xtzolb’aleb’ li loq’laj hu jo’ junkab’al

23 octubre

Ma tz’iib’anb’il li evangelio chiru lin ch’ool?

Jeremias 30–33; 36; Lamentaciones 1; 3

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. K’a’ru xoo’aatinak wi’ sa’ li ch’utam xnume’, ut k’a’ru li xqaye naq taqab’aanu? K’a’ru ak qab’aanuhom re xk’anjelankil li na’leb’ xqak’uub’?

• Rilb’aleb’ li wankeb’ sa’ rajb’al ru. K’a’ru naru taqaye malaj taqab’aanu re xtenq’ankileb’ li neke’reek’a naq xjunes wankeb’ malaj naq najt wan li qaChoxahil Yuwa’?

• Xb’oqb’aleb’ chixjunil chixk’ulb’al li evangelio. K’a’ru naru taqab’aanu re xtenq’ankileb’ li qas qiitz’in chireek’ankil lix rahom li Jesukristo?

• Xjunajinkileb’ li junkab’al chi junelik. Kʼaʼru chi naʼlebʼ naru taqawotz chiqibʼil qibʼ re xkawob’resinkileb’ li qajunkab’al?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Li Qaawa’ kixye re li profeet aj Jeremias naq a’an tixch’utub’ Israel ut tixk’ojob’ jun “ak’ sumwank” rik’in lix tenamit. A’an kixye, “Tink’e lin chaq’rab’ sa’ lix k’a’uxleb’ ut tintz’iib’a sa’ lix ch’ooleb’. Laa’inaq lix Dioseb’ ut a’anaqeb’ lin tenamit” (chi’ilmanq Jeremias 31:31–34). Yoo chixb’aanunkil a’an sa’ li kutan a’in, ut laa’o lix tenamit. Li na’leb’ a’in maare tatreek’asi laa’at ut eb’ li saaj chixpatz’b’al, K’a’ru naraj naxye naq tz’iib’anb’il li evangelio chiru lin ch’ool? Ma tz’iib’anb’il li evangelio chiru lin ch’ool? Wi ink’a’, k’a’ru tinb’aanu?

K’oxla chan ru taatenq’aheb’ li saaj chixtz’ilb’aleb’ rix li patz’om a’in. Re xkawresinkil li tzolok, naru taataw li na’leb’ taawaj xwotzb’al sa’ Jeremias 30–33; 36; sa’ li raatin li Awa’b’ej Russell M. Nelson, “Chinumtaaq li Dios” (Jolomil ch’utub’aj-ib’ re octubre 2020); ut li raatin li Elder D. Todd Christofferson, “Cuando te hayas convertido” (Liahona, mayo 2004, 11–13).

eb’ li saaj ixq neke’ril li loq’laj hu

Naq naqara li Qaawa’ ut naqasik’ tzolok chirix, li evanglio tz’iib’anb’ilaq chiru li qach’ool.

Tzolok sa’ komonil

Ye reheb’ li saaj naq te’aatinaq chirix Jeremias 31:31–34. Re xb’aanunkil a’in, naru taak’eheb’ huhil aamej tz’iib’anb’il wi’ wiib’ oxib’ li patz’om chirix xtz’iib’ankil li evangelio chiru li qach’ool, jo’eb’ li patz’om wankeb’ sa’ “Xkawresinkil aawib’ sa’ musiq’ej.” Sa’ junesal, sa’ ka’kab’il, malaj sa’ kok’ ch’uut, eb’ li saaj naru te’rileb’ li raqal sa’ Jeremias ut te’xk’oxla chan ru te’xsumeheb’ raj li patz’om a’an. Kanab’eb’ chixwotzb’al lix patz’omeb’ ut lix sumehomeb’. Wankeb’ xkomon chik li na’leb’ arin li naru tatxtenq’a chixk’utb’al chiruheb’ li saaj chan ru naq tz’iib’anb’ilaq li evangelio chiru lix ch’ooleb’.

