eb’ li saaj ixq sa’ li tzoleb’aal

13 noviembre

Chan ru naq taahoye’q sa’ inb’een lix musiq’ li Qaawa’?

Oseas 1–6; 10–14; Joel

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. K’a’ru toje’ xqanumsi li xkawob’resi lix nawom qach’ool?

• Rilb’aleb’ li wankeb’ sa’ rajb’al ru. Ani taaraj ru qatenq’ ut qatij? K’a’ru naqeek’a naq tento taqab’aanu choq’ re?

• Xb’oqb’aleb’ chixjunil chixk’ulb’al li evangelio. Chan ru naq toowanq jo’ saqen chiruheb’ li qakomon ut li qamiiw li ink’a’ neke’xpaab’ li naqapaab’ laa’o?

• Xjunajinkileb’ li junkab’al chi junelik. K’a’ru taqab’aanu re xk’utb’al xkomon chik li rahok ut li tenq’ choq’ re li qajunkab’al ut re xb’aanunkil li us sa’ li qochoch?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Yaal naq a’in jun li kutan re wiib’ank ch’oolej ut xuwak. Li profeet aj Joel sa’ li Najter Chaq’rab’ kixye naq li qakutankil—a’ “lix kutankil li Qaawa’ ”—a’anaq “xkutankil li aak’ab’ ut li q’oyin” ut “xiwajelaq” (Joel 2:1–2, 11). A’b’an, toj wan li yo’onink sa’ li qakutankil. K’oxla li raatin li Elder Dieter F. Uchtdorf: “Us ta wan naq naqeek’a naq aalob’resinb’ilo xb’aan li ch’a’ajkilal malaj sutinb’ilo xb’aan li rahil ch’oolejil, lix rahom li Dios ut lix evangelio li Jesukristo te’xk’e li k’a’ru numtajenaq xnimal ru” (“Li Dios tixb’aanu li k’a’ru numtajenaq xnimal ru,” Jolomil ch’utub’aj-ib’ re octubre 2020).

Chi jo’kan, naq nakak’e reetal li aak’ab’ ut li q’ojyin re li qakutan, chijultiko’q aawe naq li Qaawa’ kixyeechi’i ajwi’ li osob’tesink k’a’jo’ xninqaleb’ ru: “Tinhoy lin musiq’ sa’ xb’eeneb’ chixjunil: eb’ lee ralal ut lee rab’in te’aatinaq jo’ profeet” (Joel 2:28; chi’ilmanq ajwi’ Jose Smith—Resilal 1:41). K’e reetal naq kiyeechi’iman naq lix Musiq’ li Dios taahoymanq sa’ xb’eeneb’ li saaj winq ut li saaj ixq. K’a’ut naq aajel ru naq eb’ li saaj te’xtaw ru li na’leb’ a’in? K’oxla li patz’om a’in naq nakawil Joel 2 ut li raatin li Elder Uchtdorf re xkawresinkil li tzolok.

eb’ li saaj winq neke’tzolok sa’ li loq’laj hu

Li Qaawa’ kixyeechi’i naq sa’ roso’jikeb’ li kutan, a’an tixhoy lix Musiq’, ut “eb’ lee ralal ut lee rab’in te’aatinaq jo’ profeet” (Joel 2:28).

Tzolok sa’ komonil

Re xtenq’ankileb’ li saaj chixtawb’al ru Joel 2:28–29, naru taak’e jun k’a’aq re ru sa’ jun li sek’, ut ye re jun li saaj naq tixhoy li ha’ sa’ xb’een. Chan ru naq a’in nokoxtenq’a chixtawb’al ru k’a’ru naraj naxye naq li Qaawa’ “naxhoy lix musiq’ sa’ xb’eeneb’ chixjunil”? Chan ru naq yoo chi tz’aqlok ru li profeetil aatin sa’ Joel 2:28–29? Naru xb’aanunkil a’in re xtenq’ankileb’ li saaj chixtawb’al ru chan ru naq li Qaawa’ naxhoy lix Musiq’ sa’ li kutan a’in.

