb’ li ras riitz’in.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Jwan 8:12; 14:6; Romanos 8:35–39; 2 Nefi 2:3–9; 9:5–10; Alma 36:3, 27; 3 Nefi 27:14–16, 27; Eter 12:27 (K’a’ut naq li Jesukristo taawanq raj jo’ xch’oolil li qayu’am)

• Becky Craven, “Kanaaqex chi jalb’il” (Jolomil ch’utub’aj-ib’ re octubre 2020)

• “Ninpaabʼ li Kristo,” “Sachso ninkana” (Eb’ li B’ich, 75, 118)

• “Por qué necesitamos un Salvador — Un mensaje de Navidad acerca de nuestro Salvador Jesucristo,” “Gracias A Él” (eb’ li video), ChurchofJesusChrist.org

Li k’utuk jo’ li Kolonel

“Rik’in li junjunq li wan sa’ laa tzoleb’aal naru natawman li xnawom ch’oolej, li chaab’il na’leb’, ut li k’a’ru nak’ulman rik’in xyu’aminkil li evangelio. B’oqeb’ chi wotzok ut chixwaklesinkil rib’ chirib’ileb’ rib’ ” (Li k’utuk jo’ li Kolonel, 5).