• Sa’ lix raqikil na’leb’ laj Moises choq’ reheb’ laj Israelita, a’an kirelajiheb’ naq te’xk’ul li raatin li Dios sa’ xch’ooleb’. Kixk’ut ajwi’ chiruheb’ chan ru te’xb’aanu a’in, li natawman sa’ Deuteronomio 6:3–9. Jo’ tzoleb’aal malaj molam, ilomaqeb’ li raqal a’in ut aatinanqex chirix xb’aanunkil li kixye laj Moises. Eb’ li saaj naru ajwi’ te’ril Alma 5:14, 26–35 re xtzolb’al k’a’ru kixk’ut laj Alma chirix xkanab’ankil naq tz’iib’anb’il li evangelio chiru li qach’ool.

• Sa’ li aatin “Cuando te hayas convertido,” li Elder D. Todd Christofferson kixye k’a’ru naru taqab’aanu re naq tz’iib’anb’ilaq li evangelio chiru li qach’ool. K’a’ru naqatzol sa’ li kaahib’ raqal sa’ xtiklajik li raatin chirix li nak’ulman naq tz’iib’anb’il li evangelio chiru li qach’ool? Naru taab’oqeb’ li saaj chirilb’al xkomon chik li aatin ut te’xsik’ k’a’ru tento taqab’aanu re naq taa’uxq a’in. K’a’ru lix k’anjel li Kolonel? K’a’ru li qak’anjel laa’o? Patz’ reheb’ li saaj naq te’xwotz lix na’leb’, ut li k’a’ru xe’xtzol. K’a’ru ak xqanumsi li kixk’e chi tz’iib’aak li evangelio chiru li qach’ool? Chan ru nokohe’xtenq’a li qasumwank sa’ li b’e a’in?

• Li Awa’b’ej Russell M. Nelson kixch’olob’ naq li aatin Israel “na’aatinak chirix jun li kristiaan li naraj naq li Dios taanumtaaq sa’ lix yu’am” (“Chinumtaaq li Dios”). Naru taaye reheb’ li saaj naq te’sik’oq sa’ li waqib’ raqal sa’ xtiklajik li raatin li Awa’b’ej Nelson, jo’ ajwi’ li raqal li natikla rik’in “Li patz’om choq’ qe chiqajunqal.” Patz’ reheb’ naq te’xtaw jun na’leb’ li taatenq’anq reheb’ chixtawb’al ru k’a’ru naraj naxye “xkanab’ankil naq taanumtaaq li Dios” sa’ xyu’ameb’. K’a’ru naqeek’a ut k’a’ru naqab’aanu naq li Dios nanumta sa’ li qayu’am? Jo’ kixye li Awa’b’ej Nelson, chan ru naq najala li qab’aanuhom re xch’utub’ankil Israel wi tz’iib’anb’il li evangelio chiru li qach’ool?

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Henry B. Eyring, “Que Dios escriba en mi corazón” (Liahona, noviembre 2000, 85–87)

• Linda K. Burton, “¿Está escrita en nuestro corazón la fe en la expiación de Jesucristo?” (Liahona, noviembre 2012, 111–15)

Li k’utuk jo’ li Kolonel

“Li tzol’leb’ li natawman sa’eb’ li loq’laj hu ut sa’ li raatineb’ li profeet sa’ roso’jikeb’ li kutan wan xwankil chixjalb’al li ch’oolej ut chixnimob’resinkil li paab’aal. Naq laa’at ut eb’ li ani tzolb’ileb’ aab’aan “teeyal xchaab’ilal li raatin li Dios,” teetaw naq a’an “k’a’jo’ naq naxk’ameb’ xch’ool li tenamit chixb’aanunkil li k’a’ru tiik” (Alma 31:5)” (Li k’utuk jo’ li Kolonel, 5).