junkab’al chirix li santil ochoch

11 diciembre

Ma yookin chixk’eeb’al li k’a’aq re ru re li Dios xb’een wa sa’ lin yu’am?

Hageo; Sakarias 1–3; 7–14

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. K’a’ru xoo’aatinak wi’ sa’ li ch’utam xnume’, ut k’a’ru li xqaye naq taqab’aanu? K’a’ru ak qab’aanuhom re xk’anjelankil li na’leb’ xqak’uub’?

• Rilb’aleb’ li wankeb’ sa’ rajb’al ru. K’a’ru naru taqab’aanu re xtenq’ankileb’ li qas qiitz’in jo’ naraj li Kristo naq naqil li na’ajman ru a’b’an ink’a’ naqanaw k’a’ru xyeeb’al?

• Xb’oqb’aleb’ chixjunil chixk’ulb’al li evangelio. K’a’ru ak xqataw sa’ lix evangelio li Jesukristo li naxsahob’resi qach’ool? Chan ru taqawotz li sahil ch’oolejil a’an rik’ineb’ li qas qiitz’in?

• Xjunajinkileb’ li junkab’al chi junelik. K’a’ru yooko chixb’aanunkil re xtawb’al xk’ab’a’eb’ li qaxe’ qatoon li neke’raj ru xk’ojob’ankil k’anjel re li santil ochoch? K’a’ru naru taqab’aanu re xtenq’ankileb’ li qas qiitz’in chixtawb’al xk’ab’a’eb’ lix xe’toonil?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Li qayu’am nujenaq rik’in li k’a’ru aajel ru xb’aanunkil. Wi ink’a’ naqak’e reetal, li qak’anjel wulaj wulaj naru tixk’e chi sachk sa’ qach’ool k’a’ru aj-e li yu’am a’in. Naqanaw naq xb’een raj wan li Kolonel ut lix evangelio sa’ li qayu’am, a’ut chapb’il qahoonal xb’aan k’iila k’a’aq re ru. Maare xb’aan a’in naq li loq’laj hu naxye “chetiikob’resi ru lee b’e” (Proverbios 4:26), “il li k’a’ru yookex chixk’ulb’al” (Hageo 1:5), ut “k’ehomaq reetal lee yu’am ma tz’aqal yookex sa’ li paab’aal” (2 Korintios 13:5).

Eb’ laj Israelita sa’ xkutankil laj Hageo ke’raj ru li aatin a’an. Sa’ lix chaab’il k’anjel re xyiib’ankil chi ak’il li tenamit Jerusalen, ke’b’ay chixyiib’ankil chi ak’il li rochoch li Qaawa’. K’e reetal chan ru naq lix tijom li Qaawa’ sa’ Hageo 1 wan xwankil sa’ li kutan a’in. Chan ru naq taawaklesi xch’ooleb’ li saaj chixtz’ilb’al rix ma yookeb’ chixk’eeb’al li k’a’aq re ru re li Dios xb’een wa sa’ xyu’ameb’? Naru taawil li raatin li Elder Dale G. Renlund, “Jun teneb’ank-ib’ rik’in li Jesukristo li ink’a’ natoqe’ ” (Jolomil ch’utub’aj-ib’ re octubre 2019), malaj li raatin li Awa’b’ej Ezra Taft Benson sa’ “El gran mandamiento: Amar al Señor” (sa’ Enseñanzas de los Presidentes de la Iglesia: Ezra Taft Benson [2014], 41–49).

eb’ li saaj ixq sa’ li tzoleb’aal

Naru taqak’e li k’a’aq re ru re li Dios xb’een wa sa’ qayu’am.