• Li loq’laj hu naxye resil k’iila sut naq li Qaawa’ kixhoy xMusiq’ sa’ xb’eeneb’ lix tenamit. Rilb’al wiib’ oxib’ reheb’ naru tixtenq’aheb’ li saaj chixtawb’al ru chan ru taahoye’q lix Musiq’ li Qaawa’ sa’ xyu’ameb’ a’an. Naru taayiib’ xjalam-uuch jun nimla’ sek re ha’ chiru li pizarron, ut taapatz’ reheb’ li saaj naq te’ril wiib’ oxib’ reheb’ li raqal sa’ “Xkomon chik li tenq’.” Chixk’atq li sek’ chiru li pizarron, naru te’xtz’iib’a k’a’ru ke’xb’aanu li tenamit sa’ li loq’laj hu re naq li Qaawa’ kiru chixhoyb’al lix Musiq’ sa’ xb’eeneb’ ut k’a’ru li ke’osob’tesiik wi’. Jo’q’e ak xqeek’a li Musiq’ej chixk’ojob’ankil qach’ool, chixk’amb’al qab’e, malaj chiqasaqob’resinkil?

• Naru taatz’iib’a li raatin li Elder Dieter F. Uchtdorf chiru li pizarron: “Li Dios naraj xk’eeb’al li k’a’ru numtajenaq xnimal ru aawe laa’at ut re chixjunil li Iglees—jun li sachb’a-ch’oolejil k’anjel ut jun li eetalil” (“Li Dios tixb’aanu li k’a’ru numtajenaq xnimal ru”). Naru taapatz’ reheb’ li saaj naq te’ril li raatin li Elder Uchtdorf re xk’eeb’al reetaleb’ li xninqal ru osob’tesink kixk’e li Dios reheb’ li tenamit sa’ li loq’laj hu chirix naq ke’xnumsi ninqi ch’a’ajkilal. K’a’ru kixk’ut li Elder Uchtdorf naq taqab’aanu re naq taqasik’ ru li us sa’ li qach’a’ajkilal? Ye reheb’ li saaj naq te’xtz’iib’a k’a’ru li “numtajenaq xnimal ru” naraj li Dios choq’ qe. Ye reheb’ naq te’xk’oxla k’a’ raj ru te’xb’aanu re xk’ulb’aleb’ li osob’tesiik a’an.

• Naru taak’ut li video “Presidente Nelson: Escúchalo – Revelación Personal” (ChurchofJesusChrist.org). Patz’ reheb’ li saaj naq te’xk’e reetal chan ru naq li Musiq’ej nokoraatina ut chan ru naq nokorosob’tesi. Naru ajwi’ te’ril li raatin li Awa’b’ej Russell M. Nelson, “Li k’utb’esinb’il na’leb’ choq’ re li Iglees ut choq’ re qayu’am” (Jolomil ch’utub’aj-ib’ re abril 2018). Patz’ reheb’ naq te’xsumeheb’ li patz’om a’in: Chan ru naq li Awa’b’ej Nelson kixsik’ ut kixk’ul xmusiq’ankil xb’aan li Musiq’ej? K’a’ru naqatzol rik’in laj Jose Smith chirix li rajom li Dios chi aatinak rik’ineb’ li ralal xk’ajol? K’a’ru kixtz’aama li Awa’b’ej Nelson naq taqab’aanu? Seraq’i reheb’ li saaj jo’q’e xhoye’ xMusiq’ li Qaawa’ sa’ aab’een. Patz’ reheb’ naq te’xk’oxla li xe’xnumsi a’an, ut wi te’raj, naru te’xseraq’i.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Hechos 2:1–6, 14–21; Jakob 7:1–8; Mosiah 4:1–3, 19–20; 18:7–11; Alma 19:14, 28–36; Helaman 6:34–36; Tzol’leb’ ut Sumwank 19:37–41

Li k’utuk jo’ li Kolonel

“Tenq’aheb’ li komon chixnawb’al ru li Santil Musiq’ej sa’ xch’ool jo’ ajwi’ chixyu’aminkil li k’a’ru naxye” (Li k’utuk jo’ li Kolonel, 10).