nekee’aatinak li saaj ixq

27 noviembre

Chan ru naq tinwotz li evangelio?

Jonas; Mikeas

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. Chan ru naq xoonacho’ rik’in li Kolonel? K’a’ru yooko chixb’aanunkil re wank jo’ a’an?

• Rilb’aleb’ li wankeb’ sa’ rajb’al ru. Ani wan sa’ qak’a’uxl? Chan ru naq taqatenq’a?

• Xb’oqb’aleb’ chixjunil chixk’ulb’al li evangelio. Chan ru naq taqasume lix patz’omeb’ li qamiiw chirix li Iglees?

• Xjunajinkileb’ li junkab’al chi junelik. K’a’ru naru taqab’aanu re aatinak chi kok’ aj xsa’ rik’in li qajunkab’al ut li qech alal?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Wankeb’ li saaj sa’ laa tzoleb’aal malaj molam li neke’xwotz li evangelio chi kok’ aj xsa’. Naru ajwi’ taab’aanu laa’at! Choq’ reheb’ naab’al, jwal ch’a’aj malaj xiwxiw xwotzb’al li evangelio. A’ut, chiqajunilo naru toochaab’ilo’q sa’ xwotzb’al li qapaab’aal chirix li Jesukristo. Maare li Qaawa’ ink’a’ tixye aawe “ayu Ninive, li xnimal ru tenamit, ut ye reheb’ naq chalk re li tojb’a-maak sa’ xb’eeneb’,” jo’ kixb’aanu laj Jonas (Jonas 1:2). A’b’an li q’unil xyaab’ xkux li Santil Musiq’ej naru tatxb’oq chi “xik” rik’ineb’ laa komon ut laa wamiiw li kawresinb’ileb’ chirab’inkil lix nawom aach’ool. K’e reetal k’a’ru naru taatzol rik’in laj Jonas naq yookat chi tzolok chiru li xamaan a’in, ut kawresi aawib’ re taawotz rik’ineb’ li saaj k’a’ru xatzol. Naru ajwi’ taawil li raatin li Elder D. Todd Christofferson, “Xwotzb’al resil li wakliik chi yo’yo ut lix k’ojob’ankil wi’chik li evangelio,” naq nakakawresi li tzolok (Jolomil ch’utub’aj-ib’ re abril 2020).

eb’ li saaj winq neke’tzolok sa’ li loq’laj hu

Li Santil Musiq’ej naru tooreek’asi chixwotzb’al li evangelio rik’ineb’ li kawresinb’ileb’ chirab’inkil lix nawom qach’ool.

Tzolok sa’ komonil

Re xtenq’ankileb’ li saaj chixwotzb’al li xe’xtzol rik’in laj Jonas chiru li xamaan a’in, naru taak’ut xjalam-uuch laj Jonas (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Patz’ reheb’ naq te’aatinaq chirix li xe’xtzol rik’in laj Jonas chirix xwotzb’al li evangelio. Naru taapatz’ reheb’ naq te’ril Jonas 1 ut 3 ut taapatz’: K’a’ru naqatzol chirix xwotzb’al li evangelio rik’ineb’ li chanchan naq ink’a’ kawresinb’ileb’ chi jalaak? K’a’ru naqatzol chirix li rajom li Dios chixkuyb’al xmaak li ani naxjal xk’a’uxl? Re xtenq’ankileb’ li saaj chirajb’al xwotzb’al li evangelio, naru xb’aanunkil wiib’ oxib’ reheb’ li na’leb’ a’in, malaj junaq chik laa na’leb’ nakakawresi laa’at.

• Re xnawb’al chan ru xwotzb’al lix evangelio li Kolonel rik’ineb’ li qas qiitz’in, naru teeril li seraq’ sa’eb’ li raqal a’in: Jwan 4:3–26; Hechos 16:25–33; Alma 19:14–18, 28–31. Toja’ naq tex’aatinaq chirixeb’ li patz’om a’in: Chan ru naq kawresinb’ileb’ li kristiaan sa’eb’ li seraq’ a’in re te’rab’i resil li evangelio? Chan ru naq kiwotzman li esil? K’a’ut naq li qaChoxahil Yuwa’ ut li Jesukristo neke’raj naq taqawotz li evangelio? Toja’ naq tex’aatinaq chirix li nak’utman sa’eb’ li seraq’ a’in ut chan ru naq taqawotz li evangelio sa’ li qakutankil.

• Rilb’al ruheb’ lix chaab’il k’anjel jalan chik li kristiaan re xwotzb’al li evangelio naru tixwaklesi xch’ooleb’ li saaj re xb’aanunkil ajwi’ a’an. Li Elder D. Todd Christofferson kixwotz wiib’ oxib’ li na’leb’ chirix a’in sa’ “Xwotzb’al resil li wakliik chi yo’yo ut lix k’ojob’ankil wi’chik li evangelio.” Li Elder Christofferson kixye naq neke’ajman oxib’ li na’leb’ re naq li kristiaan te’raj rab’inkil li qab’oqom naq te’xk’ul li evangelio: li qarahom, li qab’aanuhom, ut lix Hu laj Mormon. Aatinanqex chirix li na’leb’ kixye chirix xwotzb’al li evangelio, ut b’oqeb’ li saaj chixwotzb’al li na’leb’ chirix a’an li neke’ril sa’ xyu’ameb’ a’an. Chan ru naq lix na’leb’eb’ naxk’am rib’ rik’in li oxib’ chi na’leb’ kixye li Elder Christofferson?

• Chan ru taatenq’aheb’ li saaj chixtawb’al ru naq moko ch’a’ajaq ta xwotzb’al li evangelio? Naru taak’uteb’ li video sa’ “Xkomon chik li tenq’,” ut taapatz’ reheb’ li saaj naq te’xk’oxla chan ru naq te’xwotz li evangelio rik’in junaq kristiaan neke’xnaw ru. K’a’ru taqab’aanu re xb’oqb’aleb’ chi chalk ut chi ilok? K’a’ru naru te’xb’aanu re chalk ut tenq’ank? Chan ru taqatenq’aheb’ chirajb’al chalk ut kanaak? K’a’ru taqab’aanu re xwotzb’al li evangelio wulaj wulaj?

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Carlos A. Godoy, “Ninpaab’ naq wankeb’ li anjel,” Jolomil ch’utub’aj-ib’ re octubre 2020

• “Compartir el Evangelio,” “Invitar a otros a venir y ver,” “Invitar a otros a venir a ayudar,” “Invitar a otros a venir y quedarse” (eb’ li video), ChurchofJesusChrist.org; naru xtawb’al xkomon chik li k’anjeleb’aal sa’ “Compartir el Evangelio,” Biblioteca del Evangelio

Li k’utuk jo’ li Kolonel

“Junaq komon q’axal wi’chik tixsik’ xjalb’al xyu’am naq li jalok nachal rik’in xtaql xch’ool a’an. Naq nakak’e jun b’oqok chi k’anjelak, k’e reetal naq taawoxloq’i xtaql xch’ooleb’ li ani tzolb’ileb’ aab’aan” (Li k’utuk jo’ li Kolonel, 35).