Tzolok sa’ komonil

Naru taatikib’ li aatinak rik’in xtz’iib’ankil wiib’ oxib’ li na’leb’ re Hageo 1:6 chiru li pizarron. K’a’ru naru taqatzol rik’ineb’ li na’leb’ a’in—rawb’al li awimq a’b’an maak’a’ naqaxok, tzekank a’b’an ink’a’ nak’ojla qach’ool, malaj xk’eeb’al qatojb’al sa’ jun q’ichil koxtal—chirix xnumsinkil qahoonal rik’in li maak’a’ na’ok wi’ chiru li Qaawa’? Us ta ink’a’ naxpatz’ qe naq taqakab’la jun li santil ochoch, k’a’ru yoo chixpatz’b’al li Qaawa’ qe naq taqab’aanu? Chan ru naq taqak’e li naxpatz’ xb’een wa sa’ qayu’am? Eb’ li na’leb’ a’in naru te’xtenq’aheb’ li saaj chixtz’ilb’al rix ma yookeb’ chixk’eeb’al li k’a’aq re ru re li Dios xb’een wa sa’ xyu’ameb’?

• Naq naqak’ul li loq’laj wa’ak rajlal xamaan, jwal us xtz’ilb’al rix li qajom chixtaaqenkil li Jesukristo. Chan ru naq taqoksi li loq’laj wa’ak re xtz’ilb’al rix ma yooko chi wulak jo’ li Kolonel? Maare li saaj naru te’xwotz chan ru naq neke’xb’aanu a’in. Naru ajwi’ te’xtz’iib’a li neke’xpatz’ rib’ naq yookeb’ chi tz’aqonk sa’ li loq’laj wa’ak. Ye reheb’ naq te’xk’oxla wiib’ oxib’ reheb’ li raqal, aatin, malaj na’leb’ sa’ “Xkomon chi li tenq’ ” naq yookeb’ chi tz’iib’ak.

• Li Awa’b’ej Dieter F. Uchtdorf, sa’ “De las cosas que más importan” (Liahona, noviembre 2010, 19–22), kixwotz li na’leb’ li tixtenq’aheb’ li saaj “chixk’oxlankil li k’a’ru yookeb’ chixk’ulb’al” (Hageo 1:5). Sa’ junesal malaj sa’ kok’ ch’uut, naru te’ril li oxib’ raqal sa’ xraqik li raatin (te’ok chirilb’al sa’ li raqal “El poder de lo básico”), ut te’xsik’ k’a’ru naraj naxye xjayalinkil li qayu’am rik’in li Kolonel. Naru te’xye k’a’ru neke’reek’a naq tento te’xb’aanu re xnimob’resinkil li rajomeb’ chixtaaqenkil li Jesukristo.

• Naab’al qe naqanumsi qahoonal chixb’aanunkil li chaab’il. A’b’an maare maawa’ a’an li k’a’ru jwal chaab’il wi’chik. Maare taawaj xwotzb’al li raatin li Awa’b’ej Dallin H. Oaks sa’ li xb’een raqal re li raatin, “Bueno, Mejor, Excelente” (Liahona, noviembre 2007, 104–108), li naru tixtenq’aheb’ li saaj chixtawb’al ru li na’leb’ a’in. Naru ajwi’ taab’oqeb’ chixtz’iib’ankil li k’a’ru neke’xb’aanu wulaj wulaj. Patz’ reheb’ naq te’xtz’il rix li junjunq k’anjel ut ma “chaab’il,” “chaab’il wi’chik,” malaj “jwal chaab’il wi’chik.” K’a’ru naxk’e naq jun li k’anjel “jwal chaab’il wi’chik”? Patz’ reheb’ li saaj naq te’xwotz chirib’ileb’ rib’ li xe’xtzol sa’ li tz’ilok-ix a’in.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Josue 24:14–15; Mateo 6:19–34; 22:36–40; Markos 10:17–22; 1 Korintios 11:23–28; 2 Korintios 13:5; Kolosenses 3:1–2 (Tento taqak’e li k’a’aq re ru re li Dios xb’een wa sa’ li qayu’am)

• Scott D. Whiting, “Li wank jo’ chanru a’an,” Jolomil ch’utub’aj-ib’ re octubre 2020

Li k’utuk jo’ li Kolonel

“Moko na’ajman ta ru naq taak’utmanq chixjunil sa’ jun tzolok re xtoch’b’al xch’ool junaq—chi kok’ aj xsa’ tz’aqal jun malaj wiib’ na’leb’ “ (Li k’utuk jo’ li Kolonel, 7).